Tuhu kin alam semesta enda la lit mulana?

Nina Pustaka, “Tangtangna iciptaken Dibata langit ras doni.”​—Kejadin 1:1.

Sope kira-kira tahun 1950, enterem ilmuwan si terkenal tek maka alam semesta enda enggo lit nai nari, labo lit mulana. Tapi perban enggo melala penemuan mbaru-mbaru enda, gundari teremen ilmuwan e tek maka alam semesta enda lit mulana.

Uga nge tangtangna bentuk doni enda?

Ijelasken bas Pustaka maka tangtangna “kai pe lenga lit bas doni janah lenga lit bentukna” ras itutupi lau.​—Kejadin 1:2, 9.

Penjelasen e sesuai ras kai si ipelajari ilmuwan si gundari. Sekalak ahli biologi si gelarna Patrick Shih ngataken maka tangtangna “la lit oksigen bas atmosfer doni enda . . . , [janah] kai si lit bas doni enda labo bagi si gundari.” Majalah  Astronomy ngataken, “Penemuan si mbaru ncidahken maka tangtangna doni enda itutupi lau, sitik kel ngenca teridah taneh si kerah.”

Uga carana atmosfer e berubah?

Ikataken bas Pustaka maka tangtangna mekapal kel atmosfer e, emaka cahaya la banci teridah arah doni nari. (Kejadin 1:3-5) Dungna, cahaya matawari ras bulan banci teridah arah doni nari.​—Kejadin 1:14-18.

Smithsonian Environmental Research Center (SERC) ngataken maka tangtangna sitik ngenca seh cahaya ku doni perban atmosfer e. Selain si e, ikatakenna ka bagenda, “Tangtangna mekapal embun si mbungkus kerina doni enda.” Dungna “urak embun e janah teridah me langit si biru.”

Kai nge si leben lit bas doni?

Ikataken bas Pustaka maka si leben iciptaken eme ikan, kenca si e perik-perik, binatang-binatang, ras dungna jelma. (Kejadin 1:20-27) Ilmuwan-ilmuwan tek maka enggo ndekah leben lit ikan, kenca si e binatang-binatang, ras ndekah kenca si e dungna lit jelma.

Piga-piga kalak ngataken maka Pustaka la cocok ras ilmu pengetahuan. Tapi biasana bage nina kalak e perban situhuna labo angkaina kai si ikataken Pustaka.

Bas Pustaka labo lit ikataken umur alam semesta ntah pe doni enda 6.000 tahun. Sanga njelasken kerna penciptan doni ras alam semesta enda, kata “tangtangna” ngenca igunaken bas Pustaka. (Kejadin 1:1) Emaka, bas Pustaka labo lit ikataken ndigan doni ras alam semesta enda lit.

Labo ikataken Pustaka maka kerina si nggeluh bas doni enda iciptaken bas waktu 6x24 jam. Bas Pustaka, kata “wari” maksudna jangka waktu tertentu. Contohna, jangka waktu guna nciptaken doni inganta tading ras kerina si lit i je, termasuk enem “wari” penciptan si itulis bas Kejadin pasal 1, igelari “wari ciptaken Dibata Jahwe * langit ras doni.” (Kejadin 2:4) Emaka, sada “wari” penciptan si ikataken bas Pustaka, ertina sada jangka waktu si seh kel dekahna.

Bas Pustaka labo lit ikataken maka mahluk hidup la banci berubah. Bas buku Kejadin ikataken maka iciptaken “erbage-bage [jenis] binatang.” (Kejadin 1:24, 25) Kata “jenis” i jenda labo seri ras kata “spesies” bas istilah biologi, janah kata enda mbue ertina. Emaka sada “jenis” banci maksudna melala spesies ntah pe macam-macamna. Alu bage, kenca enggo reh dekahna, sada “jenis” mahluk hidup si tading bas sada ingan banci ngasilken erbage-bage spesies ntah pe macamna.

 Uga menurutndu?

Bali bagi si enggo ituriken ndai, jelas ras tepat kel ikataken bas Pustaka uga tangtangna alam semesta enda lit, uga mulana doni enda, ras uga tangtangna lit kegeluhen i je. Masuk akal nge akapndu adi Pustaka pe banci njelasken ise si nciptaken kerina e? Nina Encyclopædia Britannica, “Adi lit si ngataken maka kegeluhen lit perban kejadin si luar biasa, e cocok ras kai si ipelajari ilmuwan mbaru-mbaru enda.” *