Adi payo bage, ukuri kai akibatna i bas kegeluhenta. Contohna, lit anak turang seninanta munuh bana. Getem kal iakap bapana. Tersungkun-sungkun ia, nggo nge ieteh Jahwe kai si terjadi bas wari si pepagi janah itentukenNa maka ia ras ndeharana ngasup ngadapi masalah e. Arus nge kita tek maka iatur Jahwe kerina si terjadi i bas kegeluhenta?

Asum sipereksa 1 Korinti 10:13, siidah maka la lit ikataken Pustaka si Badia kerna nggo leben ieteh Jahwe kai si ngasup kita ngadapisa janah iputuskenNa ujin kai si man adapenta. Engkai maka banci sikataken bage? Lit empat alasenna.

Si pemena, ibere Jahwe man manusia kebebasen erban pilihen. AteNa gelah siban keputusenta sendiri. (Ulangen 30:19, 20; Josua 24:15) Adi siban keputusen si erban Jahwe senang, banci kita tek maka iajariNa kita. (Kuan-kuanen 16:9, Terjemahan Dunia Baru) Tapi paksa sibahan keputusen si la mehuli, arus sitanggung akibatna. (Galati 6:7) Emaka adi itentuken Jahwe tantangen si man adapenta, lit nge kebebasenta?

Si peduaken, la ikawali Jahwe kita i bas kejadin si ”sial” nari. (Pengerana 9:11) Mungkin lit kalak si kena sial erkiteken lit i bas ingan ras waktu si salah. Ikataken Jesus kerna kena sial, lit 18 kalak si mate erkiteken itindih menara. Iturikenna maka labo Dibata si erban kalak e mate. (Lukas 13:1-5) Emaka, la masuk akal adi erpengakap maka sope kecelakan terjadi, nggo itentuken Dibata ise si nggeluh ise si mate.

Si peteluken, tep-tep kalak arus mpertahanken kesetian man Jahwe. Ikataken Setan maka umat Jahwe ngelayani Ia erkiteken lit si iberekenNa. Ituduh Setan maka la lit si setia man Jahwe adi ngadapi ujin. (Jop 1:9-11; 2:4; Ketangkasen 12:10) Emaka, adi la ipediat Jahwe kita ngadapi ujin, enda erban tempa-tempa tuduhen Setan e benar.

Si peempatken, ipilih Jahwe guna la meteh kerinana si terjadi i bas wari si reh. Tentu saja, adi e kin ate Jahwe banci ietehNa kai si terjadi i bas wari si reh. (Jesaya 46:10) Tapi ikataken Pustaka maka ipilih Jahwe guna la meteh kerinana kerna wari si reh. (Kejadin 18:20, 21; 22:12) Jahwe e perkeleng ras adil, emaka la icampuriNa kebebasenta guna erban keputusen.—Ulangen 32:4; 2 Korinti 3:17.

Adi bage, kai maksud Paulus paksa ikatakenna ”labo ipelepas [Jahwe] kam icubai lebih asa gegehndu”? Maksudna labo Jahwe ertindak sope reh percuban e tapi paksa terjadi. * (Nehen penjelasen tambahen.) Adi tek kita man Jahwe, isampatiNa kita ngadapi kerina percuban bas geluhta. (Masmur 55:23) Sipereksa kari dua alasenna engkai maka bage nina Paulus.

Alasen si pemena eme tentangen si niadapi, tentangen ’si biasa seh man manusia’. Kita nggeluh i doni Setan, emaka kerina kita pasti ngadapi kiniseran. Tapi adi ernalem kita man Jahwe, banci kita megenggeng janah tetap setia. (1 Petrus 5:8, 9) I bas 1 Korinti  pasal 10, isuratken Paulus piga-piga ujin si iadapi kalak Israel paksa i taneh mesawang. (1 Korinti 10:6-11) Kalak si ernalem man Jahwe banci megenggeng ngadapi ujin e. Tapi si la patuh man Jahwe, dungna la setia erkiteken la ernalem man baNa.

Alasen si peduaken eme ”Dibata setia”. Kai maksudna? Paksa siidah uga Jahwe ngkawali umatNa nai nari seh asa gundari, sieteh maka lalap isampatiNa kalak ”si ngkelengi Ia ras ngikutken undang-undangNa”. (Ulangen 7:9) Sieteh maka lalap itepati Jahwe janjiNa. (Josua 23:14) Banci kita tek maka (1) la ipeturut Jahwe ujin kai pe reh kelekna seh asa lanai kita ngasup nggengkenca, janah (2) ”iberekenNa pe dalan pulah”.

Uga Jahwe mereken dalan pulah man kalak si ernalem man baNa? Situhuna banci isasapkenNa ujin e. Tapi inget, ikataken Paulus maka ’gelah ngasup kam nggengkenca ibereken [Jahwe] dalan pulah’. Emaka, rusur ibere Jahwe dalan pulah man banta alu mereken gegeh gelah banci kita tetap setia. Mari sipelajari uga cara Jahwe merekenca.

• ’Iapuli Jahwe kami i bas kerina kiniseran kami’. (2 Korinti 1:3, 4) Banci malem iban Jahwe perukuren, pusuh, ras perasanta arah Pustaka, kesah si badia, ras juak-juak si tutus.—Matius 24:45; Johanes 14:16; Roma 15:4.

• Banci ipake Jahwe kesahNa si badia negu-negu kita. (Johanes 14:26) Isampati kesah si badia e kita nginget kisah-kisah ras prinsip bas Pustaka gelah banci siban keputusen si mehuli.

• Banci ipake Jahwe malekatNa guna nampati kita.—Heber 1:14.

• Banci ipake Jahwe turang seninanta guna nampati kita. Ipegegehi kalak e kita alu kata-kata ras perbahanenna.—Kolose 4:11.

Emaka, kai si nggo sipelajari arah kata Paulus nari i bas 1 Korinti 10:13? La itentuken Jahwe ujin kai si man adapenta. Tapi sieteh, adi tek kita man Jahwe banci kita megenggeng ngadapi kerina ujin. Sieteh maka lalap nge ibere Jahwe dalan pulah gelah banci kita tetap setia man baNa.