Tuhu kin alam semesta ras kegeluhen si lit i je iciptaken Dibata ntah terjadi bage-bage saja? Beda kel jawapen arah dua ilmuwan bage pe arah kata-kata Pustaka si ikutip bas awal artikel enda. Duana pendapat e lit si ndukungsa, tapi enterem denga kalak si bingung kerna si e. Enterem kalak erdebat kerna si e bas acara TV bage pe bas buku-buku si laris kel.

Banci saja ikataken guru-gurundu maka alam semesta ras kegeluhen terjadi bage-bage saja, labo lit si nciptakenca. Tapi lit nge bereken kalak e buktina? Ntah, banci saja begindu ikataken peminpin-peminpin agama maka lit Pencipta. Tapi lit nge bereken kalak e buktina? Ntah isuruhna kam “tek” maka Dibata e lit amin pe la lit buktina?

Pasti pernah ukurindu penungkunen e janah banci saja akapndu la lit si banci mbuktiken lit ntah lang Pencipta. Banci saja tersungkun-sungkun ka kam, ‘Penting kin meteh jawapen arah penungkunen-penungkunen ndai?’

Bas majalah enda, ibahas kari piga-piga bukti si erban enterem kalak tek nandangi Pencipta. Ibahas ka kari i je, engkai maka penting meteh jawapen kerna uga tangtangna kegeluhen lit i doni enda.