2 Perban Salahta Sendiri nge Maka Kita Susah?
Engkai maka Perlu Siteh
Adi manusia susah perban salahna sendiri, e ertina banci saja ikurangina kai si erban ia susah.
Cuba Ukuri
Kai saja pengaruh perbahanen manusia man kiniseran si terjadi enda?
-
Kekerasen.
Menurut perkiran Organisasi Kesehatan Dunia (WHO), 1 arah 4 kalak pernah isiksa sanga ia kitik denga. Selain si e, iperkiraken WHO ka 1 arah 3 diberu ianiaya secara fisik ntah pe seksual, janah banci saja inanamina e duana bas geluhna.
-
Kematen.
Menurut World Health Statistics 2018 arah WHO, “Lit kira-kira 477.000 kalak si mate ibunuh i sebelang doni bas tahun 2016.” Selain si e, lit kira-kira 180.000 kalak si mate sanga terjadi perang ras kerusuhen bas tahun e.
-
Masalah Kesehaten.
Bas sada artikel majalah National Geographic, itulis Fran Smith, “Lit lebih sada miliar kalak si ngisap. Janah mbako eme salah sada si utamana erban melala pinakit si erban mate. Contohna sakit jantung, stroke, infeksi pernapasan, ras kanker paru-paru.”
-
Perbedan Ekonomi.
“Enterem kalak si reh stresna perban mesera pergeluhna, terpaksa ngungsi, ersaing sada ras si debanna, perbahanen si la adil perban la seri ekonomi, suku, ras jenis kelamin,” nina sekalak psikolog Jay Watts.
DARAMI TERBUEN
Tontonlah video Engkai maka Iban Dibata Doni Enda? bas jw.org.
Nina Pustaka si Badia
Melala kesusahen terjadi perban manusia.
Pemerentahen si kejam erban enterem kalak jadi susah, padahal situhuna pemerentah me si arusna ngelindungi rakyatna.
“Lit sekalak si erkuasa janah kalak si deban ngenanami kiniseran erkiteken kuasana.”—PENGERANA 8:9.
Banci ikurangi manusia kai si erban ia susah.
Pedah Pustaka banci nampati kita gelah reh sehatna janah banci erdame ras kalak si deban.
“Ketenengen ukur mahanca kalak mejuah-juah, cian ate seri ras penakit kangker.”—KUAN-KUANEN 14:30.
“Tadingkenlah kerina perasan dendam, merawa, ngamuk, serko, janah ngisakken, bage pe kerina si la mehuli.”—EPESUS 4:31.
