PAKSA e bulan November 1932 i Mexico City, kota si nterem pendudukna si lebih sada juta kalak. Sada minggu sope si e, enda me tangtangna ipasang lampu lalu lintas bas kota e. Meriah kel ukur kalak e. Tapi labo perban si e saja. Melala reporter si maba kamera bas stasion kereta api si sangana nimai tamu istimewa. Ise kin ia? Joseph F. Rutherford, presiden Lembaga Menara Pengawal. Saksi Jahwe bas kota e pe ikut nimai turang seninanta Rutherford, si reh guna ngikuti kebaktin telu wari dekahna.

Nina The Golden Age, ”Lanai isangsiken kebaktin enda jadi peristiwa si seh kel pentingna i bas sejarah” guna mpebelang kebenaren i Meksiko. Tapi enda kebaktin si kitik, 150 kalak ngenca si reh. Engkai maka ikataken seh kel pentingna?

Sope kebaktin e, lenga nterem si megi kebenaren i bas Meksiko. Mulai tahun 1919, iban me kebaktin-kebaktin si kitik, tapi piga-piga tahun kenca si e jumlah runggun reh kurangna. Sanga iban kantor cabang i Mexico City tahun 1929, tempa reh ulina keadanna, tapi lit denga piga-piga tantangen. Ipersingeti organisasi me kolportir, si gundari gelarna perintis, gelah ula erbisnis sanga erberita. Lit sada kolportir si merawa perban si e, itadingkenna kebenaren janah ibanna kelompokna guna erlajar Pustaka. Paksa e pe, arus ka iganti pengawas kantor cabang perban lit kesalahenna. Emaka, Saksi-Saksi si setia i Meksiko perlu ipegegehi.

Sanga reh Turang Seninanta Rutherford, ipegegehina kalak e alu dua khotbah si erban semangat i kebaktin, ras lima khotbah si ipeseh arah radio. Enda me si pemenana kel stasion radio igunaken bas pembarken berita si meriah i Meksiko. Kenca kebaktin e, itangkuhken me pengawas cabang si mbaru guna ngaturken pendahin i je. Gundari nggo semangat kel Saksi-Saksi e. Janah alu penampat Jahwe, banci kalak e terus erberita.

Sada tahun kenca si e, tahun 1933, lit dua kebaktin bas kota e, sada bas Veracruz sada nari bas Mexico City. Perban kerja keras turang senina i je, mehuli kel hasilna. Contohna, bas tahun 1931 lit 82 perberita. Bas tahun 1941 nggo sepuluh kali lipat buena! Lit kira-kira 1.000 kalak si reh ku Kebaktin Teokratis tahun 1941 ku Mexico City.

Bas tahun 1943, mulai me iban Saksi-Saksi iklan Kebaktin Teokratis ”Bangsa si Merdeka”, bas 12 kota i Meksiko. * (Nen keterangen tambahen.) Enda ilakoken alu papan sandwich, dua papan si galang si ipersada ras ipake bas bara, sada papan arah lebe janah sada nari arah pudi. Enda nggo ipake guna erban iklan kebaktin mulai tahun 1936.

Iklan alu make papan sandwich tuhu-tuhu berhasil bas Mexico City. Ikataken majalah La Nación kerna Saksi si reh ku kebaktin e, ”Bas wari pemena, kalak e ipindo gelah ngundang terbuen jelma. Paginna, nggo reh teremna si pulung.” Tapi segat ate Gereja Katolik ngidah si e, emaka ibanna tentangen man Saksi. Tapi turang seninanta e la mbiar. Terus ibanna iklan guna kebaktin e. Nina artikel si deban bas La Nación, ”Kerina kalak si bas kota ngidah kalak e.” Ikatakenna maka turang seninanta nggo ”berubah jadi papan iklan ’sandwich’”. Bas artikel e itama ka foto turang seninanta bas dalan i Me. Iteruh foto e lit tulisen: ”Serangen bas dalan.”

Bas tahun e, mbue Saksi si arus erban melala pengorbanen gelah banci reh ku piga-piga kebaktin i Meksiko. Enterem turang seninanta si reh bas kuta-kuta si ndauh nari, janah ndauh ka bas jalur kereta api ntah pe pasar nari. Nina sada runggun, ”Si lit i bas ingan enda eme jalur telegraf ngenca.” Emaka arus kalak e nangkih kelede ntah pe erdalan nahe piga-piga wari gelah banci nangkih kereta api ku kota kebaktin.

Buen Saksi si musil janah sitik ngenca si ngasup reh ku kebaktin. Seh kenca i je, melala si tading bas rumah Saksi si lit bas daerah e. Mehuli kel kalak e janah melumbar. Si debanna tunduh bas piga-piga Bale Kinirajan. Bas sada paksa, lit 90 turang senina si tading bas kantor cabang, janah tunduh bas kardus-kardus buku. Ikataken Buku Tahunan maka ngata bujur kel turang seninanta, perban kardus-kardus e ndauh ”sikapen janah la mbergeh bagi lante semen”.

Meriah kel ukur kalak e banci pulung ras turang seninana, sitik pe la sia-sia akapna pengorbanenna. Gundari, lit lebih 850.000 Saksi i Meksiko nggejapken si e. * (Nen keterangen tambahen.) Nina laporen bas Buku Tahunan 1949 pengorbanen si iban turang seninanta labo ngurangi semangatna i bas nembah Jahwe. Tiap dung kenca kebaktin, ”lalap icakapken kalak e kerna si e”. Mulih-ulih isungkun turang seninanta e, ”Ndigan ka kita kebaktin me?”​—I bas arsipta nari i Amerika Tengah.