1, 2. (a) Kai si ikataken Elipas bage pe Bildad kerna tanggapen Dibata nandangi pelayanenta? (b) Kai si ikataken Jahwe kerna si e?

RIBUN tahun si nggo lewat, ngerana telu dilaki man juak-juak Jahwe si setia, gelarna Jop. Salah sadana eme Elipas arah Teman nari, isungkunna Jop, nina, ”Erguna kin manusia enda man Dibata? Lang! Kalak pentar erguna man dirina saja ngenca. Payo gia lagu langkahndu, erguna kin man Dibata? Mehuli gia kam, untung kin man baNa?” (Jop 22:1-3) Jelas me i bas ukur Elipas jabapenna lang. Si debanna eme Bildad arah Suah nari, ikatakenna ka maka la mungkin manusia benar i lebe-lebe Dibata.​—Oge Jop 25:4.

² Iusahaken Elipas bage pe Bildad gelah turah ukur Jop maka sia-sia iakapna usahana i bas ngelayani Jahwe. Ate kalak e gelah tek Jop maka la kita meherga i lebe-lebe Dibata bali bagi kutu, bernga ntah pe gaya. (Jop 4:19; 25:6) Erkiteken meteruk ukur nge kalak e maka ikatakenna bage man Jop? (Jop 22:29) Payo, Jahwe si meganjangna  janah seh kel kitikna kita adi ibandingken ras Ia. Adi i datas deleng kita ntah pe sinen arah jendela pesawat, banci siidah uga kitikna janah la pentingna kita. Tapi bage nge perukuren Jahwe kerna usahanta ngelayani Ia janah usahanta nandangi kinirajanNa? Labo bage! Ikataken Jahwe man Elipas, Bildad, ras dilaki si peteluken eme Sopar, maka kai si ikataken kalak e la tuhu. Ikataken Dibata maka ngena ateNa Jop janah ilebuhNa ia ”suruh-suruhenKu”. (Jop 42:7, 8) Emaka banci kita tek manusia si la serta banci ”erguna man Dibata”.

3. Kai nina Elihu kerna usahanta ngelayani Jahwe? Kai maksudna?

³ Percakapen Jop ras telu temanna ibegi Elihu, sekalak dilaki si nguda denga. Kenca dung kalak e ngerana ikataken Elihu man Jop kerna Dibata Jahwe, ”Bicara bujur gia kam, lit kin e nampati Dibata? I bas kam nari, labo lit kai pe si iperlukenNa.” (Jop 35:7) Ikataken Elihu ka nge maka la lit ertina usahanta ngelayani Dibata? Lang. La ipersingeti Jahwe Elihu, bagi telu dilaki e erkiteken la seri maksud kata-kata Elihu e. Ikatakenna maka la perlu Jahwe penembahenta. Bas Jahwe la lit si kurang. Kai pe si ilakoken kita labo erban Ia reh bayakna ntah pe reh gegehna. Situhuna, kerina kengasupenta rehna bas Dibata nari, janah iperdiateken Dibata uga caranta makekenca.

4. Uga perasan Jahwe paksa mehuli siban man si deban?

⁴ Paksa sikelengi kalak si nembah Dibata Jahwe, ianggap Dibata Jahwe kekelengenta e man baNa. Sioge bas Kuan-kuanen 19:17, nina, ”Nampati kalak musil bali ras pepinjamken man [Jahwe], [Jahwe] ka kari si ersimulih.” Situhuna katawari pe iperdiateken Dibata Jahwe kita paksa sicidahken perkuah atenta man si deban. Janah amin gia Ia Si Nepa si nasa lit, ianggap Jahwe perbahanenta e utangNa banta, igalariNa kari alu simpar. Janah Anak Dibata, Jesus, ikut ngakuisa.​—Oge Lukas 14:13, 14.

5. Penungkunen kai si man bahasenta?

⁵ Bas jaman si nuria, iundang Jahwe nabi Jesaya jadi wakilNa janah ngelayani Ia alu istimewa. (Jesaya 6:8-10) I bas ukurna nari ialoken Jesaya undangen enda, nina, ”Aku, suruhlah aku!” Gundari pe, ibere Jahwe man umatNa si setia kesempaten guna erdahin man Ia. Lit ribun juak-juak Jahwe si seri tanggapenna ras Jesaya. Nggit kalak e ngaloken tugas guna ngelayani Jahwe i bas cara ras ingan si berbeda janah ngadapi keadan ras tentangan si mesera. Tapi, banci saja lit si tersungkun-sungkun: ’Payo, kuergai  kesempaten guna ikut i bas ngelayani Jahwe, tapi erguna nge kai sikulakoken e? La kin dung nge iban Jahwe dahin e la pe aku ikut je?’ Pernah nge bage perasanndu? Mari sibahas piga-piga kejadin bas kegeluhen dua juak-juak Jahwe si mbarenda, Debora ras Barak, si banci nampati kita njabap penungkunen-penungkunen e.

6. Engkai maka menukah iakap tentera Jabin naluken kalak Israel?

⁶ Barak eme tentera bangsa Israel, janah Debora eme sekalak nabi si diberu. Enggo 20 tahun dekahna ”mesui kal ate bangsa” Israel iban raja Kanaan eme Jabin. Tentera Jabin seh kel megegehna dingen seh kel kejamna emaka kalak Israel si tading i kuta mbiar ndarat rumah nari. Lit 900 gereta perang tentera Jabin alu sabi besi si galang, tapi kurang senjata kalak Israel guna ngelawan bage pe baju perangna guna ngkawali dirina.​—Hakim-Hakim 4:1-3, 13; 5:6-8. * (Nen keterangen tambahen.)

7, 8. (a) Kai petunjuk si pemena si ibereken Jahwe man Barak? (b) Uga kalak Israel naluken tentera Jabin? (Nen gambar pemena artikel.)

⁷ Adi sibandingken ras tentera Jabin, kalak Israel lemah ras menukah italuken. Tapi erkelangken Nabi Debora, iperentahken Jahwe man Barak, ”Buatlah sepuluh ribu kalak i bas suku Naptali ras Sebulon nari jenari babai ia ku Deleng Tabor. Aku mabasa Sisera, puanglima tentera Jabin, ngelawan kam i Lau Kison. Ibabana gereta besina ras tenterana, tapi Kubereken man bandu kemenangen ngelawan ia.”​—Hakim-Hakim 4:4-7.

⁸ Ipebetehken me maka perlu dilaki-dilaki si nggit mereken dirina jadi tentera, lit 10.000 kalak si reh i Deleng Tabor. Kenca si e, lawes me Barak ras dilaki-dilaki e erperang ngelawan musuh i Taanak. (Oge Hakim-Hakim 4:14-16.) Isampati Jahwe nge kalak Israel? Ue, isampatiNa. Rempet reh udan si seh kel derna, janah ingan pertempuren e jadi kubang. Enda kesempaten man kalak Israel. Ielis Barak me tentera si Sisera dauhna 24 kilometer, ingan e igelari Haroset. Bas perdalanen, leket me gereta perang Sisera bas kubang. Kiam ia ku Sananim, mungkin deher Kedes. Cebuni ia bas kemah sekalak diberu si gelarna Jael. Latih kel iakap Sisera emaka terpedem ia. Paksa medem ia, alu pang ibunuh Jael ia. (Hakim-Hakim 4:17-21) Ibere Jahwe kemenangen man kalak Israel! * (Nen keterangen tambahen.)

9. Kai si banci sipelajari arah Hakim-Hakim 5:20, 21 kerna pertempuren ngelawan Sisera?

⁹ Gelah terbuen sipelajari kejadin- kejadin bas Hakim-Hakim bindu 4 perlu sioge bindu seterusna. Ituriken Hakim-Hakim 5:20, 21, ”Bintang-bintang  pe ikut erperang. I bas perdalanenna i langit nari, erperang ia ngelawan Sisera. Lau Kison ergalun ngombakken musuh.” Payo nge maksudna maka malekat-malekat si nampati kalak Israel bas pertempuren e, ntah bintang-bintang si ndabuhen? La ijelasken Pustaka kerna si e. Tapi, masuk akal adi isampati Jahwe kalak e alu penusur udan si seh kel derna bas ingan ras waktu si tepat, emaka 900 gereta perang e la banci erdalan. Bas Hakim-Hakim 4:14, 15 sioge maka telu kali Jahwe ipuji erkiteken kemenangen Israel. Jelas me, labo erkiteken kalak Israel si 10.000 e maka ia menang.

10, 11. Kai kin Meros e? Engkai maka ia ikutuk?

¹⁰ Gundari mari siperdiateken uga seterusna. Kenca kemenangen kalak Israel, rende me Debora ras Barak muji Dibata Jahwe. I bas ende-endenna, nina, ”’Sumpahilah kuta Meros,’ nina malekat [Jahwe]. ’Kena sumpah, kena sumpah kerina si tading i je. La ia reh nampati [Jahwe], la ia reh bagi tentera si erperang guna [Jahwe].’”​—Hakim-Hakim 5:23.

¹¹ Kai kin Meros e? La sieteh pastina. Tapi kuta Meros enda lanai lit gundari erkiteken kutuken e. Banci saja la nggit kalak si tading i Meros e erperang ndukung Barak. Erkiteken perlu 10.000 kalak guna ngelawan kalak Kanaan, pasti ibegi kalak Meros pemindon e. Ntah pe banci jadi ibentasi Sisera kuta Meros paksa kiam ia bas Barak nari. Banci jadi lit kesempaten kalak Meros nangkap Sisera tapi la ilakokenna. Bayangken iidah kalak enda tentera si kejam e kiam mbentasi kutana guna nelamatken dirina! Situhuna banci itangkap kalak e ia guna ndukung tujun Jahwe. Adi ilakokenna e dat upah ia. Tapi paksa lit kesempaten e guna ngelakokenca man Jahwe, la ilakokenna. Beda kel kalak Meros e ras Jael si pang ngelakokenca.​—Hakim-Hakim 5:24-27.

12. Kai perbedan tanggapen kalak si ituriken bas Hakim-Hakim 5:9, 10? Uga e arusna mpengaruhi kita?

¹² I bas Hakim-Hakim 5:9, 10, banci sieteh maka beda kel tanggapen si 10.000 kalak e ras tanggapen kalak si la mereken dirina. Ipuji Debora ras Barak ”puanglima-puanglima Israel, bage pe rayat si ermeriah ukur ngendesken bana”. Beda kel kalak e ras ”si ngersak kelede mbentar”, si penting kel akapna bana emaka la ia nggit mereken dirina. Kalak si ituriken ”si kundul i babo pelana” ras ”erdalan nahe”, ntabeh geluhna. Tapi, kalak si mereken dirina bage pe Barak nggit erperang i bas uruk Tabor si erbatu-batu ras i kelbung Kison si erpaya-paya. Kalak si ntabeh atena kegeluhenna, perlu iukurina  kesempaten si ilewatkenna guna mereken diri man Dibata. Gundari, perlu sipereksa uga tanggapenta nandangi pelayanen man Dibata Jahwe.

13. Uga tanggapen suku Ruben, Dan, ras Aser la seri ras Sebulon bage pe Naptali?

¹³ Lit kesempaten si 10.000 kalak e ngidah uga perbahanen Jahwe selaku Penguasa si Meganjangna. Banci ipebetehken kalak e man si deban kerna ”kemenangen [Jahwe]” e. (Hakim-Hakim 5:11) Tapi, suku Ruben, Dan, ras Aser pentingen akapna kinibayakenna, rubia-rubiana, kapal, ras pelabuhenna asangken dahin Jahwe. (Hakim-Hakim 5:15-17) Labo kerina suku bage. Suku Sebulon ras Naptali ”pang ngasamken kesahna” guna ndukung Debora ras Barak. (Hakim-hakim 5:18) I bas dua contoh enda ndai banci sidat pelajaren penting kerna mereken diri guna pelayanen.

14. Uga caranta ncidahken maka sidukung pemerentahen Jahwe gundari?

¹⁴ Gundari, sidukung pemerentah-en Jahwe labo alu erperang. Tapi, dukungenta teridah paksa erberita alu pang janah ergiah-giah. Lebihen asangken mbarenda, iperluken terbuen kalak si nggit mereken dirina bas dahin Dibata Jahwe. Jutan turang senina bage pe kalak si nguda denga nggit mereken dirina guna pelayanen sepenuh waktu si erbage-bage bentukna. Contohna, nterem si jadi perintis, erdahin i bas Betel, Pembangunen Bale Kinirajan, janah ikut ndukung i bas kebaktin wilayah bape pe regional. Tutus ate pertua-pertua i bas Panitia Penghubung Rumah Sakit ras ngaturken kebaktin. Emaka tek kita iergai Jahwe pelayanenta i bas erbage cara si iperluken janah la pernah ilupakenNa usahanta.​—Heber 6:10.

15. Uga carana gelah lalap kita ergiah-giah i bas dahin Jahwe?

 ¹⁵ Perlu sipereksa perbahanenta kerna mereken diri bas pelayanen. Banci sisungkun banta: ’Kupeturut nge gelah kalak si deban si terbuen ndalanken dahin e? Lebih ermediate nge aku nandangi kinibayaken asangken ngelayani Jahwe? Ntah kuusih kiniteken ras kinipangen Barak, Debora, Jael ras si 10.000 kalak e alu mereken kerina si lit bas aku guna ngelayani Jahwe? Pindah nge ateku ku kota ntah negara si deban gelah banci ndatken terbuen sen janah gelah ntabeh pergeluhku? Adi bage, ertoto nge aku man Jahwe kerna uga pengaruhna nandangi keluargangku bage pe runggun?’ * (Nen keterangen tambahen.)

16. Amin gia lit kerina bas Jahwe, kai si banci sibere man baNa?

¹⁶ Ibere Jahwe kita kehamaten si luar biasa alu mpeturut kita ndukung pemerentahenNa. Mulai kin jaman Adam ras Hawa nari, ate Setan gelah manusia ikut ras ia nentang Jahwe. Tapi paksa sidukung pemerentahen Jahwe, jelas-jelas sicidahken man Setan i bas pihak ise kita. Kiniteken ras kesetianta ngiah-ken kita mereken diri i bas Pelayanen man Jahwe, janah enda erban Ia ermeriah ukur. (Kuan-kuanen 23:15, 16) Banci ipake Jahwe dukungenta si setia ras kepatuhenta guna njabap tuduhen Setan. (Kuan-kuanen 27:11) Meherga iakap Jahwe kepatuhenta man baNa janah e erban meriah ukurNa.

17. Kai si ituriken Hakim-Hakim 5:31 man banta kerna kai si terjadi bas wari si reh?

¹⁷ Lanai ndekah kerina si lit bas doni milih pemerentahen Jahwe ngenca. Tuhu-tuhu sitimai kel wari e! Perukur-enta seri bagi Debora ras Barak, si rende, ”Mbera kerina musuhNdu bage permatena O, [Jahwe], tapi teman-temanNdu ersinalsal bagi matawari si sangana nangkih!” (Hakim-Hakim 5:31) Enda terjadi paksa ikernepken Jahwe doni Setan si jahat e. Paksa ibenai pertempuren i Harmagedon, la perlu Jahwe manusia si mereken diri guna ngkernepken musuh. Tapi, kita ’nimai saja’ janah ngenen Jahwe ”mereken kemenangen”. (2 Kronika 20:17) Sope si e, lit kesempaten si luar biasa man banta guna ndukung pemerentahen Jahwe alu pang ras ergiah-giah.

18. Uga carandu mereken diri i bas pelayanen erguna man kalak si deban?

¹⁸ Iendeken Debora ras Barak enden kemenangen alu muji Dibata Jahwe, labo manusia. Nina, ”Pujilah [Jahwe]! Itetapken bangsa Israel ukurna erperang alu ukur meriah.” Alu cara si seri, paksa silayani Dibata Jahwe i bas erbage-bage cara si iperluken, kalak si deban pe banci ikut teriahken guna ’muji [Jahwe]’!