Kai si Banci Sipelajari arah Alam Semesta?
Luar biasa kel akap astronom (ahli benda luar angkasa) ngidah alam semesta enda. Lalap iban kalak e alat-alat si lebih canggih guna mpelajarisa. Kai saja si enggo pelajari kalak e?
Teratur kel alam semesta enda. Salah sada artikel bas majalah Astronomy ngataken, “Galaksi-galaksi si lit bas ruang angkasa, teratur kerina inganna. Susunenna bali bagi jaring laba-laba.” Engkai maka banci bage? Menurut ilmuwan-ilmuwan, rahasiana eme lit zat si la teridah si igelari materi gelap. Lit si mpeseri materi gelap enda bali bagi “rangka si la teridah . . . si nusun ras natang galaksi, gugus galaksi, bage pe supergugus galaksi.”
Engkai maka alam semesta enda banci teratur kel? Masuk akal nge adi si e ikataken terjadi bage-bage saja? Perdiateken kai si ikataken Allan Sandage. Ianggap kalak ia “salah sada astronom si hebatna ras si mbelinna pengaruhna bas abad pe-20-ken” janah tek ia maka Dibata e lit. Nina, “Labo mungkin alam semesta enda banci teratur kel adi la lit si ngaturkenca. Pasti lit si erbanca teratur.”
Kegeluhen idukung rancangen alam semesta. Cuba perdiateken energi si lit bas matawari si erban matawari banci erban proses pembakaren alu stabil. Adi reh lemahna energi e, matawari labo pernah lit. Adi reh gegehna energi e, matawari enggo keri meseng mbarenda nari.
Energi e eme salah sada arah piga-piga rancangen si erban kegeluhen banci lit. Anil Ananthaswamy, sekalak penulis artikel ilmiah, ngataken maka adi salah sada saja pe arah rancangen e si la seri ras si gundari, “la mungkin lit bintang, planet, ras galaksi. Kegeluhen pe labo banci lit.”
Bas alam semesta, lit planet si banci iingani jelma. Rancangen atmosfer ras lalana lau bas doni, pas kel guna ndukung kegeluhen. Ukuren bulan pe pas guna njaga posisi doni tetap stabil. Nina National Geographic, “Rancangen si rumit bas alam semesta ras mahluk hidup si lit bas doni erban planet enda banci iingani, janah planet enda ngenca si banci iingani jelma.” *
Menurut piga-piga ilmuwan, doni enda lit bas galaksi Bima Sakti bas “ingan si cocok” guna iingani. Sekalak penulis ngataken maka posisi tata surya “ndauh arah bintang-bintang” bas galaksita. Tapi e me si erban kegeluhen banci lit i doni. Adi doni enda lit i tengah ntah pe i ujung galaksi janah ndeher ras bintang-bintang si debanna, radiasi si erbahaya banci seh ku doni.
Erpalasken ilmu pengetahuan kerna alam semesta ras isina, iban sekalak ahli fisika si gelarna Paul Davies kesimpulen, nina, “Labo mungkin rempet kita lit bas alam semesta enda, ntah terjadi bage-bage saja, ntah pe perban kesalahen si la isangka-sanga si terjadi bas ruang angkasa. . . . Memang kin kita iban guna tading i jenda.” Labo iajarken Paul maka alam semesta ras jelma iciptaken Dibata. Tapi jelas teridah maka alam semesta ras doni enda iban guna ndukung kegeluhen. Emaka uga menurutndu, masuk akal nge kerina e irancang?
^ Artikel National Geographic enda tujunna labo ngataken maka doni ras jelma iciptaken Dibata. Tapi artikel enda njelasken maka doni eme ingan si cocokna guna iingani jelma.