Cataten Matius kerna ketubuhen ras masa danak-danak Jesus la seri ras cataten Lukas. Enda terjadi perban la seri perukuren ras pengalamen kalak si ituriken tep-tep penulis e.

Buku Matius nuriken kerna kejadin si lit hubungenna ras Jusup. Misalna kerna tanggapen Jusup sanga ibegina mehuli kula Maria, nipina kerna malekat si nuriken kai si paksana terjadi, ras uga ia ngikutken petunjuk malekat. (Matius 1:​19-​25) Iturikenna ka uga sada malekat mpersingeti Jusup bas nipi gelah kiam ku Mesir radu ras keluargana bage pe uga ia matuhisa. Kenca si e, ipebetehken Matius nipi Jusup si deban kerna isuruh malekat ia mulihken ku Israel. Mulih me Jusup ras keluargana janah tading i Nasaret. (Matius 2:​13, 14, 19-​23) I bas dua pasal pemena Injil Matius, lit waluh kali itulisken gelar Jusup, tapi Maria empat kali ngenca.

Tapi, si mbue ituriken bas buku Lukas eme kerna Maria. Misalna iturikenna uga malekat Gabriel ndahi Maria, uga Maria ndahi kade-kadena eme Elisabet, bage pe kerna kata-katana i bas muji Jahwe. (Lukas 1:​26-​56) Iturikenna ka kai si ikataken Simeon man Maria kerna kiniseran si iadapi Jesus pagi. Selain si e, ituriken Lukas kerna peristiwa sanga Jesus reh ku rumah pertoton radu ras keluargana paksa umurna 12 tahun. I bas kejadin enda pe, si icatat Lukas kata-kata Maria, labo kata-kata Jusup, janah icatatna ka uga perasan Maria paksa si e. (Lukas 2:​19, 34, 35, 48, 51) I bas dua pasal si pemena Injil Lukas, lit 12 kali itulisken gelar Maria, tapi gelar Jusup 3 kali ngenca. Jadi si ituriken Matius buen kerna perukuren ras perbahanen Jusup. Tapi, si ituriken Lukas buen kerna perukuren ras pengalamen Maria.

Bas dua Injil enda pe la seri carana nuriken kerna garis kesusuren Jesus. Si ituriken Matius i bas garis kesusuren Jusup nari. Enda mbuktiken maka selaku anak angkat Jusup, lit hak Jesus secara hukum i bas pemerentahen Daud. Engkai maka bage? Erkiteken Jusup e kesusuren Raja Daud arah anakna eme Salomo. (Matius 1:​6, 16) Tapi, si ituriken Lukas i bas garis kesusuren Maria nari. Enda mbuktiken maka lit hak Jesus secara keturunen bas pemerentahen Daud perban ”tubuh arah kesusuren Daud”. (Roma 1:3) Engkai maka bage? Perban Maria e kesusuren Raja Daud arah anakna eme Natan. (Lukas 3:​31) Bapa Maria eme Eli, tapi ngkai la icatat Lukas maka Maria e anak Eli? Biasana si itama bas cataten resmi keluarga eme gelar dilaki saja. Emaka sanga itama Lukas gelar Jusup janah ikatakenna ia anak Eli, ieteh kalak maka maksudna Jusup e kela Eli.​—Lukas 3:23.

Garis kesusuren Jesus si lit bas Injil Matius ras Lukas mbuktiken maka Jesus e Mesias si ipadanken Dibata. Enterem kel kalak si meteh maka Jesus e kesusuren Raja Daud, kalak Parisi ras Saduki pe la banci ipersokenna si e. Garis kesusuren Jesus si icatat Matius ras Lukas banci mpegegehi kinitekenta, janah banci erban kita reh tekna maka kerina janji Dibata pasti terjadi.