1, 2. Kai si terjadi man Paulus ras Silas i Pilipi? (Nen gambar pemena artikel.)

CUBA bayangken situasi enda. Bas tengah berngi, lit dua utusen injil eme Paulus ras Silas bas penjara i Pilipi. Seh kel gelapna penjara e janah arah ujung kel. Ipasung me nahena emaka la banci ia miser. Gurungna pe dengut-dengut perban iligasi. (Perbahanen Rasul-Rasul 16:23, 24) Pagi-pagi ndai, rempet kalak e isaren gerombolen ku tiga. Isiksa me ia i je. Uisna pe icigati janah iligasi me ia alu tongkat. (Perbahanen Rasul-Rasul 16:16-22) Tuhu-tuhu la adil! Situhuna Paulus kalak Roma, arusna min ibaba ia lebe ku pengadilen. *—Nen keterangen tambahen.

² Sanga bas penjara, iukuri Paulus me kai si nggo terjadi bage pe kerna kalak Pilipi. La lit ingan kalak e ertoto bas kutana, la bagi kuta-kuta si deban si idahi Paulus. Emaka ertoto kalak e i darat kuta i tepi lau. (Perbahanen Rasul-Rasul 16:13, 14) Payo nge perban la lit sepuluh kalak Jahudi bas kuta e si erbanca la lit inganna ertoto? Megah kel akap kalak Pilipi banci jadi kalak Roma. (Perbahanen Rasul-Rasul 16:21) Mungkin enda me sabapna la isangka kalak e maka amin gia Paulus ras Silas kalak Jahudi, banci jadi nggo iakui selaku kalak Romawi. La sieteh uga pastina, tapi si pasti Paulus ras Silas ipenjaraken alu la adil.

3. Engkai maka banci saja bingung Paulus paksa ia ipenjaraken, tapi uga tanggapenna?

³ Banci saja iukuri Paulus ka uga maka banci ia seh i Pilipi. Piga-piga bulan sope si e, ia i daerah deher Laut Aegea, bas Asia Kecil. Iambati kesah si badia me ia erberita bas piga-piga daerah. Isuruhna ia erberita ku ingan si deban. (Perbahanen Rasul-Rasul 16:6, 7) Tapi ku ja? Sanga ia i Troas, datna sada pengenehenen si ngataken, ”Marilah ku Makedoni.” Enda me sura-sura Jahwe! Emaka minter berkat Paulus ku Makedoni. (Oge Perbahanen Rasul-Rasul 16:8-10.) Tapi kai si terjadi? Seh kenca ia i je, ipenjaraken me ia! Engkai maka ipediat Jahwe enda terjadi? Ngasa ndigan nge ia ipenjaraken? Banci saja tersungkun-sungkun Paulus kerna si e, tapi tetap paguh kinitekenna janah tetap ia ermeriah ukur. Janah ”ertoto dingen rende muji Dibata” ia ras Silas. (Perbahanen Rasul-Rasul 16:25) Kedamen i bas Dibata nari ngarak-ngarak pusuh ras perukuren kalak e.

4, 5. (a)I bas kai keadanta banci saja seri ras Paulus? (b) Kai si dungna terjadi man Paulus?

⁴ Pernah nge igejapkenndu uga perasan Paulus? Banci saja nggo ipindondu penampat Dibata sanga erban keputusen janah nggo iusahakenndu ngikutken bimbingen kesah si badia. Tapi kenca e, iadapindu melala tantangen ntah pe arus banndu perubahen si mbelin bas geluhndu. (Pengerana 9:11) Emaka sanga iukurindu e, banci saja tersungkun kam ngkai maka ipediat Jahwe si e terjadi. Uga carana gelah banci kam megenggeng janah tuhu-tuhu tek man Jahwe? Banci sidat jabapna alu mbahas kai si terjadi man Paulus ras Silas.

⁵ Sanga rende Paulus ras Silas, melala kejadin si la isangka-sangka terjadi. Si pemena, terjadi me linur si megegeh. Rempet talang pintu-pintu penjara. Janah nangtangen me rante si ngiket tahanen e. Kenca e, iambati Paulus me penjaga penjara si atena munuh bana. Dungna, iperidiken me penjaga penjara e ras isi jabuna. Paginna, isuruh pejabat kota me gelah Paulus ras Silas ipedarat bas penjara nari janah ipindona gelah itadingkenna kuta e. Sanga ieteh kalak e maka Paulus ras Silas kalak Roma, isedarina maka nggo salah kepe ia. Emaka ikut ia naruhken Paulus ras Silas nadingken kuta e. Tapi sope berkat, usahaken kalak e singgah ku rumah Lidia, si mbaru iperidiken. Janah ipegegehina turang senina si lit i Pilipi. (Perbahanen Rasul-Rasul 16:26-40) Rempet kerina berubah!

6. Kai si man bahasenta?

⁶ Kai si banci sipelajari i bas peristiwa e nari? Banci ilakoken Jahwe kai si la isangka-sangka, emaka la perlu aru ateta sanga siadapi percuban. Pasti ndekah kel inget Paulus pelajaren e. Enda banci sieteh perban kai si itulisna man turang senina i Pilipi kerna kearun ate ras kedamen bas Dibata nari. Bas artikel enda sibahas kari kata-kata Paulus bas Pilipi 4:6, 7. (Oge.) Kenca e, sibahas piga-piga peristiwa bas Pustaka kerna kai si ilakoken Jahwe si la isangka-sangka. Janah sibahas ka uga ”kemalemen ate si rehna i bas Dibata nari” banci nampati kita megenggeng i bas ngadapi percuban alu tuhu-tuhu tek man Jahwe.

7. Kai si iajarken Paulus bas suratna man turang senina i Pilipi, janah kai si banci sipelajari?

⁷ Sanga ioge turang senina bas Pilipi surat Paulus, kai si iinget kalak e? Banci saja ingetna kai si terjadi nandangi Paulus ras Silas janah uga Jahwe nampati alu cara si la iduga. Kai si iajarken Paulus bas suratna? Pelajarenna eme: Ula aru atendu. Ertotolah, janah gejapkenndu me ’kemalemen ate bas Dibata nari si la terukuri manusia’. Kai ertina? Lit si ngataken maka kedamen e ”ngelebihi kerina sura-suranta” ntah pe ”ngelebihi kerina rencananta”. Emaka ikataken Paulus ”kemalemen ate si rehna i bas Dibata nari” tuhu-tuhu la kel terbayangken. Paksa la sieteh uga ndungi perbebenta, Jahwe ietehNa. Janah banci ilakokenNa kai si la isangka-sangka.—Oge 2 Petrus 2:9.

8, 9. (a) Amin gia iadapi Paulus kai si la adil i Pilipi, tapi kai ulihna? (b) Engkai maka tek turang senina i Pilipi kata-kata Paulus?

⁸ Surat Paulus pastilah mpegegehi turang senina i Pilipi paksa iukurina kai si nggo ilakoken Jahwe man kalak e bas sepuluh tahun terakhir enda. Amin gia ipediat Jahwe Paulus ras Silas ngadapi kai si la adil, enda banci ”mpertahanken ras mpeteguhi berita si meriah”. (Pilipi 1:7) Lanai ate-ate pejabat bas Pilipi niksa kalak Kristen si mbaru. Janah perban ieteh kalak e maka kalak Roma kepeken Paulus, dungna Lukas pe banci tetap i Pilipi kenca Paulus ras Silas lawes jenari. Emaka banci ipegegehi Lukas kalak Kristen si mbaru i runggun Pilipi.

⁹ Sanga ioge turang senina i Pilipi surat Paulus, itehna maka kata-kata Paulus e labo pendapat pribadina saja. Tuhu-tuhu mberat percuban si iadapi Paulus. Paksa itulisna surat e, ia pe sangana jadi tahanen bas rumahna i Roma. Tapi banci icidahkenna maka igejapkenna nge ”kemalemen ate si rehna i bas Dibata nari”.—Pilipi 1:12-14; 4:7, 11, 22.

10, 11. Kai si arus silakoken paksa aru ateta? Kai si banci siteki?

¹⁰ Uga carana gelah ’ula aru ateta kerna kai pe’ tapi sigejapken ”kemalemen ate si rehna i bas Dibata nari”? Surat Paulus man kalak Pilipi mpebetehken maka adi aru ateta kerna perbebenta, tambarna eme ertoto. Emaka paksa aru ateta, turiken kearunta e bas toto. (Oge 1 Petrus 5:6, 7.) Sanga ertoto kam man Jahwe, teklah maka iperdiatekenNa nge kam. Kataken bujur man baNa kerna kerina pasu-pasu si datndu. Janah ingetlah maka kai si banci ilakoken Jahwe ”ndauh belinen asangken ngasup kita mindosa ntah pe ngukurisa”.—Epesus 3:20.

¹¹ Bali bagi Paulus ras Silas, banci saja sengget kita kerna cara Jahwe nampati kita. Banci saja labo luar biasa si ilakoken Jahwe e, tapi enda tuhu-tuhu siperluken. (1 Korinti 10:13) Tapi labo ertina sitimai saja Jahwe si mpehuli keadanta ntah pe ndungi masalahta, kita kundul-kundul saja, la perlu silakoken kai pe. Perbahanenta arus sentudu ras pertotonta. (Roma 12:11) Arah perbahanenta teridah tutus ntah lang ateta janah nggit ntah lang kita mereken kesempaten man Jahwe masu-masu usahanta. Ula kita lupa maka banci lebihen ilakoken Jahwe asangken kai sipindo ntah pe siarapken bas Ia nari. Maun-maun ilakokenNa kai si la sisangka-sangka. Emaka mari sibahas piga-piga contoh si banci mpegegehi kinitekenta maka ngasup Jahwe ngelakoken kai si la sisangka-sangka.

12. (a) Kai si ilakoken Raja Hiskia sanga iancam Raja Sanherip? (b) Kai si banci sipelajari i bas cara Jahwe ndungi masalah?

¹² Melala contoh bas Pustaka kerna perbahanen Jahwe si la isangka-sangka. Contohna, sanga Hiskia jadi raja Juda, iserang Sanherip, raja Assur, me Juda janah italukenna kerina kuta kecuali Jerusalem. (2 Raja-Raja 18:1-3, 13) Gundari iserang Sanherip atena Jerusalem. Kai si ilakoken Raja Hiskia? Si pemena, ertoto ia man Jahwe mindo penampat janah ipindona pedah arah nabi Jahwe nari eme Jesaya. (2 Raja-Raja 19:5, 15-20) Kenca e, lit usaha Hiskia eme nggalari kai si ipindo Sanherip. (2 Raja-Raja 18:14, 15) Selain e, isikapken Hiskia kuta e bicara ndekah kari ikepung. (2 Kronika 32:2-4) Kai dungna si terjadi? Isuruh Jahwe me sada malekat ngkernepken 185.000 tentera Sanherip i bas sada berngi. Tuhu-tuhu la isangka-sangka Hiskia!—2 Raja-Raja 19:35.

13. (a) Pelajaren kai si banci sidat arah kai si terjadi bas Jusup? (b) Kai si la isangka-sangka Sara terjadi?

¹³ Perdiateken kai si terjadi nandangi Jusup. Sanga kundul ia bas penjara i Mesir, pasti la terbayangkenna ia jadi kalak nomor dua si mbelinna kuasana i Mesir. Janah la ka terbayangkenna maka ia me si igunaken Jahwe nelamatken keluargana bas kelihen nari. (Kejadin 40:15; 41:39-43; 50:20) Pastilah kai si ilakoken Jahwe e la terukuri Jusup. Cuba ka ukuri nini Jusup eme Sara. Iakap Sara arah juak-juakna si diberu saja ngenca banci lit anakna. Pasti la isangkana banci iban Jahwe ipupusna Isak i bas umurna si nggo metua.—Kejadin 21:1-3, 6, 7.

14. Kai si banci ibere Jahwe?

¹⁴ La banci siarapken gelah imasapken Jahwe kerina perbebenta alu mukjizat sope reh doni si mbaru. Janah la ka banci sipaksa Jahwe ngelakoken kai si luar biasa bas geluhta. Tapi sieteh maka isampati Jahwe juak-juakNa si setia bas jaman si nai alu cara si luar biasa. Janah ia lenga berubah. (Oge Jesaya 43:10-13.) Emaka tek kita man baNa. Tek kita maka pasti ibereNa gegeh guna ngelakoken peratenNa. (2 Korinti 4:7-9) Kai si banci sipelajari bas Hiskia, Jusup, ras Sara nari? Adi tetap kita setia man Jahwe, banci isampatiNa kita amin gia mberat kel masalahta.

15. Amin gia siadapi perbeben, uga carana gelah banci sigejapken ”kemalemen ate si rehna i bas Dibata nari”? Uga enda banci terjadi?

¹⁵ Uga carana gelah banci sigejapken ”kemalemen ate si rehna i bas Dibata nari” amin gia ngadapi perbeben? Perlu siusahaken gelah tetap kita rembak ras Jahwe. Banci kita erteman ras Jahwe erkiteken korban tebusen Jesus Kristus. Tebusen eme salah sada pemere Jahwe si luar biasa. Erkiteken tebusen, banci ialemiNa dosa-dosanta, pusuh peratenta banci bersih, janah banci rembak ras Dibata.—Johanes 14:6; Jakup 4:8; 1 Petrus 3:21.

16. Kai ulihna adi sialoken ”kemalemen ate si rehna i bas Dibata nari”? Ban anding-andingenna.

¹⁶ Kai ulihna adi sialoken ”kemalemen ate si rehna i bas Dibata nari, si la terukuri manusia”? Ikataken Pustaka maka ia me si ”ngarak-ngarak” pusuh ras perukurenta. (Pilipi 4:7) Kata ”ngarak-ngarak” iterjemahken bas istilah militer nari si ertina terpuk tentera si itugasken guna njaga sada kuta. Terpuk enda me si njaga kalak si tading i Pilipi. Banci ntabeh pertunduh kalak e perban ietehna lit si njagai kutana. Bage ka pe kita, adi sialoken ”kemalemen ate si rehna i bas Dibata nari”, lanai perlu aru ateta janah pusuh ras perukurenta pe banci tenang. Sieteh maka iperdiateken Jahwe kita janah ateNa gelah kita berhasil. (1 Petrus 5:10) Emaka lanai aru ateta ntah pe kitik ukurta.

17. Engkai maka banci kita tek man Jahwe paksa reh kiniseran si mbelin?

¹⁷ Kentisik nari reh me kiniseran si mbelin. (Matius 24:21, 22) La sieteh pastina kai si terjadi man banta sekalak-sekalak. Tapi, ula aru kel ateta kerna si e. Amin gia la sieteh kai kari si ilakoken Jahwe, tapi sieteh uga Ia. Sieteh kai si nggo ilakokenNa mbarenda man juak-juakNa si setia. Sieteh maka la soal kai si terjadi, pasti nge isehken Jahwe sura-suraNa. Janah banci saja ilakokenNa alu cara si la isangka-sangka! Emaka, tiap isampati Jahwe kenca kita, enda me cara si mbaru sigejapken ’kemalemen ate bas Dibata nari, si la terukuri manusia’.