Adi lalap siukuri kai saja bedana kita ras kalak si deban, dungna enggo melala kel siakap kekurangenna. Akibatna, hebaten siakap kita asangken ia. Adi enggo bage si terjadi, mesera siakap sepenggejapen ras ia. Banci saja, e tandana enggo negatif perasanta man kalak e. 

“Ermeriah ukurlah ras kalak si ermeriah ukur. Tangislah ras kalak si tangis.”​—ROMA 12:15.

Kai maksudna? Perlu kita sepenggejapen alu mbayangken adi kita arah kalak e janah sigejapken kai si gejapkenna.

Adi sepenggejapen kita ras kalak si deban, banci siteh kai saja si seri antara kita ras ia. Janah siteh, banci saja seri kepeken perbahanenta bage pe perasanta ras kalak e. Adi sepenggejapen kita, siteh maka situhuna kerina kita sada keluarga, la soal uga pe latar belakangta. Adi sidarami kai saja si seri antara kita ras kalak si deban, la mis negatif perasanta man kalak e. 

Selain si e, adi sepenggejapen kita siergai kalak si deban. Contohna Anne-Marie, ia arah Senegal nari. Mbarenda sepele kapna kalak si rendah kastana. Tapi banci ia berubah kenca usahakenna sepenggejapen ras kalak. Nina, “Sanga kuidah uga suina akap kalak si rendah kastana, kubayangken uga perasanku adi aku arah kalak e. Emaka sadar aku maka labo aku hebaten asangken kalak e. Kebetulen saja nge aku lahir bas kasta si terganjangen.” Jelas me, adi siusahaken ngangkai uga suina akap kalak si deban, banci kita sepenggejapen ras kalak e janah lanai negatif perasanta.

Adi negatif perasanndu man sada kelompok, daramilah bas kai saja kam seri ras kalak arah kelompok e. Contohna, bayangken uga perasan kalak e sanga . . .

• man kalak e ras keluargana

• dung banna dahinna

• pulung ras teman-temanna

• megiken lagu favoritna

Kenca si e, bayangken adi kam arah kalak e. Sungkuni bandu:

• ‘Adi lit kalak si sepele bangku, uga nge perasanku?’

• ‘Adi lit kalak si hakimina aku padahal lenga bo aku tandaina, uga nge perasanku?’

• ‘Adi aku arah kalak e, uga nge ateku perbahanen kalak bangku?’