1. Kai nina Marta kerna turangna si nggo mate? (Nen gambar pemena artikel.)

MARTA eme kap teman ras ajar-ajar Jesus si sangana erceda ate. Turangna si Lasarus nggo mate. Lit denga nge si banci ngapuli ia? Lit. Erjanji Jesus bana, ”Nggeluh nge turangndu mulihken.” Payo maka kata-kata Jesus enda labo mis erban Marta lanai erceda ate. Tapi tek Marta nandangi janji Jesus enda, emaka nina, ”Kueteh nge maka i bas wari pendungi pagi keke nge ia i bas si mate nari.” (Johanes 11:20-24) Tek ia maka lit nge pagi kekeken. Tapi iban Jesus sada mukjizat. I bas wari e mis ipekekena Lasarus.

2. Ngkai maka kita pe ngarap gelah ipekeke kalak mate?

² Payo, gundari lenga ipekeke Jesus bage pe Bapana keluarga ntah pe teman-temanta si nggo mate. Tapi tek nge kam bagi Marta maka ipekeke pagi kalak si mate? Banci saja perbulangen ntah pe ndeharandu, nandendu, bapandu, nini ras bulangndu, ntah  pe anakndu nggo mate. Lanai kam sabar ndakep ia, ngerana-ngerana, bage pe tawa-tawa ras ia. Bali bagi Marta, banci sikataken, ’Kueteh nge maka keke nge pagi ia.’ Payo, tek kita maka ipekeke nge pagi kalak si mate, tapi perlu siukuri kai alasenna ngkai maka kita tek.

3, 4. Kai si nggo ilakoken Jesus, janah uga e erban kiniteken Marta reh paguhna?

³ Marta tading i deher Jerusalem, emaka banci jadi la idahna sanga ipekeke Jesus anak sekalak balu-balu i deher Nain i Galilea. Tapi ibegina nge berita e. Janah, banci jadi ibegina ka maka nggo ipekeke Jesus anak Jairus. Kerina kalak i bas rumah Jairus e ”ietehna nge maka anak e enggo mate”. Emaka ijemak Jesus tan anak e, janah nina, ”O beru, kekeken!” Emaka mis keke anak e. (Lukas 7:11-17; 8:41, 42, 49-55) Ieteh Marta bage pe seninana, Maria, banci ipepalem Jesus kalak sakit. Emaka tek kalak e adi lit Jesus i je sanga Lasarus sakit, labo ia mate. Tapi nggo kap ia mate, emaka lit denga nge arapen Marta? Nina Marta keke nge pagi Lasarus ”i bas wari pendungi”. Ngkai maka tek kel ia? Janah ngkai kam pe tek maka ipekeke nge pagi keluarga ntah pe temanndu si nggo mate?

⁴ Tek kita maka ipekeke pagi kalak si mate perban lit buktina. Mari sibahas piga-piga. Banci idatndu kari pelajaren si banci jadi jarang iukurindu. Janah reh tekna kam maka banci nge kam jumpa mulihi ras kalak si nggo mate.

5. Ngkai maka tek kel Marta maka ipekeke nge pagi Lasarus?

⁵ Labo ikataken Marta, ’Mbera keke min pagi turangku e.’ Tapi nina, ’Kueteh maka keke nge pagi ia.’ Ngkai maka tek kel Marta? Perban ietehna lit kalak si pernah ipekeke. Banci jadi sanga kitik denga ia ipelajarina enda bas rumahna ras bas rumah pertoton. Sibahas kari telu kalak si ipekeke si ituriken bas Pustaka.

6. Ise kalak si ipekeke si ieteh Marta?

⁶ Elia me si tangtangna ibere Jahwe kuasa guna mpekeke kalak mate. Bas Israel utara i Kanaan, kuta Sarpat, lit i je sekalak diberu balu-balu si mesera pergeluhna tapi mehuli kel ia man nabi Elia. Emaka iban Jahwe me sada mukjizat. Tepung ras minak la keri-keri gelah ula kelihen diberu e ras anakna. (1 Raja-Raja 17:8-16) Tapi sakit me anak diberu e janah dungna mate. Isampati Elia ia. Ijemakna anak e, kenca e ertoto ia, ”O [Jahwe] Dibatangku pegeluhlah mulihken anak enda!” Ibegi Dibata pertoton Elia, janah nggeluh me anak e! Enda me tangtangna kalak si ipekeke si itulis bas Pustaka. (Baca 1 Raja-Raja 17:17-24.) Pasti ieteh Marta kejadin e.

7, 8. (a) Kai si ilakoken Elisa man anak si nggo mate e? (b) Arah kai si ilakoken Elisa, e mbuktiken Jahwe ngasup ngelakoken kai?

⁷ Kalak si peduaken si ibere Jahwe  kuasa guna mpekeke kalak mate eme Elisa. I kuta Sunem, lit sekalak diberu si la banci lit anakna. Perban mehuli ia man Elisa, iban Jahwe me lit anak diberu e ras perbulangenna si nggo metua. Tapi piga-piga tahun kenca si e, mate anak e. Pasti ceda kel ukur nandena. Perban cedana atena, erdalan ia 30 kilometer dauhna njumpai Elisa i Deleng Karmel. Kenca e isuruh Elisa me suruh-suruhenna, Gehasi, ku Sunem guna mpekeke anak e. Tapi la banci ipekekena. Emaka lawes me Elisa ras diberu e ndahi anakna ndai.​—2 Raja-Raja 4:8-31.

⁸ Lawes me Elisa ku kamar anak e, janah ertoto ia. Ijabap Jahwe pertotonna, janah nggeluh anak e mulihi. Sanga idah diberu e anakna nggo nggeluh, seh kel riahna akapna! (Baca 2 Raja-Raja 4:32-37.) Banci jadi iingetna pertoton Hanna. Hanna pe la banci lit anakna, tapi ibere Jahwe ia sekalak anak dilaki, gelarna Samuel. Ipuji Hanna Jahwe perban banci isuruhNa kalak ku bas Kuburen jenari ibabaNa ka ia mulihken ku das. (1 Samuel 2:6) Alu mpekeke anak dilaki i Sunem, ibuktiken Dibata maka ngasup ia mpegeluh kalak si mate.

9. Turiken kerna kekeken si peteluken si ituriken bas Pustaka.

⁹ Kejadin si luar biasa si deban eme kenca Elisa mate. Nggo lebih 50 tahun dekahna ia jadi nabi, janah dungna ”sakit nabi Elisa penakitna enda me maba kematenna”. Kenca nggo ertahun-tahun, Elisa tading tulan-tulan nari ngenca. Bas sada wari, lit piga-piga kalak Israel maba mayat sekalak dilaki guna ikuburken. Tapi, rempet reh musuh. Emaka, ngercek kalak e kiam, piah ibenterkenna mayat ndai ku kuburen Elisa. Nina Pustaka, ”Kenca mait ndai kena ku tulan-tulan Elisa, kalak si mate ndai nggeluh mulihi, e maka tedis ia.” (2 Raja-Raja 13:14, 20, 21) Kejadin e jadi bukti man Marta maka ngasup Dibata mpekeke kalak si mate. Janah kam pe banci tek maka gegeh Dibata luar biasa kel.

10. Kai si terjadi man Tabita, ras kai si ilakoken Petrus?

¹⁰ I bas Kitap-Kitap Junani Kristen pe lit ka nge ituriken kerna umat Dibata si mpekeke kalak si mate. Nggo sibahas ndai kerna Jesus si mpekeke anak diberu balu-balu deher kuta Nain ras anak Jairus. La ndekah kenca si e, ipekeke rasul Petrus me Dorkas ntah pe Tabita. Reh Petrus ku rumah Tabita, kenca e ertoto ia, janah nina, ”O Tabita, kekekenlah!”  Keke me Tabita, janah iidah kerina kalak Kristen si lit i je maka ia nggo nggeluh. Kejadin e tuhu-tuhu terjadi, emaka nterem kalak bas kuta e ”tek man Tuhan”. Janah ituriken kalak e man si deban berita kerna Jesus bage pe Jahwe si ngasup mpekeke kalak si mate.​—Perbahanen Rasul-Rasul 9:36-42.

11. Kenca ndabuh anak muda e arah lante telu nari, uga nina Lukas? Kai pengaruhna kejadin e man kalak si deban?

¹¹ Selain si e, lit ka kalak si ipekeke janah lit ka si ngidahsa. I bas sada waktu, pulung rasul Paulus ras turang senina i das sada loteng rumah i Troas, gundari barat laut Turki. Bas perpulungen e, lit sekalak anak muda gelarna Etikus si sangana kundul i jendela. Tapi terpedem ia, dungna ndabuh arah lante telu nari. Banci jadi Lukas si tangtangna mereksasa. Perban ia sekalak dokter, ietehna me maka anak muda e labo luka ras pingsan ngenca tapi ia nggo mate! Emaka nusur me Paulus. Idakepna Etikus janah nina, ’Nggo nggeluh ia.’ Emaka hebat kel akap kalak e kerina kerna kai si nggo terjadi. La terlupaken kalak e kejadin e. Perban nggeluh mulihi anak muda e, ”meriah kal ukur perpulungen”.​—Perbahanen Rasul-Rasul 20:7-12.

12, 13. Kenca nggo sibahas piga-piga contoh kerna kalak mate si ipekeke, penungkunen kai si turah bas ukurta?

¹² Kejadin kerna kalak mate si ipekeke e, erban kinitekenta reh paguhna bagi Marta. Reh tekna kita man Dibatanta, si mereken kegeluhen, maka banci nge ipegeluhNa kalak si mate. I bas kerina kekeken si terjadi bas Pustaka, lalap lit kalak si ipake Jahwe guna mpekeke kalak mate, misalna Elia, Jesus, ntah  pe Petrus. Janah enda banci terjadi, perban ibere Jahwe denga gegehNa guna erban mukjizat bas paksa si e. Tapi uga kerna kalak si mate i bas paksa lanai ibere Jahwe kuasa man sekalak jelma guna mpekeke kalak mate? Banci denga nge pagi kalak e ipekeke? Banci nge kalak e tek bagi Marta, si ngataken, ”Kueteh nge maka i bas wari pendungi pagi keke nge ia”? Engkai Marta tek maka ipekeke pagi kalak si mate, janah ngkai maka kam pe tek?

¹³ Piga-piga kejadin si ituriken bas Pustaka mbuktiken maka ieteh umat Dibata nge kerna kekeken i bas wari si pepagi. Mari sibahas contohna.

14. Kai si banci sipelajari arah kiniteken Abraham kerna kalak mate si ipekeke?

¹⁴ Nggo ndekah kel itimai Abraham maka lit Isak. Tapi cuba ukuri kai si isuruh Jahwe man Abraham. ”’Buat anakndu,’ nina Dibata, ’Anakndu si tonggal Isak si seh kal atendu kelengna, jenari laweslah ku taneh Moria. . . . Persembahken ia jadi sada persembahen gelehen man bangku.’” (Kejadin 22:2) Uga nge akapndu perasan Abraham sanga bage nina Jahwe bana? Enggo ijanjiken Jahwe maka arah kesusuren Abraham me kerina bangsa ndatken pasu-pasu. (Kejadin 13:14-16; 18:18; Roma 4:17, 18) Janah ikataken Jahwe maka pasu-pasu e ”arah Isak”. (Kejadin 21:12) Tapi uga e banci terjadi adi ipersembahken Abraham si Isak? Ituriken Paulus maka tek Abraham ngasup nge Dibata mpekeke Isak. (Baca Heber 11:17-19.) Tapi, la ikataken bas Pustaka maka iarapken Abraham minter anakna ipekeke, banci jadi piga-piga jam nari, sada wari nari, ntah sada minggu kenca ia mate.  Labo tehna ndigan Isak ipekeke. Tapi tek ia maka pasti nge ipekeke Jahwe anakna.

15. Kai si iarapken Jop kenca ia mate?

¹⁵ Jop pe ietehna maka ipekeke pagi kalak si mate. Ietehna maka adi sada batang kayu itabah, banci denga ia turah mulihi janah jadi batang kayu si mbaru. Tapi manusia la bage. (Jop 14:7-12; 19:25-27) Adi mate ia, la banci ipegeluhna bana. (2 Samuel 12:23; Masmur 89:49) Enda labo maksudna la banci ipekeke Jahwe kalak si mate. Situhuna, tek Jop maka iinget Jahwe nge ia, amin gia la ieteh Jop ndigan ipekekeNa kalak si mate. (Baca Jop 14:13-15.) Tek Jop maka iinget Si Nepa kegeluhen nge ia janah ngasup Ia mpekekesa.

16. Kai nina malekat man Daniel?

¹⁶ Juak-juak Jahwe si deban eme Daniel. Lalap isampati Jahwe ia janah setia ia seh asa mate. Ilebuh malekat ia, kalak si ”keleng kal ate Dibata” janah nina man bana ”ola kam mbiar, ola atendu aru”.​—Daniel 9:22, 23; 10:11, 18, 19.

17, 18. Kai janji Jahwe man Daniel?

¹⁷ Sanga umur Daniel hampir 100 tahun janah nggo nandangi mate ia, banci jadi iukurina kerna kai pagi si terjadi man bana. Tek nge Daniel maka ipekeke Dibata pagi ia? Pasti! Bas pendungi buku Daniel, erjanji Dibata, nina, ”Kam Daniel, patuhlah kam seh ku pendungina. Kenca bage mate me kam tapi keke me kam.” (Daniel 12:13) Ieteh Daniel maka kalak mate e sangana istirahat, janah i bas Kuburen ”lanai bo lit pemeteh ntah pe kepentaren”, ku je me pagi ia lawes. (Pengerana 9:10) Tapi labo e ertina la lit arapenna. Perban ibere Jahwe man Daniel janji si luar biasa bas wari si pepagi.

¹⁸ Nina malekat Jahwe man bana, ”Keke me kam ngaloken upahndu i bas paksa pendungina.” La ieteh Daniel ndigan pastina e terjadi, tapi ietehna maka ipekeke nge pagi ia. Enda terjadi ndekah kenca ia mate eme ”i bas paksa pendungina”.

19, 20. (a) Engkai kita tek maka ipekeke nge pagi kalak si mate? (b) Kai si man bahasenta bas artikel si reh?

¹⁹ Payo, melala bukti si erban Marta tek maka ”i bas wari pendungi pagi keke nge [Lasarus]”. Janji Jahwe man Daniel bage pe kiniteken Marta, erban kita reh tekna maka ipekeke nge pagi kalak si mate.

²⁰ Nggo sibahas kerna piga-piga kalak mate si ipekeke i bas masa si lewat. Enda mbuktiken maka kalak mate banci nggeluh mulihi. Sieteh ka maka tek kel juak-juak Dibata si setia mbarenda maka ipekeke pagi kalak si mate. Lit nge kalak mate si ipekeke amin pe nggo ndekah janji e ibereken? Adi lit, e erban kita reh tekna ka maka ipekeke nge pagi kalak mate. Tapi, ndigan e terjadi? Sibahas kari bas artikel si reh.