Enterem kalak erpengakap maka Dibata me si erban manusia susah. Dungna isembah kalak e Dibata perban mbiar ihukum.

Lit peminpin agama si langsung ngajarken maka Dibata si erban manusia susah. Tapi lit ka si labo langsung ngajarken si bage. Contohna nina:

• Bencana alam e hukumen arah Dibata nari.

• Anak-anak mate perban iban Dibata ateNa jadi malekat i surga.

• Dibata ndukung sada pihak bas peperangen, dungna enterem kalak ngenanami kiniseran.

Tapi, tuhu kin si ikataken peminpin agama e? Uga adi situhuna salah kai si ajarkenna janah enggo itulak Dibata kalak e? Banci denga nge kita tek man kai si ikataken kalak e?

Labo Dibata si erban kita susah.

La mungkin Dibata si erban kita susah, perban e la cocok ras sipat-sipat Dibata. Contohna:

‘Dibata sempurna i bas kerina perbahanenNa. Ia setia dingen bujur.’​—ULANGEN 32:4.

“Nggit kin Dibata si Mada Kuasa mahan si salah?”​—JOP 34:10.

“Dibata si Mada Kuasa . . . la pernah la adil perbahanNa.”​—JOP 34:12.

Dibata nulak agama si ngataken kai si la tuhu kerna Ia.

Contohna, agama si ngajarken maka Dibata si erban manusia susah, bage pe agama si ikut ndukung peperangen ras kekerasen.

“Nabi-nabi e erkata guak i bas gelarKu. La kap ia Kusuruh. La lit Kubereken perentah man bana. . . . Pengidah si iturikenna labo i bas Aku nari rehna. Nubuat si iturikenna la kap tuhu.”​—JEREMIA 14:14.

Segat ate Jesus agama si munapik.

“Labo kerina kalak si erlebuh man bangku, ‘O Tuan, Tuan,’ masuk ku bas Kerajan surga, tapi kalak si ngelakoken peraten Bapakku si i surga nge. I bas wari e pagi, nterem kalak ngataken man bangku, ‘O Tuan, Tuan, la kin i bas gelarndu kami ernubuat, janah i bas gelarndu kami mpelawes malekat-malekat jahat, bage pe i bas gelarndu ilakoken kami melala perbahanen si dem kuasa?’ Tapi kukataken pagi man kalak e, ‘La pernah kena kutandai! Laweslah i bas aku nari, o kalak jahat!’”​—MATIUS 7:21-23.