TAHUN si lewat, lit ribun turang senina si dilaki i sebelang doni ipilih jadi pertua ras si nampati runggun. Adi kam salah sadana, pasti meriah kel kapndu banci ngelayani Jahwe bage pe turang seninandu alu cara si mbaru enda.

Biasa nge adi lit sitik perbiarndu. Nina Jason, pertua si nguda denga, “Tangtangna aku ipilih, la kuakap aku ngasup perban nggo tambah tanggung jawapku.” Sanga ibereken Jahwe tugas si mbaru man Musa ras Jeremia, la akap kalak e ngasup ngelakokenca. (Keluaren 4:10; Jeremia 1:6) Adi bage perasanndu, kai nge si banci ilakokenndu gelah percaya diri janah terus maju secara rohani? Melala si banci ipelajarindu arah Timotius nari.​—Perbahanen Rasul-Rasul 16:1-3.

Umur Timotius kira-kira 20 tahun sanga ia mulai ngelayani bas piga-piga ingan ras rasul Paulus. Sanga tangtangna ia iajak Paulus, banci jadi la kapna ngasup ngajar ras mereken nasehat man kalak si deban perban ia ngudasa denga. (1 Timotius 4:11, 12; 2 Timotius 1:1, 2, 7) Tapi terus ibanna perubahen, emaka sepuluh tahun kenca si e, nina Paulus man kalak Pilipi, “Ngarap aku adi sue ras peraten Tuan Jesus, minter kusuruh Timotius ndahi kena.” Engkai maka bage nina Paulus? Ijelaskenna, “La lit sekalak pe si seri ras ia.”​—Pilipi 2:19, 20.

Engkai maka Timotius jadi usihen si mehuli man pertua? Lit enem alasenna.

1. Ermediate kel ia man kalak si deban. Ikataken Paulus man turang senina i Pilipi maka pasti nge “tuhu-tuhu ermediate kel” Timotius man kalak e. (Pilipi 2:20) Ate Timotius gelah turang seninana tetap rembak ras Jahwe, emaka nggit ia ngorbanken waktu ras gegehna nampati kalak e.

William, si nggo lebih 20 tahun jadi pertua, lalap ikatakenna bagenda man pertua si mbaru, “Kelengi turang senina. Utamaken keperlun kalak e asangken pengaturen runggun.” Ula bagi supir bus si pentingen akapna tepat waktu seh ku terminal asangken ermediate man penumpangna.

2. Iutamakenna pelayanenna man Jahwe. Ikataken Paulus maka beda kel Timotius ras kalak si “ngukuri kepentingenna saja, labo kepentingen Jesus Kristus.” (Pilipi 2:21) Iperdiateken Paulus maka turang senina si dilaki i sekelilingna ngutamaken dirina saja. Mon-mon lebih iutamakenna kepentingenna asangken ngelayani Jahwe. Tapi Timotius lang! Kenca idatna terbuen kesempaten i bas ngelayani Jahwe, tanggapenna bali bagi Jesaya, si ngataken, “Aku, suruhlah aku!”​—Jesaya 6:8.

Kai si banci ilakokenndu gelah banci seimbang i bas mperdiateken keperlunndu ras keperlun runggun? Si pertama ikutilah nasehat Paulus enda, ‘Pastiken kai si lebih penting.’ (Pilipi 1:10) Utamakenlah ngelayani Jahwe. Si peduaken, ula lakoken kegiaten si erban melala waktu ras gegehndu terbuang. Nina Paulus man Timotius, “Kiamlah kam nadingken sura-sura kalak si nguda denga, janah ayakilah kai si benar, kiniteken, kekelengen, kedamen.”​—2 Timotius 2:22.

3. Kerja keras ia i bas ngelayani Jahwe. Nina Paulus kerna Timotius, “Bali bagi sekalak anak ras bapak, ia jadi  budak ras aku guna mberitaken berita si meriah.” (Pilipi 2:22) Timotius la perkisat. Kerja keras ia ras Paulus, janah e erban pertemanen kalak e reh paguhna.

Gundari melala kel pendahin bas organisasi Jahwe. Pendahin e erban kita puas janah erban kita reh deherna ras turang seninata. Emaka pastiken gelah lalap kam “sibuk i bas ndahiken dahin Tuhan.”​—1 Korinti 15:58.

4. Ilakokenna kai si ipelajarina. Itulis Paulus man Timotius, “Nggo tuhu-tuhu ikutkenndu kai si kuajarken, si kudalanken, tujunku, kinitekenku, kesabarenku, kekelengenku, ras kesetianku.” (2 Timotius 3:10) Ilakoken Timotius kai si ipelajarina, emaka ialokenna terbuen tanggung jawap.​—1 Korinti 4:17.

Daramilah pertua si erpengalamen si banci jadi usihenndu. Enggo ertahun-tahun Tom jadi pertua. Iceritakenna maka pernah lit sekalak pertua si erpengalamen, ermediate pertua e bana janah iberekenna pelatihen si mehuli man Tom. Nina, “Rusur aku nungkun man bana janah kudalanken nasehatna. Enda me si erban aku percaya diri.”

5. Terus ilatihna dirina sendiri. Inasehati Paulus Timotius, “Ajarlah dirindu alu tujun guna nembah Dibata.” (1 Timotius 4:7) Amin gia lit pelatih atlet, perlu denga atlet e latihen sisada. Iiahken Paulus Timotius, “Teruslah kam mbaca i lebe-lebe jelma si nterem alu tutus, mereken nasehat, ras ngajar. . . . Ukurilah si enda kerina alu mbages janah tuhu-tuhulah perdiateken, gelah kerina kalak ngidah kemajunndu alu jelas.”​—1 Timotius 4:13-15.

Kam pe perlu ka itingkatkenndu keterampilenndu. Rajinlah kam erlajar Pustaka, janah teruslah ikutken petunjuk si terbaru arah organisasi. Ula kam percaya dirisa. Ula pengalamenndu si iandalkenndu sanga ngadapi erbage masalah, tapi daramilah pedah Pustaka. Bagi Timotius, “teruslah perdiateken dirindu ras pengajarenndu.”​—1 Timotius 4:16.

6. Iandalkenna kesah si badia Jahwe. Sanga icakapken Paulus kerna pelayanen Timotius, iingetkenna ia, “Alu kesah si badia si lit i bas dirita, jagalah erta si ialokenndu.” (2 Timotius 1:14) Perlu iandalken Timotius kesah si badia Dibata.

Donald, si nggo ertahun-tahun jadi pertua, ngataken, “Kalak si lit tanggung jawapna bas runggun, arus iergaina hubungenna ras Dibata. Kalak si ngelakokenca, ‘gegehna ertambah-tambah.’ Adi ertoto kalak e mindo kesah si badia janah iusahakenna gelah lit bas ia sipat-sipat si ihasilken kesah si badia, pasti ia jadi pasu-pasu man turang seninana.”​—Masmur 84:8; 1 Petrus 4:11.

Mpegegehi kel ngidah si nampati runggun bage pe pertua-pertua si mbaru, si bagi kam, si terus maju i bas ngelayani Jahwe. Jason, si iceritaken ndai, ngataken, “Sedekah jadi pertua, melala si kupelajari, janah lebih percaya diri aku. Gundari meriah kel kuakap ndalanken tugasku, enda tanggung jawap si luar biasa kel kuakap!”

Nggit nge kam terus erban perubahen? Adi usihndu Timotius, kam pe banci jadi pasu-pasu man turang seninandu.