Adi la kita nggit erteman ras kalak arah kelompok si segat ateta, banci reh negatifna perasanta man kalak e. Janah adi ras kalak si seri ras kita saja ngenca kita erteman, dungna banci siakap perukurenta, perasanta, ras perbahanenta ngenca si benarna.

“Arus min ipebelin kena kekelengen kena.”​—2 KORINTI 6:13.

Kai maksudna? ‘Kekelengenta’ banci ipengaruhi perasanta, emaka biasana kalak si seri ras kita saja ngenca sikelengi. Tapi situhuna, kekelengenta arus belinen asangken e gelah banci kita erteman ras kalak si beda ras kita.

Kenca sitandai sekalak jelma, banci dungna siangkai engkai maka lakokenna kai si beda ras kita. Janah adi enggo reh deherna kita ras ia, dungna siteh maka labo lit bedana kita ras ia. Banci lebih siergai ia ras sigejapken uga perasanna.

Contohna sekalak diberu si gelarna Nazaré. Mbarenda negatif perasanna man kalak asing si tading bas daerahna. Kai si erban lanai negatif perasanna man kalak e? Nina, “Erteman aku ras kalak e janah ras kami erdahin. Kepeken kalak e sitik pe la bagi si kataken kalak. Adi erteman kita ras kalak si beda budayana ras kita, dungna la sibeda-bedaken kalak e. Janah banci sikelengi tiap kalak ras siergai ia.”

Usahakenlah ngerana-ngerana ras kalak si sukuna, bahasana, ntah pe negarana beda ras kam. Banci . . .

• sungkunndu kalak e gelah ceritakenna kerna dirina.

• undangndu kalak e man ras-ras.

• begikenndu alu tutus sanga kalak e cerita, janah daramilah kai si penting akap kalak e.

Adi tehndu kai saja pengalamen kalak e, angkaindu me dungna uga ia situhuna. Alu bage banci reh positifna perukurenndu man kalak e.