Kai si Banci Sipelajari arah Mahluk Hidup?
Mahluk hidup banci reh galangna, kemuit, ras reh buena. E me si erban planet enda unik ras mejile. Gundari reh buena si banci siteh kerna mahluk hidup. Kai si banci siteh kerna uga tangtangna maka lit kegeluhen? Mari sibahas.
Labo mungkin rancangen si rumit bas mahluk hidup terjadi bage-bage saja. Bas mahluk hidup lit bagin-bagin si kitik si igelari sel. Sel e bagi pabrik si kitik si ngelakoken ribun pendahin si seh kel rumitna gelah mahluk hidup banci tetap nggeluh ras reh buena. Sel e pe lit bas mahluk hidup si sederhana kel rancangenna. Cuba perdiateken organisme sel tunggal si lit bas ragi roti. Adi ibandingken ras sel manusia, sel ragi mungkin teridah sederhana. Tapi situhuna rumit kel sel enda. Bas sel ragi lit nukleus si isina DNA si ngelakoken melala pendahin alu mehuli. Gelah banci ia tetap nggeluh, lit erbage-bage “mesin” si kitik bas sel ragi e. Dahinna guna mbagi-mbagi, ngangkut, ras ngubah zat-zat jadi pangan sel e. Adi keri panganna, reh meletna sel e erdahin janah dungna lanai aktip. E me sebapna banci ndekah sisimpan ragi roti ras la ia mate. Ragi e banci aktip mulihi sanga sipake guna erban kue.
Enggo puluhen tahun dekahna ipelajari ilmuwan-ilmuwan sel ragi guna ngangkai sel manusia. Tapi melala denga si lenga angkai kalak e. Ross King, sekalak profesor bas Chalmers University of Technology i Swedia ngataken, “Ahli biologi si lit gundari pe la bias erban kerina penelitin si iperluken guna ngangkai cara kerja ragi.”
Uga menurutndu? Mungkin nge rancangen si rumit bas sel ragi si sederhana enda terjadi bage-bage saja? Ntah lit si erbanca?
Kerina mahluk hidup lit DNA-na. DNA eme molekul-molekul nukleotida si ersada. Bas tiap sel manusia lit 3,2 miliar nukleotida. Nukleotida e isusun bas bentuk-bentuk tertentu, emaka sel banci erban enzim ras protein.
Susunen nukleotida si sederhanana kel pe la mungkin terjadi bage-bage saja. Bicara terjadi pe bage, kemungkinenna 1 banding 10150 ngenca (kenca angka 1 lit 150 angka nol).
Faktana lenga lit ilmuwan si banci mbuktiken maka mahluk hidup rehna arah benda mati.
Manusia e unik kel. Banci meriah siakap ndalani geluhta. Banci siban kai ateta siban, banci kita ngerana-ngerana, banci situriken perasanta, janah la lit mahluk hidup si deban si banci bage. Banci sinanami erbage-bage nanam, bau, sora, warna, ras pemandangen. Banci ka siban rencana man masa depanta ras sidarami tujun geluhta.
Lit si ngataken, banci silakoken si e ndai kerina gelah kita tetap nggeluh ras reh buena. Masuk akal nge akapndu? Ntah, e buktina maka kegeluhen enda pemere arah Pencipta si engkelengi kita?