1. Uga Abraham ncidahken maka tek ia nandangi keadilen Jahwe? (Nen gambar pemena artikel.)

IKATAKEN Abraham, ”Adi bage la bujur perbahanen Hakim kerina doni.” (Kejadin 18:25) Ibelaskenna kata-kata enda labo erkiteken ia la tek man Dibata. Tapi, kata-kata enda ncidahken maka tek ia adi Jahwe adil i bas ngakimi kota Sodom ras Gomora. Tek ia maka labo pernah ’ibunuh Jahwe kalak benar radu ras kalak jahat’. Iakap Abraham pe ”enda la banci jadi”. Kenca si e, ikataken Jahwe kerna diriNa, ”[Jahwe] kap pengawalndu si mbisa, serta Ia i bas kerina perbahanenNa. Dibatandu setia dingen bujur; ilakokenNa kai si mehuli dingen patut.”​—Ulangen 31:19; 32:4.

2. Engkai maka la mungkin Jahwe la adil?

² Engkai maka banci Abraham tek adi perbahanen Jahwe lalap nge benar? Erkiteken Jahwe eme usihen si mbelinna kel kerna keadilen ras kebujuren. Situhuna, kata ”keadilen” ras ”kebujuren” rusur ras-ras igunaken  bas Kitap Heber erkiteken menam seri ertina duana. Erkiteken patoken Jahwe lalap benar, emaka pengakimenNa pe lalap nge benar. Nina Pustaka si Badia, ”Ngena ate [Jahwe] kebujuren dingen keadilen.”​—Masmur 33:5.

3. Bereken contoh kinilaadilen i bas doni si gundari enda.

³ Terapuli kel kita erkiteken sieteh maka Jahwe lalap nge adil. Amin gia bage, doni si gundari enda dem alu kinilaadilen. Contohna, lit si ipenjaraken erkiteken kejahaten si la ilakokenna. Erkiteken asil uji DNA, ieteh me maka la ia ersalah, tapi nggo ertahun-tahun ia ipenjaraken. Latih kel ukurta erkiteken kinilaadilen e janah merawa ateta. Tapi, lit kinilaadilen si deban si ndauh seran ngadapisa. Kai kin e?

4. Kai nge si banci saja nguji kiniteken kalak Kristen?

⁴ La mamang akap kalak Kristen adi iadapina kinilaadilen i darat runggun. Tapi, kinitekenta banci saja iuji adi siidah ntah pe siadapi kinilaadilen i bas runggun. Adi bage si terjadi, uga nge tanggapendu? Lanai nge kam setia erkiteken si e?

5. Engkai maka la kita sengget adi siidah ntah pe siadapi kinilaadilen i bas runggun?

⁵ Kerina kita la serta janah erban kesalahen, emaka banci saja lit si la adil man banta ntah pe kita si la adil man kalak i bas runggun. (1 Johanes 1:8) Amin gia enda jarang terjadi, labo kalak Kristen si setia sengget ntah pe nadingken runggun. Ibere Jahwe pedah bas Pustaka nari man banta guna nampati kita tetap setia adi ngadapi kinilaadilen arah turang seninanta nari.​—Masmur 55:12-14.

6, 7. Kinilaadilen kai si iadapi turang seninanta i bas runggun, janah sipat-sipat kai si nampati ia?

⁶ Ukuri kerna Willi Diehl. Tahun 1931, Turang Seninanta Diehl ngelayani bas Betel i Bern, Swiss. Tahun 1946, iundang ia ku sekolah Gilead kelas pewaluhken i New York, A.S. Kenca sekolah e, itugasken ia bas dahin keliling i Swiss. I bas pengalamen geluhna, ikataken Turang Seninta Diehl, maka bas bulan Mei 1949, ipebetehkenna ku kantor cabang Swiss maka erjabu atena. Ikataken turang senina si ertanggung jabap man bana maka icabut kerina hak istimewana. Jadi perintis ngenca ia banci. ”Lanai aku banci mpeseh kotbah,” nina Turang Seninanta Diehl. ”Nterem turang senina si la mperkuanken kami, ibanna kami bagi kalak si ipedarat bas runggun nari.”

⁷ Uga tanggapen Turang Seninanta Diehl enda? Nina, ”Ieteh kami nge, maka labo salah menurut Pustaka adi erjabu, emaka ertoto aku janah ernalem man Dibata Jahwe.” Amin gia pernah la iangkai turang senina uga perukuren Jahwe kerna perjabun, paksa pemeteh kalak e isesuaiken, mulihi ka dat Turang Seninanta Diehl hak istimewana. Iupahi Jahwe kesetianna. *  (Nen keterangen tambahen.) Mari sisungkuni banta, ’Adi kualami kinilaadilen si bage, sabar nge aku janah kutimai nge Jahwe si mpehuli keadanna? Ntah man diringku saja aku ernalem janah erusaha nentang kinilaadilen e?’​—Kuan-kuanen 11:2; oge Miha 7:7.

8. Engkai maka banci saja salah pengangkanta kerna kita ntah pe kalak si deban si jadi korban kinilaadilen?

⁸ Adi lit iakapndu kinilaadilen si terjadi i bas runggun, ingetlah maka banci saja salah paham kam. Engkai maka bage? La kita serta janah banci saja salah pengangkanta kerna sada situasi. Banci saja la sieteh kai situhuna terjadi. Tapi, amin gia benar ntah lang pengangkanta, arus kita ertoto man Jahwe kerna situasi e, ernalem man baNa, janah tetap setia. Alu bage la sempat ’[Jahwe] silepakken’.​—Oge Kuan-kuanen 19:3.

9. Contoh kai si man bahasenta i bas artikel enda ras arikel seterusna?

⁹ Mari sipelajari telu contoh kinilaadilen si ialami umat Dibata i bas jaman Pustaka. Bas artikel enda, sibahas kerna ente Abraham eme Jusup bage pe pengalamenna ras senina-seninana. Bas artikel seterusna, sibahas kari uga perbahanen Jahwe nandangi Raja Ahap ras pengalamen rasul Petrus i Siria Antiokia. Asum mbahas contoh enda, perdiateken uga carana gelah banci tetap iutamakenndu Jahwe janah njaga hubungenndu ras Ia, khususna paksa lit akapndu si la adil man bandu.

10, 11. (a) Kinilaadilen kai si iadapi Jusup? (b) Kesempaten kai si lit bas Jusup paksa ia ipenjara?

¹⁰ Jusup eme juak-juak Jahwe si setia si ngalami kinilaadilen bas kalak asing nari. Tapi si erban kitik kel ukurna eme kinilaadilen si ilakoken senina-seninana man bana. Paksa umur Jusup 17 tahun, iculik senina-seninana ia janah idayakenna jadi budak. Kenca si e ibaba ia ku Mesir. (Kejadin 37:23-28; 42:21) I bas negeri si asing e, ituduh me Jusup mperkosa sekalak diberu janah ipenjaraken ia alu la ibere kesempaten mbela diri. (Kejadin 39:17-20) Lit 13 tahun dekahna iadapi Jusup kiniseran selaku budak ras tahanen penjara. Kai pelajaren si banci sidat i bas kai si nialami Jusup si nampati kita adi lit turang seninanta si la adil man banta?

¹¹ Paksa Jusup ipenjara, kalak si nikapken inemen raja pe ipenjareken. Bas sada berngi, ernipi ia, isampati Jahwe me Jusup guna ngertikenca. Ituriken Jusup maka si nikapken inemen raja e ibebasken kari bas penjara  nari janah mulihi ngelayani Paro. Iban Jusup me enda jadi kesempaten guna nuriken keadanna man dilaki e. Banci kita erlajar arah kai si ituriken Jusup bage pe si la iturikenna.​—Kejadin 40:5-13.

12, 13. (a) Janari sieteh maka labo ipeturut Jusup saja kinilaadilen si ialamina? (b) Kai si la ikataken Jusup man si nikapken inemen Raja?

¹² Oge Kejadin 40:14, 15. Perdiateken maka nina Jusup ”iculik” ia. Kata-kata si ipake Pustaka enda banci ka ngertiken ”itangko”. Jelas me, Jusup korban kinilaadilen. Alu jelas ikataken Jusup ka maka la ia ersalah kerna kejahaten si ituduhken bana. Emaka ikatakenna man si nikapken inemen Raja gelah iturikenna kerna ia ku Paro. Kai tujunna? Nina, ”Sampati aku gelah ndarat i bas rumah tutupen enda nari.”

¹³ Ipeturut Jusup saja nge situasina e janah la lit usahana ngelakoken kai pe? Lang! Ieteh Jusup maka ia korban kinilaadilen. Emaka iturikenna keadanna man si nikapken inemen Raja, ngarap ia gelah isampati dilaki e. Tapi, la pernah ikataken bas Pustaka kerna lit ituriken Jusup man si deban maka iculik senina-seninana ia, man Paro pe  la iturikenna kerna si e. Emaka, paksa reh senina-seninana ku Mesir janah erdame ras Jusup, ialo-alo Paro kalak e ras iundangna gelah tading i Mesir guna ngenanami ”kasa kai si mejilena i taneh Mesir”.​—Kejadin 45:16-20.

14. Kai si nampati kita gelah ula sikataken kai si erban kitik ukur adi sialami kinilaadilen i bas runggun?

¹⁴ Adi siakap kita ngadapi kinilaadilen bas runggun, metengetlah min kita gelah la sikata-kataken kerna keadan e. Tentu saja, arus sipindo penampat pertua janah sikataken bana adi lit turang seninanta si ngelakoken dosa si mbelin. (Imamat 5:1) Amin gia bage, i bas melala kasus si labo dosa si mbelin, banci mis sidungi ras turang seninanta e janah la sipebetehken man ise pe, bage pe pertua. (Oge Matius 5:23, 24; 18:15.) Tetaplah kita setia janah sidalanken pedah Pustaka i bas keadan si bage. Maun-maun banci saja sisedari maka salah paham kita kerna sada keadan, kepeken labo kita iperlakoken alu la adil. Emaka mehuli adi la sipebelin masalah e alu ngataken kai si la mehuli kerna turang seninanta! Ingetlah amin gia kita salah ntah pe benar, ngataken kai si erban kitik ukur kalak labo erban keadan reh ulihna. Kesetianta man Jahwe ras man turang seninanta nampati kita la ngataken kai si erban kitik ukur turang seninanta. Ikataken pemasmur maka ”kalak si patuh man Dibata i bas kai-kai pe . . . la ibelaskenna cakap la tuhu kerna temanna, . . . la erbahan salah man temanna”.​—Masmur 15:2, 3; Jakup 3:5.

15. Uga hubungen Jusup ras Jahwe jadi pasu-pasu man bana?

¹⁵ Lit ka pelajaren penting si deban i bas Jusup nari. Sedekah 13 tahun inanamina kiniseran erkiteken kinilaadilen, perukuren Jusup kerna keadan e bali bagi perukuren Jahwe. (Kejadin 45:5-8) La pernah isalahkenna Jahwe. Tentu saja, labo ilupaken Jusup kinilaadilen si erban ia ngenanami kiniseran, tapi labo kitik ukurna. Si pentingna ka, la ipeturutna kinilasertan kalak si deban ras perbahanen si la mehuli erban ia ndauh bas Jahwe nari. Kesetian Jusup mereken kesempaten man bana guna ngidah uga Jahwe mpehuli kinilaadilen ras masu-masu ia bage pe keluargana.

16. Engkai maka arus terus sipedeher banta man Jahwe adi sialami kinilaadilen bas runggun?

¹⁶ Alu cara si seri, arus siergai ras sijaga hubungenta ras Jahwe. Ula pernah sipeturut kinilasertan turang  seninanta erban kita ndauh bas Dibata nari, si nikelengi ras si isembah kita. (Roma 8:38, 39) Tapi, adi sialami kinilaadilen i bas runggun, siusihlah Jusup janah tetap ndeher ras Jahwe. Usahakenlah gelah seri perukurenta ras perukurenNa. Kenca nggo sidungi kerina masalahta asa bancina alu ngikuti pedah Pustaka, sipeturutlah Jahwe si ndungisa. Banci kita tek maka idungiNa si e i bas waktu ras cara si itetapkenNa.

17. Uga caranta ncidahken maka tek kita man ”Hakim kerina doni”?

¹⁷ Sedekah nggeluh bas doni si jahat enda, pasti siadapi kinilaadilen. Amin gia jarang, banci saja kam ntah pe kalak si itandaindu ngadapi ntah pe ngidah kinilaadilen bas runggun. Emaka ula sangkut ukurndu. (Masmur 119:165) Tapi, tetaplah setia man Jahwe, ertoto mindo penampat, ras ernalem man baNa. Inget maka erkiteken kinilasertan, banci saja salah paham kam nandangi masalah e, ras banci saja la ietehndu kai situhuna terjadi. Usihlah Jusup janah ula kataken kai si la mehuli, si erban keadan reh parahna. Emaka, asangken ernalem man dirindu sendiri, ertekadlah gelah tetap setia janah alu sabar timai Jahwe mpehulisa. Alu bage meriah ukur Jahwe ngidah kam janah datndu pasu-pasu bagi Jusup. Banci kam tek man Jahwe, ”Hakim kerina doni”, si pasti ngelakoken kai si benar, ”ilakokenNa kai si mehuli dingen patut”.​—Kejadin 18:25; Ulangen 32:4.

18. Kai si man bahasenta bas artikel seterusna?

¹⁸ Bas artikel seterusna, sibahas dua contoh nari kerna kinilaadilen si terjadi i bas umat Jahwe bas jaman Pustaka. Contoh-contoh enda banci nampati kita gelah sieteh uga sipat meteruk rukur ras nggit ngalemi nampati kita ngusih perukuren Jahwe nandangi kinilaadilen.