Setuju nge kam nandangi pernyatan e? Bali bagi Samantha, kita kerina pernah ngadapi situasi si sulit. Caranta ngadapi situasi paksa kita igoda gelah la jujur ncidahken kai si pentingna i bas kegeluhenta. Contohna, adi ergan lalap siakap erga dirinta janah la kita nggit mela bas lebe-lebe jelma sinterem erbual nggo jadi hal si biasa siakap. Paksa kebenarenna tereteh kinilajujuren lalap ngerehken kai si la mehuli. Mari siperdiateken keterangen seterusna.

Palas hubungen si nteguh eme kepercayan. Adi dua kalak siteken sapih-sapih ia perasanna pasti aman ras tenang. Tapi kepercayan la banci mis turah. Kepercayan e banci turah adi rusur ras, rusur ngerana-ngerana janah ncidahken perbahanen si la ngukuri bana. Tapi sada saja kinilajujuren banci ncedai kepercayan. Janah paksa kepercayan e ceda mesera kal mpesikapsa.

Pernah nge kam itipu sekalak jelma si akapndu ia temanndu? Adi pernah uga perasanndu? Pasti ceda kal ukurndu perban ihianati. Enda wajar. Jelas me, kinilajujuren banci ncedai hubungen si mehuli.

Robert Innes, sekalak profesor ekonomi i Universitas California, ngataken maka ”kinilajujuren banci langket.”[3] Kinilajujuren banci iumpamaken bagi virus—reh rusurna kam erteman ras kalak si la jujur, mbelin kemungkinenna kinilajujuren ”ngelangketi” kam.

Uga carana gelah kam la ndabuh i bas jerat kinilajujuren? Pustaka si Badia banci nampati kam. Cuba perdiateken piga-piga prinsip i bas Pustaka si Badia.