1, 2. Ngkai maka piga-piga orang tua aru atena adi anakna iperidiken?

LIT ribun si erlajar Pustaka mereken dirina guna ngelayani Jahwe janah iperidiken. Melala arah kalak e ndai kitik-kitik nari nggo erlajar kerna Pustaka janah ipilihna ngelayani Jahwe. (Masmur 1:1-3) Kam orang tua, banci jadi itima-timaindu kel anakndu iperidiken.​—Bandingken ras 3 Johanes 4.

² Tapi, banci jadi aru atendu. Perban lit idahndu piga-piga anak muda si nggo iperidiken dungna ragu ia man pedah-pedah Dibata. Lit ka si dungna lanai ngelayani Jahwe. Emaka, mbiar kam adi anakndu iperidiken tapi dungna lanai keleng atena Jahwe. Banci jadi bali ia bagi kalak Kristen i Epesus bas abad si pemena. Kerna kalak e nina Jesus, ”Lanai atendu keleng aku bagi tangtangna nai.” (Ketangkasen 2:4) Emaka uga carandu nampati  anakndu gelah tetap paguh kekelengenna janah ”selamat”? (1 Petrus 2:2) Mari sipelajari kerna Timotius.

3. (a) Ja nari ieteh Timotius kerna Jesus? Kenca erlajar ia kai si ilakokenna? (b) Kai saja si ikataken Paulus kerna Timotius?

³ Tangtangna kel Paulus reh ku Listera eme tahun 47. Banci jadi i je me Timotius si nguda denga erlajar kerna Jesus. Idalankenna kai si nggo ipelajarina janah dua tahun kenca si e, ikut ia erberita ras Paulus. Janah 16 tahun kenca si e, itulis Paulus me surat man Timotius, nina, ”Tetaplah ndalanken kebenaren si rehna i bas Dibata nari si enggo iajarken man bandu dingen enggo tuhu-tuhu kam tek. Ietehndu kap ise nai si ngajari kam. Janah ingetndu pe maka kitik-kitikndu nari enggo ietehndu kerna Pustaka si Badia [Kitap-Kitap Heber], si ngasup mereken kepentaren man bandu, e me si mabai kam ku keselamaten arah kiniteken man Kristus Jesus.” (2 Timotius 3:14, 15) Ikataken Paulus maka Timotius (1) ietehna kerna Pustaka, (2) tuhu-tuhu tek man kai si ipelajarina, ras (3) ndatken kepentaren si mabai ia ku keselamaten perban tek ia man Jesus Kristus.

4. Kai saja si banci ipake orang tua guna ngajari anakna? (Nen gambar pemena artikel.)

⁴ Kam orang tua, tentu atendu ieteh anakndu min kerna Pustaka, si gundari isina Kitap-Kitap Heber ras Junani. Kitik denga pe anak e banci nge ipelajarina kerna kalak ras kejadin bas Pustaka. Melala kel oge-ogen ras video si ibereken organisasi Jahwe gelah ipake orang tua guna ngajari anakna. Apai nge si nggo lit bas bahasandu? Perlu ieteh anakndu kerna Pustaka gelah ndeher ia ras Jahwe.

5. Ja nari sieteh maka tek kel Timotius man Jesus?

⁵ Tapi, labo bias ngajari anak kerna kalak ras kejadin si lit bas Pustaka. Bali bagi Timotius, iajari ia gelah ’tuhu-tuhu tek’. Ieteh Timotius Kitap-Kitap Heber ’kitik-kitikna nari’. Emaka, tek ia Jesus e me Mesias. Paguh kel kiniteken Timotius emaka iperidiken ia, kenca si e ikut ia ras Paulus jadi perberita.

6. Kai si perlu ilakokenndu gelah paguh kiniteken anakndu?

⁶ Uga carana gelah bagi Timotius kiniteken anakndu, gelah ia pe ’tuhu-tuhu tek’? Si pemena, perlu kam sabar. La banci mis paguh kiniteken anakndu. Kai si itekindu, lenga tentu iteki anakndu. Tiap anak perlu erlajar guna ”meteh apai si bujur apai si jahat”.  (Baca Heber 5:14.) Orang tua, adi nungkun anakndu, banlah e jadi kesempaten guna mpepaguh kinitekenna. Mari sibahas pengalamen sekalak bapa.

7, 8. (a) Kai si ilakoken sekalak bapa sanga ngajari anakna? (b) I bas situasi si uga saja kam perlu sabar man anakndu?

⁷ Thomas lit anakna diberu umurna 11 tahun. Isungkun anakna ia, nina, ”Arah evolusi kin Jahwe erban kerina si lit i doni enda?” Kenca e sungkunna ka, ”Ngkai maka la siikuti sada organisasi masyarakat, adi mehuli nge tujunna?” Erusaha Thomas gelah la ipaksakenna man anakna kai si itekina. Ietehna maka si erban sekalak jelma tek labo perban sada bukti si mbelin tapi arah melala bukti si kitik.

⁸ Ieteh Thomas ka maka perlu ia sabar ngajari anakna. Situhuna kerina kalak Kristen perlu sabar. (Kolose 3:12) Iangkai Thomas maka perlu ia rusur ngerana-ngerana ras anakna guna nampati anakna mpepaguh kinitekenna. Ibabaina anakna gelah iukurina kai si ipelajarina bas Pustaka. Nina Thomas, ”Adi pelajari kami sada pelajaren penting, aku ras ndeharangku, ipastiken kami tek ntah lang anak kami man kai si ipelajarina ras masuk akal nge akapna ntah lang. Adi lit penungkunenna, e mejile. Situhuna bahaya adi ue-uekenna saja kerina.”

9. Uga carandu nampati anakndu gelah tek ia Pustaka?

⁹ Adi sabar orang tua ngajarisa, nggo mulai iangkai anak ”kuga belangna, gedangna, ganjangna ras bagesna” kiniteken e. (Epesus 3:18) Banci siajari ia sue ras umurna bage pe seh asa ja ngasup ia ngangkaisa. Arah kai si ipelajarina erban reh paguhna kinitekenna, enda erban reh nukahna akapna nuriken man si deban kai si itekina, bage pe man teman sekolahna. (1 Petrus 3:15) Contohna, banci nge ituriken anakndu arah Pustaka uga keadan kalak mate? Masuk akal nge akapna kai si ituriken bas Pustaka? * (Nen keterangen tambahen.) Ingetlah, perlu kam sabar i bas nampati anakndu gelah tek ia Pustaka, tapi enda erguna kel.​—Ulangen 6:6, 7.

10. Kai ka si perlu ilakokenndu gelah paguh kiniteken anakndu?

¹⁰ Payo, adi berendu contoh si mehuli man anakndu, ia pe banci paguh kinitekenna. Stephanie lit telu anakna, nina, ”Kitik denga pe anakku, nggo kuukuri enda, ’Kuturiken nge man anakku ngkai maka aku tek Jahwe e lit, perkeleng, janah mehuli kerina perbahanenNa? Iidah anakku  nge maka keleng kel ateku Jahwe?’ Labo banci anakku tuhu-tuhu tek, adi aku pe lang.”

11, 12. Kai ertina pentar? Kai buktina maka labo umur si nentuken sekalak jelma pentar?

¹¹ Nggo sipelajari maka Timotius (1) ietehna kerna Pustaka janah (2) tuhu-tuhu ia tek. Tapi, kai maksud Paulus maka Pustaka si Badia banci erban Timotius ndatken ’kepentaren si mabai ku keselamaten’?

¹² Ijelasken i bas Pemahaman Alkitab, Jilid 1, maka i bas Pustaka erti pentar eme ”ngasup nggunaken pemeteh ras pengangkanna alu mehuli guna ndungi masalah, mpedauh diri arah bahaya, ndatken sura-sura, ntah pe mereken pedah man kalak si deban. Lawan kata pentar eme bodoh”. Nina Pustaka, ”I bas pusuh anak-anak lit kebodohen.” (Kuan-kuanen 22:15, Terjemahan Dunia Baru) Perban kepentaren ertentangen ras kebodohen, kepentaren eme tanda sekalak jelma nggo dewasa. Maka banci ikataken sekalak jelma paguh kinitekenna adi mbiar ras patuh ia man Jahwe, labo perban umurna.​—Baca Masmur 111:10.

13. Kai buktina sekalak anak muda nggo paguh kinitekenna?

¹³ Anak muda si paguh kinitekenna la ”iombang-ambingken galumbang dingen ijole-joleken ku jah ku je” perban sura-surana ntah pengaruh arah teman-temanna. (Epesus 4:14) Tapi, ”arah pengalamenna ngasup ia meteh apai si bujur apai si jahat”. (Heber 5:14) Emaka, banci iban kalak e keputusen si mehuli amin gia orang tuana ntah pe kalak si tertuan asangken ia la lit i je. (Pilipi 2:12) Adi pentar ia banci ia selamat. (Baca Kuan-kuanen 24:14.) Uga nge carandu nampati anakndu gelah ia pentar? Kataken man anakndu kai nina Pustaka si penting ilakokenna. Bereken min contoh arah kata-kata ras perbahanenndu maka kam pe idalankenndu nge pedah bas Pustaka.​—Roma 2:21-23.

14, 15. (a) Kai si arus iukuri anak muda sope iperidiken? (b) Kai si arus ilakoken orang tua gelah reh tekna anakna ngikutken pedah Pustaka?

¹⁴ Tapi, gelah paguh kiniteken anakndu la bias katakenndu apai si benar apai si salah. Sampati ia ngukuri penungkunen enda, ’Ngkai ilarang Pustaka aku ngelakoken kai si banci jadi meriah kuakap? Ngkai aku tek pedah Pustaka lalap erguna man bangku?’​—Jesaya 48:17, 18.

¹⁵ Adi iperidiken ate anakndu, sampati ia ngukuri kai tanggung jabapna adi ia iperidiken. Uga nge nina kerna tanggung jabap e? Kai gunana adi ia iperidiken? Kai ka tentangenna?  Ngkai maka buen nge gunana asangken tentangenna? (Markus 10:29, 30) Penting kel iukurina si e sope iperidiken. Sampati anakndu gelah iukurina kai gunana adi ia patuh janah kai akibatna adi la patuh. Alu bage reh tekna ia maka ngikutken pedah Pustaka lalap erguna man bana.​—Ulangen 30:19, 20.

16. Kai nge si ilakokenndu adi anakndu mulai ragu man kai si ipelajarina?

¹⁶ Banci jadi kenca anakndu iperidiken, mulai ia ragu man kai si ipelajarina. Adi bage, kai nge si ilakokenndu? Contohna, nggo mulai meriah akap anakndu kai si lit bas doni enda. Ntah banci saja nggo mulai ia ragu ngikutken pedah Pustaka. (Masmur 73:1-3, 12, 13) Tanggapenndu banci erban ia terus ngelayani Jahwe ntah lang. Emaka, ula rawai anakndu amin gia kitik denga ia ntah pe nggo galang. Tapi banlah gelah idahna maka keleng atendu ia janah sampatindu atendu.

17, 18. Kai ka si banci ilakokenndu guna nampati anakndu adi mulai ia ragu man kai si ipelajarina?

¹⁷ Ibereken anak muda dirina man  Jahwe sanga ia iperidiken. Erjanji ia maka si pentingna i bas geluhna eme ngkelengi ras ngelayani Jahwe. (Baca Markus 12:30.) Penting kel iakap Jahwe janjinta e, emaka kita pe penting min siakap. (Pengerana 5:4, 5) Ingetkenlah anakndu kerna si e. Tapi, perlu ibaca ras ipelajari orang tua lebe kai si nggo ibereken organisasi Jahwe man bana. Kenca si e, alu mehuli janah i bas waktu si cocok, ingetken anakndu maka sanga erjanji ia ngelayani Jahwe janah iperidiken, enda seh kel seriusna tapi melala pasu-pasuna.

¹⁸ Contohna, banci idatndu penampat i bas apendiks ”Pertanyaan Orang Tua” arah pudi buku Pertanyaan Kaum Muda—Jawaban yang Praktis, Jilid 1. Ituriken i je maka ula min minter iakap orang tua lanai setuju anakna e man kinitekenna. Tapi, idaramina min kai situhuna masalah anakna. Banci jadi ipengaruhi temanna ia ntah melungen akapna. Ntah pe kitik ukurna perban maju kel temanna secara rohani. Bas apendiks e pe ituriken maka enda labo berarti anakndu lanai nggit ngelayani Jahwe. Banci jadi perban lit nge masalahna maka bage ia. I bas apendiks e lit penampat man orang tua uga carana nampati anakna si ragu man kai si ipelajarina.

19. Uga nge cara orang tua nampati anakna gelah ndatken ’kepentaren si mabai ku keselamaten’?

¹⁹ Orang tua, penting kel tugasndu i bas ’ngajari dingen negu-negu anakndu bagi si ngena ate Jahwe’. (Epesus 6:4) Bagi si nggo sibahas, arus iajarindu anakndu kerna Pustaka janah sampati ia gelah tek man kai si ipelajarina. Adi paguh kinitekenna, nggit ia ngelayani Jahwe janah mereken si mehulina man baNa. Kata Dibata, kesah si badia, ras usahandu i bas nampati anakndu banci erban ia ndatken ’kepentaren si mabai ku keselamaten’.