1, 2. (a) Kai si arus silakoken gelah banci siban kesimpulen si benar, janah engkai? (b) Kai kari sibahas bas pelajaren enda?

ARUS siteh lebe kejadin situhuna, alu bage siteh erban kesimpulen si benar. (Kuan-kuanen 3:21-23; 8:4, 5) Adi la bage, menukah akap Setan ras doni enda ngubah perukurenta. (Epesus 5:6; Kolose 2:8) Emaka, gelah banci siban kesimpulen si benar, arus siteh kejadin situhuna. Nina Kuan-kuanen 18:13, “[Begiken] lebe ope denga njabap, adi la bage ibahanndu, bodoh dingen ihinandu kalak.”

² Bas pelajaren enda, sibahas kari ngkai maka mesera siakap meteh kejadin situhuna janah erban kesimpulen si benar. Sipelajari ka kari uga pedah ras contoh-contoh bas Pustaka nampati kita meteh uga carana ndatken keterangen situhuna.

3. Engkai maka perlu sidalanken pedah Pustaka si lit bas Kuan-kuanen 14:15? (Nen gambar pemena artikel.)

³ Gundari, menukah kel ndatken informasi. Banci sidat arah Internet, TV, ras si debanna. Banci ka sidat arah  e-mail, SMS, ntah pe arah temanta. Janah e tempa-tempa la pernah keri. Emaka arus kita hati-hati. Banci jadi mehuli nge ukur temanta e, tapi lit kalak si sengaja mpeseh berita si la tuhu ntah pe iputarbalikkenna kejadin situhuna. Pedah Pustaka si apai si banci nampati kita meteh benar ntah lang informasi si nggo sibegi? Nina Kuan-kuanen 14:15, “Kalak bodoh tek ia kerina, kalak pentar ijagana perjingkangna.”

4. (a) Uga Pilipi 4:8, 9 nampati kita milih bacan? (b) Engkai maka penting ndatken informasi situhuna? (Nen kotak “ Si Banci Nampati Kita Meteh Kejadin Situhuna.”)

⁴ Gelah banci siban keputusen si mehuli, arus siteh kejadin situhuna. Emaka, arus kel kita hati-hati sanga milih bacan. (Baca Pilipi 4:8, 9.) Ula sisia-siaken waktuta ngenen berita si lenga terteki bas Internet ntah pe mbaca e-mail si lenga tentu benar. Si pentingna ula sinen situs Internet kalak murtad, perban ate kalak e lanai kita tek man Dibata janah iputarbalikkenna kai si iajarken Pustaka. Informasi si lenga terteki banci mpengaruhi kita gelah siban keputusen si salah. Ula pernah akapndu maka informasi si salah la lit pengaruhna man bandu.​—1 Timotius 6:20, 21.

5. (a) Berita si la tuhu kai si ibegiken kalak Israel? (b) Kai pengaruhna man kalak e?

⁵ Ngeri kel akibatna adi sibegiken berita si la tuhu. Bas jaman Musa, lit 12 mata-mata si lawes ku Taneh Perjanjin. Sepuluh mata-mata ngataken kai si la tuhu kerna negeri e. (Bilangen 13:25-33) Ilebih-lebihken kalak e kai si idahna, dungna mbiar janah kitik ukur kalak Israel. (Bilangen 14:1-4) Engkai maka bage tanggapen kalak Israel? Banci jadi tek kalak Israel perban buen mata-mata e si ngataken bage. Emaka la kalak Israel nggit megiken informasi si benar arah dua mata-mata si debanna kerna Taneh Perjanjin. (Bilangen 14:6-10) La tek kalak Israel man informasi si benar ras man Jahwe, teken kalak e man informasi si la tuhu.

6. Engkai maka la perlu ateta mamang sanga sibegi berita si erban kita sengget kerna umat Jahwe?

⁶ Perlu kita hati-hati, khususna sanga sibegi berita kerna umat Jahwe. Ingetlah, musuhta Setan igelari si “nuduh senina-seninata.” (Ketangkasen 12:10) Nina Jesus maka ‘ikataken penentang-penentang pagi kerina bual  si jahat’ kerna kita. (Matius 5:11) Adi tuhu-tuhu siperdiateken kai nina Jesus e, lanai pagi ateta mamang sanga sibegi berita si la pernah sibegi kerna umat Jahwe.

7. Penungkunen kai si perlu siukuri ope sikirim e-mail ntah pe SMS?

⁷ Meriah nge kapndu ngirim e-mail ntah pe SMS ku teman-temanndu? Sanga idahndu cerita si menarik bas berita ntah pe ibegindu pengalamen si jarang terjadi, mis nge atendu ipesehndu man teman-temanndu, bali bagi kalak si maba acara bas TV? Sungkuni lebe dirindu ope ikirimndu e-mail ntah pe SMS, ‘Nggo nge pasti benar cerita si kupeseh e? Kuteh nge uga situhuna ceritana?’ Adi sangsi denga kam, banci jadi nggo pesehndu berita si la tuhu. Adi lenga tehndu uga kin situhuna ceritana, ula kirim. Hapus saja!

8. (a) Kai si ilakoken kalak si nentang kita i bas piga-piga daerah? (b) Kai si erban kita alu la sengaja ikut nampati kalak e?

⁸ Lit ka alasen si deban ngkai maka bahaya adi la siukuri lebe ope sikirim e-mail ntah pe SMS. I bas piga-piga daerah, pendahinta ibatasi ntah pe ilarang. Kalak si nentang kita i bas negara e, mpeseh berita si la tuhu guna mpebiar-biar kita ntah pe gelah kita lanai siteken. Cuba ukuri kai si terjadi bas Uni Soviet si mbarenda. Polisi rahasia, si igelari KGB, mpeseh berita si la tuhu man turang seninata, ikatakenna turang senina si lit tanggung jawapna bas runggun pe nggo nghianati umat Jahwe. * (Nen keterangen tambahen.) Sayang kel, nterem turang seninata tek man berita si la tuhu e janah  tadingkenna organisasi Jahwe. Nterem kang arah kalak e mulihken, tapi piga-piga lang. Ipediatna berita si la tuhu erban ia lanai erkiniteken. (1 Timotius 1:19) Uga carana gelah e la terjadi banta? Ulalah peseh berita si la mehuli ntah pe berita si lenga jelas. Ula tekindu kerina si ibegindu. Pastiken lebe uga kejadin situhuna.

9. Kai deba nari si erban mesera siakap ndatken kesimpulen si benar?

⁹ Mon-mon, cerita si nggo sibegi sebagin ngenca benar. Janah cerita si debanna la nceritaken alu lengkap kejadin situhuna. Enda banci erban mesera siakap ndatken kesimpulen si benar. Ula pernah kita tek man cerita si sebagin ngenca benar! Kai si perlu silakoken gelah ula kita itokohi cerita si bage?​—Epesus 4:14.

10. (a) Engkai maka sempat iserang piga-piga kalak Israel atena senina-seninana? (b) Kai si erbanca la surung?

¹⁰ Banci kita erlajar arah kai si terjadi man kalak Israel, si tading i sebelah barat Lau Jordan sanga jaman Josua. (Josua 22:9-34) Ibegi kalak e maka kalak Israel i sebelah timur Lau Jordan nggo mbangun ingan persembahen i deher lau. Sebagin cerita e benar, tapi labo bage cerita lengkapna. Perban si e, iakap kalak Israel i sebelah barat maka senina-seninana i sebelah timur nggo nentang Jahwe, dungna ersada kalak e nerang senina-seninana. (Baca Josua 22:9-12.) Tapi ope iserangna, isuruh kalak Israel i sebelah barat piga-piga dilaki ndarami uga kin cerita situhuna. Kai si idat kalak e? Kepeken kalak Israel i sebelah timur labo mbangun ingan persembahen man dibata palsu. Ibangunna e gelah iteh kerina kalak maka kalak e nembah Jahwe. Meriah kel kap kalak Israel perban la minter iserangna senina-seninana, tapi idaramina lebe uga cerita situhuna.

11. (a) Perbahanen si la adil kai si iadapi Mepiboset? (b) Engkai maka sempat la adil perbahanen Daud man Mepiboset?

¹¹ Banci jadi pernah kitik ukurta perban iceritaken kalak kerna kita, janah kai si ikatakenna e la kerina tuhu. Enda me si terjadi man Mepiboset. Ibere Raja Daud kerina taneh Saul man bana, Saul eme bulang Mepiboset. (2 Samuel 9:6, 7) Tapi kenca si e, ibegi Daud cerita si la mehuli kerna ia. Janah la ipastikenna lebe tuhu ntah lang cerita si ibegina e, tapi mis ibuatna kerina si nggo iberena man Mepiboset. (2 Samuel 16:1-4) Kenca nggo ngerana Daud man bana, itehna me nggo salah perbahanenna. Emaka iulihkenna piga-piga erta Mepiboset. (2 Samuel 19:24-29) Bicara ipastiken Daud min ndai lebe uga cerita situhuna, labo ialami Mepiboset kejadin si la adil e.

12, 13. (a) Kai si ilakoken Jesus sanga ikataken kalak si la tuhu kerna ia? (b) Kai nge silakoken adi lit kalak ngataken kai si la mehuli kerna kita?

¹² Kai nge si ilakokenndu adi lit kalak ngataken si la tuhu kerna kam? Enda me si terjadi man Jesus ras man Johanes Peridiken. (Baca Matius 11:18, 19.) Kai si ilakoken Jesus?  Labo ipekerina waktu ras tenagana guna mbuktiken maka cerita e la tuhu. Malahen iiahkenna kalak gelah mperdiateken kai si ilakokenna ras si iajarkenna. Nina Jesus, “Kepentaren teridah arah perbahanen.”

¹³ Banci sidat pelajaren si penting arah Jesus. Banci saja ikataken kalak kai si la mehuli kerna kita, janah banci saja mbiar kita ceda gelarta. Tapi arah perbahanenta banci iteh kalak uga kita situhuna. Adi siusih Jesus, teridah me arah perbahanenta maka kai si la mehuli si ikataken kalak kerna kita, la tuhu.

14, 15. Engkai maka ula kita teksa man pemetehta?

¹⁴ Nggo sibahas maka mesera kel meteh uga kin cerita situhuna. Si erban reh serana eme dirita si la sempurna. Banci jadi nggo ertahun-tahun silayani Jahwe janah nggo rusur siban keputusen si mehuli, emaka iergai kalak kita. Banci nge e jadi masalah man banta?

¹⁵ Banci. Dungna nggo mulai siandalken pemetehta. Teksa kita man dirita. Sipediat perasan ras pendapatta ngkuasai carata rukur. Lenga pe siteh kerina kejadinna, banci saja siakap nggo siangkai kejadin e. Enda seh kel bahayana! Jelas-jelas nggo ipersingeti Pustaka kita gelah ula siandalken pemetehta.​—Kuan-kuanen 3:5, 6; 28:26.

16. (a) I bas contoh enda, kai si terjadi bas restoran? (b) Kai si iukuri Tom?

¹⁶ Contohna, bayangken bas sada berngi lawes Tom, si nggo ndekah jadi pertua, ku restoran. Idahna pertua si  deban, gelarna John, ras diberu si labo ndeharana. Akrap kel kalak e, tawa-tawa ia duana janah sidakepen. Sengget kel Tom janah tersungkun-sungkun bas pusuhna, ‘Lalah nandangi cerai John ras diberuna? Uga kari anak-anakna?’ La sekali e ngenca idahna John bage. Bicara kam arah Tom e, uga nge perasanndu?

17. (a) Bas contoh enda, kai si dungna iteh Tom? (b) Kai pelajarenna man banta?

¹⁷ Tapi cuba ukuri lebe. Iakap Tom maka John nggo selingkuh, tapi bage kin cerita situhuna? Bas berngi e, mis idilo Tom John, dungna tehna me kepeken diberu e adek John, janah ndauh inganna tading. Nggo ertahun-tahun kalak e la jumpa. Janah perban ntisik ngenca kalak e banci jumpa, bas restoran me kalak e ngerana-ngerana. Diberu John la banci ikut. Untung kel akap Tom perban lenga ceritakenna man ise pe! Kai pelajarenna man banta? La soal uga dekahna kita nggo ngelayani Jahwe, arus siteh lebe uga cerita situhuna gelah banci siban kesimpulen si benar.

18. Kai si erban kita tek man cerita si la mehuli kerna turang seninata?

¹⁸ Reh serana ka siakap meteh cerita situhuna adi si terlibat bas situasi e turang seninata si la sicocoken ras kita. Adi terus siukuri kai si erban kita la sicocoken, dungna curiga kita lalap man bana. Emaka adi sibegi cerita si la mehuli kerna ia, banci jadi mis kita tek, aminna pe lenga lit buktina. Kai pelajarenna man banta? Adi lalap negatip perukurenta man turang seninata, lenga pe siteh uga cerita situhuna, mis siban kesimpulen si salah kerna ia. (1 Timotius 6:4, 5) Ula pernah cian ateta kalak. Ingetlah lalap maka ate Jahwe sikelengi janah siampuni min turang seninata arah pusuhta nari.​—Baca Kolose 3:12-14.

19, 20. (a) Pedah Pustaka si apai si banci nampati kita erban kesimpulen si benar? (b) Kai si man bahasenta bas artikel selanjutna?

¹⁹ Gundari, mesera kel meteh uga kejadin situhuna janah erban kesimpulen si benar. Engkai? Perban informasi si nggo sibegi e la lengkap ntah pe sebagin ngenca si benar janah kita pe la sempurna. Kai si banci nampati kita? Pedah bas Pustaka! Contohna, salah sada pedah ngataken maka bodoh adi mis sijawap, padahal lenga siteh uga cerita situhuna. (Kuan-kuanen 18:13) Pedah si deban ngataken maka ula siteki kerina kai si nggo sibegi adi lenga sipastiken kebenarenna. (Kuan-kuanen 14:15) Janah la soal uga dekahna kita nggo ngelayani Jahwe, ula kita teksa man dirita. (Kuan-kuanen 3:5, 6) Pedah Pustaka banci erguna man banta adi sipake informasi si terteki guna erban kesimpulen si benar janah erban keputusen si mehuli.

²⁰ Tapi lit denga alasen si deban si erban mesera siakap meteh uga kin kejadin situhuna. Manusia mis erban kesimpulen arah kai si idahna. Emaka bas artikel seterusna, sibahas kari i bas bidang kai saja kita banci ngelakoken kesalahen si bage janah uga carana gelah ula silakoken kesalahen e.