Jutan kalak enggo ndalanken nasehat-nasehat si lit bas artikel sebelumna. Janah lanai dungna negatif perasan kalak e man kalak si deban. Tapi situhuna, labo alu gegehta maka banci sibeneken perasan negatif arah pusuhta. Adi bage, banci nge perasan negatif man kalak si deban tuhu-tuhu bene?

Seh asa gundari, lenga lit pemerentahen manusia si ngasup meneken perasan negatif man kalak si deban. Tapi, lit nge pemerentahen si ngasup ngelakokenca?

Pemerentahen si ngasup meneken perasan negatif man kalak si deban perlu . . .

1. 1. Ngiahken rakyatna gelah ula nai negatif perasan kalak e bas pusuh ras perukurenna.

2. 2. Mpepalem pusuh kalak si pernah jadi korban perasan negatif si erbanca ia pe negatif perasanna man kalak si deban.

3. 3. Peminpin-peminpin si mehuli si adil perbahanenna man rakyatna.

4. 4. Mpersada kalak arah kerina bangsa.

Ikataken bas Pustaka maka enggo iban Dibata pemerentahen si bage i surga, gelarna eme “Kerajan Dibata.”​—Lukas 4:43.

Kai si ihasilken pemerentahen e?

“Kebujuren si tuhu-tuhu, i je me pagi maka iantusi [manusia].”​—JESAYA 26:9.

“Erkiteken kerina kalak ngelakoken si bujur e maka lit kedamen ras ketenengen seh rasa lalap.”​—JESAYA 32:17.

Kai maksudna? Ajari Kerajan Dibata pagi rakyatna kai si benar. Adi enggo teh kalak e apai si benar ras si salah bage pe apai si adil ras si la adil, banci dungna berubah perukuren kalak e man kalak si deban. Hasilna, kerina kalak pagi sikeleng-kelengen janah la mbeda-bedaken.

“Iapusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit. Sebap kai si terjadi mbarenda nggo lanai lit.”​—KETANGKASEN 21:4.

Kai maksudna? Pepalem Kerajan Dibata pagi kerina luka bas pusuh akibat perbahanen si la adil. Hasilna, kalak si pernah jadi korban perasan negatif lanai segat atena kalak si pernah la adil man bana.

“La erpalasken si teridah saja ia ngadili, tah pe erpalasken kai si ibegina; tapi alu bujur irungguina perkara kalak musil, janah ibelana kalak si tertindas.”​—JESAYA 11:3, 4.

Kai maksudna? Raja arah Kerajan Dibata eme Jesus Kristus merentah manusia pagi alu adil. Labo akapna lit bangsa si hebaten asangken bangsa si debanna. Petetapna ka ukurta maka patuh pagi kerina kalak man undang-undangna si adil.

Ajari Kerajan Dibata kalak gelah ‘seri perukuren ras kekelengen kalak e, bage pe tuhu-tuhu ersada janah seperukuren.’​—PILIPI 2:2.

Kai maksudna? Labo arah darat saja teridah maka rakyat Kerajan Dibata ersada, tapi “tuhu-tuhu ersada” pagi kalak e perban kalak e sikeleng-kelengen.