1. Kai buktina Jahwe nggit mere?

JAHWE pernah nggeluh sisada. Dungna iciptakenNa malekat i surga ras manusia i doni. Jahwe, “Dibata si ermeriah ukur,” meriah kapNa mere kai si mehuli. (1 Timotius 1:11; Jakup 1:17) Janah perban ate Jahwe kita ermeriah ukur, iajariNa kita gelah nggit mere.​—Roma 1:20.

2, 3. (a) Engkai maka meriah ukurta adi nggit mere? (b) Kai si man bahasenta bas artikel enda?

² Iciptaken Dibata manusia bali bagi Ia. (Kejadin 1:27) Ertina, bali sipat-sipatta ras Ia. Gelah tuhu-tuhu meriah ukurta ras sidat pasu-pasuNa, arus siusih Ia. Arus siperdiateken kalak si deban janah nggit kita mere. (Pilipi 2:3, 4; Jakup 1:5) Engkai? Perban bage kin kita iciptaken Jahwe. Aminna pe kita la sempurna, banci nge siusih Jahwe janah nggit mere.

³ Sibahas kari piga-piga pedah bas Pustaka gelah nggit kita mere. Kenca e sipelajari ngkai maka meriah ukur Jahwe adi nggit kita mere. Sipelajari ka kari ngkai maka nggit  mere nampati kita ngelakoken pendahin si ibereken Jahwe banta janah ngkai maka meriah ukurta adi nggit kita mere. Janah si terakhir sipelajari ngkai maka arus terus kita nggit mere.

4, 5. (a) Kai buktina Jahwe ras Jesus nggit mere? (b) Engkai maka arus siusih kalak e?

⁴ Ate Jahwe siusih min Ia, emaka meriah ukurNa adi nggit kita mere. (Epesus 5:1) Janah, ateNa meriah ka min ukur manusia. Buktina, ibanNa kita alu cara si luar biasa, ibanNa doni enda mejile, janah kerina isina erban kita ermeriah ukur. (Masmur 104:24; 139:13-16) Emaka siergai Jahwe adi siusahaken erban kalak ermeriah ukur.

⁵ Siusih ka Jesus, si mereken usihen si sempurna maka manusia pe banci nge mere. Nina Jesus, “Anak manusia reh labo guna ilayani, tapi guna ngelayani, janah mereken kegeluhenna selaku tebusen jadi penukar man nterem jelma.” (Matius 20:28) Iiahken rasul Paulus ka kalak Kristen, “Banlah perukuren ras perbahanen kena tetap seri ras Kristus Jesus . . . Itadingkenna kerina si lit i bas ia, ibanna dirina bali bagi budak.” (Pilipi 2:5, 7) Emaka sisungkuni banta, ‘Banci nge kuusih Jesus lebihen asangken si pernah kulakoken?’​—Baca 1 Petrus 2:21.

6. Kai ate Jesus si ajarkenna man banta arah cerita kerna kalak Samaria si mehuli? (Nen gambar pemena artikel.)

⁶ Meriah ukur Jahwe adi siusih Ia ras Jesus, si nggo mereken usihen si sempurna man banta. Enda silakoken adi siperdiateken kalak janah sidarami uga cara nampatisa. Icidahken Jesus uga pentingna enda sanga iceritakenna kerna kalak Samaria si mehuli. (Baca Lukas 10:29-37.) Iajarina pengikut-pengikutna maka arus isampati kalak e kalak si deban, la soal ise ia ntah pe ja nari asalna. Ingetndu nge ngkai maka ikataken Jesus cerita enda? Perban isungkun kalak Jahudi ia, “Ise dage si arus kukelengi?” Arah jawapen Jesus, siteh maka arus kita nggit mere bagi kalak Samaria e adi meriah ateta siban ukur Jahwe.

7. Uga carata mbuktiken maka tek kita cara Jahwe nge si mehulina? Jelasken.

⁷ Alasen si deban kita mere, lit hubungenna ras kai si terjadi bas Taman Eden. Ikataken Setan man Adam ras Hawa, adi la ipatuhi kalak e Jahwe janah dirina saja ngenca si ukurina, banci reh senangna kegeluhen kalak e. Hawa ngukurken dirina saja, janah bali atena ia ras Dibata. Adam pe ngukurken dirina saja, janah padin kapna erban Hawa ermeriah ukur asangken erban Dibata si ermeriah ukur. (Kejadin 3:4-6) Dungna, parah kel akibatna. Jelas me, la lit si banci ermeriah ukur adi ngukurken dirina saja. Tapi adi la kita ngukurken dirita saja janah nggit mere, sibuktiken maka tek kita cara Jahwe nge si mehulina.

8. Engkai maka arus iukuri Adam ras Hawa kalak si deban?

⁸ Amin gia Adam ras Hawa ngenca bas Taman Eden e, arusna iukurina ka  min kalak si deban. Engkai? Lit dahin si ibereken Jahwe man kalak e. IsuruhNa kalak e ndemi doni enda alu anak-anakna janah erban doni jadi pardis. (Kejadin 1:28) Arusna si iarapken Adam ras Hawa eme gelah meriah pagi akap anak-anakna, bali bagi si iarapken Jahwe gelah kerina kalak e ermeriah ukur. Kerina pagi kalak e erban doni enda jadi pardis. Pendahin enda seh kel mbelinna!

9. Engkai maka meriah pagi kap manusia i bas njadiken doni enda jadi pardis?

⁹ Manusia sempurna arus ka kerja sama ras Jahwe pagi i bas njadiken doni enda jadi pardis janah gelah terjadi bagi si iarapken Jahwe. Alu bage, kalak e banci masuk ku wari istirahatNa. (Heber 4:11) Bayangken uga puasna ras uga riahna pendahin enda pagi! Melala kel pagi pasu-pasu si ibereken Jahwe man kalak si la ngukurken dirina saja janah ermediate man kalak si deban.

10, 11. Kai si banci nampati kita erberita ras njadiken murid?

¹⁰ Gundari, ibere Jahwe man banta pendahin si istimewa. AteNa kita erberita ras njadiken murid. Gelah banci silakoken, arus tuhu-tuhu ermediate kita man kalak si deban. Janah, banci terus silakoken pendahin enda adi mehuli tujunta eme perban keleng ateta Jahwe bage pe kalak si deban.

¹¹ Nina Paulus maka ia ras kalak  Kristen si deban bas abad pertama eme “teman erdahin Dibata,” perban si iberitaken ras si iajarken kalak e eme kata Dibata. (1 Korinti 3:6, 9) Gundari, kita pe banci jadi “teman erdahin Dibata” adi nggit kita mere waktu, gegeh, ras ertata guna ngelakoken pendahin si ibereken Dibata. Sada kehormaten si luar biasa kel enda man banta!

12, 13. Menurutndu, kai nge pasu-pasuna njadiken murid?

¹² Adi nggit kita mere waktuta bage pe gegehta sanga erberita janah ngajari kalak si deban, pasti meriah kel ukurta. Enda me si ikataken nterem turang seninata si nggo nampati kalak erlajar Pustaka. Meriah kel ukurna ngidah kalak si erlajar e ngangkai kai si ajarken Pustaka, ngidah reh belinna kinitekenna, ibanna perubahen bas geluhna, janah iceritakenna kai si ipelajarina man kalak si deban. Jesus pe meriah kel kapna sanga 70 kalak si isuruhna erberita, ‘mulih alu ermeriah ukur’ perban idat kalak e pengalamen-pengalamen si mehuli.​—Lukas 10:17-21.

¹³ Turang seninata i sebelang doni pe meriah kel kapna sanga idahna ajaren Pustaka ngubah kegeluhen kalak. Contohna Anna, turang seninata si nguda denga, atena ngelakoken terbuen man Jahwe. * (Nen keterangen tambahen.) Emaka pindah ia ku sada daerah si merluken terbuen perberita i Eropa Timur. Itulisna, “Nterem kel kalak si nggit erlajar Pustaka i jenda, meriah kel ukurku. La tanggung kuakap riahna. Sanga aku i rumah, lanai lit waktuku ngukuri masalahku. Si kuukuri, masalah kalak si kusampati erlajar ngenca. Kudarami cara mpegegehisa ras nampati kalak e. Janah tek aku maka ‘riahen kap i bas mere asangken i bas ngalo.’”​—Perbahanen Rasul-Rasul 20:35.

14. Uga carana gelah meriah kapndu erberita amin gia la ibegiken kalak?

¹⁴ Amin gia la ibegiken kalak kita sanga erberita, tetap meriah ukurta perban sibere kesempaten man bana megiken berita si meriah, amin gia dungna la ia nggit megikenca. Iarapken Jahwe gelah silakoken pendahin si seri bali bagi si isuruh Jahwe man Esekiel, “Katakenlah man bana kai si Kusuruh kam ngatakenca, subuk ibegikenna ntah lang.” (Esekiel 2:7; Jesaya 43:10) Emaka uga pe tanggapen kalak, iergai Jahwe nge usahata. (Baca Heber 6:10.) Nina turang seninata kerna pelayanenna, “Kita si nuansa, si niramsa, janah sitotoken gelah ipeturah Jahwe kai si nggo sisuan e.”​—1 Korinti 3:6.

15. Man kalak si ngata bujur man banta nge ngenca kita nggit mere? Jelasken.

¹⁵ Ate Jesus gelah kita nggit mere perban e erban kita ermeriah ukur. Adi  nggit kita mere, kalak pe dungna nggit mere. Emaka iiahkenna kita, “Teruslah mere, maka kena pe ibere. Itungtungken kalak pagi ku bas kantong jubah kena alu sukaten si mehuli, si ipadatken, iugur-ugur seh mambur. Sebap uga perbahanen kena man kalak si deban, bage ka nge kari perbahanenna man kena.” (Lukas 6:38) Memang, adi nggit kam mere, labo kerina kalak nggit ngata bujur man bandu. Tapi amin gia la ia ngata bujur, tetaplah nggit mere. La pernah itehndu, maka sekali kam nggit mere kepeken melala pengaruh si mehuli man kalak si debanna.

16. Man ise saja arusna kita nggit mere? Engkai?

¹⁶ Kalak si tuhu-tuhu nggit mere, labo mere perban iarapkenna lit balasen arah kalak si deban. Nina Jesus, “Tapi adi ibanndu pesta, undanglah kalak si mesera, si cacat, si lumpuh, ras si pentang. Ermeriah ukur me pagi kam, sebap la ngasup kalak e mbalassa bandu.” (Lukas 14:13, 14) Nina Pustaka pe, ‘Kalak bujur ntah pe si nggit mere ipasu-pasu Jahwe,’ janah ‘Meriah ukur kalak si mperdiateken kalak mesera.’ (Kuan-kuanen 22:9; Masmur 41:2) Nggit kita mere perban sisampati ateta kalak si deban.

17. Kai saja si banci sibereken man kalak si deban si banci erban kita ermeriah ukur?

¹⁷ Sanga ikataken Paulus mulihi kata-kata Jesus maka “riahen kap i bas mere asangken i bas ngalo,” si imaksudkenna i jenda labo mereken sen ngenca. Banci ka sibere pergegeh, pedah arah Pustaka nari, bage pe  penampat si iperlukenna. (Perbahanen Rasul-Rasul 20:31-35) Arah kai si ikataken bage pe si ilakoken Paulus, iajarina kita maka penting kel mereken waktu ras gegehta, bage pe siperdiateken kalak si deban ras sikelengi ia.

18. Kai si ikataken piga-piga peneliti kerna nggit mere?

¹⁸ Peneliti-peneliti si mpelajari kebiasan manusia meteh maka manusia ermeriah ukur adi nggit mere. Bas sada artikel, nterem kalak ngataken maka reh riahna kapna kenca ilakokenna kai si mehuli man kalak si deban. Nina peneliti, sanga sisampati kalak si deban, lit siakap ertina ras tujunna kita nggeluh. Emaka piga-piga ahli ngataken, kalak si ngelakoken pendahin sukarela, reh sehatna ia janah reh riahna ukurna. Pasti la ateta mamang megi si e, perban Penciptata si perkeleng, Jahwe, nggo lalap ngataken maka meriah ukurta adi kita mere.​—2 Timotius 3:16, 17.

19, 20. Engkai maka nggit kam mere?

¹⁹ Mesera siakap terus mere, perban kalak i sekelilingta ngukurken dirina saja. Ipersingeti Jesus kita kerna dua perentah si mbelinna eme ngkelengi Jahwe alu kerina kegeluhenta, pusuhta, perukurenta, ras gegehta, bage pe ngkelengi kalak si deban bagi ngkelengi dirita. (Markus 12:28-31) Nggo sipelajari bas artikel enda maka kalak si ngkelengi Jahwe nggit ngusih Ia. Jahwe ras Jesus nggit mere. Iiahken kalak e kita gelah ngusih ia, perban iteh kalak e maka e banci erban kita tuhu-tuhu ermeriah ukur. Adi nggit kita mere man Dibata bage pe man kalak si deban, siergai Jahwe janah enda erguna man banta ras kalak si deban.

²⁰ Pasti nggo ilakokenndu si mehulina i bas mere bage pe nampati kalak si deban, khususna turang seninandu. (Galati 6:10) Adi terus lakokenndu e, pasti ngata bujur kalak man bandu ras kelengina kam, janah kam pe pasti ermeriah ukur. Nina Pustaka, “Melumbarlah mere maka kam reh bayakna, sampatilah kalak maka kam pe isampati.” (Kuan-kuanen 11:25) Bas kegeluhen ras pelayanenta, melala carata ngelakoken perbahanen si mehuli ras nggit mere alu la ngarapken balasen. Sibahas kari piga-piga carana bas artikel seterusna.