1. Alu cara kai saja kita banci erdahin ras Jahwe?

SANGA iciptaken Jahwe manusia, ateNa kalak e jadi temanNa erdahin. Amin gia gundari manusia la sempurna, tapi kalak si setia banci tetap erdahin ras Jahwe tiap wari. Contohna, kita “teman erdahin Dibata” adi siberitaken berita si meriah kerna KerajanNa ras njadiken murid. (1 Korinti 3:5-9) Tuhu-tuhu luar biasa kel siakap perban nggo ipilih Pencipta si madakuasa kita ndahiken dahin si seh kel pentingna enda! Tapi, labo sanga erberita ngenca kita banci erdahin ras Jahwe. Bas artikel enda, sibahas ka kari uga carana kita erdahin ras Dibata sanga nampati keluargata bage pe kalak si lit bas runggun, sanga ngalo-ngalo tamu, sanga nampati organisasi ngelakoken pendahin si ilakoken i sebelang doni, ras sanga ngelakoken terbuen guna ngelayani Jahwe.​—Kolose 3:23.

2. Engkai maka ula pernah sibandingken kai si banci silakoken man Jahwe ras kai si banci ilakoken kalak si deban?

² Sanga sipelajari kari artikel enda, penting siinget maka la seri kerina kalak. La seri umurta, kesehatenta, keadanta, bage pe kengasupenta. Emaka ula bandingken kai si banci ilakokenndu man Jahwe ras kai si banci ilakoken kalak  si deban. Nina rasul Paulus, “Tiap kalak arus iperiksana perbahanenna sendiri, janah ermeriah ukur me ia erkiteken dirina sendiri, labo perban ibandingkenna dirina ras kalak si deban.”​—Galati 6:4.

3. Engkai maka banci ikataken kalak si ermediate man keluargana erdahin ras Dibata?

³ Ate Jahwe gelah siperdiateken keluargata. Mungkin, arus kam ndarami sen guna ncukupi keperlun keluargandu. Piga-piga diberu, arus ia i rumah guna ngurus anakna. Janah adi lanai ngasup orang tuata ngurus dirina sendiri, banci saja kita si arus ngurussa. Kerina enda penting. Nina Pustaka, “Ise pe si la nikapken keperlun kade-kadena terutama anggota keluargana, lanai kap ia erkiniteken janah jahaten asangken kalak si la erkiniteken.” (1 Timotius 5:8) Adi lit tanggung jawapndu bas keluarga, banci jadi la banci iberekenndu terbuen man Jahwe bagi si iarapkenndu. Tapi ula kitik ukurndu! Meriah ukur Jahwe adi isikapkenndu keperlun keluargandu.​—1 Korinti 10:31.

4. (a) Uga cara orang tua erdahin ras Jahwe? (b) Kai hasilna?

⁴ Orang tua Kristen banci erdahin ras Jahwe alu nampati anakna erban cita-cita rohani. Enggo melala orang tua si ngelakokenca. Hasilna, anak-anak kalak e dungna nggit ngelayani sepenuh waktu, amin gia ndauh arah rumah nari. Piga-piga jadi utusen injil, lit ka jadi perintis bas daerah si merluken terbuen perberita, janah si debanna ngelayani i Betel. Memang, adi ndauh anak-anak arah rumah nari, lanai banci orang tua rusur ras anak-anakna. Tapi nggit kalak e mpegegehi anak-anakna gelah terus ngelayani Jahwe i japa pe kalak e ringan. Engkai? Perban meriah akap orang tua ngidah anak-anakna ngutamaken Jahwe. (3 Johanes 4) Enterem orang tua seri perasanna ras Hanna, si ngataken maka enggo iberekenna Samuel jadi “sikerajangen” Jahwe. Sada kehormaten si mbelin kel akap kalak e banci erdahin ras Jahwe alu cara si bagenda.​—1 Samuel 1:28.

5. Uga carandu nampati turang senina si lit bas runggunndu? (Nen gambar pemena artikel.)

⁵ Adi la mberat tanggung jawapndu bas keluarga, banci nge sampatindu turang senina si sakit, si nggo metua, ntah pe si merluken penampat? Ntah, banci nge sampatindu kalak si ngurus kalak e? Daramilah kalak bas runggunndu si merluken penampat si bage. Contohna, banci saja lit turang seninata si ngurus orang tuana si nggo metua. Banci nge ibanndu waktundu guna ngurus orang tuana gelah banci ilakokenna dahin si deban? Ntah banci saja isampatindu turang seninata alu ngelegi ia gelah banci pulung, belanja, ras ndahi kalak sakit. Adi bage banndu, banci saja nggo erdahin kam ras Jahwe i bas njawap toto kalak.​—Baca 1 Korinti 10:24.

6. Kai si banci nampati kita gelah siteh uga carana ngalo-ngalo tamu?

⁶ Teman erdahin Dibata eme kalak si nggit ngalo-ngalo tamu. Bas Pustaka,  kata Junani “ngalo-ngalo kalak si deban” ertina ngalo-ngalo “kalak si la itandai.” (Heber 13:2; cataten i teruh) Bas Pustaka, banci sibaca melala contoh si ngajari kita uga carana ngelakoken perbahanen si mehuli e. (Kejadin 18:1-5) Banci sisampati kalak si deban janah arus sisampati ia ndigan pe lit kesempatenta ngelakokenca, amin gia kalak e labo “turang seninata si sada kiniteken.”​—Galati 6:10.

7. Kai untungna adi nggit kita ngalo-ngalo kalak si ngelayani sepenuh waktu?

⁷ Nggit nge kam erdahin ras Jahwe alu ngalo-ngalo kalak si ngelayani sepenuh waktu si merluken ingan tading? (Baca 3 Johanes 5, 8.) Adi bage siban, enda erguna man bana bage pe man banta. Nina Pustaka, “Ipegegehi kena aku alu kiniteken kena, janah kupegegehi kena alu kinitekenku.” (Roma 1:11, 12) Perdiateken pengalamen Olaf. Sanga ia nguda denga, sekalak pertua keliling ndahi runggunna janah perlu ia ingan tading, tapi bas runggun la lit si banci nampati ia. Isungkun Olaf me orang tuana si la Saksi, banci ntah lang pertua keliling e tading bas rumahna. Banci nina orang tuana tapi Olaf arus medem bas kursi. Nggit Olaf, janah la kapna dalih. Meriah kel kapna banci tading seminggu ras pertua keliling e! Tiap erpagi-pagi ibahas kalak e topik si menarik janahna sarapen. Terpegegehi kel Olaf perban pertua keliling e, dungna sepenuh waktu ia ngelayani Jahwe. Nggo 40 tahun dekahna Olaf ngelayani jadi utusen injil bas piga-piga negara.

8. Ngkai maka arus tetap kita mehuli amin gia tangtangna la iergai kalak? Bereken contohna.

⁸ Melala carata banci ngkelengi kalak si lenga sitandai, amin gia tangtangna la iergaina kita. Contohna, Jesica arah Ekuador nari erlajar ras turang seninata i Spanyol. Bas sada wari, sanga kalak e erlajar, ngandung lalap Jesica. Emaka isungkun turang seninata e ia ngkai maka ia ngandung. Iceritakenna, ope ia reh ku Spanyol, mesera kel kegeluhenna. Bas sada wari, lanai lit pangan si man berenkenna man anakna, lau ngenca. Emaka ertoto Jesica mindo penampat janahna mpepedem anakna. La ndekah kenca si e, reh me dua Saksi ndahi Jesica janah bereken kalak e majalah bana. Tapi merawa Jesica janah icigatkenna majalah ndai, nina, “Enda kin pangan si atendu kubereken man anakku?” Iusahaken turang seninata e mpetenang ia, tapi la ia nggit mbegikenca. Kenca e, itama turang seninata e sada keranjang pangan i lebe-lebe pintuna. E me sebapna maka ngandung ia sanga erlajar ndai, perban sadar ia nggo itulakna jawapen arah totona. Emaka itekadken Jesica ngelayani Jahwe. Jelas me, perban turang seninata ndai nggit mere, mehuli hasilna.​—Pengerana 11:1, 6.

9, 10. (a) Kai saja kesempaten kalak Israel guna jadi sukarelawan i bas ngelayani Jahwe? (b) Alu cara kai saja turang senina si dilaki banci nampati bas runggun?

⁹ Mbarenda, melala kel kesempaten kalak Israel jadi sukarelawan guna ngelayani Jahwe. (Keluaren 36:2; 1 Kronika 29:5; Nehemia 11:2) Gundari pe, melala kesempatenndu mereken waktu, erta, ras keterampilenndu guna nampati turang senina. Adi bage si lakokenndu, pasti meriah kapndu janah ipasu-pasu Jahwe kam.

¹⁰ Iiahken Pustaka dilaki-dilaki si lit bas runggun gelah erdahin ras Jahwe eme alu jadi si nampati runggun ras jadi pertua. (1 Timotius 3:1, 8, 9; 1 Petrus 5:2, 3) Kalak si ngelakokenca, atena nampati turang seninana secara rohani bage pe jasmani. (Perbahanen Rasul-Rasul 6:1-4) Pernah nge kam isuruh pertua nampati bas bagin tata tertib, ngurus buku-bukuta, ngurus daerah erberita, ngurus Bale, ntah si debanna? Meriah kel ukur turang senina si nggit ngelakokenca.

11. Manpaat kai si idat sekalak turang senina si ikut pendahin pembangunen?

¹¹ Kalak si ikut jadi sukarelawan bas dahin pembangunen, rusur ndatken teman si mbaru. Margie, sekalak turang seninata, nggo 18 tahun dekahna ikut mbangun Bale Kerajan. I bas pembangunen e, ermediate kel ia man turang seninata si diberu si nguda denga janah isampatina kalak e. Ikatakenna maka enda sada cara si luar biasa man sukarelawan guna mpegegehi sada ras si debanna. (Roma 1:12) Sanga iadapina masalah, si mpegegehi ia eme teman si idatna bas pendahin enda. Pernah nge kam jadi sukarelawan bas  pendahin pembangunen? Banci kam ikut bas dahin e amin gia la kam ahli.

12. Uga carandu nampati kalak si kena bencana?

¹² Banci ka kita erdahin ras Jahwe alu nampati turang seninata si kena bencana. Contohna, banci sisumbangken sen. (Johanes 13:34, 35; Perbahanen Rasul-Rasul 11:27-30) Cara si deban banci kita nampati eme alu mbersihken ntah mpehuli kai si ceda perban bencana. Sanga terjadi banjir, ceda kel rumah turang seninata Gabriela, arah Polandia nari, tapi meriah kel ukurna sanga reh turang seninata arah runggun si deban nampati ia. Sanga iukurina pengalamenna e, ikatakenna maka la ia kuatir kerna ertana si nggo bene, tapi si pentingna kapna eme kai si nggo idatna. Nina, “Pengalamen enda erban aku reh tekna maka jadi bagin runggun Kristen eme kehormaten si luar biasa janah enda erban meriah kel ukurku.” Bage me perasan nterem kalak si nggo isampati perban bencana. Janah kalak si erdahin ras Jahwe si nggo nampati turang seninana pe, puas kel kapna janah meriah kel ukurna.​—Baca Perbahanen Rasul-Rasul 20:35; 2 Korinti 9:6, 7.

13. Engkai maka reh belinna kekelengenta man Jahwe adi nggit kita jadi sukarelawan? Bereken contohna.

¹³ Turang seninata si gelarna Stephanie ras perberita si deban bas daerahna, erdahin ras Jahwe alu nampati Saksi si kiam ku Amerika Serikat perban terjadi perang i negarana. Isampati kalak e pengungsi e ndarami rumahna ras barang-barang si iperlukenna. Nina, “Perban igejapken kalak e kekelengen turang senina i sebelang doni, dungna meriah kel ukur kalak e janah iergaina kel e. E me si ngiahken kami nampati. Iakap kalak e, kami si nampati ia, tapi situhuna, ia nge si buen nampati kami. Enggo isaksiken kami uga kekelengen, persadan, kiniteken, ras uga tekna turang senina man Jahwe. Enda erban reh belinna kekelengen kami man Jahwe, janah reh bagesna pengergan kami man kerina si nggo ialoken kami arah organisasiNa.”

14, 15. (a) Perukuren si uga si lit bas nabi Jesaya? (b) Uga kalak Kristen banci ngusih perukuren Jesaya enda?

¹⁴ Nggit nge kam mereken terbuen i bas erdahin ras Jahwe? Nggit nge kam pindah ku daerah si merluken terbuen perberita? Memang, labo arus  kita pindah ku ingan si ndauh gelah banci nampati kalak si deban. Tapi lit piga-piga turang seninata si banci pindah ku ingan si ndauh. Seri perukuren kalak e ras nabi Jesaya. Sanga isungkun Jahwe ia, “Ise ndia Kusuruh? Ise ndia nggit maba berita i bas Aku nari?” ijawapna, “Aku, suruhlah aku!” (Jesaya 6:8) Ngasup nge janah nggit nge kam nampati organisasi Jahwe? Bas kai saja nge kam banci nampati?

¹⁵ Nina Jesus kerna erberita ras erban murid, “Mbelang man peranin, tapi kurang si erdahin. Emaka pindolah man Si Mada peranin, gelah isuruhNa si erdahin guna peraninNa e.” (Matius 9:37, 38) Banci nge kam merintis bas daerah si merluken terbuen perberita? Ntah banci nge sampatindu kalak si deban gelah nggit ngelakokenca? Igejapken nterem turang seninata maka cara si mehulina mbuktiken kekelengenta man Dibata ras kalak si deban eme alu merintis bas daerah si merluken terbuen perberita. Lit nge cara si deban si banci ilakokenndu gelah banci iberekenndu terbuen i bas pelayanenndu? Adi lakokenndu e, pasti meriah kel ukurndu.

16, 17. Kai saja si banci ilakokenndu gelah banci iberekenndu terbuen man Jahwe?

¹⁶ Nggit nge kam erdahin sementara ntah pe piga-piga wari bas seminggu, i Betel ntah nampati bas dahin pembangunen? Lalap iperluken organisasi Jahwe kalak si nggit ngelayani i japa pe ia iperluken ras si nggit ngelakoken pendahin kai pe amin gia la lit pengalamenna bas pendahin e. Iergai Jahwe kerina kalak si nggit erban pengorbanen ras si nggit ngelayani i japa pe ia iperluken.​—Masmur 110:3.

¹⁷ Nggit nge kam ilatih gelah banci iberekenndu terbuen i bas ngelayani Jahwe? Banci saja nggo ncukupi syarat kam ngikuti Sekolah man Perberita Kerajan. Bas sekolah enda ibereken pelatihen man turang seninata si paguh kinitekenna si nggit ngelayani sepenuh waktu, alu bage banci iberekenna terbuen man organisasi Jahwe. Kalak si nggo ngikuti sekolah e arus nggit ngelayani i japa pe ia itugasken. Nggit nge kam mereken terbuen man Jahwe alu cara si bage?​—1 Korinti 9:23.

18. Kai saja manpaatna adi tiap wari kita erdahin ras Jahwe?

¹⁸ Perban kita umat Jahwe, nggit kita mere, mehuli kita, janah perkeleng. (Galati 5:22, 23) Tiap wari kita ermediate man kalak si deban. Enda erban meriah ukurta ras dame siakap. La soal uga pe keadanndu, banci meriah ukurndu adi usihndu Jahwe si nggit mere janah tetap jadi teman erdahinNa si iergaiNa!​—Kuan-kuanen 3:9, 10.