1, 2. Engkai maka itulis rasul Paulus sada surat man kalak Kristen i Heber?

I BAS tahun 61 M, runggun-runggun i bas Israel ngenanami kedamen. Amin pe rasul Paulus paksa ipenjaraken i Roma, ngarap kal ia gelah mis ibebasken. Timotius, teman seperdalanenna mbaru denga ibebasken i bas penjara nari, janah ngarap kal kalak e duana banci ndahi turang seninana i Judea. (Heb. 13:23) Lima tahun kenca si e, kalak Kristen i Judea, khususna si tading i Jerusalem arus erbahan keputusen si penting. Engkai? Jesus nggo mpebetehken man ajar-ajarna, adi nggo idah kalak e pagi Jerusalem ikepung tentera, kalak enda arus ngongsi.​—Luk. 21:20-24.

² Nggo 28 tahun dekahna kenca Jesus mereken persinget e man ajar-ajarna. I bas masa si e, kalak Kristen i Israel tetap setia amin gia ngenanami melala kiniseran ras penganiayan. (Heb. 10:32-34) Tapi ate Paulus nikapken kalak enda nandangi kai si terjadi i bas wari si pepagi. Kentisik nari kalak enda ngadapi ujian kiniteken si mbelinna kal. (Mat. 24:20, 21; Heb. 12:4) Kalak enda perlu megenggeng janah erkiniteken lebih asa si nggo-nggona gelah matuhi perentah  Jesus guna ngongsi, janah kegeluhenna tergantung man kepatuhenna. (Oge Heber 10:36-39.) Emaka ipebetehken Jahwe man Paulus guna mpersingeti turang seninana. Surat enda igelari kitap Heber, enda ibahan guna mpegegehi kalak e kerna kai si nandangi terjadi.

3. Engkai maka perlu sipelajari kitap Heber?

³ Selaku umat Dibata jaman modern, kita pe perlu mpelajari kitap Heber. Engkai? Erkiteken keadanta si gundari mirip ras kalak Kristen i Judea. Kita nggeluh i bas ’wari-wari pendungi si mbue kiniseran,’ janah melala si tetap setia i bas ngadapi percuban ntah pe tantangen. (2 Tim. 3:1, 12) Tapi enterem i bas kita ngenanami situasi si aman janah la ngenanami penganiayan. Amin gia bage, bali bagi kalak Kristen i bas jaman Paulus kita perlu erjaga-jaga. Engkai? Erkiteken kentisik nari, kita ngadapi sada ujian kiniteken si mbelinna kal!​—Oge Lukas 21:34-36.

4. Kai nge ayat tahunenta i bas tahun 2016, janah ngkai maka enda cocok?

⁴ Kai nge si banci nampati kita guna nikapken diri nandangi kai si terjadi i bas wari si pepagi? Paulus mpebetehken melala cara si banci mpegegehi kinitekenta. Salah sada persinget si pentingna kal itulis i bas Heber 13:1. Nina ayat enda, ”Tetaplah kam sikeleng-kelengen bagi kalak si ersenina i bas Kristus.” Ayat enda nggo ipilih guna jadi ayat tahunenta i bas tahun 2016.

5. Kai ertina sikeleng-kelengen bagi kalak si ersenina?

⁵ Kai ertina sikeleng-kelengen bagi kalak si ersenina? Kata enda, i bas cakap Junani nari si ertina ”kekelengen man senina.” Sikeleng-kelengen bagi kalak si ersenina eme sada perasan dame ras aman, si lit i bas keluarga ntah pe i bas teman si rembak ras kita. (Joh. 11:36) La sipekulah-kulah banta jadi turang ras senina, tapi kita tuhu-tuhu turang senina. (Mat. 23:8) Nina Paulus, ”Sikeleng-kelengenlah kam bagi si ersenina. Silebe-lebenlah kam i bas mpehaga teman.” (Rom. 12:10) Ayat e ncidahken uga belinna kekelengenta man turang seninanta. Kekelengen bagi kalak si ersenina si erpalasken prinsip-prinsip Kristen (kekelengen a·gaʹpe), nampati juak-juak Dibata gelah rembak sada ras si debanna janah ersada.

6. Menurut kalak Kristen si tuhu-tuhu ise nge ”seninanta” si arus sikelengi?

⁶ Kata ”sikeleng-kelengen bagi kalak si ersenina” rusur sioge i bas publikasi Kristenta. I bas jaman kalak Jahudi si nai, kata ”senina” rusur igunaken man keluarga janah maun-maun man kalak si labo keluarga. La pernah igunaken man kalak si la Jahudi. Tapi, selaku kalak Kristen situhu-tuhu, ”seninanta” eme kerina kalak Kristen situhu-tuhu, la soal suku kai ia. (Rom. 10:12) Jahwe merentahken kita gelah sikeleng-kelengen sada ras si debanna selaku turang ras senina. (1 Tes. 4:9) Tapi ngkai maka penting terus sikeleng-kelengen bagi kalak si ersenina?

7. (a) Engkai maka penting ncidahken kekelengen bagi kalak si ersenina? (b) Bereken alasen si deban engkai maka penting mpebelin kekelengenta man sada ras si debanna.

⁷ Alasen si penting ngkai arus sicidahken maka kita sikeleng-kelengen bagi  kalak si ersenina, erkiteken Jahwe si nuruh kita ngelakokenca. Kita la banci tuhu-tuhu ngkelengi Jahwe adi la sikelengi turang seninanta. (1 Joh. 4:7, 20, 21) Alasen si deban erkiteken kita merluken sada ras si debanna, khususna i bas masa si mesera pagi. Paksa itulis Paulus surat man kalak Kristen Heber, ietehna maka kentisik nari piga-piga i bas kalak e arus nadingken rumahna bage pe ertana. Jesus nggo nuriken uga serana pagi paksa si e. (Mar. 13:14-18; Luk. 21:21-23) Sope lenga reh kiniseran e, kalak Kristen perlu mpebelin kekelengenna man sada ras si debanna.​—Rom. 12:9.

8. Sope lenga reh kiniseran si mbelin, kai nge si perlu silakoken?

⁸ Kiniseran si mbelinna i bas sejarah manusia nandangi reh. (Mar. 13:19; Ket. 7:1-3) Emaka, perlu sipatuhi pedah enda, ”O bangsangKu, bengketlah ku rumahndu, janah erukilah man bandu. Cebuni kam lebe kentisik seh pernembeh ate TUHAN enggo ngadi.” (Jes. 26:20) ”Rumah” ertina runggun-runggun Kristenta. Ije kita banci nembah Jahwe radu ras turang seninanta. Tapi la bias reh ku perpulungen saja. Paulus mpersingeti kalak Kristen Heber gelah mpegegehi sada ras si debanna guna nehken keleng ate ras ndalanken si mehuli. (Heb. 10:24, 25) Gundari, kita perlu sikeleng-kelengen bagi kalak si ersenina lebih asa si nggo-nggona, gelah banci kita megenggeng ngadapi penganiayan si terjadi i bas wari si pepagi.

9. (a) Kesempaten kai si lit i bas kita gundari guna ncidahken maka kita sikeleng-kelengen bagi kalak si ersenina? (b) Bereken contoh uga juak-juak Jahwe ncidahken maka ia sikeleng-kelengen bagi kalak si ersenina.

⁹ Sope lenga reh kiniseran si mbelin, melala kesempatenta ncidahken maka kita sikeleng-kelengen bagi kalak si ersenina. Melala turang seninanta ngenanami kiniseran erkiteken linur, banjir, badai, tsunami, ntah pe bencana alam si debanna. Piga-piga turang seninanta ianiaya. (Mat. 24:6-9) Janah perban kita nggeluh i doni si serbut enda, kita ngenanami kesuliten ekonomi. (Ket. 6:5, 6) Tapi reh buena perbeben turang seninanta, reh buena kesempatenta i bas ncidahken kekelengenta man bana. Amin gia doni enda la ncidahken kekelengen, arus tetap sicidahken kekelengenta man turang seninanta. (Mat. 24:12) ^[1]

10. Kai si man bahasenta gundari?

¹⁰ Amin gia melala perbebenta, uga carana gelah kita tetap sikeleng-kelengen? Uga caranta mbuktiken maka sikelengi turang seninanta? Kenca ngataken, ”Tetaplah kam sikeleng-kelengen bagi kalak si ersenina i bas Kristus,” rasul Paulus nuriken piga-piga cara si banci ilakoken kalak Kristen. Gundari mari sibahas enem cara.

11, 12. Kai ertina nggit ngalo-ngalo kalak si kesilang? (Nehen gambar pemena artikel.)

¹¹ ”Ingetlah ngalo-ngalo kalak si reh kesilang ku rumahndu.” (Oge Heber 13:2.) Kai ertina nggit ”ngalo-ngalo kalak si reh kesilang”? Kata-kata e ertina ”mehuli man kalak si lenga sitandai.” Kata-kata enda ngingetken kita kempak Abraham ras Lut. Kalak e duana ncidahken kiniulin man temue si lenga itandaina. Dungna, ieteh Abraham ras Lut maka temuena enda kepeken malekat. (Kej. 18:2-5; 19:1-3) Contoh e ngiahken kalak Kristen Heber guna ncidahken kekelengen alu nggit ngalo-ngalo temue.

¹² Uga kita banci ncidahken maka  meriah ukurta ngalo-ngalo kalak si reh kesilang? Banci siundang turang ras senina reh ku rumahta guna man ras-ras ntah pe ndatken kata-kata pergegeh. Amin gia lenga sitandai kal pertua keliling ras ndeharana, paksa reh ia ku runggunta banci siundang ia ku rumahta. (3 Joh. 5-8) La perlu siban pangan-pangan si mewah si ngkeriken melala sen. Tujunta eme mpegegehi turang seninanta, labo gelah teridah mehaga. Janah tujunta ngundang kalak ku rumahta labo ngarapken balasen. (Luk. 10:42; 14:12-14) Emaka seh kal pentingna gelah ula kita sibuksa janah lupa ngalo-ngalo kalak si reh kesilang!

13, 14. Uga kita banci ’nginget kalak si sangana i bas penjara’?

¹³ ”Ingetlah kalak si i bas penjara.” (Oge Heber 13:3.) Paksa Paulus nulis kata-kata e, itujukenna man turang senina si ipenjaraken erkiteken kinitekenna. Paulus mujiken runggun e erkiteken kalak e ’ikut erceda ate ras kalak si ipenjaraken.’ (Heb. 10:34) Piga-piga turang senina nampati Paulus sedekah empat tahun ia ipenjaraken, tapi lit turang senina si ndauh bas penjara e nari. Uga kalak enda nampati Paulus? Kalak e ertoto alu tutus guna kepentingen Paulus.​—Pil. 1:12-14; Heb. 13:18, 19.

¹⁴ Gundari, melala Saksi-Saksi Jahwe ipenjaraken perban kinitekenna. Turang senina si tading ndeher ras kalak e banci langsung nampati. Tapi, nterem kita ndauh bas kalak e nari. Uga caranta nampati ras nginget ia? Kekelengen man turang senina ngiahken kita guna notoken ia. Contohna, banci sitotoken turang seninanta, bage pe anak-anak si ipenjaraken i Eritrea, misalna turang seninanta Paulos Eyassu, Isaac Mogos, ras Negede Teklemariam, si nggo 20 tahun ipenjaraken.

15. Uga kita banci ngergai perjabunta?

¹⁵ ”Kerinalah kam ngergaken perjabun.” (Oge Heber 13:4.) Kita pe banci ncidahken kekelengen man turang seninanta alu njaga lagu langkahta tetap bersih. (1 Tim. 5:1, 2) Contohna, adi kita erlua-lua ras turang ntah pe seninanta, enda banci ncedai pusuhna bage pe keluargana. Turang seninanta pe banci lanai siteken. (1 Tes. 4:3-8) Ukuri ka, uga perasan sekalak ndehara adi idapetina perbulangenna nonton pornografi. La kin banci iakapna perbulangenna lanai ngkelengi ia ras la ngergai perjabunna?​—Mat. 5:28.

16. Uga ermengkah ate banci nampati kita i bas ncidahken kekelengen man turang seninanta?

¹⁶ ”Ermengkahlah atendu asa si lit i bas kam.” (Oge Heber 13:5.) Tek man Jahwe nampati kita ermengkah ate, ertina, puas nandangi kai si lit bas kita. Uga enda nampati kita ncidahken maka kita sikeleng-kelengen bagi kalak si ersenina? Adi kita ermengkah ate, siinget maka ergan turang seninanta asangken sen ntah pe erta. (1 Tim. 6:6-8) Emaka, la kita nggit mandangi ia ntah pe la puas kerna kegeluhenta si gundari. Janah la kita percian ntah pe merangap. Sebalikna, adi kita ermengkah ate, enda erbahan kita melumbar mere.​—1 Tim. 6:17-19.

17. Uga ’melcik ukur’ nampati kita ncidahken kekelengen man turang senina?

¹⁷ ”E maka melciklah ukurta.” (Oge Heber 13:6.) Tek man Jahwe mereken gegeh banta gelah megenggeng i bas ngadapi penganiayan. Melcik ukur nampati kita rukur alu positif. Janah adi kita rukur alu positif, banci sicidahken  kekelengenta man turang senina alu mpegegehi ras ngapuli ia. (1 Tes. 5:14, 15) Amin pe i bas kiniseran si mbelin, banci kita tetap tenang janah la mbiar, perban sieteh pembebasenta nggo ndeher.​—Luk. 21:25-28.

18. Uga kita banci mpebelin kekelengenta kempak pertua-pertua?

¹⁸ ’Ingetlah peminpin-peminpin si mpeseh kata Dibata man bandu.’ (Oge Heber 13:7, 17.) Pertua-pertua i bas runggunta nggunaken waktuna erdahin alu tutus guna kita. Paksa siukur-ukuri kai si ilakokenna, kekelengen ras pengerganta pe reh belinna. La kita nggit erbahan kitik ukur pertua janah bene keriahen ukurna erkiteken perbahanenta. Sebalikna, kita patuh i bas ukurta nari. Enda me caranta ’mpehaga dingen ngkelengi ia, erkiteken dahin si idahikenna.’​—1 Tes. 5:13.

19, 20. Uga kita ncidahken keleng ate man turang senina lebih asa si nggo-nggona?

¹⁹ Saksi-Saksi Jahwe itandai erkiteken kekelengenna man turang seninana. Bagi kalak Kristen bas jaman Paulus. Tapi Paulus ngiahken kalak e ncidahken kekelengen lebih asa si nggo-nggona. Nina, ”Dalankenlah lebih asa si e.” (1 Tes. 4:9, 10) Jelas me, lit lalap kesempaten ncidahken kekelengen alu lebih mehuli!

²⁰ Emaka adi sinen ayat tahunen bas Bale Kinirajanta, banci siukuri penungkunen enda: Uga carana gelah aku lebih pertemue? Uga aku banci nampati turang seninangku si ipenjaraken? Kuergai nge perjabun si ibereken Dibata? Kai si banci nampati aku gelah lebih ermengkah ate? Uga carana gelah reh tekna aku man Jahwe? Uga carana gelah reh patuhna aku man pertua? Adi sidalanken si enem enda lebih asa si nggo-nggona, ayat tahunenta labo terjeng tulisen saja bas dingding; tapi ngingetken kita guna matuhi kata-kata Paulus, ”Tetaplah kam sikeleng-kelengen bagi kalak si ersenina i bas Kristus.”​—Heb. 13:1.