ENGKAI maka merawa kel bapakku? Mari kuturiken. Aku lahir tanggal 29 Juli 1929, janah aku mbelin-mbelin i sada kuta bas provinsi Bulacan, Filipina. Kegeluhen kami sederhana. Sanga aku anak-anak denga, reh me tentera Jepang ku Filipina janah mulai me perang. Perban kuta kami ndauh arah kota nari, la ngaruh kel perang e man kami. Bas ingan kami la lit radio, TV, ntah pe koran, emaka berita kerna perang e arah kalak ngenca begi kami.

Kami lit waluh sembuyak, janah sanga umurku waluh tahun, ras nini bulangku aku tading. Amin gia kami agama Katolik, meriah akap bulang cerita-cerita kerna agama janah ialokenna oge-ogen rohani arah temanna nari. Kuinget sange ituduhkenna man bangku sada buku kitik i bas bahasa Tagalog si mpebetehken kerna ajaren agama palsu, janah iberekenna ka man bangku Pustaka i bas bahasa Tagalog. Meriah kel kuakap mbaca Pustaka, khususna kitap Injil. Enda erban aku nggit ngikutken Jesus.​—Johanes 10:27.

Bas tahun 1945, lawes me tentera Jepang arah Filipina nari. Dung e, idilo orang tuangku me aku mulih ku rumah. Janah bulang pe isuruhna ka aku mulih, dungna mulih me aku.

I bas bulan Desember 1945, reh me Saksi Jahwe arah kota Angat erberita ku kuta kami. Sekalak Saksi si nggo metua reh ku rumah kami, janah iturikenna kai nina Pustaka kerna ”wari-wari pendungi”. (2 Timotius 3:1-5) Iundangna kami erlajar Pustaka i deher kuta e. Reh me aku amin gia orang tuangku la ikut. Lit 20 kalak i je, janah isungkuni kalak e kerna Pustaka.

Labo kuangkai kel kai si icakapken i je, emaka kutadingken ateku. Tapi kenca e, iendeken kalak e lagu Kerajan. Ntabeh kuakap  megi lagu e, emaka la aku surung lawes. Kenca rende ras ertoto, iundangna ka kami gelah reh ku perpulungen i Angat minggu si reh.

Perpulungen e iban i rumah keluarga Cruz, janah lit piga-piga arah kami erdalan waluh kilometer dauhna. Lit 50 kalak i je, janah luar biasa kel kuakap banci ijabap anak si kitik denga penungkunen si mesera bas Pustaka. Kenca nggo piga-piga kali aku ikut pulung, lit sekalak perintis si nggo metua gelarna Damian Santos, iundangna aku erberngi i rumahna. Sada berngin kami cerita-cerita kerna Pustaka.

Nterem si minter iperidiken kenca ia erlajar Pustaka. Amin gia piga-piga kali denga ngenca aku ikut pulung, isungkun turang senina aku, nina, ”Nggit kam iperidiken?” Ningku, ”Nggit.” Kueteh maka ’Kristus nge Tuanku si tuhu-tuhu, janah aku nggit jadi budakna’. (Kolose 3:24) Lawes me kami ku lau maler si ndeher arah ingan e, janah lit dua kalak kami iperidiken bas tanggal 15 Februari 1946.

Kueteh me maka adi aku nggo iperidiken, arus aku erberita bagi Jesus. Nina bapakku bangku maka ngudasa denga aku erberita, janah amin gia nggo iperidiken labo e erban aku jadi sekalak perberita. Kujelasken bana maka ate Dibata siberitaken min berita si meriah kerna KinirajanNa. (Matius 24:14) Ningku bana arus kutepati janjiku man Dibata. E si erbanca merawa bapakku bagi si kuceritaken tangtangna ndai. Iusahakenna kel gelah ngadi aku erberita. Tapi kutadingken kerinana gelah banci ngelayani Jahwe.

Idilo keluarga Cruz me aku tading ras ia i rumahna i Angat. Iiahken kalak e me aku ras anakna si nguda, Nora, gelah merintis. Merintis me kami duana bas tanggal 1 November 1947. Aku merintis i Angat, tapi Nora lawes merintis ku kota si deban.

Dua tahun kenca aku merintis, reh sekalak turang senina bas Betel nari, gelarna Earl Stewart, ipesehna khotbah man 500 kalak i kota Angat. Ia ngerana bahasa Inggris, aku si nerjemahkenca ku bahasa Tagalog. Enda me tangtangna aku nerjemahken khotbah. Engkai maka kueteh bahasa Inggris? Amin gia pitu tahun ngenca aku sekolah, tapi bahasa Inggris lalap sange guruku ngerana. Janah lalan oge-ogenta si kupelajari i bas bahasa Inggris, perban sitik ngenca oge-ogenta i bas bahasa  Tagalog. Emaka kueteh bahasa Inggris, janah banci kuterjemahken khotbah e.

Imomoken Senina Stewart man runggun si i je, maka iundang me misionaris ku Kebaktian Pertambahan Teokrasi tahun 1950 ku New York, Amerika Serikat. Emaka ipindo kantor cabang sada ntah pe dua perintis guna nampati i Betel. Iundang me aku. Sekali nari, kutadingken me kerinana guna erdahin i Betel.

Aku seh i Betel tanggal 19 Juni 1950. Mbelang kel halamen Betel e, lit sada hektar belangna. Janah ikelilingi batang-batang kayu si galang. Lit sepulu dua senina si anak perana denga erdahin i je. Dahinku bas pagi-pagi si lampas nampati i dapur. Jam siwah aku erdahin i bagin laundry nggosok baju. Bage ka nge dahinku bas ben wari pe. Nggo pe misionaris e mulih, aku tetap i Betel. Kai pe si isuruh turang senina, kudahiken kerina. Nusun majalah aku guna ikirim, erdahin ka aku bas pengirimen, bage pe jadi si ngalo-ngalo tamu bas Betel.

Bas tahun 1952, aku ras enem turang senina arah Filipina nari iundang ku Sekolah Gilead kelas 20. Meriah kel kuakap! Seh kenca kami i Amerika Serikat, melala i je si la pernah idah kami. Beda kel i je ras i kuta kami.

Contohna, arus kami erlajar make alat-alat bas rumah si la pernah idah kami. Cuacana pe beda kel! Pernah bas erpagi-pagi, sanga medak aku, mbentar kerina kuidah darat. Enda me tangtangna kuidah salju. Mejile kel, tapi mbergeh kel kuakap, seh kel bergehna!

Meriah kel kuakap ngikuti Sekolah Gilead, amin gia melala perubahen si arus kuban. Mehuli kel instruktur si ngajari kami, janah iajarina kami uga carana erlajar ras ngeriset. Pelatihen e nampati aku reh deherna ras Jahwe.

Kenca wisuda, itugasken me aku jadi perintis istimewa sementara i Bronx, Kota New York. Emaka bulan Juli 1953, banci aku reh ku Kebaktian Masyarakat Dunia Baru, si iban i Bronx. Kenca kebaktin e, itugasken aku mulihi ku Filipina.

Itugasken turang senina i Betel aku jadi pertua keliling. Melala me kesempatenku guna ngusih Jesus, si lawes ku kota-kota bage pe kuta-kuta si ndauh guna nampati umat Jahwe. (1 Petrus 2:21) Itugasken aku ku daerah Luzon si mbelang kel, enda me pulo si mbelangna i Filipina. Daerahna eme provinsi Bulacan,  Nueva Ecija, Tarlac, ras Zambales. Gelah banci seh ku piga-piga kota, arus kubentasi Pegunungen Sierra Madre si erbatu-batu. La lit motor ntah pe kereta api si seh ku kota e, emaka kusungkuni supir puso si maba kayu gelah banci aku numpang i pudi pusona. Buen nge si mere tumpangen, tapi la ntabeh i datas puso e.

Buen runggun si lit i je kitik janah mbaru denga. Emaka meriah akap runggun e sanga kusampati ia ngatur perpulungen ras dahin erberita.

Kenca e, itugasken aku ku daerah Bicol. Daerah e pelosok kel, janah la pernah Saksi reh erberita ku je. I bas sada rumah, WC-na iban alu ngelubangi taneh, i datas lubang e ibanna dua kayu. Sanga cinder aku i datas kayu e, ndabuh kayu e ku bas, janah aku pe ikut ndabuh. Ndekah kel maka dung aku ridi.

Sanga aku jadi pertua keliling, kuinget me Nora, si radu kami sange jadi perintis biasa. Ia nggo jadi perintis istimewa i Dumaguete City, janah kudahi me ia. Kenca si e surat-suraten kami, janah bas tahun 1956, erjabu kami. Kenca erjabu, seminggu kami i bas sada runggun i Pulo Rapu Rapu. I jah arus kami erdalan ngelewati deleng janah ndauh kel erdalan, tapi meriah akap kami banci nampati turang senina i bas ingan si ndauh.

Kenca empat tahun kami i bas pendahin keliling, iundang ka kami ku Betel. Kami mulai erdahin i kantor cabang bulan Januari 1960. I Betel, melala pelajaren si kudat arah turang senina si ngelayani bas organisasi Jahwe. Janah meriah akap Nora ndahiken erbage-bage tugas bas Betel.

Sada pasu-pasu kel kuakap banci kuidah reh teremna kalak si ngelayani Jahwe i Filipina. Sanga aku reh ku Betel paksa nguda, 10.000 ngenca perberita i negara enda. Gundari lebih 200.000 perberita i Filipina, ras lit ratusen turang ras senina si erdahin i Betel ndukung dahin erberita.

Gundari perlu kami ingan si terbelangen man Betel. Emaka ipindo Badan Pinpinen me gelah darami kami ingan guna mbangun kantor cabang si terbelangen. Lawes me aku ras pengawas percetaken ku rumah-rumah si ndeher ras kantor cabang, sungkuni kami kalak e ntah dayakenna rumahna. La lit si atena ndayakenca, janah lit si ngataken man kami, ”Kalak Cina labo erdaya, tapi nukur.”

Tapi, bas sada wari, la iarap kami, salah sada tetangga kami pindah ku Amerika Serikat, emaka isungkunna ntah nggit kami nukur rumahna. Kenca si e, lit ka tetangga si deban si idayakenna atena rumahna, janah iiahkenna ka tetanggana ndayaken rumahna ka. Kalak si ngataken ”kalak Cina labo erdaya” dungna idayakenna rumahna. La ndekah, kantor cabang nggo telu kali lebih mbelang asa si pertama. Tek aku maka Jahwe si erbanca maka banci bage.

Bas tahun 1950, aku si ngudana erdahin bas Betel. Tapi gundari aku ras ndeharangku si metuana. Sitik pe la aku erkadiola ngikutken Jesus la soal ku ja pe aku isuruhna. Amin gia ipelawes orang tuangku aku rumah nari, tapi ibere Jahwe aku keluarga besar si ngkelengi Ia. Tek aku maka ibere Jahwe nge kerina si iperluken kita, la soal kai pe tugasta. Bujur kel kataken kami man Jahwe perban kerina si nggo iberekenNa, janah iiahken kami ka kalak si deban gelah iujina Jahwe.​—Maleaki 3:10.

Iundang Jesus sekalak pengalo cuke si gelarna Matius Lewi gelah jadi pengikutna. Nggit nge ia? ”Tedis Lewi, itadingkenna kerina, jenari ikutkenna Jesus.” (Lukas 5:27, 28) Aku pe nggo kutadingken kerinana gelah banci ngikutken Jesus, janah kuiahken ka si deban ngelakokenca gelah dat mbue pasu-pasu.