1, 2. a) Janari banci sieteh maka ngasup kita make manusia si mbaru? (b) Kai sifat-sifat manusia si mbaru i bas Kolose 3:​10-​14 si man bahasenta?

I BAS Alkitab Terjemahan Dunia Baru, lit dua kali ipake kata ”manusia si mbaru”. (Epesus 4:​24; Kolose 3:​10) Ertina eme sifat-sifat si ”itepa rikutken tempas Dibata”. Ngasup nge kita make manusia si mbaru e? Ngasup. Itepa Jahwe kita sentudu ras tempasNa, pasti ngasup kita ngusih sifat-sifatNa.​—Kejadin 1:​26, 27; Epesus 5:1.

² Payo, perban kita la sempurna, lit rusur sura-suranta si salah. Janah banci ka kita ipengaruhi kalak. Tapi alu penampat Jahwe, banci kita jadi kalak si ngena ateNa. Guna nampati kita ngelakokenca, mari sibahas piga-piga sifat manusia si mbaru. (Oge Kolose 3:​10-​14.) Kenca e, sibahas ka uga caranta ncidahken sifat-sifat e i bas pelayanenta.

3. Kai salah sada sifat manusia si mbaru?

³ Ituriken Paulus maka sifat si la rayo-ayo sada bagin si penting i bas manusia si mbaru. Nina, ”Lanai bo erndobah kalak Jahudi ntah la kalak Jahudi, si ersunat ntah la ersunat; lanai erndobah suku-suku asing, kalak Sekyt si ianggap hina, budak ntah bebas.” * (Nen keterangen tambahen.) Emaka i bas runggun, ula min lit si erpengakap maka ulin ia asangken si deban perban sukuna, bangsana, ntah pe jabatenna i bas masarakat. Engkai? Perban selaku pengikut Kristus, ’kerina nge kita sada’.​—Kolose 3:​11; Galati 3:​28.

4. (a) Uga arusna perbahanen umat Jahwe man kalak si deban? (b) Keadan kai si banci erban kalak Kristen lanai ersada?

⁴ Adi sipake manusia si mbaru, siergai kerina kalak la soal suku ras kalak si uga ia. (Roma 2:​11) I bas piga-piga daerah, mesera ngelakokenca. Contohna, i bas Afrika Selatan, ipeserap pemerentah ingan tading kalak si beda suku. Enterem kalak si tading bas daerah e, Saksi Jahwe pe lit. Emaka, iahken Badan Pinpinen turang seninanta e gelah mediate man turang senina si deban. Kenca si e, bas Oktober 2013, iaturken me gelah turang seninanta si beda suku enda banci itandaina si deban terdeheren.​—2 Korinti 6:​13.

5, 6. Pengaturen kai si iban bas sada kota guna nampati umat Dibata gelah reh kompakna? (Nen gambar pemena artikel.) (b) Kai ulihna?

⁵ Iaturken turang seninanta gelah dua runggun si beda cakap ras suku e banci pulung ras-ras bas piga-piga minggu. Ras-ras ia erberita, perpulungen, janah isempatkenna reh ku rumah turang senina si deban. Lit ratusen runggun si ikut bas pengaturen e, janah melala laporen si mehuli seh ku kantor cabang. Kalak si labo Saksi Jahwe pe ipujikenna kita. Contohna, nina sekalak pelayan bas agama si deban, ”Aku labo Saksi, tapi adi menurutku luar biasa pengaturen kena i bas erberita, janah kompak kel kena amin gia bas erbage suku nari.” Uga tanggapen turang seninanta kerna pengaturen enda?

⁶ Tangtangna, sangsi sekalak turang seninanta i bas cakap Xhosa, gelarna Noma ngundang sekalak Saksi i bas runggun cakap Inggris guna reh ku rumahna si sederhana. Tapi kenca erberita ia ras turang senina si kalak Barat janah reh ku rumah kalak e, lanai ia sangsi. Nina, ”Kalak e pe seri nge ras kita!” Emaka, sanga turang senina i bas runggun cakap Inggris reh ku runggun cakap Xhosa guna ras-ras erberita, iundang Noma piga-piga kalak man ku rumahna. Mamang kel atena sanga idahna sekalak pertua si kalak Barat, nggit kundul bas keranjang plastik. Perban acara e, nterem turang seninanta ndatken teman si mbaru janah reh kompakna ras kalak si beda suku ras ia.

7. Engkai maka kita perlu lalap ermediate?

⁷ Sope reh doni si mbaru, umat Jahwe pasti denga ngadapi masalah. Mesera ndarami dahin, kena pinakit, isiksa, kena mara, itipu kalak, ntah pe tantangen si debanna. Gelah banci sisampat-sampaten, arus kita ermediate man kalak si deban. Adi ermediate kita banci kita mehuli man kalak si deban. (Epesus 4:​32) Sifat-sifat enda bagin i bas manusia si mbaru. Enda banci nampati kita ngusih Dibata janah ngapuli kalak si deban.​—2 Korinti 1:​3, 4.

8. Kai ulihna adi ermediate ras mehuli kita man kerina kalak i bas runggun? Bereken contohna.

⁸ Banci saja lit turang seninanta si mbaru pindah ku runggunta ntah si la lit senna. Uga kita nampati ia? Ermediate kita man bana, nggit kita jadi temanna, janah sibanlah gelah ietehna maka iperluken ia bas runggun e. (1 Korinti 12:​22, 25) Contohna, Dannykarl si pindah Filipina nari ku Jepang. Perban la ia kalak Jepang, la diate teman-teman sada dahinna ia. Kenca e reh ia ku perpulungen Saksi Jahwe. Nina Dannykarl, ”Kerina nge kalak Jepang kuidah i je, tapi ermediate kel ia bangku, bagi nggo ndekah kami sitandan.” Turang senina si mehuli e me si erbanca ia nggit erlajar kerna Jahwe. Kenca e iperidiken me ia, janah gundari ngelayani jadi pertua. Meriah kel iakap pertua si deban perban Dannykarl ras ndeharana eme Jennifer lit bas runggun e. Nina, ”Sederhana kel kegeluhen kalak e selaku perintis, janah jadi contoh si mehuli i bas ndarami lebe Kinirajan Dibata.”​—Lukas 12:31.

9, 10. Bereken contoh kerna hasil si mehuli adi kita ermediate sanga erberita.

⁹ Kerina kita lit kesempatenta ”mehuli man kerina manusia” sanga erberita si meriah. (Galati 6:​10) Melala Saksi mekuah atena ngenen kalak si terpaksa pindah ku negara si deban, emaka iusahakenna mpelajari cakap kalak e. (1 Korinti 9:​23) Janah mehuli hasilna. Contohna, sekalak perintis i Australia gelarna Tiffany. Ipelajarina cakap Swahili guna nampati runggun Swahili bas kuta Brisbane. Amin gia mesera kel mpelajari cakap e, semangat ia, perban enda banci nampati kalak. Nina Tiffany, ”Gelah reh riahna akapndu erberita, cubakenndulah ngelayani bas runggun cakap si deban. Enda bali bagi gawah-gawah ku kuta si deban tapi la perlu nadingken kutanta. Banci idahndu persadan turang seninanta sebelang doni, janah enda bagi mukjizat perban kerina banci ersada.”

¹⁰ Enda ka si ilakoken sada keluarga i Jepang. Nina anakna si diberu gelarna Sakiko, ”Paksa erberita, rusur kami jumpa ras kalak Brasil. Sanga icidahken kami Ketangkasen 21:​3, 4 ntah pe Masmur 37:​10, 11, 29 bas Alkitab cakap Portugis, tuhu-tuhu kel iperdiatekenna janah maun-maun tangis ia.” Mekuah ate keluarga e ngenen kalak Brasil si pindah ku negarana janah isampatina atena kalak e erlajar Pustaka. Emaka, ipelajari keluarga e cakap Portugis. Kenca e, ikut ia nampati erban runggun cakap Portugis. Ertahun-tahun dekahna isampatina kalak si pindah ku negarana gelah jadi Saksi Jahwe. Nina Sakiko, ”Memang perlu perjuangen mpelajari cakap Portugis enda, tapi belinen lalap pasu-pasuna asangken pengorbanenta. Bujur kel ningkami man Jahwe.”​—Oge Perbahanen Rasul-Rasul 10:​34, 35.

11, 12. (a) Engkai maka arus mehuli tujunta makeken manusia si mbaru? (b) Uga carana gelah tetap meteruk rukur?

¹¹ Tujunta makeken manusia si mbaru eme guna muji Dibata Jahwe, labo gelah ipuji kalak. Ingetlah, malekat si sempurna pe banci dungna sombong janah erdosa, terlebih ka kita si la sempurna. (Bandingken Esekiel 28:17.) Emaka, tetaplah kita meteruk rukur, ula pernah tadingken sifat e. Uga carana?

¹² Salah sada carana gelah kita meteruk rukur eme mbaca ras ngukuri Pustaka tiap wari. (Ulangen 17:​18-​20) Khususna perlu siukuri kai si ajarken Jesus man banta bage pe kerna perbahanenna si meteruk rukur. (Matius 20:28) Misalna kerna Jesus si nggit mburihi nahe ajar-ajarna. (Johanes 13:​12-​17) Cara si deban eme ertoto man Jahwe mindo kesahNa si badia. Adi mulai lit perasanta maka ulin kita asangken si deban, kesah si badia banci nampati kita ngelawansa.​—Galati 6:​3, 4; Pilipi 2:3.

13. Kai saja gunana adi kita meteruk rukur?

¹³ Oge Kuan-kuanen 22:4. Ate Jahwe gelah kita meteruk rukur. Melala kel gunana adi kita meteruk rukur. Misalna, runggun banci reh damena janah reh kompakna. Janah kita pe keleng ate Jahwe. Nina rasul Petrus, ”Alu meteruk ukur erbentingkibullah kam kerina guna sisampat-sampaten. Sabap i bas Pustaka si Badia lit tersurat, ’Kalak si meganjang ukurna itulak Dibata, tapi man kalak si meteruk ukurna icidahkenNa lias ateNa.’”​—1 Petrus 5:5.

14. Ise usihen si mehulina i bas ncidahken sifat si melias ras sabar?

¹⁴ Gundari, melala kalak ngatakenca maka kita lemah adina kita melias ras sabar. Tapi e labo tuhu. Sifat-sifat si mejile ndai rehna i bas Jahwe nari, Dibata si Mada Kuasa. Ia usihen si mehulina i bas ncidahken sifat si melias ras sabar. (2 Petrus 3:9) Contohna, sabar Jahwe paksa njabap penungkunen Abraham ras Lut erkelangken malekatNa. (Kejadin 18:​22-​33; 19:​18-​21) Janah pasti sabar kel Jahwe man kalak Israel si la patuh lebih 1.500 tahun.​—Esekiel 33:11.

15. Kai buktina Jesus e melias dingen sabar?

¹⁵ Jesus ”melias”. (Matius 11:29) Sabar kel ia ngadapi kekurangen ajar-ajarna. I bas pelayanenna i doni, rusur ia ipandangi janah ituduh kalak. Tapi tetap ia melias dingen sabar seh ngasa mate. Paksa mesui kel iakap Jesus bas tiang inganna ipakuken, ipindona gelah ialemi Bapana kalak si niksa ia. Nina Jesus, ”La iangkana kai si ibahanna.” (Lukas 23:34) Amin gia paksa si e mesui akap Jesus ras latih akapna rukur, tetap ia melias dingen sabar.​—Oge 1 Petrus 2:​21-​23.

16. Kai buktina kita melias dingen sabar?

¹⁶ Ituriken Paulus kai buktina adi kita melias ras sabar. Nina, ”Ola kam pergelut dingen sialem-alemen salah adi kitik ukurndu ibahan kalak. Kam arus sialem-alemen salah bagi [Jahwe] enggo ngalemi salahndu.” (Kolose 3:​13) Gelah banci sialemi kalak si deban, arus kita melias dingen sabar. Enda erban runggun kompak janah terus reh kompakna.

17. Engkai maka penting kel sifat melias dingen sabar?

¹⁷ Ate Jahwe gelah melias dingen sabar kita man kalak si deban. Sifat enda penting kel adi nggeluh ateta bas doni si mbaru. (Matius 5:5; Jakup 1:​21) Adi melias dingen sabar kita, sipuji Jahwe janah kita pe nampati kalak si deban gelah ikut muji Ia.​—Galati 6:1; 2 Timotius 2:​24, 25.

18. Adi keleng ateta kalak si deban la kita rayo-ayo. Engkai maka bage?

¹⁸ Sifat-sifat si nggo sibahas ndai kerina lit hubungenna ras kekelengen. Contohna, ipersingeti Jakup turang seninana gelah ula beda perbahanenna ku kalak si bayak ras si musil. Perban enda la sentudu ras perentah Dibata eme ”kelengilah temanndu manusia bagi kam ngkelengi dirindu”. Janah ikatakenna ka ”Adi rayo-ayo kam, erdosa kam.” (Jakup 2:​8, 9) Adi keleng ateta kalak si deban, ula mis sipandangi ia perban pendidikenna, sukuna, ntah pe kedudukenna. Ula min sipekulah-kulah maka kita la rayo-ayo. Tapi arus min bas pusuhta nari kita la rayo-ayo.

19. Engkai maka penting ncidahken kekelengen?

¹⁹ Kalak si erkeleng ate ”megenggeng, mehuli” janah ”la sombong”. (1 Korinti 13:4) Gelah banci erberita si meriah man kalak si deban kita perlu megenggeng, mehuli, bage pe meteruk rukur. (Matius 28:19) Sifat-sifat enda erbanca kita reh kompakna ras kerina turang senina bas runggun. Adi sikeleng-kelengen kita, runggunta banci ersada janah gelar Jahwe pe ipuji. Paksa idah kalak kita kerina ersada, enda banci ngiahken ia erlajar Pustaka. Emaka cocok ituriken Pustaka kerna manusia si mbaru e, ”I babo si e kerina, arus kam sikeleng-kelengen sabap keleng ate mpersadaken kerinana alu serta.”​—Kolose 3:​14.

20. (a) Penungkunen kai si perlu sisungkun man dirinta? Engkai? (b) Kai si man timanta bas doni si mbaru?

²⁰ Perlu sisungkun banta, ’Kai nari si perlu kulakoken guna nangtangi manusia si male ras nadingkenca?’ Arus kita ertoto man Jahwe mindo penampatNa. Siusahaken kel mperobahi perukuren ntah pe perbahanen si salah gelah banci kita ”dat bagin i bas Kinirajan Dibata”. (Galati 5:​19-​21) Janah perlu ka sisungkun banta, ’Kupehuli nge lalap caraku rukur gelah ngena ate Jahwe?’ (Epesus 4:​23, 24) Perban kita la sempurna, perlu kita terus erjuang guna make manusia si mbaru janah ndigan pe ula sitangtangi. Perjuangenta enda la erngadi-ngadi. Meriah kel ukurta pagi paksa kerina kalak nggo make manusia si mbaru janah ngusih sifat-sifat Jahwe alu sempurna!