1, 2. (a) Kai saja si termasuk i bas ’pemere Dibata si la terkataken uga ulina’? (b) Penungkunen kai saja si banci sibahas i bas artikel enda?

ERKITEKEN ngkelengi kita, Jahwe ngutus Jesus, anak si ikelengiNa ku doni. Enda sada pemere si seh kal mehergana! (Joh. 3:16; 1 Joh. 4:9, 10) Rasul Paulus nggelari enda sada ’pemere Dibata si la terkataken uga ulina’. (2 Kor. 9:15) Engkai igunaken Paulus kata-kata enda?

² Ieteh Paulus korban tebusen Jesus sada jaminen maka kerina janji Dibata si luar biasa pasti terjadi. (Oge 2 Korinti 1:20.) Enda ertina, si termasuk i bas ’pemere Dibata si la terkataken uga ulina’, eme korban tebusen Jesus ras kerina kiniulin Jahwe bage pe keleng ate si icidahkenNa banta. Selaku manusia, pemere si meherga e la banci siangkai alu jelas gundari. Uga arusna perasanta nandangi pemere si istimewa e? Janah pemere enda ngiahken kita ngelakoken kai paksa nikapken diri bas acara Peringet-ingeten Kematen Jesus i bas wari Rabu, 23 Maret 2016?

3, 4. (a) Uga perasanndu paksa lit sekalak jelma mereken hadiah man bandu? (b) Uga maka banci sada pemere si istimewa ngubah kegeluhenndu?

³ Meriah ukurta paksa sekalak jelma mereken hadiah man banta. Piga-piga pemere tuhu-tuhu erguna ntah pe istimewa, terlebih ka pemere e banci ngubah kegeluhenta. Contohna, bayangken kam terlibat i bas sada kejahaten. Ukumenna kematen. Tapi la isangka-sangka, lit sekalak jelma si la itandaindu nggit ngaloken ukumen e guna nggantiken kam. Ia nggit mate guna kam! Uga perasanndu nandangi pemere si istimewa enda?

⁴ Pasti igejapkenndu maka kam ikelengi. Pemere si meherga banci ngiahken kam erbahan perubahen i bas geluhndu. Banci saja, enda ngiahken kam gelah lebih melumbar mere janah ngkelengi kalak si deban bage pe ngalemi kalak si erban salah man bandu. Segedang geluhndu, kam pasti nggit ncidahken maka kam tuhu-tuhu ngataken bujur nandangi tebusen si nggo ialokenndu.

5. Engkai maka tebusen ndauh ergan asangken pemere-pemere si deban?

⁵ Tebusen ndauh ergan asangken pemere si lit i bas contoh ndai. (1 Pet. 3:18) Cuba ukuri: Adam nggo mereken warisen dosa man banta kerina, janah ukumenna kematen. (Rom. 5:12) Erkiteken ngkelengi kita, Jahwe ngutus Jesus ku doni guna manusia, ’inanamina kematen guna kerina manusia’. (Heb. 2:9) Tapi labo e saja. Erkiteken korban tebusen Jesus, kematen imasapken pagi seh rasa lalap. (Jes. 25:7, 8; 1 Kor. 15:22, 26) Kerina si erkiniteken man Jesus banci nggeluh dame janah ermeriah ukur rasa lalap, enda banci inanami kalak si jadi raja ras Jesus i surga bage pe si jadi rayat Kinirajan Dibata i doni. (Rom. 6:23; Ket. 5:9, 10) Kai pasu-pasu si deban si termasuk i bas pemere Jahwe?

6. (a) Pasu-pasu Jahwe siapai saja si itimaindu? (b) Pemere Dibata ngiahken kita guna ngelakoken kai?

⁶ Pemere Dibata si deban eme doni si jadi pardis, si sakit ipepalem, ras si mate ipekeke. (Jes. 33:24; 35:5, 6; Joh. 5:28, 29) Kita ngkelengi Jahwe ras anakNa si mereken ’pemere si la terkataken uga ulina.’ Pemere enda ngiahken kita guna ngelakoken kai? Enda ngiahken kita (1) guna ngusih Jesus Kristus asa ngasupta, (2) guna ngkelengi turang seninanta, janah (3) guna ngalemi kalak si deban i bas pusuhta nari.

7, 8. Erkiteken Kristus ngkelengi kita, enda arusna ngiahken kita ngelakoken kai?

⁷ Si pemena, tersuruh min ukurta nggunaken kegeluhenta lako nghamati Jesus. Nina rasul Paulus, ”Kekelengen Kristus ngkuasai kami.” (Oge 2 Korinti 5:14, 15.) Ieteh Paulus adi sialoken kekelengen Jesus si luar biasa, enda banci ngkuasai kita, ntah pe ngiahken kita guna ngkelengi ras nghamati Jesus. Jelas me, adi tuhu-tuhu siangkai uga kekelengen Jahwe ras kai si nggo ilakokenNa man banta, kekelengenNa  ngiahken kita nggeluh alu cara si ngena ate Jesus. Uga cara ngelakokenca?

⁸ Adi keleng ateta Jahwe, enda ngiahken kita guna ngusih Jesus ras ngikuti dalanna. (1 Pet. 2:21; 1 Joh. 2:6) Adi sipatuhi Jahwe ras Jesus, sibuktiken kekelengenta man kalak e. Nina Jesus, ”Kalak si ngaloken dingen ngikutken pedah-pedahku, ia me si engkelengi aku. Kalak si engkelengi aku ikelengi Bapangku kap ia; janah aku pe engkelengi ia ras kupetandaken diringku man bana.”​—Joh. 14:21; 1 Joh. 5:3.

9. Kai tantangen si man hadapenta?

⁹ I bas minggu-minggu Peringeten, mehuli adi sigunaken waktunta guna ngukuri uga kita nggunaken kegeluhen. Sungkun dirindu, ’I bas hal kai saja nggo kuusih Jesus? I bas bidang kai nari si perlu kutingkatken?’ Penting siukuri penungkunen enda perban ate doni enda kita nggeluh bali ras ia. (Rom. 12:2) Adi la kita metenget, banci kita ersura-sura ngusih peminpin-peminpin doni, artis-artis, bage pe bintang-bintang olah raga. (Kol. 2:8; 1 Joh. 2:15-17) Uga carana kita ngelawan tekanen e?

10. Penungkunen kai si banci sisungkun man dirinta bas minggu-minggu Peringeten, ras jabapna ngiahken kita ngelakoken kai? (Nehen gambar pemena artikel.)

¹⁰ Mehuli adi sigunaken waktunta i bas minggu-minggu Peringeten guna mperdiateken uis, film, musik, isi komputer, handphone, bage pe tabletta. Cuba sungkuni dirindu, ’Bicara ijenda Jesus janah idahna peruisku, mela nge aku?’ (Oge 1 Timotius 2:9, 10.) ’Arah peruisku teridah nge aku sekalak ajar-ajar Jesus? Nggit nge Jesus nonton film si kutonton? Nggit nge ia megiken musikku? Adi ipinjam Jesus handphone ntah pe tabletku, mela nge aku adi idahna isina? Adi isungkun Jesus kerna video game si rusur kumainken, mesera nge kuakap njabapsa?’ Kekelengenta man Jahwe arusna ngiahken kita guna ngambekken kerina si la cocok man kalak Kristen, la soal asakai ergana. (Perb. 19:19, 20) Paksa sibaktiken kegeluhenta man Jahwe, kita erjanji nggunaken kegeluhenta alu cara si nghamati Jesus. Emaka ula sibuniken kai pe si banci erban kita mesera ngusih Jesus.​—Mat. 5:29, 30; Pil. 4:8.

11. (a) Erkiteken ngkelengi Jahwe ras Jesus, enda ngiahken kita ngelakoken kai? (b) I bas minggu-minggu Peringeten, kai si banci silakoken guna nampati turang seninanta i bas runggun?

¹¹ Erkiteken ngkelengi Jesus, kita nggit erberita ras ngajari kalak si deban alu semangat. (Mat. 28:19, 20; Luk. 4:43) Banci nge aturndu dahinndu gelah banci kam merintis ekstra 30 ntah pe 50 jam i bas minggu-minggu Peringeten? Nina sekalak dilaki si nggo mbalu si umurna 84 tahun, ia la banci merintis erkiteken umur ras kesehatenna. Tapi perintis-perintis i bas daerahna nggit nampati ia. Kalak e nikapken kendaran janah milih daerah si banci idahina. Ulihna, turang seninanta enda banci merintis 30 jam. Banci nge isampatindu kalak i bas runggunndu guna merintis ekstra i bas bulan Maret ntah pe April? Memang labo kerina kalak banci merintis, tapi banci sigunaken waktu ras gegehta guna ningkatken pelayanenta man Jahwe. Adi silakoken e, bali bagi Paulus, sicidahken maka ukurta tersuruh erkiteken  kekelengen Jesus. Kai ka si banci silakoken guna ncidahken maka siergai keleng ate Dibata?

12. Erkiteken Dibata ngkelengi kita, kai si arus silakoken?

¹² Si peduaken, erkiteken Dibata ngkelengi kita arus sikelengi turang seninanta. Rasul Johanes nuratken, ”O kam si kukelengi, adi bagenda kin keleng ate Dibata man banta, kita rutang sikeleng-kelengen sapih-sapih kita.” (1 Joh. 4:7-11) Bukti sialoken keleng ate Dibata, sikelengi ka turang seninanta. (1 Joh. 3:16) Uga cara ncidahkenca?

13. Usihen kai si ibereken Jesus i bas ngkelengi kalak si deban?

¹³ Usihen si ibereken Jesus ncidahken uga cara ngkelengi kalak si deban. Paksa i doni, isampatina kalak, khususna si ngenanami kiniseran. Ipepalemna kalak si sakit, pangpangen, pentang, la erpembegi, ras si la beluh ngerana. (Mat. 11:4, 5) La bali bagi peminpin agama, meriah ukur Jesus ngajari kalak si nggit erlajar kerna Dibata. (Joh. 7:49) Ikelengina si meteruk rukur ras iusahakenna nampatisa.​—Mat. 20:28.

14. Kai si banci silakoken guna ncidahken kekelengenta man turang senina?

¹⁴ Minggu-minggu Peringeten sada kesempaten si mehuli guna nampati turang senina i bas runggun, khususna si nggo metua. Banci nge kam reh ku rumahna? Banci nge babandu sitik pangan-pangan, nampati dahin i rumahna, nikapken kendaran ku perpulungen, ntah pe erberita si meriah ras ia? (Oge Lukas 14:12-14.) Keleng ate Dibata arusna ngiahken kita guna ncidahken kekelengen man turang senina!

15. Hal penting kai si perlu siakui?

¹⁵ Si peteluken, erkiteken Jahwe ngkelengi kita, enda ngiahken kita ngalemi turang seninanta. Adam nggo mereken warisen dosa ras kematen man banta kerina emaka la lit ise pe si banci ngataken, ”Aku la perlu tebusen.” Juak-juak Dibata si setiana kal pe merluken tebusen. Utangta si mbelin  nggo isasapken. Engkai maka penting ngakui si e? Jabapna lit i bas salah sada perumpaman Jesus.

16, 17. (a) Kai si banci sipelajari i bas perumpaman Jesus kerna raja ras juak-juakna? (b) Kenca ngukuri perumpaman Jesus, kai tekadndu?

¹⁶ Jesus mereken perumpaman kerna sekalak raja si nasapken utang juak-juakna si buena 60.000.000 dinar. Tapi, juak-juak e la nggit ngalemi juak-juak si deban si rutang 100 dinar man bana. Perkuah ate raja ndai arusna ngiahken ia ngalemi temanna. Merawa kal raja paksa ibegina juak-juakna e la nggit nasapken utang temanna si kitik. Nina, ”Kam kalak jahat! Erkiteken pemindonndu, utangndu si bage buena nggo kusasapken. Kam pe aturna mekuah atendu temanndu sapih juak-juak bagi mekuah ateku kam.” (Mat. 18:23-35) Bagi raja ndai, Jahwe nggo ngalemi utangta si mbelin. Keleng ate Jahwe ras perkuah ateNa ngiahken kita ngelakoken kai?

¹⁷ Asum kita ersikap guna acara Peringeten, banci sisungkun banta, ’Pernah nge ceda ukurku ibahan sekalak turang senina? Mesera nge kuakap ngalemi ia?’ Adi bage, enda kesempaten si mehuli guna ngusih Jahwe, si ”nggit ngalemi.” (Neh. 9:17; Msm. 86:5) Adi siergai pengalemen Jahwe, kita pe nggit ngalemi kalak si deban i bas pusuhta nari. Adi la sikelengi ras sialemi turang seninanta, la banci siarapken Jahwe ngkelengi ras ngalemi kita. (Mat. 6:14, 15) Paksa ngalemi, enda la ngubah kenyatan maka ia pernah nakiti kita, tapi enda nampati kita ndatken ketenangen ras kemalemen ate.

18. Uga kekelengen Dibata nampati sekalak turang senina ngadapi kinilasempurnan turang senina si deban?

¹⁸ Maun-maun mesera siakap erurusen ras turang seninanta si la sempurna. (Oge Epesus 4:32; Kolose 3:13, 14.) Contohna, Lily, sada turang seninanta. ^[1] Ia nampati sekalak diberu si nggo mbalu gelarna Karolina. Rusur taruhkenna Karolina ku japa pe ia perlu, nampati ia belanja ras mbue denga si debanna. Amin gia bage, Karolina nggit mandangi, mekeng, janah maun-maun la menukah nampati ia. Tapi si niinget Lily eme sifat-sifat Karolina si mehuli. Enda si erbanca ia banci nampati Karolina piga-piga tahun dekahna seh Karolina sakit janah dungna mate. Amin gia mesera iakap Lily nampati Karolina, tapi nina, ”Aku nimai waktuna Karolina ipekeke. Merhat aku meteh uga ia adi nggo sempurna kari.” Jelas me, erkiteken Dibata ngkelengi kita, enda ngiahken kita guna ngelupaken kesalahen turang seninanta janah nimai waktuna paksa kerina manusia nggeluh alu sempurna.

19. ’Pemere Dibata si la terkataken uga ulina’ ngiahken kita ngelakoken kai?

¹⁹ Jahwe nggo mereken ’pemereNa si la terkataken uga ulina.’ Mbera terus siergai! Minggu-minggu Peringeten sada kesempaten si mehuli guna ngukuri kai si nggo ilakoken Jahwe ras Jesus. Mbera keleng ate kalak e ngiahken kita guna ngusih Jesus asa ngasupta, ngkelengi turang seninanta, janah ngalemi i bas pusuhta nari.