1. (a) Nubuat kai si ikataken Jesaya kerna Jesus? (b) Engkai e mpegegehi?

NUBUAT Jesaya kerna Jesus Kristus mpegegehi kita ras mereken arapen banta. Inubuatken Jesaya maka “la erpalasken si teridah saja [Jesus] ngadili, tah pe erpalasken kai si ibegina” janah “alu bujur irungguina perkara kalak [mesera].” (Jesaya 11:3, 4) Engkai e mpegegehi? Erkiteken teremen kalak bas doni enda la ngena tena suku, bangsa, budaya, ntah bahasa tertentu, janah ihakimina kalak arah kai si idahna saja. Emaka perlu kel kita Hakim si sempurna, Jesus, si la nghakimi kalak arah kai si teridah saja!

2. (a) Kai perentah Jesus man banta? (b) Kai si man bahasenta bas artikel enda?

² Tiap wari, lit lalap pendapatta kerna kalak si deban. Tapi la kita sempurna bagi Jesus, emaka pendapatta pe la sempurna. Menukah kel kita ipengaruhi arah kai si teridah. Emaka iperentahken Jesus, “Ula nai hakimi kena kalak arah kai si teridah saja. Hakimilah kalak alu adil.”  (Johanes 7:24) Emaka ate Jesus, bali min kita bagi ia janah ula sihakimi kalak arah kai si teridah saja. Bas artikel enda, lit telu si man bahasenta si banci mpengaruhi pendapatta: suku ntah pe bangsa sekalak jelma, bayak ntah pe mesera ia, ras umurna. Sipelajari ka kari uga carana matuhi Jesus janah la nghakimi kalak arah kai si teridah.

3, 4. (a) Engkai maka berubah cara rukur Petrus man kalak si labo Jahudi? (Nen gambar pemena artikel.) (b) Kai pemeteh si mbaru si iajarken Jahwe man Petrus?

³ Cuba bayangken uga perasan rasul Petrus sanga isuruh ia lawes ku Kesarea, ku rumah kalak si labo Jahudi si gelarna Kornelius! (Perbahanen Rasul-Rasul 10:17-29) Kitik-kitik nari nggo iajari ia maka kalak si labo Jahudi e najis. Tapi lit si terjadi si erban berubah carana rukur. Idahna kejadin si luar biasa arah Dibata. (Perbahanen Rasul-Rasul 10:9-16) Idahna uis si galang, si rehna arah langit nari, i bas uis e lit binatang-binatang si najis. Kenca e, lit sora ngerana ku ia, “O Petrus, cinderken, gelehlah e, jenari panlah!” Alu tegas, itulak Petrus ngelakokenca. Kenca e, bagenda nina sora e, “Ula nai ikatakenndu najis kai si nggo ikataken Dibata bersih.” Kenca idah Petrus kerina e, la iangkaina kai si ikataken sora e bana. La ndekah kenca si e, reh me utusen arah Kornelius. Isuruh kesah si badia Petrus ku rumah Kornelius, emaka lawes me ia ras utusen ndai.

⁴ Adi Petrus nghakimi “arah kai si teridah saja,” labo ia nggit lawes ku rumah Kornelius. Kalak Jahudi, la pernah nggit ku rumah kalak si labo Jahudi. Tapi ngkai maka Petrus nggit? Amin gia la tena ngena kalak si labo Jahudi, tapi nggit ia ngubah carana rukur perban kejadin si luar biasa si nggo idahna bage pe perban itegu-tegu kesah si badia. Kenca ibegiken Petrus si Kornelius, nina, “Gundari tuhu-tuhu nggo kuangka maka Dibata la erpilihen. Tapi kerina kalak arah bangsa si apai pe, adi mbiar man Dibata janah ngelakoken kai si benar, pasti ialokenNa.” (Perbahanen Rasul-Rasul 10:34, 35) Menarik kel akap Petrus pemeteh si mbaru enda, janah enda mpengaruhi kerina kalak Kristen. Uga carana?

5. (a) Kai si ate Jahwe gelah iangkai kerina kalak Kristen? (b) Amin gia nggo siteh kai si iajarken Pustaka, perasan kai si banci jadi lit denga bas kita?

⁵ Ipake Jahwe Petrus gelah iteh kerina kalak Kristen maka Jahwe la mbeda-bedaken. I bas Jahwe, seri kerina suku, bangsa, budaya, ntah pe bahasa. Adi mbiar kita man baNa janah silakoken kai si benar, ialokenNa kita. (Galati 3:26-28; Ketangkasen 7:9, 10) Banci jadi nggo tehndu kerna si e. Tapi uga adi kam mbelin bas negara ntah pe keluarga si la tena ngena suku, bangsa, bahasa,  ntah budaya tertentu? Amin pe kapndu kam la mbeda-bedaken, tapi tuhu-tuhu nge la lit perasan si bage bas kam? Amin gia nggo isampati Petrus kalak si deban gelah itehna maka Dibata la mbeda-mbedaken, tapi lit denga perasan si bage bas ia. (Galati 2:11-14) Jadi uga carata patuh man Jesus janah lanai nghakimi kalak si deban arah kai si teridah?

6. (a) Kai si banci silakoken gelah lanai lit bas kita perasan nganggap rendah kalak si deban? (b) Arah laporen si iban sekalak turang senina, kai siteh kerna ia?

⁶ Gelah siteh lit denga perasan si bage bas kita ntah lang, perlu siperiksa dirita. Sibandingken perukurenta ras kai si nggo sipelajari bas Pustaka. (Masmur 119:105) Banci ka sisungkun temanta, lit ntah lang perasan si bage bas kita, perban kita sendiri la banci ngenenca. (Galati 2:11, 14) Banci jadi nggo biasa siakap perasan si bage, emaka la siteh nggo lit kepeken perasan si bage bas dirita! Enda me si terjadi man sekalak turang seninata si lit tanggung jawapna bas runggun. Itulisna laporen kerna sepasang turang seninata si kerja keras i bas pelayanen sepenuh waktu. Dilakina arah suku si ianggap nterem kalak rendah. Melala si mehuli si ituliskenna kerna dilaki e, tapi nina ka, “Amin pe ia arah [suku si bagenda], tapi arah perbahanen bage pe carana nggeluh teridah maka labo kerina kalak arah [suku si bagenda] penjorok.” Kai pelajarenna banta? La soal uga buena tanggung jawapta bas organisasi Jahwe, arus siperiksa dirita janah sialoken penampat gelah siteh lit denga kin perasan nganggap kalak rendah bas dirita. Kai nari si banci silakoken?

7. Kai buktina maka ‘nggo sibuka pusuhta’?

⁷ Adi ‘sibuka pusuhta,’ perasan nganggap kalak rendah dungna banci siganti alu kekelengen. (2 Korinti 6:11-13) Ras kalak si sada suku, bangsa, ntah pe bahasa ras kam nge ngenca kam erteman? Adi bage, usahaken ka min erteman ras kalak si deban. Banci ajakndu turang senina si beda latar belakangna gelah erberita ras kam. Ntah pe banci ka undang ia man ku rumahndu janah ngerana-ngerana ras ia. (Perbahanen Rasul-Rasul 16:14, 15) Dungna, kekelengen me si dem bas pusuhndu, perasan nganggap kalak rendah lanai lit i je. Gundari mari sibahas cara si deban si banci ka erban kita nghakimi kalak “arah kai si teridah saja.”

8. Kai si banci sipelajari arah Imamat 19:15?

⁸ Bayak ntah lang sekalak jelma banci mpengaruhi tanggapenta kerna ia. Nina Imamat 19:15, “Bujur ras adillah pemutusenndu adi kam ngadili perkara kalak; ola kapiti kalak [mesera], ola  mbiar man kalak bayak.” Engkai maka bayak ntah lang sekalak jelma banci mpengaruhi tanggapenta kerna ia?

9. (a) Kai nina Salomo? (b) Kai pelajarenna banta?

⁹ Salomo, si itegu-tegu kesah si badia, ngataken, “Kalak bayak nterem temanna, tapi kalak [mesera] temanna jine pe ernembeh ate man bana.” (Kuan-kuanen 14:20) Kai pelajarenna? Adi la kita hati-hati, kalak bayak saja ngenca sitemani tapi kalak mesera lang. Engkai seh kel bahayana adi sihakimi kalak menurut ertana?

10. Masalah kai si terjadi bas runggun abad pertama?

¹⁰ Adi sihakimi turang seninata arah ertana, dungna runggun banci terbagi-bagi. Enda me si terjadi i piga-piga runggun bas abad pertama, emaka ipersingeti Jakup kalak e. (Baca Jakup 2:1-4.) Ula min sipediat runggunta terbagi-bagi. Jadi, uga carana gelah la sihakimi kalak menurut ertana?

11. Lit nge pengaruh ertata ku hubungenta ras Jahwe? Jelasken.

¹¹ Arusna, bagi Jahwe min carata ngenen turang seninata. Labo perban erta si erban sekalak jelma meherga iakap Jahwe. Rembak ntah lang kita ras Jahwe, la lit hubungenna ras ertata. Payo si ikataken Jesus maka “kalak bayak mesera masuk ku Kerajan  surga,” tapi labo lit ikatakenna maka e la mungkin. (Matius 19:23) Ikataken Jesus ka, “Ermeriah ukurlah kena si mesera, sebap man kena me Kerajan Dibata.” (Lukas 6:20) Tapi labo ertina kerina kalak mesera nggit megiken Jesus janah ndatken pasu-pasu si istimewa. Nterem kang kalak mesera si la nggit ngikutken Jesus. Emaka, la banci sikataken kalak ndeher ras Jahwe ntah lang arah ertana.

12. Kai nina Pustaka kerna kalak mesera ras kalak bayak?

¹² Umat Jahwe lit si bayak, lit si mesera. Kerina kalak e ngkelengi Jahwe janah ngelayani Ia alu bulat ukur. Ikataken Pustaka man kalak bayak “gelah erpengarapen ia labo man kebayakenna si banci keri, tapi erpengarapen man Dibata.” (Baca 1 Timotius 6:17-19.) Ipersingeti Pustaka ka kerina umat Jahwe, si bayak ras si mesera, maka bahaya kel merangap man sen. (1 Timotius 6:9, 10) Adi bagi Jahwe carata ngenen turang seninata, labo sihakimi kalak e perban ertana. Tapi uga ka kerna umur? Cocok nge sihakimi kalak arah umurna?

13. Kai si iajarken Pustaka i bas ngergai kalak si nggo metua?

¹³ Rusur ikataken bas Pustaka maka arus siergai kalak si nggo metua. Nina Imamat 19:32, “Mehamatlah man kalak si enggo metua, janah pehagalah Aku.” Ikataken Kuan-kuanen 16:31 maka “ulih kalak bujur, eme kap cawir metua; uban desken mahkota si meherga kap.” Nina Paulus man Timotius gelah ula ipersingetina kalak si nggo metua alu kasar, tapi ibanna min kalak e bagi bapakna. (1 Timotius 5:1, 2) Amin gia lit hakna mpersingeti kalak si nggo metua, tapi arus ikelengina ras iergaina kalak e. 

14. Kai si ilakoken kalak si tuan asangken kita si erbanca perlu sipersingeti ia?

¹⁴ Uga adi lit kalak si nggo metua alu sengaja ngelakoken dosa ntah pe idukungna perbahanen si la ngena ate Jahwe? La iampuni Jahwe kalak si ngelakoken dosa alu sengaja, aminna pe ia nggo metua janah iergai. Perdiateken pedah si lit bas Esekiel 9:5, 6, “Emaka kubegi ka Dibata ngerana man kalak si debanna nina, ‘Ikutken ia niar-niar kuta e . . . Bunuh kerina tua-tua, anak perana, singuda-nguda, pernanden, bage pe danak-danak.’” Enda seri ras kai si ikataken Jesaya. (Jesaya 65:20) Si pentingna, siergai Jahwe si nggo metua si nggeluh rasa lalap. (Daniel 7:9, 10, 13, 14) Adi siergai Jahwe, pang kita mpersingeti kalak si perlu isampati, la soal nggo asakai umurna.​—Galati 6:1.

15. Kai pelajaren si banci sidat arah rasul Paulus kerna ngergai turang seninata si nguda denga?

¹⁵ Uga adi turang seninata e nguda denga? La nge perlu siergai ia? Labo bage. Itulis Paulus man Timotius, “Ula pediat ise pe sepele man bandu erkiteken kam nguda denga. Tapi jadi usihenlah kam man kalak si setia i bas pengerana, perbahanen, kekelengen, kiniteken, bage pe lagu langkah si bersih.” (1 Timotius 4:12) Sanga itulis Paulus surat e, banci jadi umur  Timotius 30 tahun, tapi nggo ibere Paulus bana tanggung jawap si seh kel pentingna. Kai pelajarenna? Ula sihakimi turang seninata perban ia nguda denga. Ukuri kai si nggo ilakoken Jesus sanga umurna 33 tahun denga!

16, 17. (a) Uga pertua erban keputusen adi lit turang senina si ncukupi syarat jadi si nampati runggun ntah pe pertua? (b) Uga pendapat ntah pe budaya sekalak jelma erban ia la ngikutken Kata Dibata?

¹⁶ I bas piga-piga budaya, anak muda la iergai. Dungna, piga-piga pertua la milih anak muda ngelayani jadi si nampati runggun ntah pe pertua, amin pe ia nggo ncukupi syarat. Tapi la pernah itentuken bas Pustaka umur sekalak dilaki gelah banci jadi si nampati runggun ntah pe pertua. (1 Timotius 3:1-10, 12, 13; Titus 1:5-9) Adi budayana si ikutken pertua e i bas erban peraturen si bage, e la cocok ras kai nina Pustaka. Pertua arus nghakimi anak muda menurut Pustaka, labo menurut pendapat ntah pe budayana.​—2 Timotius 3:16, 17.

¹⁷ Adi la ikutken pertua pedah Pustaka i bas milih si nampati runggun ntah pe pertua, itahan kalak e me turang senina si nggo ncukupi syarat ndatken tanggung jawap e. Bas sada negeri, lit sekalak si nampati runggun si ndalanken tanggung jawap si penting alu mehuli, setuju me pertua-pertua maka ia nggo ncukupi syarat jadi pertua. Tapi ikataken piga-piga pertua si nggo metua maka ia ngudasa denga, emaka la ia iajuken jadi pertua. Sayang kel, la surung turang seninata ndai jadi pertua, enda terjadi perban salah cara rukur kalak e. Janah tempa-tempa cara rukur si bage nggo biasa i bas piga-piga negeri. Emaka penting kel ngikutken pedah Pustaka asangken pendapatta ntah pe budayata. Alu bage, sipatuhi Jesus, janah lanai sihakimi kalak arah kai si teridah.

18, 19. Uga carana gelah bagi Jahwe carata ngenen turang seninata?

¹⁸ Kita la sempurna, tapi banci nge sipelajari carana ngkelengi kerina kalak bagi si ilakoken Jahwe. (Perbahanen Rasul-Rasul 10:34, 35) Emaka arus terus siikutken pedah Pustaka. Adi sidalanken, sipatuhi me perentah Jesus gelah ‘ula nai sihakimi kalak arah kai si teridah saja, tapi sihakimilah kalak alu adil.’​—Johanes 7:24.

¹⁹ Lanai ndekah, ihakimi Rajata, Jesus Kristus, me kerina kalak. Penghakimenna menurut pedah Dibata si benar, labo menurut kai si idahna ntah si begina. (Jesaya 11:3, 4) Pasti sitimai kel masa si luar biasa e!