1. Amin gia Jahwe pribadi si Meganjangna, Ia ngundang kita ngelakoken kai?

JAHWE eme pribadi si Meganjangna. Ia si nepa kerina si nasa lit, ras la tersibar kepentaren ras kuasaNa. Kenca iangkai Jop kerna si e, nina man Jahwe, ”Genduari kueteh TUHAN, maka kai pe ngasup kam ngelakokenca kai isuraNdu seh kerina.” (Jop 42:2) Jahwe banci ngelakoken kai pe amin gia la isampati kalak si deban. Tapi icidahkenNa kekelengenNa man tinepaNa alu ngundang kalak e erdahin ras Ia i bas njadiken sura-suraNa.

2. Guna dahin penting kai Jahwe ngundang Jesus?

² Dibata nepa Jesus ope denga ijadikenNa kerina si nasa lit. Kenca si e, Jahwe ngundang Jesus guna erdahin ras Ia i bas nepa si nasa lit. (Joh. 1:1-3, 18) Rasul Paulus nuratken, ”Arah ia Dibata njadiken kerina si nasa lit subuk i Surga bage pe i doni, barang si teridah bage pe barang si la teridah, ikut pe kerina kesah si erkuasa ras merentah. Kerina si nasa lit ijadiken Dibata arah Kristus guna Kristus.” (Kol. 1:15-17)  Jadi, Jahwe labo mereken sada dahin si penting saja man Jesus, tapi ipebetehkenNa ka man banta kerna si e. Tuhu-tuhu sada kinihamaten!

3. Kai nge dahin si ibereken Jahwe man Adam, ras engkai?

³ Jahwe pe ngundang manusia guna erdahin ras Ia. Contohna, iberekenNa tugas man Adam guna erbahan gelar rubia-rubia. (Kej. 2:19, 20) Pasti meriah kal ukur Adam ndahiken tugas enda! Alu megermet iperdiatekenna uga bentuk ras biak-biak rubia-rubia e, kenca si e ibahanna gelarna. Situhuna ngasup nge Jahwe erbahan gelar rubia-rubia e erkiteken Ia si nepasa. Tapi, perban keleng ateNa Adam iberekenNa tugas man bana guna erbahan gelar rubia-rubia. Janah iberekenNa ka dahin si deban man Adam eme erbahan sebelang doni jadi pardis. (Kej. 1:27, 28) Tapi dungna Adam lanai nggit erdahin ras Dibata, akibatna ia ras kesusurenna ngenanami kiniseran.​—Kej. 3:17-19, 23.

4. Uga piga-piga kalak erdahin ras Dibata i bas njadiken sura-suraNa?

⁴ Dibata pe ngundang kalak si deban erdahin ras Ia. Contohna, Nuah erban bahtera gelah ia ras keluargana selamat paksa reh banjir si mbelin. Musa maba bangsa Israel ndarat i bas Mesir nari. Josua minpin kalak Israel ku Taneh si Ipadanken Dibata. Salomo majekken rumah pertoton i Jerusalem. Maria jadi nande Jesus. Kerina kalak si setia e bage pe si debanna erdahin ras Jahwe i bas njadiken sura-suraNa.

5. Dahin kai si banci silakoken guna ndukung Kinirajan Dibata? Situhuna perlu nge Dibata penampatta? (Nehen gambar pemena artikel.)

⁵ Gundari Jahwe pe ngundang kita guna ndukung KinirajanNa. Melala cara guna ngelakokenca. Amin gia kita kerina la banci ngelayani Dibata alu cara si seri, tapi kita banci mbarken berita si meriah kerna Kinirajan Dibata. Situhuna, Jahwe banci ndahiken dahin enda la pe sisampati. Jahwe banci langsung ngerana arah surga nari ku doni. Nina Jesus, Jahwe pe ngasup erban batu-batu ersurak mpebetehken kerna Raja i bas KinirajanNa. (Luk. 19:37-40) Tapi, Jahwe ngundang kita gelah jadi ’sada aronNa’. (1 Kor. 3:9) Isuratken rasul Paulus, ”Kami selaku teman Tuhan erdahin mindo man bandu: gelah ola isia-siakenndu lias ate Dibata e si enggo ialokenndu.” (2 Kor. 6:1) Sada kinihamaten si mbelin banci erdahin ras Dibata. Janah enda banci erbahan kita ermeriah ukur. Engkai? Mari sibahas piga-piga alasenna.

6. Uga nge perasan Jesus paksa erdahin ras Bapana?

⁶ Erdahin ras Jahwe pasti erbahan juak-juakNa ermeriah ukur. Sope lenga reh ku doni, nina Jesus, ”Aku kap tinepa TUHAN si pemena . . . Aku lit i deherNa desken sekalak anak buah ateNa; aku kap sumbul keriahenNa, dem keriahen i bas adep-adepenNa”. (Kua. 8:22, 30) Paksa Jesus erdahin ras Bapana, meriah ukurna banci ndungi mbue dahin janah ietehna maka Bapana ngkelengi ia. Uga kita gundari?

7. Ngkai maka dahin erberita si meriah erbahan kita ermeriah ukur?

⁷ Nina Jesus meriah ukurta paksa kita mere bage pe paksa kita ngalo. (Perb. 20:35) Meriah ukurta paksa sialoken kebenaren, bage pe paksa mpebetehkenca man kalak si deban? Siidah uga riahna ukur kalak paksa ngangkai ajaren  Pustaka si Badia janah reh rembakna ras Dibata. Meriah ka ukurta ngenehen kalak e ngubah perukurenna ras cara geluhna si dekah. Erberita si meriah eme sada dahin si penting kal janah tuhu-tuhu erban kita ermeriah ukur. Dahin e banci erban sekalak jelma jadi teman Dibata ras ndatken kegeluhen si rasa lalap.​—2 Kor. 5:20.

8. Kai si ikataken dua turang seninanta kerna uga riahna erdahin ras Jahwe?

⁸ Paksa sisampati kalak si deban erlajar kerna Dibata, sieteh maka enda erbahan meriah ukur Jahwe janah tuhu-tuhu iergaiNa pengorbanenta. Enda banci erbahan kita ermeriah ukur. (Oge 1 Korinti 15:58.) Nina Marco, si tading i Italia, ”Meriah kal ukurku erkiteken mere si mehulina man Jahwe labo man manusia si banci ngelupaken kai si nggo kulakoken.” Franco pe si ngelayani i Italia ngataken, ”Rusur kita niingetken Jahwe maka keleng ateNa kita, enda banci sigejapken arah Pustaka si Badia bage pe persedian rohani si iberekenNa. Janah meherga iakapNa kai si nggo silakoken, amin gia siakap usahanta enda la lit ertina. Eme alasenna erdahin ras Dibata mereken tujun i bas geluhku janah erbahan aku ermeriah ukur.”

9. Uga rembakna hubungen Jahwe ras Jesus, janah engkai?

⁹ Paksa kita erdahin ras kalak si keleng ateta, reh rembakna kita ras ia. Reh buena sieteh kerna kepribadin ras sifat-sifatna. Sieteh kai sura-surana, ras uga ia ndatkenca. Jesus erdahin ras Jahwe miliaren tahun dekahna. Kekelengen kalak enda reh paguhna janah kai pe la banci ncedaisa. Jesus tuhu-tuhu rembak kal ras Bapana emaka banci ikatakenna, ”Bapa ras aku sada kap.” (Joh. 10:30) Kalak enda radu ras erdahin janah sisampat-sampaten.

10. Engkai maka erberita si meriah banci erban kita reh rembakna ras Dibata bage pe ras kalak si deban?

¹⁰ Jesus mindo gelah Jahwe ngkawali ajar-ajarna. Ngkai? Nina, ”Gelah ersada ia bagi Kam ersada ras aku.” (Joh. 17:11) Adi sidalanken perentah Dibata ras ikut erberita si meriah, reh buena siangkai sifat-sifat Dibata si mehuli. Sieteh engkai maka kita arus tek man Jahwe ras ngikutken bimbingenNa. Janah adi kita rembak ras Dibata, Ia pe ngerembakken dirina man banta. (Oge Jakup 4:8.) Kita pe banci reh rembakna ras turang seninanta erkiteken kita radu erjuang i bas ngadapi perbeben janah tujun geluhta pe seri. Ras-ras kita erdahin, ras-ras kita tawa, bage pe radu ras kita megenggeng. Nina Octavia, si tading i Inggris, ”Erkiteken erdahin ras Jahwe, aku reh rembakna ras turang senina. Menurut Oktavia alasenna eme  erkiteken ”tujun ras cita-cita kalak enda seri”. Pasti perasanta pe bage. Paksa siidah pengorbanen turang seninanta bas ngelayani Jahwe, enda erban kita reh rembakna ras ia.

11. Ngkai maka reh rembakna kita ras Jahwe bage pe ras turang senina i doni si mbaru pagi?

¹¹ Gundari pe nggo mbelin kekelengenta man Dibata ras turang seninanta, tapi reh belinna ka bas doni si mbaru pagi. Cuba ukuri kerina dahin si banci silakoken i bas wari si pepagi! Banci sialo-alo kalak si ipekeke ras ngajari ia kerna Jahwe. Kita pe banci ikut erbahan doni enda jadi pardis. Pasti meriah kal siakap erdahin ras turang seninanta janah alu manjar-anjar dungna kita jadi sempurna i bas pemerentahen Kristus. Kerina manusia banci reh rembakna sada ras si debanna khususna ras Jahwe, janah pasti ’iperiahkenNa pusuh kerina si nggeluh.’​—Msm. 145:16.

12. Ngkai maka erberita si meriah banci ngelindungi kita?

¹² Perlu sijaga hubungenta ras Jahwe. Engkai? Erkiteken kita nggeluh i doni Setan janah kita kerina la sempurna, menukah kal siakap ngusih perukuren ras perbahanen doni enda. Bali bagi erlangi ngelawan arus i bas lau mbelin si deras kita arus erusaha gelah ula terbaba arus. Bage ka pe, kita arus erusaha gelah ula terpengaruh doni Setan. Emaka, uga dahin erberita si meriah banci ngelindungi kita? Paksa situriken kerna Jahwe ras Pustaka si Badia, fokus perukurenta eme kai si mehuli ras si penting, labo kai si erbahan lemah kinitekenta. (Pil. 4:8) Erberita si meriah mpegegehi kinitekenta perban ngingetken kita kerna janji Dibata bage pe perentahNa. Selain si e, enda nampati kita ndatken sifat-sifat si banci ngelindungi kita i bas Setan ras donina si jahat enda nari.​—Oge Epesus 6:14-17.

13. Uga perasan sekalak turang sininanta i Australia kerna erberita si meriah?

¹³ Adi tetap kita sibuk erberita si meriah, erlajar Pustaka si Badia, ras nampati turang seninanta i bas runggun, kita ilindungi erkiteken lanai lit waktunta ngukuri masalahta. Nina Joel, si tading i Australia, ”Ngataken bujur kal aku. Lanai kuukuri kal masalahku erkiteken rusur aku erberita si meriah. Kuidah perbeben si niadapi nterem jelma ras manfaat si kudat perban nggeluh sentudu ras prinsip Pustaka si Badia. Erberita si meriah nampati aku gelah tetap meteruk rukur, mereken kesempaten man bangku gelah ernalem man Jahwe bage pe man turang senina.”

14. Engkai adi megenggeng kita erberita ncidahken maka kesah Dibata lit bas kita?

¹⁴ Erberita si meriah pe erban kita reh tekna maka kesah Dibata lit i bas kita. Anding-andingenna: Bayangken kam isuruh erdahin guna mbagiken roti man kalak si deban. Kam la igaji, janah kam sendiri si nutupi pengeluarenndu. Nterem kalak la nggit ngalokenca, janah lit ka si segat atena kam. Asa kai dekahna kam ngasup ndahiken dahin enda? Pasti kentisik ngenca, mungkin mis kitik ukurndu janah dungna ingadikenndu. Sebalikna, kita terus erberita si meriah tahun ku tahun, amin gia arus sikorbanken waktu ras senta. Maun-maun lit ka si nokohi ntah pe si segat atena kita. Tapi kita tetap erberita si meriah, enda mbuktiken kesah Dibata nampati kita.

15. Kai hubungenna dahin erberita ras sura-sura Jahwe nandangi manusia?

¹⁵ Kai hubungenna dahin erberita si meriah ras sura-sura Jahwe nandangi manusia? Sura-sura Dibata manusia nggeluh si rasa lalap, sura-suraNa lenga berubah amin gia Adam nggo erdosa. (Jes. 55:11) Lit sada cara Dibata guna mbebasken kita i bas dosa ras kematen nari. Kai carana? Alu ngutus Jesus ku doni guna nebus dosa-dosanta. Tapi, gelah ndatken manfaat tebusen e, manusia arus patuh man Dibata. Emaka, ipebetehken Jesus kai si ipindo Dibata man manusia, janah isuruhna ajar-ajarna ngelakoken kai si nggo ilakokenna. Emaka paksa kita erberita si meriah ras nampati kalak si deban jadi teman Dibata, kita sangana erdahin ras Dibata janah ndukung sura-suraNa guna nelamatken manusia i bas dosa ras kematen nari.

16. Kai hubungenna dahin erberita ras dua perentah si mbelinna i bas Dibata nari?

¹⁶ Paksa sisampati kalak si deban guna ndatken kegeluhen si rasa lalap, sicidahken maka kita ngkelengi ia bage pe Jahwe. Ia ”ersura-sura gelah kerina manusia selamat dingen meteh kai si tuhu-tuhu.” (1 Tim. 2:4) Paksa kalak Parisi nungkun man Jesus kerna perentah Dibata si apai kin si pentingna, nina Jesus, ”Kelengilah Tuhan Dibatandu asa ukurndu, asa tendindu, dingen asa gegehndu lit. Enda me perentah si mbelinna dingen si pentingna. Si peduaken bali ras si ndai e me, ’Kelengilah temanndu manusia bagi kam ngkelengi dirindu.’” (Mat. 22:37-39) Adi ikut kita erberita, sicidahken kepatuhenta man hukum enda.​—Oge Perbahanen Rasul-rasul 10:42.

17. Uga perasanndu kerna kinihamaten i bas mberitaken berita si meriah?

¹⁷ Tuhu-tuhu kita ipasu-pasu Jahwe! IbereNa banta sada dahin si erbahanca kita ermeriah ukur, si ngerembakken kita ras Ia bage pe ras turang seninanta, janah ngelindungi hubungenta ras Ia. Enda pe banci mereken kesempaten man banta guna ncidahken kekelengenta man Dibata bage pe man kalak si deban. Jutan juak-juak Jahwe i belang-belang doni, ngadapi situasi si erbeda-beda. Tapi la soal kita nguda ntah pe metua, bayak ntah musil, megegeh ntah pe lemah, kerina kita banci nuriken kerna kinitekenta man kalak si deban asa ngasupta. Nina Chantel si tading i Francis, ”Pribadi si megegehna i bas alam semesta, si nepa kerina si nasa lit, Dibata si ermeriah ukur, ngataken man bangku: ’Laweslah! Beritaken! Beritakenlah guna Aku, beritaken i bas pusuhndu nari!’” Menurutna, Dibata pe erjanji guna mpegegehi ia, mereken dukungen, penampat, Pustaka si Badia, turang senina, bage pe mereken pelatihen ras petunjuk si tepat. Sada kinihamaten si mbelin iakapna banci ngelakoken kai si ipindo Jahwe janah radu erdahin ras Ia! Pasti perasanta pe bage.