Penungkunen si Ngoge
Banci nge ipake kalak Kristen spiral (IUD)?
Perlu iukuri kalak Kristen si nggo erjabu alu mbages gelah banci erban keputusen si mehuli kerna si e. Emaka, arus ieteh kalak e uga kin cara kerja spiral janah kai nina Pustaka kerna si e.
Iperentahken Jahwe man Adam ras Hawa bage pe man Nuah ras keluargana, nina, ”Ertuahlah kam jadi nterem.” (Kejadin 1:28; 9:1) Tapi la ituriken bas Pustaka maka kalak Kristen arus ngikutken perentah e. Emaka, kalak si erjabu e me si erban keputusen kerna make KB (Keluarga Berencana) guna ngatur piga atena anakna ntah pe ndigan atena lit anakna. Adi bage, kai nge si arus iukuri kalak e?
Arus iukuri kalak Kristen lebe kai nina Pustaka kerna KB. Kalak Kristen la banci igugurkenna kandungenna. Nggugurken kandungen eme munuh calon bayi i bas bertin. Nina Pustaka, nggugurken kandungen e la ngergai kegeluhen. (Keluaren 20:13; 21:22, 23; Masmur 139:16; Jeremia 1:5) Adi bage, uga nge spiral e?
Lit ituriken kerna si e bas The Watchtower 15 Mei 1979 (halamen 30-31). Sanga si e, biasana spiral iban bas plastik nari, janah imasukken ku rahim, gelah sekalak diberu la hamil. Ituriken bas artikel e maka la ieteh kel uga jelasna cara kerja spiral enda. Nterem ilmuwan ngataken maka spiral erban sel sperma la banci jumpa ras sel telur, gelah la banci ibuahina. Adi sel telur la ibuahi, bayi la banci jadi.
Tapi, i bas piga-piga kejadin, sel telur e ndai ibuahi. Banci jadi sel telur si ibuahi e ndai berkembang i saluren Fallopi (la bas inganna) ntah nuju ku rahim. Sanga nuju ku rahim atena, tapi perban nggo itama spiral ndai i je, la banci sel telur si ibuahi ndai leket ku dinding rahim, dungna sel telur e la jadi. Enda seri ras nggugurken kandungen. Nina artikel e, ”Kalak Kristen si ipakena atena spiral e ndai, arus ikurina uga nina Pustaka kerna ngergai kegeluhen.”
Tapi mulai tahun 1979, sanga artikel e iterbitken, nggo reh majuna ilmu kedokteran bage pe ilmu pengetahuan.
Gundari lit dua jenis spiral. Jenis si pertama iban i bas tembaga nari janah bas tahun 1988, enda nggo melala bas Amerika Serikat. Jenis si deban eme hormon si mulai idayaken bas tahun 2001. Uga nge cara kerja dua jenis spiral enda?
Tembaga: Nggo sieteh ndai maka spiral erban sel sperma la banci masuk ku rahim janah jumpa ras sel telur. Spiral tembaga banci munuh sel sperma, perban sel sperma mate adi kena tembaga. * (Nen keterangen tambahen.) Janah iubah spiral enda me lapisen dalam rahim.
Hormon: Jenis si deban eme spiral hormon, enda seri ras pil KB. Gunana seri ras spiral si tangtangna ndarat mbarenda, tapi ihasilkenna hormon i rahim. Enda erban piga-piga diberu lanai ngasilken sel telur. Emaka, adi la lit * (Nen keterangen tambahen.) Janah ibanna melala lendir i leher rahim, si erban sel sperma la banci ngelewati vagina guna masuk ku rahim.
sel telur, la banci lit pembuahen. Spiral e pe itipiskenna lapisen dalam rahim.Nggo sieteh maka dua jenis spiral enda, iubahna lapisen dalam rahim. Enda ertina, adi sel telur sekalak diberu nggo ibuahi, masuk ia ku rahim tapi la banci leket ku dinding rahim perban lapisen dalam rahim lanai nerima. Dungna sel telur si ibuahi ndai la banci jadi. Tapi nina para ilmuwan enda jarang terjadi, seri ras kalak si make pil KB.
Tapi la lit si banci mastikenca maka kalak si make spiral tembaga ntah pe hormon e erban sel telur la pernah ibuahi. Arah hasil riset nggo ituriken ndai kai gunana spiral, eme gelah sel telur la ibuahi, emaka jarang nge sekalak diberu si dungna hamil.
Kalak Kristen si ipakena atena spiral e, arus icakapkenna lebe ras dokterna. Gelah banci ikataken dokter spiral kai saja si lit i bas inganna tading, kai saja gunana ras kai resikona. Janah ula min iarapkenna kalak si deban ntah pe dokter si erban keputusen man bana. (Roma 14:12; Galati 6:4, 5) Enda keputusen si arus iban pasangen e sendiri. Keputusen e arus erban meriah ukur Jahwe janah pusuh ras perukuren kalak e pe la terganggu.—Bandingken ras 1 Timotius 1:18, 19; 2 Timotius 1:3.
^ par. 8 Nina sada laporen arah England’s National Health Service, ”Spiral si lebih mbue tembagana, 99% lebih manjur. Ertina, adi lit 100 diberu si make spiral e i bas sada tahun, la seh sada pe si hamil. Tapi spiral si sitik ngenca tembagana, kurang manjur.”
^ par. 9 Spiral hormon tipis banna lapisen dalam rahim. Emaka, mon-mon ipake dokter spiral e man diberu si nggo erjabu ntah pe si lenga, si melalasa ntah pe derassa haidna.