1, 2. (a) Kai saja pendapat kalak kerna kebebasen? (b) Kai si iajarken Pustaka kerna kebebasen, janah penungkunen kai si nandangi sibahas?

SANGA erban keputusen pribadi, ikataken sekalak diberu man temanna, ”Ula ban aku rukur; kataken saja si arus kulakoken. Nukahen bage.” Ate diberu e madin kataken saja kai si ilakokenna asangken nggunaken kebebasenna, sada pemere si meherga i bas Si Nepa ia nari. Uga kam? Meriah nge iakapndu erban keputusen, ntah kalak si deban atendu erban keputusen man bandu? Uga menurutndu kerna kebebasen?

² La seri pendapat kalak kerna kebebasen. Piga-piga ngataken kebebasen e labo tuhu-tuhu lit erkiteken nggo iaturken Dibata kerina perbahanenta. Si debanna ka ngataken kebebasen e banci lit adi tuhu-tuhu kita bebas. Tapi, Pustaka si Badia ngajarken maka kita itepa alu kengasupen ras kebebasen erban pilihen pribadi si mehuli.  (Oge Josua 24:15.) I bas Pustaka lit jabapen kerna penungkunen enda: Lit nge batasna kebebasenta? Uga arusna kita nggunaken kebebasenta i bas erban keputusen? Uga keputusenta ncidahken maka tuhu-tuhu keleng ateta Jahwe? Uga banci sicidahken maka siergai keputusen kalak si deban?

3. Uga Jahwe nggunaken kebebasenNa?

³ Jahwe tuhu-tuhu bebas, janah banci kita erlajar arah caraNa nggunaken kebebasenNa. Contohna, ipilih Jahwe bangsa Israel jadi umatNa, ’bangsaNa si khusus’. (Ulangen 7:6-8) Lit alasen maka ibanNa pilihen e. Ate Jahwe nggenepi janjiNa man temanNa Abraham. (Kejadin 22:15-18) Selain si e Jahwe lalap perkeleng ras adil sanga nggunaken kebebasenNa. Banci siidah kerna si e arah caraNa mere disiplin man kalak Israel paksa kalak e la patuh. Adi tuhu-tuhu ia erkadiola, icidahken Jahwe kekelengenNa ras lias ateNa. Nina, ”BangsangKu enggo nilah, tapi Kubaba nge ia mulihi Kukelengi ia alu ukur meriah.” (Hosea 14:4) Ibereken Jahwe contoh si mehuli alu nggunaken kebebasenNa e nampati kalak si deban!

4, 5. (a) Ise si pemena ngaloken kebebasen bas Dibata nari, janah uga ia nggunakenca? (b) Penungkunen kai si arus siukuri?

⁴ Igunaken Jahwe kebebasenNa i bas nepa malekat ras manusia. Tinepa Jahwe si pemena eme Jesus. Ia itepa bagi tempas Dibata janah lit kebebasenna. (Kolose 1:15) Uga Jesus nggunaken kebebasenna? Ope reh ku doni, ipilih Jesus tetap setia man Dibata janah la ikut ras Setan guna mbrontak. Sanga Jesus reh ku doni, ipilihna nulak godan Setan. (Matius 4:10) Kenca si e, i bas berngi ope kematenna, ikatakenna man Bapana maka nggit ia ngelakoken peratenNa. Nina, ”O Bapa, adi banci pedauh min calung kiniseran enda i bas aku nari. Tapi labo peratenku, peratenNdulah jadi.” (Lukas 22:42)Banci nge siusih Jesus ras sigunaken kebebasenta i bas nghamati Jahwe ras ngelakoken peratenNa?

⁵ Ue, banci siusih Jesus erkiteken kita pe itepa bagi tempas Dibata. (Kejadin 1:26) Tapi kebebasenta la bagi Jahwe. Ituriken Kata Dibata maka ibereken Jahwe batasen man kebebasenta janah iarapkenNa gelah sialoken batasen e. Contohna, i bas keluarga, ndehara arus patuh man perbulangenna janah anak-anak pe arus patuh man orang tua. (Epesus 5:22; 6:1) Uga batasen si bage mpengaruhi caranta nggunaken kebebasen? Jabapen man penungkunen e banci nentuken kegeluhenta bas wari si pepagi.

6. Bereken contoh si ncidahken engkai maka penting lit batasen man kebebasenta.

⁶ Banci nge kita tuhu-tuhu bebas adi lit ibereken batasen? Banci! Engkai? Erkiteken batasen banci ngkawali kita. Contohna, mungkin ermotor kita ku sada kota si ndauh. Tapi bayangken la lit rambu-rambu lalu lintas, janah ate-ate kalak kerina i bas dalan e. Aman nge akapndu ermotor i bas dalan e? Pasti lang. Iperluken batasen gelah kerina ndatken manfaat. Mari sibahas piga-piga contoh i bas Pustaka si ncidahken uga batasen si ibereken Jahwe banci erguna.

7. (a) Kai perbedan Adam ras rubia-rubia? (b) Turiken sada cara Adam nggunaken kebebasenna.

⁷ Sanga itepa Jahwe dilaki si pemena, Adam, iberekenNa pemere si seri bagi si iberekenNa man malekat, eme kebebasen. Tapi la ibereken Dibata kebebasen man rubia-rubia. Uga Adam nggunaken kebebasenna alu cara si mehuli? Meriah iakap Adam mere gelar man rubia-rubia. ’Ibaba Dibata man manusia ndai gelah idahNa kai ibahan manusia gelar kerina rubia-rubia ras perik-perik e.’ Kenca iperdiateken Adam tep-tep rubia-rubia, ibereNa gelar si mehuli. La iubah Jahwe kai si nggo iban Adam. ”Bagenda me dalanna kerina rubia-rubia e ndatken gelarna.”—Kejadin 2:19.

8. Uga Adam nalahgunaken kebebasenna, janah kai akibatna?

⁸ Ibereken Jahwe tanggung jabap man Adam guna erban doni enda jadi pardis. Nina, ”Ertuahlah kam jadi nterem, demi dingen taluken doni enda, kuasai kerina nurung, perik-perik i awang-awang, bage pe kerina rubia-rubia i daraten.” (Kejadin1:28) Tapi, ipilih Adam man buah si ilarang, janah alu ngelakokenca, itulakna batasen si ibereken Jahwe man bana. Erkiteken isalahgunaken Adam kebebasenna, ribun tahun dekahna manusia ngenanami kiniseran. (Roma 5:12) Siingetlah akibat keputusen Adam. Alu bage tersuruh ukurta nggunaken kebebasen alu cara si mehuli ras ngaloken batasen si ibereken Jahwe.

9. Pilihen kai si ibereken Jahwe man umatNa, Israel, janah kai si ijanjiken kalak e?

⁹ Kerina manusia la serta janah mate erkiteken Adam ras Hawa. Tapi, banci denga sigunaken kebebasenta. Banci sieteh kerna si e arah cara Dibata mperlakoken bangsa Israel. IberekenNa pilihen man kalak e guna jadi bangsaNa si khusus. (Keluaren 19:3-6) Ipilih bangsa e jadi umat Dibata janah ialokenna batasen si ibereken Dibata. Nina, ”Nggit kami ndalanken kerina si ikataken [Jahwe].” (Keluaren 19:8) Tapi, i bas pudi wari la itepatina  janjina man Jahwe. Banci sidat sada pelajaren penting i bas contoh e nari. Mari terus siergai kebebasenta janah terus reh rembakna ras Jahwe bage pe matuhi undang-undangNa.—1 Korinti 10:11.

10. Contoh kai si lit i bas Heber pasal 11 si mbuktiken maka manusia si la serta banci nggunaken kebebasenna i bas nghamati Dibata? (Nehen gambar i bas pemena artikel.)

¹⁰ I bas Heber pasal 11, lit gelar 16 dilaki ras diberu si ngergai batasen si ibereken Jahwe. Asilna, ialokenna mbue pasu-pasu ras arapen si luar biasa i bas wari si pepagi. Contohna, megegeh kal kiniteken Nuah janah ipilihna patuh man Dibata i bas mbangun bahtera guna nelamatken keluargana ras generasi seterusna. (Heber 11:7) Abraham ras Sara nggit matuhi Dibata janah lawes ku negeri si nggo ijanjiken man bana. Aminna pe ’banci denga kalak e mulihken’ ku kota Ur, ipilihna tetap ngukuri janji Dibata kerna wari si pepagi. Nina Pustaka maka ”tedehen atena negeri si terulin”. (Heber 11:8, 13, 15, 16) Itulak Musa erta Mesir janah ipilihna ”ngenanami kiniseran ras bangsa Dibata asangken ntabeh kentisik i bas dosa”. (Heber 11:24-26) Mari siusih kiniteken kalak e ras siergai kebebasenta. Sipake e guna ngelakoken peraten Dibata.

11. (a) Kai salah sada pasu-pasu si mbelinna kerna kebebasen? (b) Kai si erbanca maka tersuruh ukurndu nggunaken kebebasen alu cara si mehuli?

¹¹ Banci saja nukahen adi kalak si deban si erban keputusen man banta. Tapi, adi bage la banci pernah sinanami salah sada pasu-pasu si mbelinna i bas kebebasen erban pilihen nari. Kai e? Ituriken Pustaka i Ulangen 30:19, 20. (Oge.) I bas ayat 19, sioge maka ibereken Dibata sada pilihen man kalak Israel. I bas ayat 20, sipelajari maka ibereken Jahwe sada kesempaten guna ncidahken uga belinna kekelengen kalak e man baNa. Kita pe banci milih nembah Jahwe janah lit ka kesempatenta nggunaken kebebasenta i bas nghamati Jahwe ras ncidahken uga belinna kekelengenta man baNa!

12. Kai arusna si la silakoken kerna kebebasen?

¹² Bayangken iberekenndu sada pemere si meherga man temanndu. Uga perasanndu adi iambekkenna, ntah pe ipakena guna mbahayaken kalak si deban? Pasti kitik kal ukurndu. Ibereken Jahwe man banta pemere eme kebebasen. Emaka pasti kitik kal ukurNa adi iidahNa isalahgunaken kalak kebebasenna e janah ipakena guna mbahayaken kalak si deban. Nina Pustaka maka i bas ”wari-wari pendungi” manusia ”la ia nggit ngataken bujur”. (2 Timotius 3:1, 2) Emaka uga banci sicidahken maka bujur kal sikataken nandangi pemere Jahwe e? Janah uga gelah ula sisalahgunaken?

13. Kai sada cara si banci erban kita la nalahgunaken kebebasen Kristenta?

¹³ Kerina kita bebas milih teman, paken, penampilen ras hiburen. Tapi,  banci saja sigunaken kebebasenta e jadi alasen i bas erban pilihen si la ngena ate Dibata ntah pe guna ngikuti mode doni enda. (Oge 1 Petrus 2:16.) Asangken nggunaken kebebasenta e i bas ngelakoken kai si salah, madin sigunaken e jadi sada kesempaten guna ”tama kemulian man Dibata”.—1 Korinti 10:31; Galati 5:13.

14. Engkai maka perlu kita tek man Jahwe sanga nggunaken kebebasenta?

¹⁴ Nina Jahwe, ”Aku kap [JAHWE] Dibatandu; Aku ngajari kam guna kiniulinndu, janah naruhken kam ku bas dalan si man dalanenndu.” (Jesaya 48:17) Perlu kita tek man Jahwe ras sialoken batasen si iberekenNa gelah banci siban pilihen si mehuli. Alu meteruk ukur siakui maka ”labo manusia si nentuken nasipna; labo manusia si engkuasai geluhna”. (Jeremia 10:23) Adam ras kalak Israel si la setia milih nulak batasen si ibereken Jahwe janah ernalem man dirina sendiri. Mari, erlajar kita i bas contoh si la mehuli e nari. Asangken ernalem man dirinta, madin ”ernalemlah man Dibata alu bulat ukur”.—Kuan-kuanen 3:5.

15. Kai si banci sipelajari arah prinsip si lit i bas Galati 6:5?

¹⁵ Arus ka siergai kebebasen kalak si deban i bas erban keputusen. Engkai? Erkiteken kerina lit kebebasenta, la lit dua kalak Kristen si lalap seri keputusenna. Enda termasuk keputusen kerna perbahanen ras ibadatta. Inget  prinsip si lit i bas Galati 6:5. (Oge.) Adi sisedari maka kerina kalak Kristen ertanggung jabap man keputusenna, banci siergai kebebasen kalak si deban i bas nggunaken kebebasenna.

16, 17. (a) Uga kebebasen jadi masalah i bas Korinti? (b) Uga Paulus nampati kalak Kristen e, janah kai pelajarenna man banta?

¹⁶ Mari sibahas sada contoh Pustaka si ncidahken engkai maka perlu siergai kebebasen turang seninanta. Kalak Kristen i bas runggun Korinti sijabapen kerna man daging si banci saja nggo ipersembahken man berhala tapi dungna idayaken i bas tiga. Pusuh peraten piga-piga kalak Kristen la terganggu man daging e erkiteken ietehna adi berhala e labo lit ertina. Tapi, kalak si pernah nembah berhala erpengakap adi man daging si bage seri saja nggo nembah berhala. (1 Korinti 8:4, 7) Enda masalah si mberat si banci ncedai runggun. Uga Paulus nampati kalak Kristen ndungi masalah enda?

¹⁷ Si pemena, iingetken Paulus kalak e adi pangan labo banci mpegegehi hubungenna ras Dibata. (1 Korinti 8:8) Kenca si e, ipersingeti Paulus gelah ula ipediat kalak e ’kebebasenna’ ngelukai pusuh peraten kalak si lemah. (1 Korinti 8:9) Dungna, ikatakenna man kalak si pusuh peratenna si lebih mbatasi maka ula iakimina kalak si man daging. (1 Korinti 10:25, 29, 30) Emaka i bas keadan si penting si lit hubungenna ras ibadat, tep-tep kalak Kristen perlu erban keputusenna sendiri. La kin arusna ka siergai kebebasen turang seninanta i bas erban keputusen pribadi, aminna pe labo i bas keadan si serius?—1 Korinti 10:32, 33.

18. Uga banci icidahkenndu maka iergaindu kebebasen si lit bas kam?

¹⁸ Ibereken Jahwe kebebasen man banta si erban kita tuhu-tuhu bebas. (2 Korinti 3:17) Siergai pemere enda erkiteken banci erban kita muat keputusen si ncidahken uga belinna kekelengenta man Jahwe. Emaka, mari terus siban pilihen si nghamati Ia, janah siergai hak kalak i bas milih uga nggunaken kebebasenna.