Melala saran kerna uga carana ngadapi ceda ate. Tapi tiap kalak la seri carana erceda ate. Emaka, banci saja lit saran si cocok man banta, tapi kurang cocok man kalak si deban.

Amin pe bage, lit piga-piga saran si enggo terbukti erguna man enterem jelma. Saran-saran e rusur ijelasken pakar-pakar. Saran-saran e pe cocok ras nasehat si mehuli si lit bas Pustaka si Badia, eme buku si enggo ndekah umurna si erguna denga seh asa gundari.

• Menurut piga-piga pakar, enda me cara si pentingna bas ngadapi ceda ate. Tapi mon-mon, banci saja la ateta itemani kalak si deban. Banci saja terganggu kita sanga lit kalak si sampatina atena kita. Wajar nge adi bage perasanta.

• Labo lalap arus kita ras kalak si deban. Tapi, ula min situlak kerina penampat kalak. Lit paksana perlu kita penampat kalak si deban. Emaka, sikatakenlah alu manjar-anjar kai keperlunta gundari ras kai si la siperluken.

• Si mehulina min, lit waktuta ras kalak si deban sesuai ras keadanta. Tapi, lit ka min waktuta sisada.

NASEHAT SI MEHULI: “Ulin dua kalak asangken sekalak, . . . Sebap adi si sekalak ndabuh, temanna banci nampati ia tedis.”​—Pengerana 4:9, 10.

• Man pangan si sehat alu ratur banci ngurangi stres perban ceda ate. Panlah erbage-bage macam buah, gulen, ras protein si la mbue lemakna.

• Inemlah melala air putih bage pe inemen si debanna si sehat.

• Adi la kam pet man, panlah sitik-sitik tapi rusur. Banci ka kita lawes ku dokter janah sipindo suplemen makanan. *

• Jalan cepat ras olahraga si debanna banci erban tenang pusuhta. Olahraga banci erban lanai siukuri ateta ceda. Janahta olahraga banci siukuri uga kegeluhenta seterusna.

NASEHAT SI MEHULI: “Labo pernah lit kalak segat atena dagingna tapi berena man janah kelengina.”​—Epesus 5:29.

• Medem seh kel pentingna, terlebih adi sangana kita erceda ate. Perban adi sangana kita erceda ate, reh nukahna siakap latih.

• Ula mbuesa siinem inemen si lit kafeinna ras akoholna, perban e banci erban mesera siakap medem.

NASEHAT SI MEHULI: “Ulin sitik istrahat asangken melala kerja keras ras usaha ngayaki angin.”​—Pengerana 4:6.

• Siteh maka tiap kalak beda carana erceda ate. Emaka, carata erceda ate labo arus seri ras kalak si deban. Sidaramilah penampat si cocokna man banta.

• Lit kalak si reh tenangna ia adi turikenna isi pusuhna man kalak si deban. Tapi, lit ka si pangen akapna la teh kalak kerna ceda atena. Ahli-ahli si mpelajari kerna perasan ceda ate pe beda-beda pendapatna kerna si e. Emaka, adi situriken ateta perasanta tapi ragu denga kita, banci sibenaken alu manjar-anjar nceritaken perasanta man sekalak temanta.

• Lit piga-piga kalak si reh urakna ceda atena adi tangis ia. Tapi, lit ka kalak si banci adapina ceda atena amin pe labo ia rusur tangis.

NASEHAT SI MEHULI: “Susah ntah pe senang, pusuh ngenca si nggejapkenca.”​—Kuan-kuanen 14:10.

• Piga-piga kalak si erceda ate, minem-minem ia ntah pe gunakenna narkoba gelah reh urakna ceda atena. Tapi si e kerina erban keadan reh kelekna. Amin pe banci kita tenang, tapi kentisik ngenca janah akibatna seh kel bahayana. Emaka, daramilah kegiaten si erguna si banci erban kam tenang.

NASEHAT SI MEHULI: “Mari sibersihken dirita arah kai pe si banci erban dagingta ras perukurenta najis.”​—2 Korinti 7:1.

• Enterem kalak si ngelakoken kegiaten si erguna gelah la lalap inget-ingetna si erban ia erceda ate.

• Banci kita terapuli alu ndarami teman si mbaru, mpepaguh pertemanenta, mpelajari keterampilen si mbaru, ntah pe gawah-gawah.

• Tangtangna, banci saja ceda ateta e ntisik ngenca bene. Tapi kenca reh dekahna, banci lanai sigejap kel ceda ateta e. Enda sada proses si wajar bas ngadapi ceda ate.

NASEHAT SI MEHULI: “Lit waktu si itetapken man kerinana, . . . lit waktuna ngandung, lit waktuna tawa, lit waktuna erceda ate, lit waktuna landek.”​—Pengerana 3:1, 4.

• Mislah silakoken kegiaten si biasa silakoken tiap wari.

• Adi silakoken kegiaten si biasa silakoken contohna tunduh, erdahin, ras si debanna, perasanta banci tenang.

• Adi tetap kita sibuk ngelakoken kegiaten si erguna, ceda ateta banci reh urakna.

NASEHAT SI MEHULI: “La perdiatekenna wari-wari si enggo idalanina, perban iban Dibata ia lalap sibuk alu keriahen bas ukurna.”​—Pengerana 5:20.

• Enterem kalak si menyesal perban merudu-rudu ia erban keputusen si penting sanga ia erceda ate.

• Pangen sitimai lebe seh ngasa tenang siakap ope lenga siban keputusen guna pindah rumah, ndarami dahin si deban, ntah pe ngambekken barang-barang kalak si keleng ateta si enggo mate.

NASEHAT SI MEHULI: “Rencana kalak rajin pasti berhasil, tapi ise pe si merudu-rudu, mesera pagi dungna.”​—Kuan-kuanen 21:5.

• Enterem kalak si lit kapna gunana adi la lupakenna kenangen-kenangen manis ras kalak si keleng atena.

• Adi sipepulung foto ntah pe barang si banci jadi kenangen, banci saja reh tenangna kita. Selain si e, banci ka siban buku cataten si isina pengalamen ras cerita si ateta siinget.

• Simpan barang-barang si banci erban kita nginget kenangen ras ia. Sanga enggo tenang kita, banci saja merhat kita ngenenca.

NASEHAT SI MEHULI: “Ingetlah wari-wari si enggo lewat.”​—Ulangen 32:7.

• Banci kita lawes gawah-gawah.

• Adi la kita banci ndekah gawah-gawah, banci silakoken kegiaten si erban meriah ukurta sada ntah dua wari. Contohna, lawes ku pantai, ku taman, ntah pe naik gunung.

• Banci urak ateta ceda adi silakoken kegiaten si la biasa silakoken, amin pe ntisik ngenca.

NASEHAT SI MEHULI: “Ota kita ku ingan si melungen, ngadi kita ntisik.”​—Markus 6:31.

• Ingetlah maka sanga sisampati kalak si deban, situhuna sangana sisampati banta.

• Banci siapuli temanta ntah pe keluargata si erceda ate ras kita perban kematen kalak si keleng ateta. Kalak e pe perlu penampat.

• Sanga sisampati ras siapuli kalak, erguna siakap banta ras mulihi ka kita ermeriah ukur.

NASEHAT SI MEHULI: “Riahen kap mere asangken ngalo.”​—Perbahanen Rasul-Rasul 20:35.

• Ceda ate banci erban kita sadar kerna kai si pentingna bas geluh enda.

• Sanga kita erceda ate, cocok kel siukuri uga carata ndalani geluhta sedekah enda.

• Adi perlu, banlah perubahen.

NASEHAT SI MEHULI: “Ulin lawes ku rumah kalak si rate ceda asangken ku rumah kalak si erpesta, sebap e me kedungen kerina jelma. Kalak si nggeluh denga arus ingetna kerna si e bas pusuhna.”​—Pengerana 7:2.

 Memang, labo lit si banci tuhu-tuhu mbeneken suina pusuhta perban kematen kalak si keleng ateta. Tapi enterem kalak si pernah erceda ate, enggo buktikenna maka banci kalak e terapuli alu ngelakoken kegiaten-kegiaten si erguna bagi si ituriken ndai. Enda labo daftar si lengkap guna ngadapi ceda ate. Tapi alu ncubaken piga-piga saran ndai, mbera-mbera luka pusuhndu perban ceda ate banci tertambari.