1, 2. Uga tanggapen nterem kalak kerna pendahinna?

ENTEREM erpengakap maka si erbanca ia penting ntah lang eme pendahinna. I bas piga-piga kebudayan, biasa sisungkun sanga sitandan, ”Kai dahinndu?”

² Maun-maun Pustaka si Badia mpetandaken sekalak jelma alu ngataken pendahinna. Contohna, ”Matius pengalo cuke”, ’sekalak tukang kulit, gelarna Simon’ ras ”Lukas, dokter si ikelengi kita”. (Matius 10:3; Perbahanen Rasul-Rasul 10:6; Kolose 4:14) Pustaka pe nuriken ka tugas piga-piga kalak i bas ngelayani Jahwe. Ukuri kerna Raja Daud, nabi Elia, ras rasul Paulus. Iergaina tugas si ibereken Jahwe. Kita pe, arus ka siergai tugasta i bas ngelayani Jahwe.

3. Engkai maka kalak si nggo metua perlu mere pelatihen man kalak si terngudan? (Nehen gambar i bas pemena artikel.)

³ Meriah siakap ngelayani Jahwe janah siergai tugasta. Emaka, siarapken gelah terus ngelakokenca asa  ngasupta. Tapi, adi kalak reh tuana, la banci ilakokenna kerina bagi sanga ia nguda. (Pengerana 1:4) Enda jadi tantangen man banta. Gundari pendahin erberita reh majuna, janah igunaken organisasi Saksi Jahwe teknologi modern gelah reh teremna meteh berita si meriah. Tapi, maun-maun mesera iakap si nggo metua mpelajari cara si mbaru. (Lukas 5:39) Janah asum ia reh tuana, pasti reh kurangna gegehna. (Kuan-kuanen 20:29) Erkiteken si e, perkeleng janah erguna adi si nggo metua mere pelatihen man si terngudan guna ndalanken terbuen tanggung jabap i bas organisasi Jahwe.—Oge Masmur 71:18.

4. Engkai mesera iakap piga-piga kalak mereken tanggung jabap? (Nehen kotak ”Engkai maka Mesera Mereken Tanggung Jabap”.)

⁴ Labo lalap menukah man kalak si lit tanggungjabapna mereken tanggungjabapna e man kalak si terngudan. Ngukuri kerna kebenen hak istimewa si ikelengina banci erban kitik ukurna. Banci ka ceda kal atena mereken tanggung jabap si ikelengina e. Ntah banci saja mbiar ia adi la ia si ngelakokenca la kari mehuli asilna. Selain si e, iakapna la lit waktuna mere pelatihen. Kalak si terngudan pe perlu ersabar adi lenga ibereken terbuen tanggung jabap.

5. Penungkunen kai kari sibahas i bas artikel enda?

⁵ Engkai penting man si nggo metua nampati si terngudan ndalanken terbuen tanggung jabap? Uga ia banci ngelakokenca? (2 Timotius 2:2) Janah, engkai si terngudan perlu mehuli perukurenna asum erdahin ras si nggo metua janah si nggo terbuen tanggung jabapna ras erlajar i bas ia nari? Mari sinen lebe uga Raja Daud nampati anakna i bas pendahin si seh kal pentingna.

6. Kai sura-sura Raja Daud? Kai nina Jahwe man bana?

⁶ Ertahun-tahun dekahna, Daud ianiaya janah arus pindah i bas sada ingan nari ku ingan si deban. Kenca jadi raja, tading ia i bas rumah si mejile. Emaka nina man nabi Natan, ”Genduari aku enggo ringan i bas istana si mejile, si ibahan i bas kayu aras nari tapi peti perpadanen [JAHWE] itamaken i bas kemah.” Merhat Daud mbangun rumah pertoton si mejile man Jahwe. Nina Natan bana, ”Bahanlah kai sura-surandu, sabap Dibata ras kam.” Tapi labo bage sura-sura Jahwe. IsuruhNa Natan ngerana man Daud, ”Labo kam kalakna si majekken rumah pertoton man inganku.” Aminna pe Jahwe nggo erjanji maka lalap nge Ia ras Daud, tapi ieteh Daud maka anakna pagi si mbangun rumah pertoton. Uga tanggapen Daud?—1 Kronika 17:1-4, 8, 11, 12; 29:1.

7. Uga tanggapen Daud nandangi petunjuk Jahwe?

⁷ Merhat kal Daud mbangun rumah pertoton, emaka banci saja kitik kal ukurna. Tapi, tetap idukungna  pembangunen si ilakoken Salomo pagi. Isampati Daud ngaturken kalak si erdahin janah ipepulungna besi, tembaga, pirak, emas ras kayu. La ia mbiar kerna ise pagi si ipehaga i bas pembangunen e, si dungna itandai rumah pertoton Salomo. Tapi, ipegegehina Salomo, nina, ”Genduari anakku, [JAHWE] Dibatandulah ras kam, erbahan kam berhasil majekken rumah pertoton man baNa.”—1 Kronika 22:11, 14-16.

8. Engkai maka banci saja iakap Daud adi Salomo kurang beluhna i bas mbangun rumah pertoton? Tapi kai si ilakoken Daud?

⁸ Oge 1 Kronika 22:5. Banci saja iakap Daud maka Salomo kurang beluhna ngelakoken pembangunen e. Rumah pertoton arus ”seh kal jilena” janah Salomo ”nguda denga, langa lit pengalamenna”. Tapi ieteh Daud maka isampati Jahwe nge Salomo. Emaka ilakoken Daud asa ngasupna guna nampati ia nikapken pembangunen si mbelin enda.

9. Uga kalak si nggo metua banci meriah iakapna kerna mere tanggung jabap man kalak si deban? Bereken sada anding-andingen.

⁹ Ula kitik ukur turang senina si nggo metua adi arus iberekenna piga-piga tanggung jabap man si terngudan. Sieteh maka si pentingna gundari eme pendahin Jahwe. Sampati kalak si nguda denga ndalanken tanggung jabap guna ndukung pendahin e. Ukuri enda, sanga kam kitik denga, mungkin iperdiatekenndu bapandu maba motor. Asum kam reh belinna, iturikenna kai si ilakokenna. I bas pudi wari, banci datndu SIM  janah mulai maba motor. Aminna pe bage, perlu denga bapandu mere pedah. Maun-maun kam si maba motor. Tapi adi bapandu reh tuana, kam si rusurna maba motor. Kitik nge ukur bapandu? Lang, meriah iakapna ngidah kam maba motor isampingna. Bage ka turang senina si nggo metua, meriah iakapna ngidah si terngudan si nggo ilatihna nggo banci ndalanken tanggung jabap i bas organisasi Jahwe.

10. Uga perasan Musa kerna imuliaken ras ndatken tanggung jabap?

¹⁰ Arus kita metenget gelah ula cian ateta nandangi tanggung jabap kalak si deban. Banci kita erlajar arah tanggapen Musa sanga piga-piga kalak Israel mulai ngerana bagi nabi. (Oge Bilangen 11:24-29.) Iambati Josua atena kalak e, tapi nina Musa, ”Cemburu kin kam erkiteken aku? Adi banci merincuh aku maka ibereken [JAHWE] min kesahNa man kerina bangsaNa gelah banci ngerana bagi nabi-nabi!” Ieteh Musa maka Jahwe si ngelakokenca. Asangken ndarami kemulian guna dirina, ate Musa kerina ndatken tanggung jabap. Uga kita? Meriah nge siakap adi ialoken kalak si deban tanggung jabap?

11. Kai nina sekalak turang senina kerna mere tanggung jabap man kalak si deban?

¹¹ Enterem turang seninanta tutus kal atena ngelayani Jahwe puluhen tahun dekahna, janah nggo isampatina si terngudan i bas ndalanken terbuen tanggung jabap. Contohna, mari siperdiateken turang seninanta Peter. Lit 74 tahun dekahna ia i bas dinas sepenuh waktu, janah 35 tahun i bas kantor cabang Eropa. Ndekah ia jadi pengawas Departemen Dinas. I bas pudi wari tanggung jabap e ibereken man Paul, si terngudan asangken ia si nggo isampatina. Kitik nge ukurna erkiteken perubahen enda? Lang. Nina, ”Meriah kal ukurku lit turang senina si nggo ilatih guna ngaloken tanggung jabap si terbelinen janah e ilakokenna alu mehuli.”

12. Kai si banci sipelajari arah contoh Rehabeam?

¹² Sanga Rehabeam anak Salomo jadi raja, ipindona pedah man kalak si  metua kerna uga ndalanken tanggung jabap si mbaru. Tapi itulakna pedah e! Sebalikna, ibegikenna pedah kalak si sebekbek ras ia. Akibatna seh kal kelekna. (2 Kronika 10:6-11, 19) Kai si banci sipelajari? Mehuli adi sipindo pedah kalak si nggo metua ras lebih erpengalamen. Kalak si nguda denga ula erpengakap maka si ilakokenna arus seri ras cara si mbarenda. Tapi, arus iergaina pendapat kalak si metua janah ula mis iakapna cara kalak e la cocok.

13. Uga arusna kalak si nguda denga sanga erdahin ras kalak si nggo metua?

¹³ Lit waktuna ibereken pagi tanggung jabap man si terngudan guna ngawasi pendahin kalak si nggo metua, si lebih erpengalamen. Mehuli adi erlajar ia i bas si nggo metua enda. Bagi contoh si nggo ituriken, kenca igantiken Paul tugas Peter selaku pengawas departemen i Betel, nina, ”Kupindo pedah i bas Peter nari janah kuiahken kalak si deban i bas departemen e ngelakoken si seri.”

14. Kai sipelajari i bas cara Timotius ras Paulus sanga ras-ras erdahin?

¹⁴ Timotius ndauh ngudan asangken Paulus, janah nggo ertahun-tahun dekahna kalak e ras-ras erdahin. (Oge Pilipi 2:20-22.) Nina Paulus man kalak Korinti, ”Kusuruh Timotius ndahi kam. I bas kiniteken man Tuhan ia me anakku si kukelengi dingen si setia. Ia me si mpersingeti kam kerna dalan kegeluhen si kudalanken i bas Kristus Jesus, dingen e me pe si kuajarken i bas kerina perpulungen i japa pe.” (1 Korinti 4:17) Jelas siidah maka Paulus bage pe Timotius ras-ras erdahin alu mehuli janah sisampat-sampaten. Iban Paulus waktuna ngajari Timotius ’kerna dalan kegeluhen i bas Kristus Jesus’ janah Timotius erlajar alu mehuli. Jadi ate Paulus man Timotius janah tek ia maka Timotius ermediate man turang senina i Korinti. Banci iusih pertua Paulus e asum nampati kalak si deban i bas ndalanken tanggung jabap i runggun.

15. Uga Roma 12:3-5 nampati kita sanga ngadapi perubahen?

¹⁵ Melala kal perubahen gundari. Bagin organisasi Jahwe si i doni reh majuna bas melala cara. Enda ertina lit terus perubahen. Piga-piga perubahen e mpengaruhi kita janah la menukah ndalanisa. Perlu kita meteruk ukur ras terus siukuri kai si mehuli man pendahin Kinirajan asangken ngukuri sura-suranta saja. Adi bage silakoken, tetap kita ersada. Isuratken Paulus man kalak Kristen i Roma, ”Ola iakapndu ganjangen bandu asa patutna.” Kenca si e, iturikenna, seri bagi kulanta si la seri kerina baginna,  tep-tep anggota runggun pe la seri baginna.—Roma 12:3-5.

16. Kai si banci ilakoken tep-tep kalak Kristen guna mpertahanken perdamen ras persadan i bas organisasi Saksi Jahwe?

¹⁶ Kerina umat Jahwe nggit ndukung Kinirajan janah ngelakoken kai pe si isuruh man bana. Kalak si metua banci mere pelatihen man si terngudan. Kalak si terngudan banci ndalanken terbuen tanggung jabap alu meteruk ukur ras dem pengergan. Janah turang senina ngergai dukungen ndeharana aminna pe keadanna berubah. Ndehara banci ngusih Persila si alu setia ndukung perbulangenna, Akuila.—Perbahanen Rasul-Rasul 18:2.

17. Pelatihen kai si ibereken Jesus man ajar-ajarna?

¹⁷ Ibereken Jesus contoh si mehuli kerna nggit mere pelatihen man kalak si deban. Ieteh Jesus maka perlu iterusken kalak e pendahinna. Ietehna maka ajar-ajarna la serta. Tek ia adi kalak e banci mbarken berita si meriah lebihen asa si nggo ilakokenna. (Johanes 14:12) Ilatihna ia alu mehuli, janah kalak e pe ngasup erberita ku negara ja pe ia lawes.—Kolose 1:23.

18. Pendahin kai si banci sidahiken i bas wari si pepagi? Pendahin kai sidahi gundari?

¹⁸ Kenca Jesus mate, ipekeke Jahwe ia janah iberekenna terbuen pendahin ras kuasa, i ja ”kuasa Kristus e ndauh kal ganjangen asangken kerina kuasa pemerentah ras penguasa”. (Epesus 1:19-21) Janah aminna pe kita mate selaku juak-juak Jahwe si setia ope Harmagedon, banci kita nggeluh mulihi janah melala pendahin si mehuli i bas doni si mbaru. Janah gundari silakoken pendahin si erban meriah ukurta eme erberita si meriah ras erban ajar-ajar. Emaka la soal kita nguda ntah metua, ’mejingkatlah kita rusur i bas ndahiken dahin Tuhan’.—1 Korinti 15:58.