“Sakit Sophia * ertahun-tahun dekahna, dungna mate ia. Paksa si e, hampir 40 tahun dekahna kami enggo erjabu. Iapuli teman-temanku aku, aku pe kuusahaken tetap sibuk. Tapi, lit sada tahun dekahna bagi isayat sembilu kuakap pusuhku. Perasanku pe rusur kel berubah. Enggo pe telu tahun mate Sophia, mon-mon banci rempet mesui kel pusuhku.”​—Kostas.

Lit nge kalak si keleng atendu si enggo mate? Adi lit, banci saja angkaindu uga perasan Kostas. Banci saja pengalamen si sedihna kel akapndu eme sanga mate teman geluhndu, anggota keluargandu, ntah pe teman kompakndu. Ahli-ahli si mpelajari kerna akibat perasan ceda ate pe setuju kerna si e. Sada artikel si iterbitken bas The American Journal of Psychiatry ngataken maka “adi mate kalak si keleng kel ateta, ceda kel pusuhta janah kebenen siakap kita seh rasa lalap.” Banci saja tersungkun-sungkun kita: ‘Asa ndigan nge bage perasanku? Banci denga nge aku ermeriah ukur? Kai nge si banci ngapuli aku?’

Penungkunen-penungkunen e, ibahas kari bas majalah enda. Bas artikel seterusna, ibahas kari kai saja si igejapken kalak si sangana erceda ate. Bas artikel si debanna, ibahas kari saran-saran si banci nampati kam gelah ula nai kapndu sedihsa.

Ngarap kel kami gelah majalah enda banci ngapuli ras nampati kerina kalak si sangana getem pusuhna perban lit kalak si keleng atena si enggo mate.