5 Banci nge Kerina Kiniseran Masap?
Engkai maka Perlu Siteh
Adi tek kita masap nge pagi kiniseran, dungna reh semangatna kita nggeluh janah merhat kita rembak ras Dibata.
Cuba Ukuri
Enterem kalak erusaha nasapken kiniseran, tapi la mbue si banci ilakoken kalak e. Contohna:
Aminna pe bidang kedokteran enggo reh majuna . . .
-
Sakit jantung eme pinakit si utamana denga erban manusia mate ngasa gundari.
-
Jutan kalak mate tiap tahun perban kanker.
-
“Pinakit menular lalap denga lit. Lit pinakit menular si la pernah bene, lit ka pinakit menular si mbaru, janah lit ka si enggo pernah bene tapi reh ka mulihi,” itulis Dr. David Bloom bas jurnal Frontiers in Immunology.
Aminna pe piga-piga negara enggo makmur . . .
-
Tiap tahun lit jutan anak-anak si mate. Enda si melalana terjadi bas negara-negara miskin.
-
Lit kira-kira 4,5 miliar kalak si WC-na la cocok ipake.
-
Ratusen juta kalak la banci datna lau bersih.
Aminna pe enterem kalak itehna uga pentingna hak asasi manusia . . .
-
Perdagangen manusia terus denga terjadi ngayak gundari bas melala negara. Menurut laporen Perserikatan Bangsa-Bangsa, pemerentah la ngasup ndungi masalah e perban “la itehna e terjadi janah la ngasup mpengadisa.”
DARAMI TERBUEN
Tontonlah video Kai kin Kinirajan Dibata e? bas jw.org.
Nina Pustaka si Badia
Dibata ermediate man kita.
IperdiatekenNa kita sanga kita susah ntah pe sedih.
“La ipersilahang [Dibata] kalak si tertindih, dingen tetap iperdiatekenNa kiniseranna. Ia labo erpenundal, tapi ialoiNa adi erlebuh man baNa.”—MASMUR 22:25.
“Benterkenlah kerina kekuatiren kena man Dibata, sebap iperdiatekenNa kap kena.”—1 PETRUS 5:7.
Lanai pagi lit kalak si susah.
Banci siteh arah Pustaka maka kerina janji Dibata man manusia pasti itepatiNa.
“Iapusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit.”—KETANGKASEN 21:3, 4.
Imasapken Dibata pagi kerina si erban manusia susah.
Enda ilakokenNa arah Kerajan Dibata, eme sada pemerentahen si tuhu-tuhu lit.
“Ipanteki Dibata nu langit me sada kerajan si la ermasap-masap. Ndigan pe la tertaluken, . . . pajek ia rasa lalap.”—DANIEL 2:44.
