1, 2. (a) Kai si inubuatken Jahwe si terjadi i bas jamanta? (b) Kai penungkunen si man bahasenta bas artikel enda? (Nehen gambar pemena artikel.)

JAHWE ngataken maka i bas jamanta lit ”sepuluh kalak bangsa si deban reh ndahi sekalak Jahudi janah nina, ’Ikut ate kami ras kam, sabap enggo ibegi kami Dibata ras kam kap.’” (Sak. 8:23) Sekalak Jahudi e nggambarken kalak si iminaki kesah si badia. Kalak enda pe igelari ”Israel Dibata.” (Gal. 6:16) Si sepuluh kalak nggambarken kerina kalak si arapenna nggeluh si rasa lalap i doni. Ieteh kalak enda maka Jahwe masu-masu terpuk si iminaki e janah meriah akapna banci ngelayani Dibata radu ras kalak e.

² Bali bagi si ikataken nabi Sakaria, ikataken Jesus maka umat Dibata pasti ersada. Ijelaskenna maka kalak si arapenna nggeluh i surga eme ”rarasen si kitik” janah kalak si arapenna nggeluh i doni eme ”biri-biri si deban”. Tapi nina Jesus kerina pagi ia jadi ”sada rarasen” dingen, ”sada nge permakanna.” (Luk. 12:32; Joh. 10:16) Erkiteken lit dua terpuk, banci saja kita tersungkun-sungkun: (1) Perlu nge ieteh biri-biri si deban gelar kerina kalak si iminaki? (2) Uga arusna perasan kalak si iminaki kerna dirina? (3) Adi lit sekalak  jelma i bas runggunku mulai man roti ras minem anggur bas acara Peringeten, uga arusna perbahanenku man bana? (4) Ngkai maka la perlu latih ukurku adi erbuena jumlah kalak si man roti ras minem anggur i bas acara Peringeten? Jabapna lit i bas artikel enda.

3. Engkai maka la mungkin sieteh gundari ise saja si 144.000 kalak e?

³ Perlu nge ieteh biri-biri si deban gelar kerina kalak si iminaki si lit denga i doni? Lang. Engkai maka lang? Erkiteken lenga banci sieteh alu pasti ise saja si ndatken upahna. ^[1] Amin gia Dibata nggo ngundang kalak enda ku surga, kalak enda banci ndatken upahna adi ia tetap setia. Setan meteh si e, janah igunakenna ”nabi-nabi perguak” guna erban kalak enda ”papak”. (Mat. 24:24) Kalak Kristen si iminaki pe la banci ipastikenna maka ia ndatken upahna seh ngasa Jahwe mpebetehken bana maka ia terbukti setia. Jahwe mereken pemeteraian pendungi, sope kalak e mate ntah pe, pas sope ”kiniseran si mbelin” ibenai.​—Ket. 2:10; 7:3, 14.

4. Adi labo banci sieteh kerina gelar kalak si iminaki si lit denga i doni, uga banci kita ”ikut” ras kalak e?

⁴ Adi labo banci sieteh gelar kerina kalak si iminaki si lit denga i doni, uga carana biri-biri si deban ”ikut” ras kalak e? Pustaka si Badia ngataken maka sepuluh kalak ”reh ndahi sekalak Jahudi janah nina, ’ikut ate kami ras kam, sabap enggo ibegi kami Dibata ras kam kap.’” Ayat enda ngataken maka lit sekalak Jahudi, tapi igunakenna kata ”kam” ras ”kam kap [kerina, NW]”, enda ertina lebih sada kalak. Maksudna, kalak Jahudi e labo sada kalak saja tapi ngertiken sada terpuk si iminaki. Biri-biri si deban meteh si e, janah ia ngelayani Jahwe radu ras terpuk e. La perlu sieteh gelar kerina kalak si iminaki janah ngikutken salah sada i bas ia. Jesus me Peminpinta, Pustaka si Badia mpebetehken maka ia saja nge si arus siikutken.​—Mat. 23:10.

5. Kai persinget man kalak si iminaki si arus tuhu-tuhu iukurina, ras engkai?

⁵ Kalak Kristen si iminaki arus tuhu-tuhu ngukuri persinget si lit i bas 1 Korinti 11:27-29. (Oge.) Uga kalak si iminaki banci ikataken man roti ras minem anggur alu cara ”si la patut” i bas acara Peringeten? Adi la ijagana hubungenna ras Jahwe janah la setia man baNa. (Heb. 6:4-6; 10:26-29) Persinget si tegas enda mpersingeti kalak si iminaki maka ia arus tetap setia adi atena ndatken hadiah, ’pendilo Dibata guna kegeluhen i surga arah Kristus Jesus.’​—Pil. 3:13-16.

6. Uga perasan kalak Kristen si iminaki kerna dirina?

⁶ Nina Paulus man kalak Kristen si iminaki, ”Emaka aku, si i bas penjara erkiteken kudahi dahin Tuhan, mindo man bandu: Nggeluh lah sue ras kecibalndu si enggo iaturken Dibata man bandu, asum tangtangna kam idiloNa guna ngikut Kristus.” Uga cara kalak e ngelakokenca? Ijelasken Paulus, ”Meteruk min ukurndu, lemah lembut, dingen saber. Ula kam pergelut sapih-sapih kam, erkiteken kekelengen si lit i bas kam. Usahakenlah tuhu-tuhu maka persadanndu si ibereken kesah e tetap irakut alu enteguh i bas perdamen.” (Ep. 4:1-3) Kesah si badia nampati umat Jahwe gelah meteruk rukur, labo meganjang rukur. (Kol. 3:12) Emaka, kalak Kristen si iminaki la erpengakap maka jagon ia asangken  kalak si deban. Ietehna maka lenga tentu buen ibereken Jahwe kesah si badia man bana asangken man juak-juak Dibata si deban. Ras labo iakapna beluhen ia ngangkai Pustaka si Badia asangken kalak si deban. Labo pernah ikatakenna man kalak si deban maka kalak e pe iminaki janah isuruhna man roti ras minem anggur bas Peringeten. Sebalikna, kalak si iminaki meteruk rukur janah ietehna maka Jahwe ngenca si banci ngundang sekalak jelma lawes ku surga.

7, 8. Kai si la banci ilakoken kalak Kristen si iminaki, ras engkai?

⁷ Amin gia sada kinihamaten si mbelin banci iundang ku surga, tapi kalak si iminaki la ngarapken gelah iperlakoken alu istimewa. (Ep. 1:18, 19; oge Pilipi 2:2, 3.) Kalak enda pe meteh maka paksa ia iminaki, la ipebetehken Jahwe man kalak si deban. Emaka la mamang atena adi lit si la mis tek bana maka ia nggo iminaki. Ia pe meteh maka Pustaka si Badia ngajarken gelah ula metersa tek man sekalak jelma si ngataken maka ia ibereken tanggung jabap khusus. (Ket. 2:2) Erkiteken kalak e la ngarapken gelah iperlakoken alu istimewa, emaka paksa jumpa ras kalak si edenga itandaina la ipebetehkenna maka ia kalak si iminaki. Janah adi banci iusahakenna maka la ikatakenna man ise pe. Kalak enda pe la sombong alu nuriken tanggung jabap si mbelin si idatna i surga pagi.​—1 Kor. 1:28, 29; oge 1 Korinti 4:6-8.

⁸ Kalak Kristen si iminaki la erpengakap maka ia arus erteman ras kalak si iminaki saja, tempa-tempa kalak enda sada kelompok si mehaga. Ras labo idaramina kalak si iminaki si deban guna nuriken kerna hak istimewana ntah pe erban sada kelompok gelah banci ras-ras mpelajari Pustaka. (Gal. 1:15-17) Adi ilakokenna si e, runggun la banci ersada. Janah perbahanenna e lanai sentudu ras kesah si badia, si nampati umat Dibata gelah erdame ras ersada.​—Oge Roma 16:17, 18.

9. Kai si la ateta silakoken nandangi kalak si iminaki, janah engkai? (Nehen kotak ”Keleng Ate ’La Mekarus.’”)

⁹ Uga arusna perbahanenndu nandangi turang senina si iminaki? Nina Jesus man ajar-ajarna, ”Kam kerina ersenina.” Janah nina, ”Ise si peganjangken bana, ipeteruk Dibata me, janah ise si mpeteruk bana, ipeganjangken Dibata me ia.” (Mat. 23:8-12) Emaka, salah adi lebihsa kal sibereken pujin man sekalak jelma, amin gia ia turang senina si iminaki. Paksa Pustaka si Badia nuriken kerna pertua-pertua, enda ngiahken kita guna ngusih kinitekenna, tapi labo ikatakenna gelah sibahan manusia jadi peminpinta. (Heb. 13:7) Payo, Pustaka si Badia ngataken maka lit piga-piga kalak si ”patut iergaken dua kali lipat”. Erkiteken kalak e ”erdahin alu mehuli selaku peminpin” ras ”tutus erdahin i bas meritaken Berita Si Meriah dingen ngajar”, labo perban ia iminaki. (1 Tim. 5:17) Adi ngelebihi pujin ras perhatinta bana, enda banci erbahan kalak e mela. Si mekelekna, banci siban kalak e meganjang rukur. (Rom. 12:3) Pasti kita la nggit adi perbahanenta erban turang seninanta si iminaki ngelakoken kesalahen si serius!​—Luk. 17:2.

10. Uga banci sicidahken maka siergai kalak si iminaki?

¹⁰ Uga carana kita ncidahken maka siergai kalak si iminaki Jahwe? Misalna, ula sisungkun uga maka banci ia iminaki.  Enda urusen pribadi, si la perlu sieteh. (1 Tes. 4:11; 2 Tes. 3:11) Janah ula siakap maka perbulangenna, ndeharana, orang tuana, ras anggota keluargana pe ikut iminaki. Sekalak jelma ndatken arapen e labo erkiteken hubungen keluarga. (1 Tes. 2:12) Janah penungkunenta pe ula min ncedai pusuh kalak si deban. Contohna, adi lit sekalak ndehara si perbulangenna kalak si iminaki, la perlu sisungkuni uga perasanna paksa nggeluh si rasa lalap i doni pagi tapi la ras perbulangenna. Banci siinget i bas doni si mbaru pagi, ’iperiahken Jahwe pusuh kerina si nggeluh.’​—Msm. 145:16.

11. Adi la ’sipuji-pujisa’ kal kalak si iminaki, kita banci ilindungi i bas kai nari?

¹¹ Adi la sibeda-bedaken perbahanenta man kalak si iminaki ras kalak si deban, enda banci ngelindungi dirinta. Engkai? Nina Pustaka si Badia banci saja lit si ’pekulah-kulahna jadi senina’ i bas runggun si ngataken maka ia iminaki. (Gal. 2:4, 5; 1 Joh. 2:19) Selain e, piga-piga kalak si iminaki banci saja la setia. (Mat. 25:10-12; 2 Pet. 2:20, 21) Adi la lebihsa sipujiken ia, enda ncidahken maka kita ngelayani Jahwe labo erkiteken ngikutken kalak si deban, amin gia ia kalak si iminaki, ntah kalak si terkenal ntah pe kalak si nggo ndekah ngelayani Jahwe. Emaka, adi la ia tetap setia ntah pe nadingken runggun, labo enda erbahan bene kinitekenta ntah pe ngadi ngelayani Jahwe.​—Jud. 16.

12, 13. Engkai maka la perlu latih ukurta kerna jumlah kalak si man roti ras minem anggur i bas Peringeten?

¹² Kidekah piga-piga tahun, jumlah kalak si man roti ras minem anggur i bas Peringeten reh kurangna. Tapi i bas pudi wari enda, jumlah kalak e tambah tiap tahun. Perlu nge latih ukurta kerna si e? Lang. Mari sinehen kai alasenna.

¹³ ’Itandai Jahwe SikerajangenNa.’ (2 Tim. 2:19) La bagi Jahwe, turang senina si ngkira jumlah kalak si man roti ras minem anggur i bas Peringeten la ietehna ise si tuhu-tuhu si iminaki. Emaka si ikut i bas jumlah enda banci saja kalak si erpengakap maka ia iminaki tapi situhuna lang. Misalna, lit si mbarenda man roti ras minem anggur tapi gundari lanai. Banci saja lit ka si lit  masalah emosina si erbanca ia erpengakap maka ia merentah ras Jesus pagi i surga. Tapi si pasti, la banci sieteh piga tepatna jumlah kalak si iminaki si lit denga i doni.

14. Kai si ikataken Pustaka si Badia kerna jumlah kalak si iminaki si lit denga i doni paksa kiniseran si mbelin ibenai?

¹⁴ Kalak si iminaki lit i belang-belang doni paksa Jesus reh guna maba kalak enda ku surga. Pustaka si Badia ngataken maka, ’Terbegi me sora trompet si megang jenari isuruh Jesus me malekat-malekatna ndarat ku belang-belang doni enda. Ipepulung malekat-malekat e me kalak si enggo ipilih Dibata i bas tampuk doni nari ku tampukna si deban.’ (Mat. 24:31) Pustaka si Badia ngataken maka i bas wari-wari pendungi, lit denga sitik nari kalak si iminaki i doni. (Ket. 12:17) Tapi la ikatakenna piga kalak si tading paksa kiniseran si mbelin ibenai.

15, 16. Kai si perlu sieteh kerna si 144.000 kalak si ipilih Jahwe?

¹⁵ Jahwe si mutusken ndigan ipilihNa kalak si iminaki. (Rom. 8:28-30) Jahwe mulai milih kalak si iminaki kenca Jesus ipekeke. Mbelin kemungkinenna, i bas abad si pemena kerina kalak Kristen si tuhu-tuhu iminaki kesah si badia. Ratusen tahun kenca si e, nterem kalak ngaku Kristen tapi situhuna la ngikutken Kristus. Tapi i bas masa si e, terus iminaki Jahwe kalak Kristen situhu-tuhu amin gia sitik ngenca jumlahna. Jesus ngataken maka kalak enda bali bagi page si turah i tengah-tengah sesa. (Mat. 13:24-30) I bas wari-wari pendungi, Jahwe terus milih kalak guna jadi bagin i bas si 144.000 kalak e. ^[2] Emaka, amin pe Jahwe milih piga-piga kalak la ndekah ope reh kedungen e, la kita sangsi maka keputusenNa e benar. (Jes. 45:9; Dan. 4:35; oge Roma 9:11, 16.) ^[3] Arus kita metenget gelah ula bagi kalak upahen si jungut-jungut kerna perbahanen tuanna man kalak si pudin erdahin.​—Oge Matius 20:8-15.

¹⁶ Labo kerina kalak si iminaki bagin i bas ”juak-juak si tutus dingen pentar.” (Mat. 24:45-47) Bali bagi i bas abad si pemena, gundari pe sitik ngenca si igunaken Jahwe ras Jesus guna mereken pangan rohani ntah pe ngajar. I bas abad si pemena, sitik ngenca i bas kalak Kristen si iminaki si ipilih guna nuratken Kitap-Kitap Junani Kristen. Gundari pe, sitik ngenca i bas kalak Kristen si iminaki si ndatken tanggung jabap guna mereken ’pangan [rohani] man juak-juak Dibata i bas paksana.’

17. Kai si banci ipelajarindu i bas artikel enda?

¹⁷ Kai si banci sipelajari i bas artikel enda? Teremen umat Dibata ndatken arapen guna nggeluh si rasa lalap i doni, tapi lit si nggo ipilih guna merentah ras Jesus i surga. Jahwe masu-masu dua kelompok enda janah ateNa gelah kalak enda radu patuh man hukumNa ras tetap setia. Kalak enda kerina arus meteruk rukur ras ersada i bas ngelayani Dibata. Janah arus iusahakenna njaga kedamen bas runggun. Asum reh deherna kita ku kedungen doni enda, mari terus silayani Jahwe ras ngikuti Jesus selaku sada rarasen.