1. (a) Kai si seri bas Jepta ras Hanna? (Nen gambar pemena artikel.) (b) Penungkunen kai si nandangi sijabap bas artikel enda?

JEPTA eme sekalak peminpin ras pejuang si perpang. Hanna sekalak diberu si sederhana si ngurus perbulangen bage pe jabuna. Duana kalak enda penembah Jahwe. Tapi lit ka si seri bas kalak enda. Erpadan Jepta ras Hanna man Jahwe, janah alu setia itepatina padanna e. Tuhu-tuhu contoh si mehuli man dilaki ras diberu si gundari si erpadan man Jahwe. Mari sibahas jabapen telu penungkunen enda: Kai kin padan e? Sibar uga pentingna erpadan man Dibata? Kai si banci sipelajari arah Jepta ras Hanna nari?

2, 3. (a) Kai kin ertina padan e? (b) Kai si ikataken Pustaka kerna erpadan man Dibata?

² I bas Pustaka si Badia, padan eme janji si penting si nggo siban ras Dibata. Contohna, banci saja sekalak jelma erjanji man Jahwe maka lit atena si ilakokenna, lit atena si ipersembahkenna, ikut atena i bas  sada pelayanen, ntah pe mpedauh sada perbahanen atena. Erpadan enda pilihen nge, la lit sekalak pe si ipaksa gelah erpadan. Tapi, sanga ipilih sekalak jelma ngelakokenca, menurut Jahwe padanna e sada janji si penting si arus iergai janah idalanken. Menurut Pustaka, seri pentingna padan ras sumpah. Sumpah eme janji sekalak jelma guna ngelakoken ntah pe la ngelakoken sada perbahanen. (Kejadin 14:22, 23; Heber 6:16, 17) Kai si ikataken Pustaka kerna uga pentingna nepati padanta man Dibata?

³ Sioge bas Undang-Undang Musa maka kalak si erpadan man Jahwe, ”la banci ilanggarna padan e, tapi arus itepatina sue ras si ipadankenna”. (Bilangen 30:2) Kenca e, itulis Salomo, ”Dage adi kam erpadan man Dibata, minter sehken padanndu e. La ngena ateNa kerna kalak lenge. Emaka sehkenlah padanndu.” (Pengerana 5:4) Iajarken Jesus maka erpadan man Dibata e penting paksa ikatakenna, ”I bas nini-nininta nai lit pengajaren bagenda, ’Ola ersumpah kerna si la tuhu, tapi bahanlah kai si enggo isumpahkenndu i lebe-lebe [Jahwe].’”​—Matius 5:33.

4. (a) Sibar uga nge pentingna siakap kerna erpadan man Dibata? (b) Kai si man bahasenta kerna Jepta ras Hanna?

⁴ Jelas me maka arus penting kel siakap janjinta man Jahwe. Caranta nepati padan erpengaruh nandangi hubungenta ras Ia. Iperjelas Daud enda paksa isungkunna, ”Ise kin metunggung nangkih ku deleng [Jahwe] dingen bengket ku bas rumahNa si badia?” Ijabapna alu ngataken maka kalak ”si la ersumpah guak” nge si ialoken Jahwe. (Masmur 24:3, 4) Kai kin padan Jepta ras Hanna? Menukah nge akap kalak enda nepatisa?

5. Kai kin padan si iban Jepta? Kai dungna si terjadi?

⁵ Iban Jepta sada janji man Jahwe paksa muat lawes erperang ngelawan kalak Amon. Kalak enda musuh umat Dibata. (Hakim-Hakim 10:7-9) Ipindo Jepta man Jahwe gelah menang ia bas pertempuren e janah erpadan ia, ”Adi iberekenndu kemenangen man bangku naluken bangsa Amon, ise si pemenana ndarat i rumahku nari ngalo-ngalo aku sangana aku mulih i bas kemenangen nari kubere jadi sikerajangen Jahwe.” Ijabap Dibata pertoton Jepta janah ibanna ia menang bas pertempuren. Paksa mulih Jepta ku rumah, reh me anak si ikelengina ngalo-ngalo ia. Ia me si ”iberena jadi sikerajangen Jahwe”. (Hakim-Hakim 11:30-34, Terjemahan Dunia Baru, [NW]) Kai nge ertina enda man anakna e?

6. (a) Menukah nge iakap Jepta ras anakna nehken padanna man Dibata? (b) Kai nge si banci sipelajari kerna padan i bas Ulangen 23:21, 23 bage pe Masmur 15:4?

 ⁶ Guna nehken padan bapana, arus lawes anak Jepta ngelayani Jahwe segedang geluhna i tabernakel. La kin iukuri Jepta lebe maka ia erjanji? Labo bage. Banci saja ietehna nge maka anakna si tangtangna reh ngalo-ngalo ia. Tapi amin gia ietehna ntah lang, labo menukah iakap Jepta ras anakna ndalanken padanna e. Paksa iidah Jepta anakna, ikatakenna maka getem kel pusuhna. Kenca e lawes me anakna e gelah ”itangisina masa singuda-ngudana”. Engkai maka bage? Sada ngenca anak Jepta, e pe diberu ka, janah la ka banci erjabu bage pe mupus. Emaka la lit si nerusken kesusuren Jepta. Tapi isedari kalak enda duana maka lit si ndauh pentingen asangken perasanna. Nina Jepta, ”Enggo aku erpadan tuhu-tuhu man [Jahwe], janah perpadanen e arus isehken!” Nina anakna, ”Lakokenlah kai atendu ilakokenndu kerna aku.” (Hakim-Hakim 11:35-39, [NW]) Jepta kalak si setia bage pe anakna, la pernah iobah kalak e atena padanna man Dibata, amin gia mesera iakap kalak enda ndalankenca.​—Oge Ulangen 23:21, 23; Masmur 15:4.

7. (a) Kai si ipadanken Hanna, janah ngkai? Kai si dungna terjadi? (b) Kai pengaruh padan Hanna nandangi Samuel? (Nen keterangen tambahen.)

⁷ Hanna pe erpadan man Jahwe paksa picet kel ukurna. Tersiksa ia erkiteken la banci mupus, janah itokohi ras isakiti ka ia. (1 Samuel 1:4-7, 10, 16) Iturikenna ukurna man Jahwe, janah erjanji ia, ”O [Jahwe] si Mada Kuasa, perdiateken min aku suruh-suruhenNdu enda! Nehenlah kesusahenku janah ingetlah aku! Ola lupaken aku! Adi iberekenNdu man bangku sekalak anak dilaki, erpadan aku maka kuendesken ia man baNdu kidekah geluhna, janah bukna ndigan pe la ipangkasna.” * (Nen keterangen tambahen.) (1 Samuel 1:11) Ibegiken Jahwe pertoton Hanna, janah setahun kenca si e ipupusna sekalak anak dilaki eme Samuel. Meriah kel ukur Hanna! Tapi la ia lupa padanna man Jahwe. Paksa tubuh anakna, ikatakenna, ”Man [Jahwe] kupindo ia.”​—1 Samuel 1:20.

8. (a) Menukah nge akap Hanna nehken padanna? (b) Uga Masmur 61 ngingetken kam kerna usihen Hanna?

⁸ Paksa umur Samuel telu tahun, itepati Hanna janjina man Jahwe. Ibabana Samuel ku Imam si Mbelin Eli bas tabernakel i Silo janah nina, ”Kupindo anak enda man baNa, jenari iberekenNa man bangku kai si  kupindo. Emaka kuendesken ateku ia man [Jahwe]. Kidekah ia nggeluh, sikerajangen [Jahwe] ia.” (1 Samuel 1:24-28) Mulai jenari Samuel tading i tabernakel. Ikataken Pustaka maka ”Samuel mbelin-mbelin i bas ndahiken dahin [Jahwe].” (1 Samuel 2:21) Labo menukah iakap Hanna nepati janjina. Erkiteken lanai banci ia tading ras anakna si seh kel atena kelengna. La banci idahna anakna e reh belinna. Tapi tuhu-tuhu iseh-kenna padanna man Jahwe. Labo dalih akapna mereken kai si penting guna nepati janjina man Dibata.​—1 Samuel 2:1, 2; oge Masmur 61:1, 5, 8.

9. Kai nge si nandangi sibahas?

⁹ Gundari nggo sieteh uga pentingna erban padan man Jahwe, mari sibahas penungkunen enda: Padan kai saja si banci siban gundari? Uga nge arusna belinna tekadta guna nehken padanta?

10. Kai nge padan si pentingna kel si banci iban kalak Kristen? Kai nge ertina e?

¹⁰ Padan si pentingna kel si banci iban kalak Kristen eme mbaktiken dirina  man Jahwe. I bas pertotonna, erjanji ia mereken geluhna guna ngelayani Dibata seh rasa lalap, la soal kai pe si terjadi. Ikataken Jesus maka arus ’sipersilahang’ dirinta, ertina, Jahwe me si pentingna, labo dirinta. (Matius 16:24) Emaka mulai jenari, nggo ”sikerajangen [Jahwe] kap kita”. (Roma 14:8) Tuhu-tuhu penting kel siakap pembaktinta e. Bali perasanta ras pemasmur si ngataken, ”Kai banci kuulihken man [Jahwe] kerna kerina kiniulinNa man bangku? I bas perpulungen kerina bangsaNa, kupersembahken me kai si enggo kupadanken baNa.”​—Masmur 116:12, 14.

11. Kai si terjadi i bas wari kam iperidiken?

¹¹ Enggo nge kam mbaktiken diri man Jahwe janah icidahkenndu man kalak si deban alu iperidiken? Adi enggo, merandal! Ingetndu nge kotbah peridin turang seninanta paksa isungkunna kam nggo nge kam mbaktiken diri man Jahwe janah iangkaindu maka ”alu mbaktiken diri ras iperidiken, kam itandai kalak selaku Saksi-Saksi Jahwe”? Paksa ijabapndu enggo, iidah kerina si reh maka nggo iberekenndu geluhndu janah nggo ncukupi sarat guna iperidiken lako jadi juak-juak Jahwe. Pasti meriah kel ukur Jahwe ibahanndu!

12. (a) Penungkunen kai nge si perlu sisungkun banta? (b) Sipat-sipat kai si perlu sipebelin bagi si ikataken Petrus?

¹² Paksa iperidiken, erjanji kam man Jahwe maka iberendu geluhndu guna ngelayani Ia ras ndalanken patokenNa asa ngasupndu. Tapi enda permulan denga. Perlu nge terus sipereksa diri-nta. Banci sisungkun banta: ’Reh deherna nge aku ras Jahwe kenca iperidiken? Tetap nge kulayani Ia alu bulat ukur? (Kolose 3:23) Terus nge aku ertoto? Kuoge nge Pustaka tep-tep wari? Ratur nge aku reh ku tiap perpulungen? Erberita nge aku asa ngasupku? Ntah lanai nge aku semangat?’ Ipersingeti rasul Petrus kita maka bahaya adi lanai kita ergiah-giah bas pelayanenta man Jahwe. Enda banci la terjadi adi siusahaken mpebelin kinitekenta, mpebages pemetehta, megenggeng, janah tutus erdibata.​—Oge 2 Petrus 1:5-8.

13. Kai si perlu isedari kalak si nggo mbaktiken diri ras iperidiken?

¹³ Adi nggo erpadan kita ngelayani Jahwe, lanai banci itarik mulihi. Sekalak jelma si leja akapna ngelayani Jahwe ntah pe nggeluh selaku kalak Kristen, la banci ikatakenna maka la pernah ibaktikenna dirina man Dibata janah peridinna la sah. * (Nen keterangen tambahen.) Adi sekalak si nggo mbaktiken diri man Jahwe ngelakoken kesalahen si mbelin, arus ia ertanggungjabap man Jahwe bage pe man runggun. (Roma 14:12) La kita nggit bagi kalak si ikataken Jesus, ”Lanai atendu keleng aku bagi tangtangna nai.” Tapi, ateta min ikatakenna kerna kita, ”Kueteh nge kerna keleng atendu, kerna tutus atendu, kerna penampatindu, bage pe kerna saber  atendu. Kueteh maka buen si idahikenndu genduari asangken si tangtangna nai.” (Ketangkasen 2:4, 19) Meriah ateta siban ukur Jahwe alu ergiah-giah ndalanken pembaktinta.

14. Kai padan si peduaken si pentingna si banci iban sekalak jelma? Engkai?

¹⁴ Padan si peduaken si pentingna kel eme sekalak si erban padan perjabun. Perjabun e badia. Padan ras perjabun e seh kel pentingna iakap Jahwe. Paksa dilaki ras diberu erpadan, erjanji kalak enda i lebe-lebe Jahwe ras kalak si reh. Biasana erjanji kalak enda gelah sikeleng-kelengen, bage pe sihamaten sentudu ras hukum Dibata sedekah kalak e duana ras nggeluh i doni sue ras hukum perjabun Dibata. Amin gia lit kalak si erpadan la bage kel kata-katana, tetap nge kalak enda erpadan i lebe-lebe Dibata. Paksa erpadan, kalak enda nggo jadi perbulangen ras ndehara. Emaka perjabun sada iketen segedang geluh. (Kejadin 2:24; 1 Korinti 7:39) Nina Jesus, ”Si enggo ipersadaken Dibata, lanai banci isirangken manusia.” Pasangen si nandangi erjabu ula min iakapna adi perjabunna e la cocok ndigan pe banci sirang.​—Markus 10:9.

15. Engkai maka la seri perukuren kalak Kristen ras perukuren doni kerna perjabun?

¹⁵ Tentu saja, la lit perjabun si serta, erkiteken kerina manusia la serta. Enda me alasenna ikataken Pustaka maka maun-maun kalak si erjabu ”inanamina me erbage-bage kesusahen”. (1 Korinti 7:28) Gundari, melala kalak sepele akapna perjabun. Menurut kalak enda adi perjabun la cocok, banci mis idungina. Tapi la bage menurut kalak Kristen. Isedari kalak enda maka ia nggo erban padan perjabun i lebe-lebe Dibata. Adi la itepatina, banci ikataken maka kalak enda erbual man Dibata, janah segat ate Dibata kalak perguak. (Imamat 19:12; Kuan-kuanen 6:16-19) Arus iinget kalak Kristen si nggo erjabu kata-kata rasul Paulus enda, ”Adi enggo lit ndeharandu ola sirangken ia.” (1 Korinti 7:27) Banci ikataken Paulus bage erkiteken ietehna maka segat ate Dibata kalak simulihen.​—Maleaki 2:13-16.

16. Kai nina Pustaka kerna sirang ras ranggung?

¹⁶ Iajarken Jesus maka alasen si erpalasken Pustaka guna sirang eme adi salah sada teman nggeluh erlua-lua janah teman nggeluh si la ersalah la nggit ngalemisa. (Matius 19:9; Heber 13:4). Uga kerna ranggung? Petunjuk Pustaka jelas kerna si e. (Oge 1 Korinti 7:10, 11.) Amin gia la lit ituriken bas Pustaka alasen guna ranggung, maun-maun lit situasi si erban kalak Kristen tuhu-tuhu perlu ranggung ras teman nggeluhna. Contohna, kegeluhenna ntah pe hubungenna ras Jahwe tuhu-tuhu terancam adi tetap ia tading ras teman nggeluh si nggit mekpeki ntah pe si murtad. * (Nen keterangen tambahen.)

17. Kai si banci nampati pasangen Kristen gelah perjabunna ertahan?

¹⁷ Adi idahi perbulangen ras ndehara  pertua-pertua guna ndatken pedah lako mpesikap perjabunna, banci ipindo pertua e gelah itontonna video Apa itu Cinta Sejati? janah mpelajari buku Keluargandu Banci Ermeriah Ukur. Bas video ras buku enda ituriken kerna pedah-pedah si erpalasken Pustaka si banci nampati perjabun gelah reh paguhna. Nina pasangen si nggo erjabu, ”Kenca pelajari kami oge-ogen enda, perjabun kami reh riahna.” Iakap sekalak turang senina si nggo 22 tahun erjabu maka pasti nge ia sirang. Tapi kenca itontonna video ndai, ikatakenna, ”Kami duana nggo iperidiken, tapi la kami siangkan. Video enda pas kel man kami! Gundari, nggo reh ulina kami.” Jelas me, adi idalanken perbulangen ras ndehara pedah-pedah Jahwe bas perjabunna, hubungenna banci reh paguhna janah terus ermeriah ukur.

18, 19. (a) Kai si ilakoken nterem orang tua Kristen? (b) Cuba turikenndu kerna kalak si ngelayani sepenuh waktu khusus.

¹⁸ Ndai sibahas kerna padan Jepta ras Hanna. Erkiteken erpadan kalak enda, anak Jepta ras anak Hanna nggunaken kegeluhenna lako ngelayani Jahwe alu cara si khusus. Gundari, nterem orang tua Kristen si ngiahken anak-anakna gelah jadi perberita sepenuh waktu janah ngutamaken ngelayani Dibata i bas geluhna. Janah, kerina kita banci ndukung anak-anak muda enda gelah megenggeng bas pelayan-enna.​—Hakim-Hakim 11:40; Masmur 110:3.

¹⁹ Gundari, lit 67.000 kalak si ngelayani selaku Anggota Sepenuh Waktu Khusus Saksi-Saksi Jahwe Sebelang Doni. Piga-piga ngelayani i Betel, dahin pembangunen ntah pe dahin keliling. Si debanna tutus erdahin selaku pengajar, perintis istimewa, utusen injil, hamba Bale Kebaktin, ntah pe hamba Gedung Sekolah si Erpalasken Pustaka. Kalak enda erban ”Padan guna Patuh ras Sederhana”. Bas padan enda, erjanji kalak e maka tutus atena erdahin i bas tugas kai pe si ibereken man bana guna ngelayani Jahwe, nggeluh sederhana, lanai erdahin kecuali dat ijin. Ikataken khusus labo erkiteken jelmana, tapi tugasna. Kalak enda meteruk ukur janah ertekad neh-ken padanna sedekah ngelayani sepenuh waktu khusus.

20. Uga arusna tanggapenta nandangi padanta man Dibata? Janah ngkai?

²⁰ I bas artikel enda sibahas telu padan si banci siban man Dibata. Banci saja nggo ibanndu piga-piga. Sieteh maka arus penting siakap padanta enda janah arus sisehken kerina e asa ngasupta. (Kuan-kuanen 20:25) Adi la sisehken padanta man Jahwe, banci mberat akibatna. (Pengerana 5:6) Emaka mari siusih pemasmur si ngataken man Jahwe, ”Adi bage lalap aku ngendeken ende-enden pujin man baNdu, asum aku nehken persembah-en tep-tep wari sue ras si kupadanken man baNdu.”​—Masmur 61:8.