Akuilah Kelebihen Kalak si Deban
Masalahna
Adi egois kita, e banci erban negatif perasanta man kalak si deban. Kalak si egois hebaten kapna ia asangken kalak si deban, janah pendapatna kapna lalap si benarna. Emaka adi lit kalak si beda ras ia, rendah kapna kalak e. Ise pe banci jadi egois. Menurut Encyclopædia Britannica: “Enterem kalak si akapna hebaten budayana asangken si deban, contohna cara geluhna, panganna, peruisna, kebiasanna, kinitekenna, pendapatna, ras si debanna.” Kai si banci silakoken gelah ula sempat bage perukurenta?
Nina Pustaka
“Alu meteruk ukur anggaplah kalak si deban ganjangen asangken kena.”—PILIPI 2:3.
Kai maksudna? Gelah ula hebaten siakap kita asangken kalak si deban, perlu kita meteruk ukur. Adi meteruk ukur kita, siteh maka kalak si deban pe lit kelebihenna si la lit bas kita. Tiap kelompok pasti lit kelebihenna ras kekurangenna.
Contohna Stefan, ia mbelin-mbelin bas sada negara Komunis. Sempat segat atena kalak si asalna la arah negara Komunis. Nina, “Tek aku arus ganjangen siakap kalak si deban asangken kita gelah lanai negatif perasanta man kalak e. Janah melala denga kepeken si lenga kuteh. Lit lalap si banci kupelajari arah kalak si deban.”
Si Banci Lakokenndu
Masuk akallah kam kerna dirindu. Akuilah maka kam pe lit kekurangenndu janah lit kelebihen kalak si deban si la lit bas kam. Emaka, tiap kalak pasti lit kekurangenna ras kelebihenna. Ula kapndu seri kerina kalak si lit bas sada kelompok.
Sope negatif perasanndu man kalak arah sada kelompok, sungkuni bandu:
Akuilah maka lit kelebihen kalak si deban si la lit bas kam
-
‘Perban la mehuli nge sipatna maka segat ateku, ntah perban beda sipatna ras sipatku?’
-
‘Lit nge idahna kekurangenku?’
-
‘Bas kai saja nge ia hebaten asangken aku?’
Adi jujur kam njawap penungkunen e, lanai negatif perasanndu man kalak si deban. Janah banci saja nggit ka kam muji ras ngergai kelebihenna.
