REH serana nggeluh bas “wari-wari pendungi” enda, emaka perlu kita reh sabarna. (2 Timotius 3:1-5) Teremen kalak bas sekelilingta la sabar. Dirina saja ngenca si ikelengina, sijawapen atena lalap, ras la terkuasaina bana. Emaka perlu sisungkuni banta, ‘Lanai nge aku sabar bagi kalak i sekelilingku? Kai nge maksudna tuhu-tuhu sabar? Kai nge si banci kulakoken gelah banci sabar?’

Kai ertina kata “sabar” si lit bas Pustaka? Enda ertina lebihen asangken ngasup ngadapi masalah. Kalak si sabar la pernah nyerah perban lit arapenna, maksudna, tek ia maka reh ulina nge kari kerina. Labo dirina saja si iukurina, tapi ermediate ia man kalak si deban, termasuk man kalak si la mehuli perbahanenna man bana. Terus iarapkenna gelah hubungenna ras kalak si deban reh ulina. Enda labo ateta mamang perban nina Pustaka kesabaren rehna arah kekelengen nari. * (Nen keterangen tambahen.) (1 Korinti 13:4) Kesabaren pe bagin arah “sipat-sipat si ihasilken kesah si badia.” (Galati 5:22, 23) Emaka, kai nge si perlu silakoken gelah tuhu-tuhu sabar?

Gelah banci sabar, perlu sipindo kesah si badia man Jahwe, si iberekenNa man kalak si tek man baNa. (Lukas 11:13) Memang, kesah si badia e luar biasa kel, tapi arus ka sue totota ras perbahanenta. (Masmur 86:10, 11) Ertina asa ngasupta arus kita sabar tiap wari janah siban e jadi sipatta. Tapi mon-mon la kita ngasup. Kai si banci nampati kita?

Perlu sipelajari ras siusih contoh si sempurna si ibereken Jesus. Sanga iceritaken Paulus kerna “sipat-sipat si mbaru” termasuk kesabaren, ipegegehina kita, “Mbera kedamen Kristus erkuasa i bas pusuh kena.” (Kolose 3:10, 12, 15) Gelah kedamen Kristus erkuasa i bas pusuhta, arus siikuti contoh si mehuli si ibereken Jesus janah tuhu-tuhu tek maka idungi Dibata nge kari kerina persoalen i bas waktu si tepat. Adi tek kita, pasti lalap kita sabar, la soal kai si terjadi i sekelilingta.​—Johanes 14:27; 16:33.

Ateta, ulanai min ndekah reh doni si mbaru ndai. Tapi banci kita reh sabarna, adi siukuri uga sabarna Jahwe man banta. Ipetetap Pustaka ukurta alu ngataken, “Jahwe la melet i bas nepati janjiNa, bagi pengakap piga-piga kalak. Tapi sabar Ia man kena perban labo ateNa sekalak pe ikernepken tapi gelah kerina min ertobat.” (2 Petrus 3:9) Emaka sanga siukuri uga sabarna Jahwe man banta, pasti kita pe reh sabarna man kalak si deban. (Roma 2:4) Bas situasi kai saja kita perlu sabar?

Tiap wari, melala keadan si erban kita perlu sabar. Contohna, ula min sipotong ranan kalak amin gia sipeseh ateta kai si penting man bana. (Jakup 1:19) Arus ka kita sabar sanga lit si erban kitik ukurta. Gelah banci kita sabar, siingetlah uga Jahwe ras Jesus nggo sabar nandangi kelemahenta. La iperdiatekenna kesalahen-kesalahen si kitik si nggo silakoken. Tapi si inenna sipat-sipatta si mehuli janah sabar ia nimai kita robah.​—1 Timotius 1:16; 1 Petrus 3:12.

Perlu ka kita sabar sanga lit si ngataken maka nggo salah rananta ntah pe perbahanenta. Banci saja mis kitik ukurta ntah pe sibela dirita. Tapi nina Pustaka, la kita banci bage. Nina, “Ulin ate saber asangken ukur meganjang. Ola pedas-pedassa das darehndu, sabap nembeh ate ringan kap i bas pusuh kalak lenge.” (Pengerana 7:8, 9) Emaka amin gia la tuhu tuduhenna e, perlu kita sabar janah siukuri alu manjar-anjar ope sitanggapi. E me si ilakoken Jesus sanga ikataken kalak kai si la tuhu kerna ia.​—Matius 11:19.

Orang tua khususna perlu sabar sanga nampati anakna mpehuli carana rukur ntah pe nulak perbahanen si salah. Contohna Mattias, si ngelayani i Betel Skandinavia. Sanga remaja denga, tokohi teman sekolahna ia perban kinitekenna. Tangtangna, la iteh orang tuana kerna si e. Tapi dungna iperdiateken orang tuana maka mulai ia ragu man kinitekenna. Ikataken Gillis, bapak Mattias, maka perlu kel ia ras diberuna sabar i bas situasi si bage. Isungkun Mattias penungkunen-penungkunen si bagenda, “Ise kin Dibata e? Uga adi Pustaka e la Kata Dibata? Ja nari siteh kai si arapken Dibata bas kita nari?” Janah isungkunna ka, “Engkai isalahken kalak aku amin pe la seri perasanku bage pe kinitekenku ras kena?”

Nina Gillis, “Mon-mon merawa anak kami nungkun, labo man kami ia merawa tapi man kai si ipelajarina bas Pustaka nari, si akapna nggo erban masalah bas geluhna.” Uga cara Gillis nampati anakna? Nina, “Erjam-jam aku ngerana ras anakku.” Gillis rusuren mbegiken Mattias saja ngenca,  janah isungkunna piga-piga penungkunen gelah tehna uga perasan ras pendapat anakna. Mon-mon ijelasken Gillis sada topik man anakna janah ikatakenna man bana gelah iukurina lebe piga-piga wari ope kalak e ngerana ka mulihi. Janah mon-mon adi ipeseh anakna sada topik man bana, ikatakenna ka man anakna maka perlu ia piga-piga wari ngukurisa. Perban rusur kalak e ngerana, mulai me iangkai Mattias erti tebusen janah iangkaina ka maka keleng ate Jahwe kita, ras Jahwe ngenca si cocok merentah. Nina Gillis, “Memang perlu waktu, janah rusur mesera kang kuakap, tapi alu manjar-anjar, reh kelengna atena Jahwe. Meriah kel kuakap bage pe diberuku perban lit hasil kesabaren kami i bas ngadapi anak kami sanga ia remaja denga, dungna kena ku pusuhna ajaren Pustaka e.”

Sanga Gillis ras diberuna alu sabar nampati anakna, tek kalak e maka pasti isampati Jahwe. Nina Gillis, “Rusur kukataken man Mattias maka keleng kel ate kami ia janah e me si erban kami reh rusurna notoken ia gelah isampati Jahwe ia ngangkaisa.” Meriah kel ukur orang tua e perban sabar ia janah la ia nggit nyerah!

Perlu ka kita sabar sanga ngerawat anggota keluarga ntah pe teman si nggo ndekah sakit. Contohna Ellen * (nen keterangen tambahen), si tading i Skandinavia.

Kira-kira waluh tahun si lewat, nggo dua kali dilaki Ellen kena stroke janah enda ncedai otakna. Perban si e, lanai banci igejapkenna keriahen ukur, rate ceda, ntah pe rate mekuah. Mberat kel kap Ellen ngadapi situasi enda. Nina, “Perlu kel aku sabar janah mbue aku ertoto.” Nina ka, “Ayat si rusur kuinget si erban malem pusuhku eme Pilipi 4:13, i je nina, ‘Ngasup aku ngadapi kai pe erkiteken gegeh si kualoken i bas Dibata nari.’” Gegeh ras penampat Jahwe si erban Ellen ngasup ngadapi situasi e alu sabar.​—Masmur 62:6, 7.

Tentu, usihen si mehulina i bas ncidahken sipat kesabaren eme Jahwe. (2 Petrus 3:15) Bas Pustaka rusur sibaca kerna kesabaren Jahwe si luar biasa. (Nehemia 9:30; Jesaya 30:18) Ingetndu nge uga tanggapen Jahwe sanga piga-piga kali isungkun Abraham Ia perban ihancurkenNa ateNa Sodom? La ipotong Jahwe Abraham ngerana. Sabar Ia megiken kerina penungkunen ras kekuatiren Abraham. Buktina, ibegiken Jahwe kai si ikuatirken Abraham janah ipetetapNa ukur Abraham maka labo ihancurkenNa Sodom bicara lit sepuluh saja kalak si benar i kota e. (Kejadin 18:22-33) Lalap Jahwe sabar megiken, janah la Ia nggit merawa!

Sabar eme sipat si seh kel pentingna bas kerina kalak Kristen. Adi silakoken asa ngasupta gelah banci tuhu-tuhu sabar, siergai me Bapakta, Jahwe, si ermediate ras sabar janah termasuk kita bas “kalak si ndatken warisen si ijanjiken Dibata perban kalak e erkiniteken janah sabar.”​—Heber 6:10-12.