Perban la siakap adil adi siidah kalak bujur mesera pergeluhna. Selain si e, lit ka kalak si erpengakap labo lit gunana jadi kalak bujur adi tetap nge susah geluhna.

Lit kalak si erpengakap kiniseran terjadi perban enggo itakdirken Dibata. Lit ka kalak si erpengakap kiniseran e iban Dibata guna ngukum kalak jahat bage pe guna nguji kiniteken kalak bujur. Tapi lit ka kalak si ngataken maka la banci tuhu-tuhu siteh engkai kalak bujur ngenanami kiniseran. Amin gia bage, tetap denga kita tersungkun-sungkun:

• Adi geluhta enggo itakdirken Dibata, man kai nari sijaga kesehaten janah silakoken kai si mehuli?

• Adi tuhu kin Dibata perkeleng, engkai maka ibanNa kiniseran guna ncubai kita?

  DARAMI TERBUEN

  Tontonlah video Engkai Pediat Dibata Mesera Kegeluhen Manusia? bas jw.org.

Kiniseran labo hukumen arah Dibata nari.

Melala kalak ngenanami kiniseran perban kejadin si la isangka-sangka.

“I bas perlumban labo lalap si meter kiam si menang, i bas peperangen labo lalap kalak si megegeh si menang. Labo kalak pentar lalap si jumpa pencarin, janah labo kalak cerdik rusur ndatken kebayaken. Bage pe labo kalak si mbages pemetehna si terberita. Tapi kerina nge kalak banci kena sial.”​—PENGERANA 9:11.

Sinanami kiniseran perban kita enggo erdosa.

Enterem kalak erpengakap erti “dosa” eme ngelakoken perbahanen si la mehuli. Tapi adi menurut Pustaka, dosa ertina keadan si enggo iwarisi kerina manusia, la soal ia kalak bujur ntah pe jahat.

“I bas kesalahen kap tubuhku ndube, sabap i bas bertin nari pe enggo ikuasai dosa aku.”​—MASMUR 51:7.

Kerina manusia ngenanami kiniseran perban lahir nari pe enggo erdosa.

Dosa erban kita lanai dame ras Dibata bage pe ras kalak si deban. Selain si e, dosa erban kita merhat ngelakoken kai si salah. Dungna kerina manusia ngenanami kiniseran.

“Sanga kulakoken ateku kai si benar, kai si la mehuli lit i bas aku.”​—ROMA 7:21.

“Kerina si ijadiken Dibata ras-ras ndehereng janah rate mesui.”​—ROMA 8:22.