SANGA Saul ipilih Jahwe jadi raja, Saul meteruk ukur. (1 Samuel 9:1, 2, 21; 10:20-24) Tapi kenca jadi raja, dungna meganjang ukurna. I bas sada kesempaten, ribun kalak Pilisti reh nerang kalak Israel. Ikataken nabi Samuel man Saul maka reh kari ia mere persembahen man Jahwe. Tapi, ope Samuel reh, kalak Israel mbiar janah nterem nadingken Saul. Erkiteken lanai sabar, la itimaina Samuel, Saul sendiri si mpersembahken korban. La lit hak Saul ngelakokenca, emaka merawa Jahwe bana.—1 Samuel 13:5-9.

1, 2. Engkai maka itulak Dibata Saul? (Nehen gambar i bas pemena artikel.)

² Sanga reh Samuel, ipersingetina Saul erkiteken la taat man Jahwe. Tapi la iakap Saul salah bana. Ibenarkenna dirina, janah isalahkenna si deban. (1 Samuel 13:10-14) Mulai je nari, terus Saul meganjang rukur janah la mehuli perbahanenna. Emaka itulak Jahwe ia jadi raja. (1 Samuel 15:22, 23) Tangtangna mehuli kal  kegeluhen Saul, tapi kedungenna seh kal kelekna.—1 Samuel 31:1-6.

3. (a) Uga pengakap nterem kalak kerna meteruk ukur? (b) Penungkunen kai kari sijabap?

³ Nterem kalak erpengakap maka la banci ia berhasil i bas geluhna adi meteruk ukur. Iturikenna kelebihenna gelah teridah hebaten asangken si deban. Contohna, sekalak aktor ras politikus si terkenal ngataken, ”La lit kata meteruk ukur i bas aku—Kuarap la pernah lit.” Tapi engkai kalak Kristen perlu meteruk ukur? Kai ertina meteruk ukur, janah e labo ngertiken kai? I bas artikel enda, sijabap kari penungkunen e. Janah artikel seterusna mbahas uga kita banci tetap meteruk ukur aminna pe mesera.

4. Kai ertina meganjang rukur?

⁴ Nina Pustaka si Badia meganjang rukur ertentangen ras meteruk ukur. (Oge Kuan-kuanen 11:2.) Mindo Daud man Jahwe, ”Sampati min aku gelah ula meganjang rukur.” (Masmur 19:13, Terjemahan Dunia Baru [NW].) Kai meganjang rukur e? Ngelakoken kai pe si labo hakta ntah pe wewenangta, mungkin erkiteken la sabar ntah pe sombong. Maun-maun kerina kita banci meganjang rukur erkiteken la serta. Tapi bagi sipelajari i bas contoh Raja Saul nari, adi enda jadi sada kebiasan, nembeh ate Jahwe. Nina Masmur 119:21, ”Kalak si meganjang rukur ipandang [Jahwe].” Engkai maka bage?

5. Engkai meganjang rukur sada kesalahen si mekelek?

⁵ Si pemena, adi kita meganjang rukur la siergai Jahwe, Dibata ras Penguasanta. Si peduaken adi silakoken kai si labo hakta, banci kita rusur sijabapen ntah pe la setuju ras kalak si deban. (Kuan-kuanen 13:10) Si peteluken, banci kita terluda adi ieteh kalak kita nggo melebesa. (Lukas 14:8, 9) Jelas me, banci sieteh engkai maka iarapken Jahwe kita meteruk rukur.

6, 7. Uga arusna perbahanen kalak si meteruk ukur?

⁶ Kalak Kristen si meteruk ukur la sombong. Tapi ianggapna si deban ganjangen asangken ia. (Pilipi 2:3) Isedarina lit keterbatasenna janah alu meteruk ukur iakuina kesalahenna. Nggit ia megiken pendapat ras erlajar i bas kalak nari. Ngena kal ate Jahwe kalak si bage.

⁷ Icidahken Pustaka maka kalak si meteruk ukur itandaina bana janah iakuina maka lit si la banci ilakokenna. Enda erbanca ia ngergai ras mehuli man kalak si deban.

8. Gelah tetap meteruk ukur, perukuren si uga si arus sipedauh?

⁸ Banci saja la sisedari nggo mulai meganjang caranta rukur. Uga maka banci bage? Mungkin, mulai siakap  pentingen kita asangken si deban erkiteken lit hak istimewanta ntah pe kalak si rembak ras kita. (Roma 12:16) Ntah banci saja mulai siban gelah iperdiateken rusur kita. (1 Timotius 2:9, 10) Mungkin mulai sikataken man si deban kai si arus ntah pe la arus ilakokenna.—1 Korinti 4:6.

9. Engkai piga-piga kalak jadi meganjang rukur? Bereken contoh i bas Pustaka nari.

⁹ Banci saja kita mulai meganjang rukur erkiteken la sikuasai sura-suranta si salah. Piga-piga kalak meganjang rukur erkiteken ipuji atena ia, percian, ntah pe la ikuasaina rawana. E terjadi man piga-piga kalak si ituriken i bas Pustaka, bagi Absalom, Ussia, ras Nebukadnesar. Icidahken Jahwe man kalak e maka perlu ia meteruk ukur.—2 Samuel 15:1-6; 18:9-17; 2 Kronika 26:16-21; Daniel 5:18-21.

10. Engkai la banci sihakimi kalak si deban? Bereken contoh i bas Pustaka nari.

¹⁰ Banci saja lit alasen si deban engkai maun-maun kalak la meteruk ukur. Ukuri kerna contoh Abimelek ras Petrus. (Kejadin 20:2-7; Matius 26:31-35) Meganjang rukur nge kalak enda? Ntah e ilakokenna erkiteken la ietehna uga kin situhuna, ntah erkiteken la ndauh lebe iukurina? Erkiteken la sieteh isi pusuh kalak, ula sihakimi ia.—Oge Jakup 4:12.

11. Kai si perlu siangkai?

¹¹ Kalak si meteruk ukur, iangkaina baginna i bas organisasi Dibata. Jahwe Dibata si ratur. Lit banNa kerina baginna i bas runggun. Kerina kita penting. Ibereken Jahwe banta keterampilen, bakat, ntah pe kengasupen si la seri, janah iberekenNa kita kebebasen i bas makesa. Adi meteruk ukur kita, sigunaken pemere e bagi siarapken Jahwe. (Roma 12:4-8) Sieteh maka iarapken Jahwe gelah sipake pemere e guna nghamati Ia ras si deban.—Oge 1 Petrus 4:10.

12, 13. Kai si arus siinget adi siadapi perubahen i bas ngelayani Jahwe?

¹² Asum waktu erdalan, mungkin siadapi perubahen i bas ngelayani Jahwe. Contohna, ukuri perubahen si ialami Jesus. Tangtangna, ia ngenca ras Bapana. (Kuan-kuanen 8:22) Kenca si e, isampatina Jahwe nepa malekat, alam semesta ras manusia. (Kolose 1:16) Dungna, iutus ia ku doni. Tubuh ia jadi bayi, kenca e erbelinna. (Pilipi 2:7) Kenca mate, mulihken ia ku surga, janah tahun 1914 ia jadi raja i bas Kinirajan Dibata. (Heber 2:9) Pagi, kenca merentah jadi raja seribu tahun dekahna, ibereken Jesus mulihi Kerajan man Jahwe, alu bage ”Dibata tuhu-tuhu me Dibata i bas kerinana”.—1 Korinti 15:28.

¹³ Banci saja siadapi ka melala perubahen. Mungkin tanggungjabapta berubah erkiteken keputusenta. Contohna, kita lenga erjabu tapi dungna erjabu. Ntah banci saja lit anakta. Kenca si e mungkin siban piga-piga perubahen gelah banci jadi pelayan  sepenuh waktu. I bas waktu si deban tanggungjabapta banci saja berubah erkiteken keadanta. Mungkin reh buena si banci silakoken ntah reh kurangna. Tapi la soal kita nguda ntah metua, sehat ntah sakit, ieteh Jahwe asa kai buena si banci si bereken baNa. La iarapkenNa lebih asangken si banci silakoken. Meriah kal ukurNa ngidah kai pe silakoken man baNa.—Heber 6:10.

14. Uga sifat si meteruk ukur banci nampati kita gelah puas ras ermeriah ukur i bas keadan kai pe?

¹⁴ Bagi Jesus, kita pe meriah ukurta ngaloken tugas si ibereken Jahwe. (Kuan-kuanen 8:30, 31) Kalak si meteruk ukur puas akapna nandangi tugas ras tanggungjabapna i bas runggun. La terus iukurina kai si ilakoken kalak si deban. Sebalikna, puas ia nandangi baginna i bas organisasi Dibata. Ianggapna e rehna i bas Jahwe nari. Iergaina ka si deban janah meriah iakapna ndukungsa. Isedarina maka Jahwe nge si mereken e bana.—Roma 12:10.

15. Kai si banci sipelajari i bas Gideon nari?

¹⁵ Gideon usihen si luar biasa. Sanga isuruh Jahwe ia nelamatken bangsa Israel i bas kalak Midian nari, nina Gideon, ”Terpukku kap si la megegehna i bas suku Manase, janah aku si la mehergana i bas keluarga bapangku.” (Hakim-Hakim 6:15) Tapi tek Gideon man Jahwe janah  ialokenna tugas e. Kenca ipastikenna maka tuhu-tuhu nggo iangkaina kai si ipindo Jahwe, ertoto ia mindo penampat. (Hakim-Hakim 6:36-40) Gideon megegeh ras perpang, tapi ia bijaksana ras metenget ka. (Hakim-Hakim 6:11, 27) Sanga isuruh ia jadi raja, la ia nggit. Kenca ilakokenna si isuruh Jahwe, mulih ia ku rumah.—Hakim-Hakim 8:22, 23, 29.

16, 17. Uga banci sekalak si meteruk ukur erban kemajun?

¹⁶ Adi ialoken sekalak jelma tugas si mbaru ntah pe merhat ia ngelakoken terbuen i bas runggun, labo ertina ia la meteruk ukur. Nina Pustaka maka mehuli adi nggit ngelakoken terbuen i bas ngelayani turang seninana ras erbahan kemajun. (1 Timotius 4:13-15) Tapi perlu nge lit tugasta si mbaru guna erban kemajun? Lang. Kerina kita banci mpesikap sifat-sifatta ras kengasupen si nggo ibereken Jahwe gelah banci reh ulina kita ngelayani Ia ras turang seninanta.

¹⁷ Ope ialokenna sada tugas, kalak si meteruk ukur iukurina lebe kai si ipindo i bas ia nari. Itotokenna kerna si e janah alu metenget ipertimbangkenna banci ntah lang ilakokenna. Lit denga nge waktu ras gegehna guna hal-hal penting si deban? Adi lang, banci nge piga-piga tugas e ilakoken kalak si deban? Kenca iukurina, kalak si meteruk ukur banci saja iputuskenna la ngaloken tanggung jabap e. Adi meteruk ukur kita, mungkin perlu sikataken lang.

18. (a) Kai si ilakoken kalak si meteruk ukur adi ibereken man bana tugas si mbaru? (b) Uga Roma 12:3 nampati kita gelah meteruk ukur?

¹⁸ Ate Jahwe kita ”nggeluh alu ukur meteruk”. (Miha 6:8) Emaka sanga ibereken tugas si mbaru, sidarami petunjuk i bas Ia nari janah sipindo penampatNa bagi si ilakoken Gideon. Perlu siukuri alu mbages pedah Jahwe i bas Pustaka bage pe organisasiNa nari. Siingetlah, kai pe si banci silakoken i bas ngelayani Ia, labo erkiteken kengasupenta tapi erkiteken Jahwe meteruk ukur janah nggit nampati kita. (Masmur 18:36) Kalak si meteruk ukur la ’iakapna ganjangen bana asa patutna’.—Oge Roma 12:3.

19. Engkai maka arus kita meteruk ukur?

¹⁹ Kalak si meteruk ukur ietehna maka Jahwe ngenca si patut ngaloken kerina kemulian, erkiteken Ia Si Nepa ras si Meganjangna i alam semesta. (Ketangkasen 4:11) Adi meteruk ukur kita, meriah ukurta ngelakoken kai pe i bas ngelayani Jahwe. Siergai perasan ras pendapat turang seninanta. Asilna, kerina kita ersada. Kalak si meteruk ukur manjar-anjar ia rukur ope ngelakoken kai pe, alu bage la ibanna kesalahen si serius. Ngena kal ate Jahwe kalak si meteruk ukur. Eme alasenna maka penting kal umat Dibata meteruk ukur. I bas artikel seterusna, sibahas kari uga kita banci tetap meteruk ukur aminna pe mesera.