1, 2. (a) Kinilaadilen kai si iadapi Nabot ras anak-anakna? (b) Dua sipat kai si man bahasenta bas artikel enda?

ITUDUH dua kalak dilaki me sekalak bapa ngelakoken kesalahen si seh kel belinna. Tuduhen e la tuhu. Tapi bapa e ikataken ersalah janah iukum mate. Cuba ukuri uga perasan kalak si ngena atena keadilen ngidah bapa ras anak-anakna si la ersalah e ibenteri alu batu seh mate! Enda labo sekedar cerita. Enda tuhu-tuhu terjadi nandangi umat Jahwe si setia, gelarna Nabot, si nggeluh paksa Raja Ahap merentah Israel.​—1 Raja-Raja 21:11-13; 2 Raja-Raja 9:26.

² Bas artikel enda, sibahas kari kai si terjadi nandangi Nabot. Sibahas ka kesalahen serius si deban, eme kesalahen si iban sekalak pertua si setia i bas salah sada runggun Kristen abad pemena. Dua contoh enda ncidahken man banta uga perluna sipat meteruk rukur ras nggit ngalemi adi siusih atenta keadilen Jahwe.

3, 4. Uga nge kalakna Nabot e, janah ngkai maka itulakna ndayaken peken anggurna man Raja Ahap?

³ Tetap Nabot setia man Dibata Jahwe amin gia buen kalak Israel ngikutken contoh si la mehuli Raja Ahap ras ndeharana, Isebel, kemberahenna si jahat. Isembahna dibata palsu Baal janah la iergaina Jahwe bage pe undang-undangNa. Tapi iergai Nabot hubungenna ras Jahwe lebihen asa geluhna.

⁴ Oge 1 Raja-Raja 21:1-3. Paksa itukur Ahap atena peken anggur Nabot ntah pe itukarkenna ras peken si terjilen, la nggit Nabot. Engkai? Alu mehamat ikatakenna, ”Erkiteken gelar [Jahwe], pantang kal kubereken e man bandu, sabap taneh e pusaka nini-niningku kap.” Itulak Nabot pemindon Raja Ahap erkiteken ndayaken tading-tadingen ngelawan undang-undang Jahwe. (Imamat 25:23; Bilangen 36:7) Jelas me, patuh Nabot man Jahwe.

5. Kai si ilakoken Isebel gelah banci datna peken anggur Nabot?

⁵ Paksa la nggit Nabot ndayaken peken anggurna, ngeri kel perbahanen Raja Ahap bage pe ndeharana. Gelah banci datna peken anggur e, ipindo kemberahen Isebel dua kalak dilaki gelah ituduhna Nabot ngelakoken perbahanen si jahat. Dungna, ibunuh me Nabot ras anak-anakna. Kai si ilakoken Dibata Jahwe nandangi kinilaadilen si parah e?

6, 7. Uga Jahwe ncidahken maka ngena ateNa keadilen, janah ngkai enda ngapuli keluarga Nabot ras teman-temanna?

⁶ Minter isuruh Jahwe si Elia njumpai Ahap. Ikataken Elia maka Ahap sekalak pemunuh ras penangko. Kai keputusen Jahwe? Ibunuh me pagi Ahap, ndeharana, ras anak-anakna, bagi Nabot ras anak-anakna.​—1 Raja-Raja 21:17-25.

⁷ Erceda ate me keluarga Nabot ras teman-temanna erkiteken perbahanen Ahap si seh kel ngerina e. Tapi iidah Jahwe kinilaadilen e janah mis itanggapina, enda ngapuli kalak e. Amin gia bage, kejadin si seterusna banci saja nguji sipat meteruk ukur ras kiniteken kalak e man Jahwe.

8. Uga tanggapen Ahap paksa ibegina kepu-tusen Jahwe, janah kai asilna?

⁸ Paksa ibegi Ahap keputusen si iban Dibata Jahwe ”icaingken Ahap uisna, itangtangina, jenari ipakena uis guni tandana erkadiola, janah erpuasa ia. Tupung medem pe ruis guni ia, janah adi erdalan serbut ayona”. Ipeteruk Ahap bana. Kai dungna si terjadi? Ikataken Dibata Jahwe man Elia, ”Erkiteken si e, la Kudabuhken mara kelesa  man bana kidekah ia nggeluh denga. I bas paksa pemerentahen anakna me pagi maka Kudabuhken mara kelesa e.” (1 Raja-Raja 21:27-29; 2 Raja-Raja 10:10, 11, 17) Banci ieteh Dibata Jahwe ise kita situhuna, icidahkenNa perkuah ate man Ahap sabap ”pusuh manusia [Jahwe] si ngujisa”.​—Kuan-kuanen 17:3.

9. Engkai sipat meteruk ukur ngkawali keluarga Nabot ras teman-temanna?

⁹ Paksa ibegi keluarga Nabot ras teman-temanna maka keluarga Ahap la iukum sope Ahap mate, banci saja kiniteken kalak e man Dibata iuji. Tapi sipat meteruk ukur nampati kalak e tetap erkiniteken. Engkai? Adi kalak e meteruk ukur, tetap isembahna Jahwe janah tek maka la mungkin Jahwe la adil. (Oge Ulangen 32:3, 4.) Bas wari si pepagi, idat keluarga Nabot me pasu-pasu guna ngidah kalak si ikelengina ipekeke. Enda keadilen si serta man Nabot ras anak-anakna. (Jop 14:14, 15; Johanes 5:28, 29) Ieteh kalak si meteruk ukur maka ”Dibata kap si ngerunggui kerina perbahan-enta; si mehuli ntah si la mehuli, bage  pe si terbuni”. (Pengerana 12:14) Ieteh Jahwe kai situhuna si terjadi si la si eteh kita. Emaka sipat meteruk ukur nampati kita tetap erkiniteken man Jahwe.

10, 11. (a) Situasi kai si banci saja nguji keadil-enta? (b) Alu cara kai sipat meteruk ukur ngkawali kita?

¹⁰ Uga tanggapenndu adi iban pertua sada keputusen si la iangkaindu ntah pe si la isetujuindu? Contohna, kai si ilakokenndu adi icabut hak istimewa-ndu ntah pe hak istimewa kalak si ikelengindu? Uga adi teman geluhndu, anakndu, ntah pe temanndu ipedarat i bas runggun nari janah la kam setuju nandangi keputusen pertua e? Kai si ilakokenndu adi salah iakapndu icidahken pertua perkuah atena man kalak si erdosa? Situasi enda banci nguji kinitekenta man Jahwe ras cara Ia ngatur runggun gundari. Uga sipat meteruk ukur ngkawali kam adi iadapindu situasi si bage? Mari sibahas dua carana.

¹¹ Si pemena, adi meteruk ukur kita, setuju kita maka la sieteh kerna kerina si terjadi. Amin gia siakap sieteh kerinana, Dibata Jahwe ngenca si meteh kerina isi pusuh manusia. (1 Samuel 16:7) Adi siinget e, alu meteruk ukur siakui keterbatasenta janah perlu siubah caranta rukur. Si peduaken, adi siidah ntah pe siadapi kinilaadilen sipat meteruk ukur nampati kita guna patuh ras ersabar janah nimai Jahwe si mpehuli situasina. Nina Pustaka si Badia, ”Adi kam erkemalangen man Dibata, kerina erdalan alu mehuli.” Nina Pustaka ka,”Tapi, kalak jahat ndatken kiniseran. Geluhna pedas-pedas perlawesna.” (Pengerana 8:12, 13) Adi tetap kita meteruk ukur, kita bage pe kalak si deban ndatken gunana.​—Oge 1 Petrus 5:5.

12. Contoh kai si man bahasenta, janah ngkai?

¹² Kalak Kristen abad pemena i Siria Antiokia ngadapi situasi si nguji sipat meteruk ukur bage pe sipat nggit ngalemi. Mari sibahas contohna janah sipereksa sipatta kerna nggit ngalemi. Enda nampati kita guna ngantusi ngkai maka banci ipake Jahwe manusia si la serta tapi tetap la ilanggarNa patokenNa.

13, 14. Tugas kai si ibere man rasul Petrus, janah uga ia ncidahken maka ia perpang?

¹³ Rasul Petrus eme pertua si menam kerina kalak Kristen abad pemena nandaisa. Ndeher kel ia ras Jesus janah ibere ia tugas si penting. (Matius 16:19) Contohna, bas tahun 36, itugasken me Petrus erberita man Kornelius ras kerina si lit bas rumahna. Engkai maka enda penting? Erkiteken  Kornelius la kalak Jahudi; ia la isunat. Paksa ialoken Kornelius bage pe kerina kalak si lit bas rumahna kesah si badia, isedari Petrus maka kalak enda banci iperidiken jadi kalak Kristen. Nina, ”Kalak enda enggo ngaloken kesah si badia bali ras kita. Banci kin ia iolang-olangi iperidiken alu lau?”​—Perbahanen Rasul-Rasul 10:47.

¹⁴ I bas tahun 49, pulung me rasul-rasul bage pe pertua-pertua i Jerusalem guna erban keputusen kerna perlu ntah lang kalak Kristen si la Jahudi e isunat. I bas perjumpan e, alu pang ipersingeti Petrus turang senina maka iidahna kalak la Jahudi si la isunat e ngaloken kesah si badia. Pengalamen Petrus enda nampati badan pinpinen erban keputusen. (Perbahanen Rasul-Rasul 15:6-11, 13, 14, 28, 29) Pasti ngata bujur kel kalak Kristen Jahudi bage pe si la Jahudi e erkiteken pang Petrus mpebetehken pengalamenna i bas runggu e. Pasti menukah akap kalak Kristen abad pemena tek man dilaki si setia bage pe si erpengalamen enda!​—Heber 13:7, Terjemahan Dunia Baru.

15. Kai kesalahen Petrus paksa ia i Siria Antiokia? (Nen gambar pemena artikel.)

¹⁵ La ndekah kenca perjumpan i Jerusalem, reh me Petrus ku Siria Antiokia. Paksa ia i je, erteman ia ras turang senina si la Jahudi. Banci sibayangken uga riahna akap kalak e megiken pemeteh ras pengalamen Petrus. Amin gia bage, pasti sengget janah kitik ukur kalak e paksa rempet la nggit Petrus man ras kalak e. Kalak Kristen si deban bage pe Barnabas ikut terpengaruh. Engkai maka pertua Kristen si erpengalamen e banci erban kesalah-en si mbelin si banci erban runggun lanai ersada? Si pentingna, kai si banci sipelajari bas kesalahen Petrus si banci nampati kita adi kitik ukurta erkiteken kata-kata ntah pe perbahanen sekalak pertua?

16. Uga Petrus ipersingeti, janah penungkunen kai saja si turah erkiteken si e?

¹⁶ Oge Galati 2:11-14. Jadi kalak si percik-cik me Petrus. (Kuan-kuanen 29:25) Ieteh Petrus uga perukuren Jahwe nandangi kalak si la Jahudi. Tapi, mbiar ia kurang pengergan kalak Kristen Jahudi si arah Jerusalem e man bana adi erteman ia ras kalak Kristen si la Jahudi. Ikataken rasul Paulus man Petrus maka ia nggo jadi kalak si pekulah-kulah. Engkai? Erkiteken ibegi Paulus ibela Petrus kalak Kristen si la Jahudi bas perjumpan i bas Jerusalem tahun 49. (Perbahanen Rasul-Rasul 15:12; Galati 2:13) Uga pengakap kalak Kristen si la Jahudi si kitik ukurna iban Petrus? Lanai nge kalak e setia erkiteken si e?  Icabut nge hak istimewa Petrus erkiteken kesalahen e?

17. Kai gunana pengalemen Jahwe man Petrus?

¹⁷ Meteruk ukur Petrus janah ibegikenna persinget Paulus. La ikataken Pustaka maka icabut hak istimewa Petrus. Situhuna, bas pudi wari isuruh Dibata ia nuratken dua surat si jadi Kitap bas Pustaka. Bas suratna si peduaken, ikatakenna maka Paulus kalak ”si ikelengi kita”. (2 Petrus 3:15) Kesalah-en Petrus pasti erban kitik ukur kalak Kristen si la Jahudi. Amin gia bage, Jesus selaku kepala runggun tetap make ia. (Epesus 1:22) Lit kesempaten turang senina i bas runggun ngusih Jesus ras Bapana guna ngalemi Petrus. Mbera, la lit si sangkut ukurna erkiteken kesalahen kalak si la serta e.

18. Ndigan khususna perlu siusih keadilen Jahwe?

¹⁸ La lit pertua si serta i bas runggun bas abad pemena, bage pe bas runggun si gundari enda. Nina Pustaka si badia, ”Kerina kita megati erbahan salah.” (Jakup 3:2) Sieteh nge e, tapi kai nge silakoken adi siadapi kinilasertan turang seninanta? Siusih nge keadilen Jahwe? Contohna, uga tanggapenndu adi lit sekalak pertua ngataken kai si la mehuli kerna kalak tertentu? Sangkut nge ukurndu adi lit ranan pertua man bandu si la iukurina lebe? Asangken mis kam erpengakap maka turang senina e la cocok jadi pertua, sabar nge kam nimai Jesus, kepala runggun? Asangken iukurindu lalap kesalahenna, nggit nge kam nginget pelayanen turang senina si ilakokenna alu setia sedekah ertahun-tahun? Adi turang senina si erban kitik ukurndu tetap ngelayani jadi pertua ntah pe ibere ia terbuen tanggung jabap, meriah nge akapndu? Adi nggit kam ngalemi, icidahkenndu maka iusihndu keadilen Dibata Jahwe.​—Oge Matius 6:14, 15.

19. Kai tekadta?

¹⁹ Erkiteken ngena ateta keadilen, sitimai waktuna paksa ikernepken Jahwe kerina kinilaadilen si iban Setan ras jaman si jahat enda. (Jesaya 65:17) Tapi sope si e terjadi, paksa siadapi kinilaadilen, alu meteruk ukur siakuilah maka banci saja la sieteh kai situhuna si terjadi janah sialemilah si erban kitik ukurta. Adi silakoken e, siusih me perukuren Dibata Jahwe kerna keadilen.