Banci negatif perasan kalak man kalak si deban labo saja perban beda bangsana, warna kulitna, sukuna, ntah pe bahasana, tapi banci ka perban beda agamana, jenis kelaminna, ntah pe keadan ekonomina. Selain si e, banci ka perban beda umurna, pendidikenna, lit cacatna, ntah pe beda penampilenna. Tapi akap kalak e labo negatif perasanna man kalak si deban.

Negatif nge perasanndu man kalak si deban? Biasana adi lit kalak si negatif perasanna man kalak si deban, banci mis siteh. Tapi adi kita si negatif perasanta man kalak si deban, mesera siakap metehsa. Situhuna, kerina kita banci saja negatif perasanta man kalak si deban. Nina profesor sosiologi si gelarna David Williams, kalak si negatif perasanna man kelompok tertentu banci “la mehuli perbahanenna man kalak arah kelompok e, janah la sadarina perbahanenna e.”

Perdiateken contohna arah sekalak dilaki si gelarna Jovica. Ia tading i Eropa. Bas negarana lit sada suku si segat ate kalak. Nina, “Sedekah enda la kuakap negatif perasanku man kalak e. Menurutku kerina kalak arah suku e la mehuli.”

Melala pemerentah erban undang-undang si ngelarang perasan negatif man sada suku ntah bangsa bage pe perasan negatif si debanna. Tapi, tetap saja lit kalak si negatif perasanna man kalak si deban. Engkai? Perban si ikendaliken undang-undang e perbahanen kalak saja, labo pusuh ras perukurenna. Situhuna perasan negatif e rehna arah pusuh ras perukuren kalak. Adi bage, banci nge perasan negatif man kalak si deban lanai lit bas kita? Uga carana?