Engkai maka la banci ise pe nama baca-bacan ntah video arah Saksi-Saksi Jahwe ku Internet ntah media sosial?

Perban gratis sibereken baca-bacan ras videota, iakap piga-piga kalak banci ipebuena ntah pe itamana e ku situs web si deban ntah ku media sosial. Tapi e banci erban masalah si serius janah lanai cocok ras Syarat Penggunaan * (nen keterangen tambahen) si lit bas situs webta. Ikataken i je maka ise pe la banci “namaken gambar, baca-bacan elektronik, merek dagang, musik, poto, video, ntah pe artikel arah situs webta ku Internet (situs web, situs file-sharing, situs video-sharing ntah jejaring sosial).” Engkai enda penting?

Kerina si lit bas situs webta lit hak ciptana, maksudna ilindungi secara hukum. Penting ilindungi secara hukum, gelah la isalahgunaken. Mon-mon kalak murtad ras kalak si deban banci ncedai pendahinta alu namaken baca-bacan ntah videota ku situs webna gelah iperdiateken Saksi Jahwe ras kalak si deban. Tapi bas situsna e itamana ka baca-bacan ntah video si erban kalak ragu. (Masmur 26:4; Kuan-kuanen 22:5) Si deban, igunakenna baca-bacan, video, ntah lambang jw.orgta bas iklan, bas aplikasi elektronik, ras bas barang-barang si idayakenna. Tapi perban baca-bacan, video, ras lambang jw.orgta nggo ilindungi secara hukum, banci siaduken ia ku pengadilen gelah lanai ibanna bage. (Kuan-kuanen 27:12) Tapi banci jadi la isampati pengadilen kita adi sipediat piga-piga kalak, termasuk turang seninata, namaken baca-bacan ntah videota ku situs web si deban ntah nggunaken lambang jw.org guna ndayaken barang-barangna.

Bahaya adi sidownload baca-bacan ntah videota arah situs si deban, labo arah jw.org. Arah “budak si setia janah pentar” ngenca ibereken Jahwe pangan rohani banta. (Matius 24:45) Janah pangan e ibereken “budak” e arah situs web resmita ngenca, bagi www.pr418.com, tv.pr418.com, ras wol.pr418.com. Janah telu ngenca aplikasi si resmi si banci sidownload bas perangkat elektronikta, eme JW Language^®, JW Library^®, ras JW Library Sign Language^®. Bas situs web ras aplikasi e la lit iklan ntah kai pe si lit hubungenna ras doni Setan. Tapi adi sidownload baca-bacan ntah videota arah situs web bage pe aplikasi si deban, e banci bahaya perban banci saja baca-bacan ntah video e nggo iubah.​—Masmur 18:27; 19:9.

Adi sitama baca-bacan ntah videota ku situs web si banci ikomentari kalak, e banci erban kalak murtad ras kalak si deban mandangi organisasi Jahwe. Lit piga-piga turang seninata sijawapen bas komentar e, enda erban gelar Jahwe lanai iergai kalak. Pembahasen si bage bas Internet labo cara si mehuli guna ngubah perukuren bage pe nampati kalak ngangkai Pustaka. (1 Timotius 6:3-5; 2 Timotius 2:23-25) Lit ka piga-piga kalak erban akun bas situs web ras bas media sosial si tempa-tempa e arah organisasi ntah arah anggota Badan Pinpinen. Tapi e palsu. Labo lit halaman Web pribadi anggota Badan Pinpinen ntah akunna bas media sosial.

Sanga sipetandaken jw.org man kalak, ikut kita mberitaken “berita si meriah.” (Matius 24:14) Situs webta bage pe aplikasita reh dekahna reh jilena. Ateta erguna min e man kerina kalak. Emaka banci sikirim baca-bacan ntah videota arah e-mail ntah sikirim link guna mbuka situs webta. Bage me carana mabai kalak ku sumber pangan rohani si ibereken Jahwe arah “budak si setia janah pentar.”