ISURUH Jahwe rasul Paulus nuratken siwah sifat si mehuli ulih kesah si badia. (Galati 5:​22, 23) Sifat-sifat si mehuli enda, sigelari ka ”ulih kesah si badia”. * (Nen keterangen tambahen.) Sifat-sifat enda pe arus lit i bas kalak Kristen si nggo make ”manusia si mbaru”. (Kolose 3:​10) Bagi batang kayu si lit i deher lau pasti mejile buahna, bage ka pe alu penampat kesah si badia banci sipebelin sifat-sifat si mehuli e bas kegeluhenta.—Masmur 1:​1-3.

Sifat si pemena si itulisken Paulus eme kekelengen. Engkai maka enda sifat si meherga? Nina Paulus adi la lit kekelengen, ”sia-sia me” ia. (1 Korinti 13:2) Tapi kai kin kekelengen e, janah uga banci sipebelin ras sicidahken tiap wari?

Amin gia mesera nurikenca erti kekelengen, tapi ituriken Pustaka uga kin perukuren ras perbahanen kalak si lit kekelengenna. Contohna, kalak si perkeleng ”megenggeng, mehuli” janah ”ermeriah ukur i bas si benar”. Jelma si erkeleng ate, ”ngasup nggengken kai-kai pe, tek maka lit si mehuli bas kerinana, tetap erpengarapen dingen saber i bas kai-kai pe”. Pasti keleng atena kalak, ermediate, ras setia man temanna. Tapi kalak si la perkeleng, biasana sifatna percian, tual, perampus, egois, ras la nggit ngalemi. La kita nggit jadi kalak si bage, perban siusahaken ateta ncidahken kekelengen si tuhu-tuhu si ”la ncariken untung man bana saja”.—1 Korinti 13:4-8.

”Dibata kekelengen kap”. (1 Johanes 4:8) Kerina perbahanenNa erpalasken kekelengen. KekelengenNa si mbelinna man manusia eme paksa iutusNa Jesus ku doni mate guna banta. Nina rasul Johanes, ”Dibata enggo ncidahken kekelengenNa man banta alu nuruh AnakNa si tonggal ku doni enda, gelah kita nggeluh arah ia. Enda me kekelengen e: labo kita si enggo ngkelengi Dibata, tapi Ia nge si ngkelengi kita. Emaka isuruhNa AnakNa ku doni enda gelah arah ia kita iperdameken ras Dibata alu ngalemi dosa-dosanta.” (1 Johanes 4:​9, 10) Perban keleng ate Dibata kita, nggit Ia ngalemi dosanta janah lit arapenta nggeluh rasa lalap.

Ibuktiken Jesus kekelengenna man manusia alu nggit mereken kegeluhenna guna ngelakoken peraten Dibata. Nina rasul Paulus, ”Arah peraten Dibata kita enggo bersih i bas dosa nari, erkiteken Jesus Kristus enggo mpersembahken kulana sekali saja ngenca.” (Heber 10:​9, 10) La lit kekelengen si bage belinna si pernah icidahken manusia. Nina Jesus, ”Labo lit keleng ate si belinen asangken keleng ate kalak si nggit ngasamken kesahna guna teman-temanna.” (Johanes 15:13) Banci nge iusih manusia si la sempurna kekelengen si nggo icidahken Jahwe ras Jesus? Banci! Mari sinen uga carana.

Iiahken Paulus kita, ”Geluhndu arus erpalasken keleng ate, bagi Kristus enggo engkelengi kita, dingen ngendesken kesahna man gunanta.” (Epesus 5:​1, 2) Kai ertina ’nggeluh arus erpalasken keleng ate’? Enda ertina arus kita ngkelengi katawari paksa pe. Labo bas cakap saja. Tapi sicidahken arah perbahanenta. Nina Johanes, ”O anak-anakku, kekelengenta ola terjeng biber saja ntah pe i bas cakap saja ngenca. Arus maka tuhu-tuhu kekelengenta e, si teridah arah perbahanenta.” (1 Johanes 3:​ 18) Contohna, sibuktiken kekelengenta man Jahwe ras kalak si deban alu mbarken ”berita si meriah kerna Kinirajan”. (Matius 24:14; Lukas 10:27) Adi sabar kita, melias dingen ngalemi, enda ertina kita ’nggeluh erpalasken keleng ate’. Sipakeken pedah Pustaka si ngataken, ”Kam arus sialem-alemen salah bagi [Jahwe] enggo ngalemi salahndu”.​—Kolose 3:​13.

Adi sipersingeti kalak si deban, labo ertina la keleng ateta ia. Contohna, piga-piga orang tua mis iberekenna kerina pemindon anakna gelah ngadi ia ngandung. Tapi orang tua si tuhu-tuhu perkeleng, iajarkenna anakna. Dibata pe bage, ’iajarkenNa kalak si ikelengiNa’. (Heber 12:6) Jadi mereken persinget paksa iperluken enda pe sada bukti kekelengen. (Kuan-kuanen 3:​11, 12) Perlu siinget, la menukah ngelakokenca perban kita kerina nggo erdosa. Emaka, perlu terus siusahaken mpebelin kekelengenta. Uga caranta ngelakokenca? Mari sinen telu carana.

Si pemena, pindolah kesah si badia nampati kam mpebelin kekelengen. Nina Jesus ibereken Jahwe ”Kesah si badia man si mindo man baNa”. (Lukas 11:13) Kekelengenta banci reh belinna adi ertoto kita mindo penampat kesah si badia. (Galati 5:​16) Contohna, adi kam sekalak pertua, banci ipindondu kesah si badia nampati kam mereken persinget arah Pustaka alu kekelengen. Adi kam sekalak orang tua, banci ipindondu kesah si badia nampati kam ngajarken anakndu alu kekelengen labo alu merawa.

Si peduaken, ukuri alu mbages uga Jesus mbuktiken kekelengenna paksa ia ianiaya. (1 Petrus 2:​21, 23) Paksa iganggu kalak kam ntah pe la mehuli perbahanenna bandu, sungkuni bandu, ’Adi Jesus jadi aku kai si ilakokenna?’ Sekalak turang seninanta si gelarna Leigh, isungkunna penungkunen e man dirina ope lenga erban sada tindaken. Nina, ”Temanku erdahin ngirimken surat si risiken kata-kata si la mehuli kerna aku ras pendahinku man langganenku. Ceda kel ukurku. Tapi kusungkun diringku, ’Uga nge aku banci ngusih Jesus bas ndungi masalahku e?’ Kenca kuukuri kai si ilakoken Jesus adi ngadapi keadan si bage, dungna kupediat saja janah lanai kuukuri kerna surat e. Kenca e, kueteh maka mekelek kepe pinakit temanku e janah pasti latih kel kapna rukur. Dungna kuangkai maka labo bas ukurna nari kai si itulisna e. Alu ngukuri usihen si ibereken Jesus, enda nampati aku tetap ngkelengi temanku sada dahin e.” Adi siusih Jesus, banci terus sikelengi kalak si deban.

Si peteluken, erlajar ngkelengi alu la mentingken bana. Enda me salah sada bukti pengikut Jesus si benar. (Johanes 13:​34, 35) Nggo ibuktiken Jesus kekelengenna si la mentingken bana, enda sada usihen man banta. Uga ia mbuktikenca? Nusur ia surga nari, ”Itadingkenna kerina si lit i bas ia” guna kepentingenta ”seh mate”. (Pilipi 2:​ 5-8) Paksa siusih Jesus bas ngkelengi alu la mentingken bana, reh serina perukurenta bage pe perasanta ras ia. Dungna nggit kita mpelebeken kepentingen kalak asangken kepentingenta.

Mbue kel gunana adi kita perkeleng. Enda dua contohna:

• PERSADAN I SEBELANG DONI: Perban kita sikeleng-kelengen, ku runggun siapai pe kita reh si lit i sebelang doni pasti ialo-alo turang seninanta kita alu mehuli. Meriah kel ukurta perban sigejapken kekelengen arah ’teman-temanta si sada kiniteken i belang-belang doni enda’! (1 Petrus 5:9) Bas umat Dibata ngenca banci sidatken kekelengen si bage.

• KEDAMEN: ”Ola kam pergelut sapih-sapih kam, erkiteken kekelengen si lit i bas kam” alu bage ’irakut kita alu enteguh i bas perdamen’. (Epesus 4:​ 2, 3) Enda banci sigejapken bas perpulungen, kebaktin wilayah, ras kebaktin regional. Pasti kam setuju maka seh kel ergana kedamen si bage bas doni si serbut enda. (Masmur 119:165; Jesaya 54:13) Adi erdame kita ras kalak si deban, sibuktiken maka tuhu-tuhu keleng ateta ia, janah enda erban meriah kel ukur Bapanta si i surga.​—Masmur 133:​1-3; Matius 5:9.

Itulisken Paulus maka, ”Kekelengen pehuliken kap.” (1 Korinti 8:1) Kai ertina e? Lit si ngatakenca maka 1 Korinti bindu 13 sada ”Masmur Kekelengen”, si nuriken uga mpebelin kekelengen. Kekelengen la ndarami keuntungen bas kalak si deban nari. Kekelengen eme ngukuri keperlun kalak si deban. (1 Korinti 10:24; 13:5) Emaka adi sepenggejapen kita, ermediate, sabar, dingen melias, enda banci mpehuli kekelengen bas keluarga janah erban runggun reh kompakna.—Kolose 3:​14.

Mbue tuhu cara ngkelengi kalak si deban, tapi si pentingna eme mpebelin kekelengenta man Dibata. Engkai? Sabap kekelengenta man Dibata nge si erban kita kompak! La soal kalak si uga, suku kai, ras cakap kai, radu ras nge kita nembah Jahwe, ’kerina kita ngikutken Ia’. (Sepanya 3:9) Emaka mari terus sicidahken tiap wari sifat si meherga i bas ulih kesah si badia e.