1. Ngkai maka kalak Kristen arus iperidiken? (Nen gambar pemena artikel.)

TIAP tahun lit ribun si erlajar Pustaka iperidiken. Nterem arah kalak e eme anak muda ntah pe anak-anak. Banci jadi kitik-kitik nari kalak e nggo iajari kerna Pustaka. Kam pe bage kang? Adi bage, mejile. Kerina kalak Kristen arus iperidiken gelah banci selamat ras nggeluh rasa lalap.​—Matius 28:19, 20; 1 Petrus 3:21.

2. Ngkai maka la perlu kam mbiar mbaktiken dirindu man Jahwe?

² Kenca iperidiken, melala pasu-pasu Jahwe si banci idatndu. Tapi lit ka tanggung jabapna. Ngkai? I bas wari kam iperidiken, turang senina si erkhotbah nungkun man bandu, ”Erpalasken korban tebusen Jesus Kristus, nggo kin kam jera arah dosa-dosandu nari ras mbaktiken dirindu man Jahwe guna ngelakoken peratenNa?”  Kenca e, ijabapndu nggo. Erjanji kam ngkelengi Jahwe janah ngelayani Ia me si pentingna bas geluhndu. Erkadiola nge kam kenca kam erjanji? Pasti lang! Labo kam kari erkadiola adi iikutkenndu Jahwe. Kalak si la nandai Jahwe eme pengikut Setan. Janah labo ermediate Setan man kalak e bage pe man bandu. Situhuna, meriah kel akapna adi siikutken ia ngelawan Jahwe, si erbanca lanai lit arapenta nggeluh si rasa lalap.

3. Kai saja pasu-pasu si ibereken Jahwe man bandu perban kam iperidiken?

³ Ukuri kai saja pasu-pasu si nggo ibereken Jahwe man bandu perban nggo ibaktikenndu dirindu man Jahwe janah iperidiken. Perban nggo iberekenndu dirindu man Jahwe, emaka banci nindu, ”[Jahwe] kap ras aku, e maka la mbiar aku pe, kai kin banci ibahan kalak man bangku?” (Masmur 118:6) Seh kel riahna ukurta ngikutken Jahwe janah erban meriah ukurNa.

4, 5. (a) Ngkai maka hubungenndu ras Jahwe e tanggung jabapndu? (b) Tentangen kai saja si banci jadi iadapi kerina kalak Kristen?

⁴ Hubungenndu ras Jahwe la bagi erta warisen si pasti idatndu arah keluargandu nari. Amin gia kam tading ras orang tuandu, hubungenndu ras Jahwe e tanggung jabapndu. Ngkai maka penting siinget e? Perban kinitekenta pasti iuji. Contohna, banci jadi kam nggo iperidiken sanga kitik denga. Tapi kenca kam reh galangna nggo lit masalahndu si mbaru. Nina sekalak anak muda, ”Saksi-Saksi Jahwe si kitik denga, labo dalih akapna la pe ia man kue ulang tahun i sekolahna. Tapi kenca ia reh galangna, reh belinna sura-sura seks i bas ia, emaka perlu ia kiniteken si paguh gelah banci patuh man Jahwe janah tek maka e me si mehulina.”

⁵ Labo anak muda ngenca si dat tentangen si mbaru. Kalak si nggo dewasa pe tetap denga nge dat tentangen. Tentangenna banci reh arah perjabunna, kesehatenna, ntah pe pendahinna. La soal nggo piga umurta, kerina kita perlu setia man Jahwe uga pe situasina.​—Jakup 1:12-14.

6. (a) Kai maksudna labo lit siban syarat sanga erjanji man Jahwe? (b) Kai si banci ipelajarindu i bas 2 Korinti 4:7 nari?

⁶ Gelah banci tetap setia, rusurlah siinget maka labo lit siban syarat sanga erjanji man Jahwe. Ertina, erjanji kita ngelayani Dibata si Meganjangna la soal kai pe si terjadi, amin gia teman-temanta ntah pe orang tuanta lanai ngelayani Jahwe. (Masmur 27:10) Uga pe keadanta, pindolah penampat Jahwe gelah banci sitepati janjinta.​—Baca 2 Korinti 4:7.

7. Kai maksudna gelah kita selamat arus kita ”erdahin alu mbiar dingen gentar”?

⁷ Ate Jahwe kam jadi temanNa. Tapi perlu kam erusaha gelah tetap erteman ras Dibata janah selamat. Nina Pilipi 2:12, ”Tetaplah erdahin alu mbiar dingen gentar enggenepi keselamatenndu.” Maksudna, perlu siukuri  uga carana gelah tetap kita ndeher ras Jahwe janah tetap setia kai pe si terjadi. Ula siakap nggo pasti kita setia man Jahwe. Ingetlah maka lit si nggo ndekah kel pe ngelayani Jahwe, dungna la setia. Uga nge carana gelah banci kita selamat?

8. Kai saja si arus silakoken sanga erlajar Pustaka? Janah kai hasilna?

⁸ Gelah banci jadi teman Jahwe, perlu sibegiken Ia janah perlu ka kita ngerana ras Ia. Sibegiken Jahwe alu erlajar Pustaka. Carana alu mbaca ras ngukuri Kata Dibata bage pe oge-ogenta si erpalasken Pustaka. Erlajar Pustaka labo bagi ngapal pelajaren sanga muat ujian i sekolah. Tapi e bagi gawah-gawah ku sada ingan, ipelajarindu janah idatndu kai si mbaru kerna Jahwe. Reh deherna me kam ku Dibata, janah Ia pe reh deherna ku kam.​—Jakup 4:8.

9. Kai si banci igunakenndu i bas erlajar?

⁹ Melala si ibere organisasi Jahwe guna nampati kita i bas erlajar. Contohna, lit iban ”Menggali Isi Alkitab” bas bagin ”Anak Muda” i jw.org/id guna nampati kam ndalanken kai si ipelajarindu i bas Pustaka. I bas jw.org/id pe, lit ka panduan belajar ”Apa yang Sebenarnya Alkitab Ajarkan?” Enda nampati kam gelah  reh paguhna kinitekenndu ras gelah banci turikenndu kinitekenndu man si deban. Gelah meriah akapndu mbaca Pustaka, bacalah Sora Ermomo Januari 2017 No. 1 halamen 3, 4, 5, 7. Gelah banci selamat, arus kita erlajar janah siukuri kai sipelajari e.​—Baca Masmur 119:105.

10. Ngkai maka kalak Kristen arus ertoto?

¹⁰ Sanga kita erlajar Pustaka, sibegiken Jahwe, janah sanga kita ertoto, ngerana kita man baNa. Ula siban toto e jadi kebiasan saja ntah pe jadi ’mantra’ gelah banci sukses. Adi ertoto kita, i je me kita ngerana-ngerana ras Si Nepa kita. Cuba ukuri enda: Nggit Jahwe megiken kam! (Baca Pilipi 4:6.) Emaka, sanga aru atendu, iiahken Pustaka kam gelah ’iendeskenndu aru atendu man [Jahwe]’. (Masmur 55:23) Melala turang seninanta nggo ndatken manfaatna. Cubakenlah, gelah kam pe datndu manfaatna!

11. Ngkai perlu lalap sikataken bujur man Jahwe?

¹¹ Tapi, ula kita ertoto perban lit masalahta saja ngenca. Ipersingeti Pustaka kita, nina, ”Ngataken bujurlah.” (Kolose 3:15) Maun-maun perban aru kel ateta lanai siinget kai si nggo ibere Jahwe banta. Cubaken enda: Tiap wari, ukuri si sitikna telu si erban kam ermeriah ukur, janah kataken bujur man Jahwe kerna si e. Nina sekalak anak muda si gelarna Abigail, si iperidiken sanga umur 12 tahun, ”I bas alam semesta enda, kuakap Jahwe ngenca si patutna ngaloken pengatan bujurta. Lalaplah sikataken bujur kerna kerina si nggo iberekenNa man banta.”

12, 13. Pernah nge igejapkenndu sendiri maka Jahwe e mehuli? Kai hasilna adi igejapkenndu sendiri uga Jahwe nampati kam?

¹² Isampati Jahwe Raja Daud gelah ngasup ia ngadapi masalahna. Perban nggo igejapken Daud penampat Jahwe, banci ikatakenna, ”Malem kal ate kalak si cilinggem man baNa, penanam-nanamlah uga belinna kiniulin [Jahwe].” (Masmur 34:9) Arah ayat e ituriken maka perlu sigejapken sendiri maka Jahwe e mehuli. Sanga ibacandu Pustaka, bage pe oge-ogenta ras reh kam ku perpulungen, ietehndu uga Dibata nampati kalak si deban gelah tetap setia. Tapi, gelah reh deherna kam ras Jahwe, perlu igejapkenndu sendiri uga Jahwe nampati kam. Pernah nge igejapkenndu maka Jahwe mehuli?

¹³ Kerina kalak Kristen pasti nggo igejapkenna maka Jahwe mehuli. Iundang Jahwe kita gelah ndeher ku Ia  bage pe AnakNa. Nina Jesus, ”Labo ise pe ngasup reh ndahi aku adi la kin itaruhken Bapa si nuruh aku ia man bangku.” (Johanes 6:44) Igejapkenndu nge maka itarik Jahwe kam ku Ia? Ntah pernah nge bagenda kam rukur, ’Orang tuangku nge si itarik Jahwe, aku ngikut-ngikut saja.’ Ingetlah sanga iberekenndu dirindu man Jahwe janah iperidiken, i je me imulaindu pertemanenndu ras Jahwe. Nina Pustaka, ”Kalak si erkeleng ate man Dibata itandai Dibata kap ia.” (1 Korinti 8:3) Ergailah lalap ingan si ibereken Jahwe man bandu bas organisasiNa.

14, 15. Uga carana gelah ula kam mbiar cerita kerna Jahwe?

¹⁴ Kam pe pasti igejapkenndu maka Jahwe e mehuli sanga isampatiNa kam gelah pang ngerana man kalak si deban kerna kinitekenndu. Contohna sanga kam erberita ntah pe bas sekolah. Pasti la menukah akapndu erberita man teman sekolahndu. Banci jadi mbiar kam adi itokohina kari, apai ka adi arus kam ngerana kerna kinitekenndu sanga nterem kalak i je. Uga carana gelah ula kam mbiar?

¹⁵ Ukuri ngkai maka kam tek kai si ipelajarindu e. Adi panduan belajar bas jw.org lit bas bahasandu, pelajarilah e. I je isampati kam guna ngukuri kai saja si itekindu, ngkai maka kam tek, janah uga carana nuriken kinitekenndu e man kalak si deban. Adi nggo tuhu-tuhu kam tek, janah banndu persikapen si mehuli, dungna nggit kam cerita kerna Jahwe.​—Jeremia 20:8, 9.

16. Pelajaren kai si banci idatndu i bas pengalamen sekalak anak muda nari?

¹⁶ Nggo pe ibanndu persikapen si mehuli, banci jadi gugup denga kam. Nina sekalak anak muda si umur 18 tahun, si iperidiken sanga ia umur 13 tahun, ”Nggit nge aku cerita kerna kinitekenku, tapi maun-maun la kueteh kai si man katanken.” Emaka iusahakenna cerita kerna kinitekenna bagi percakapen sehari-hari. Nina, ”Adi temanku pe la mbiar-mbiar cerita kerna kai si ilakokenna, aku pe la mbiar-mbiar cerita kerna kai si kulakoken. Emaka ningku man bana, ’Aku senang cerita-cerita kerna Pustaka ras kalak bas wari si deban, janah . . . ’ Kenca e kuterusken ceritaku. Amin gia labo kerna Pustaka lalap iceritaken kami, tapi penasaran ia kai saja si kuturiken man kalak sanga erberita. Emaka nungkun ia man bangku. Dungna reh nukahna kuakap erberita ku teman-temanku. Kenca si e, meriah kel kuakap!”

17. Kai ka si banci nampati kam gelah pang kam cerita kerna kinitekenndu?

 ¹⁷ Adi mehuli kam man kalak si deban janah iergaindu ia, ia pe iergaina ka nge kam bage pe kinitekenndu. Olivia, si umurna 17 tahun si iperidiken sanga nguda denga. Nina, ”Mbiar aku adi cerita aku kerna Pustaka, ikataken temanku kari aku fanatik.” Tapi kuubah carangku rukur. Asangken kuukuri kai si erban aku mbiar, kuukuri enda: ”Nterem anak muda la tehna kerna Saksi-Saksi Jahwe. Banci jadi arah kita ngenca ietehna kerna Saksi Jahwe. Emaka arah perbahanenta banci ietehna uga kin situhuna kita. Adi kita pe mela ntah pe mbiar cerita kerna kinitekenta, iidah kalak e me maka mela kita jadi Saksi Jahwe. Dungna, lanai iergaina kita. Tapi, adi tek kita man kai si nggo sipelajari, janah pang kita cerita, enda erban temanta lebih ngergai kita.”

18. Kai si arus ilakokenndu gelah selamat?

¹⁸ Nggo sieteh maka arus kita erjuang gelah selamat. Carana, perlu ibacandu ras iukurindu Kata Dibata, ertoto man Jahwe, janah ukuri kerna kai si nggo ilakoken Jahwe guna nampati kam. Alu bage, reh tekna kam maka Jahwe e Temanndu. Enda erban kam nggit cerita man si deban kerna kinitekenndu.​—Baca Masmur 73:28.

19. Kai hasilna adi terus kam erjuang?

¹⁹ Ikataken Jesus, ise atena ikut ras ia arus ipersilahangna bana, ipersanna tiang siksanna jenari iikutkenna Jesus. (Matius 16:24) Payo, guna ngikutken Jesus arus sibereken dirinta man Jahwe janah iperidiken. Alu bage meriah akapndu gundari, janah banci nggeluh seh rasa lalap bas doni si mbaru pagi. Emaka teruslah erjuang gelah banci selamat!