1, 2. Kenca lawes Jesus ku surga, kai si banci saja jadi penungkunen rasul-rasul?

TEDIS rasul-rasul Jesus i Deleng Saitun, janah itatapna Jesus, tuan ras temanna, iangkat ku datas jenari iligeni embun me ia. (Perbahanen Rasul-Rasul 1:9, 10) Enggo dua tahun dekahna iajari Jesus kalak e, ipegegehina ras itegu-teguna. Tapi gundari ia nggo lawes. Kai nge si ilakoken kalak e?

² Sope lawes ku surga, ikataken Jesus man juak-juakna, ”Kam me pagi naksiken kerna aku man kalak si deban, i Jerusalem, i daerah Judea ras Samaria seh ku belang-belang doni enda.” (Perbahanen Rasul-Rasul 1:8) Uga kalak e banci ngelakokenca? Erjanji Jesus maka kesah si badia Dibata si nampatisa. (Perbahanen Rasul-Rasul 1:5) Tapi, ise si ngaturken gelah berita e mbar ku belang-belang doni? Ieteh rasul-rasul maka mbarenda ipake Jahwe manusia guna minpin kalak Israel. Emaka, banci  saja tersungkun-sungkun kalak e, ipilih Jahwe nge mulihi ntah lang peminpin si mbaru.

3. (a) Kenca lawes Jesus ku surga, keputusen penting kai si arus iban rasul-rasul? (b) Penungkunen kai si man bahasenta bas artikel enda?

³ La ndekah kenca Jesus ku surga, ipelajari ajar-ajarna lebe Kata Dibata janah ertoto man Dibata mindo penampat, sope milih Matias guna nggantiken Judas Iskariot selaku rasul si sepulu duaken. (Perbahanen Rasul-Rasul 1:15-26) Engkai pemilihen enda penting kal man Jahwe bage pe man kalak e? Ieteh kalak e maka perlu lit 12 rasul. * (Nehen penjelasen tambahen.) Enggo ipilih Jesus rasul-rasul janah iajarina guna dahin si penting kal man umat Dibata. Dahin kai e, janah uga Jahwe ras Jesus nikapken kalak e? Pengaturen kai si seri gundari? Ras uga gelah banci siinget ”peminpin-peminpin” si lit bas kita, khususna ”juak-juak si tutus dingen pentar”?—Heber 13:7; Matius 24:45.

4. Dahin kai si ilakoken pertua-pertua ras rasul-rasul i Jerusalem?

⁴ I bas Pentakosta 33 M mulai me ipinpin rasul-rasul runggun Kristen. Nina Pustaka ”tedis Petrus ras rasul si sepuluh sada kalak e”, janah iajarkenna kebenaren si nelamatken kegeluhen man jelma si nterem. (Perbahanen Rasul-Rasul 2:14, 15) Melala i bas kalak e nari jadi Kristen. Kenca si e, kalak si mbaru denga jadi kalak Kristen e ”tutus megiken pengajaren i bas rasul-rasul nari”. (Perbahanen Rasul-Rasul 2:42) Rasul-rasul si ertanggungjabap ngatur perduiten runggun. (Perbahanen Rasul-Rasul 4:34, 35) Kalak e pe ngajar ras ertoto guna umat Dibata, nina, ”Banci ipergunaken kami kerina waktu kami guna ertoto ras meritaken berita si meriah.” (Perbahanen Rasul-Rasul 6:4) Janah iutusna kalak Kristen si erpengalamen guna erberita i daerah si mbaru. (Perbahanen Rasul-Rasul 8:14, 15) Bas pudi wari, pertua-pertua si iminaki ntah pe si ipilih guna ku surga ikut ras rasul-rasul i bas minpin runggun. Selaku badan pinpinen, ibere kalak e petunjuk man runggun.—Perbahanen Rasul-Rasul 15:2.

5, 6. (a) Uga badan pinpinen ikuasai kesah si badia? (Nehen gambar pemena artikel.) (b) Uga badan pinpinen isampati malekat-malekat? (c) Uga Kata Dibata negu-negu badan pinpinen?

⁵ Ieteh kalak Kristen i bas abad pemena maka Jahwe si negu-negu badan pinpinen erkelangken Jesus. Engkai maka banci kalak e tek? Si pemena,  erkiteken badan pinpinen ikuasai kesah si badia. (Johanes 16:13) Kalak Kristen si iminaki ngaloken kesah si badia, tapi secara khusus kesah si badia ngkuasai rasul-rasul ras pertua-pertua i Jerusalem i bas ndalanken dahinna selaku pengawas. Contohna, i bas tahun 49, itegu-tegu kesah si badia badan pinpinen erban keputusen kerna sunat. Iikutken runggun me petunjuk e. Ulihna, ”erteguhna kiniteken perpulungen. Janah tep-tep wari reh teremna anggota perpulungen e”. (Perbahanen Rasul-Rasul 16:4, 5) I bas suratna ku runggun-runggun kerna sunat, banci siidah maka lit kesah Dibata bas badan pinpinen e termasuk kekelengen ras kiniteken.—Perbahanen Rasul-Rasul 15:11, 25-29; Galati 5:22, 23, Terjemahan Dunia Baru.

⁶ Si peduaken, badan pinpinen isampati malekat-malekat. Contohna, ipebetehken malekat man Kornelius gelah idaramina rasul Petrus. Kenca iajari Petrus Kornelius ras kade-kadena, ialoken kalak e kesah si badia, amin gia la isunat. Emaka Kornelius me si pemena jadi kalak Kristen si la Jahudi si la isunat. Paksa ibegi rasul-rasul ras turang senina si debanna kerna e, idalankenna peraten Dibata janah ialokenna kalak si la Jahudi si la isunat i bas runggun Kristen. (Perbahanen Rasul-Rasul 11:13-18) Jenda nari, banci sieteh maka idukung malekat-malekat dahin erberita si iaturken badan pinpinen. (Perbahanen Rasul-Rasul 5:19, 20) Si peteluken, badan pinpinen itegu-tegu Kata Dibata. Ipelajari kalak e Kata Dibata guna erban keputusen si penting kerna kiniteken kalak Kristen ras ngaturken runggun.—Perbahanen Rasul-Rasul 1:20-22; 15:15-20.

7. Engkai maka banci sikataken Jesus si minpin kalak Kristen si pemena?

⁷ Amin gia lit wewenang badan pinpinen i bas runggun, ieteh anggotana maka Jesus nge peminpinna. Uga maka banci sieteh? Ikataken rasul Paulus maka Jesus nge si milih piga-piga kalak ”jadi rasul”. Ikatakenna ka maka Kristus me ”takal”, ntah pe peminpin runggun. (Epesus 4:11, 15) Kalak e la ikataken pengikut rasul-rasul, tapi ”ajar-ajar e igelari Kristen”. (Perbahanen Rasul-Rasul 11:26) Ieteh Paulus maka penting ngikutken ajaren si erpalasken Pustaka si ipeseh rasul-rasul ras kalak si deban si jadi peminpin. Tapi, nina Paulus, ”Ateku min gelah iangkandu maka kerina dilaki, Kristus takalna.” Kata-kata enda berlaku man tep-tep anggota badan pinpinen. Kenca e nina Paulus ka, ”Kristus, Dibata kepalana.” (1 Korinti 11:2, 3) Jelas me, maka Jahwe si milih anakNa, Jesus Kristus, guna minpin runggun.

8, 9. Dahin penting kai si ilakoken Russell?

⁸ Mulai tahun 1870, ibenaken Charles Taze Russell me ras teman-temanna nembah Dibata alu cara si sentudu ras ajaren Pustaka janah isampatina ka kalak si deban ngelakokenca. Enda termasuk nampati kalak si ngerana i bas cakap si deban. Emaka, i bas tahun  1884 ibentuk me Zion’s Watch Tower Tract Society. * (Nehen penjelasen tambahen.) Presidenna eme Turang Seninanta Russell. Ipelajarina Pustaka alu megermet ras la ia mbiar ngatakenca man jelma si deban maka ajaren gereja, bagi Dibata Si Telu Sada ras tendi si la banci mate, la lit bas Pustaka. Ipelajarina ka maka kerehen Jesus pagi la teridah janah waktu ”si enggo itetapken” man bangsa-bangsa ngadi bas tahun 1914. (Lukas 21:24) Igunaken Russell waktu, gegeh, ras senna i bas ngajarken kebenaren kempak jelma si deban. Jelas me, maka Russell si igunaken Jahwe ras Jesus minpin umatNa bas waktu si penting i bas sejarah.

⁹ Russell la nggit iistimewaken. I bas tahun 1896, isuratkenna maka ia ras kalak si deban si lit tanggung jabapna la nggit ngaloken kemulian. La kalak e nggit ngaloken penggelaren si istimewa, janah la ia nggit adi lit kelompok si ikataken selaku pengikutna. Kenca e nina, ”Enda labo dahin manusia.”

10. (a) Ndigan ipilih Jesus ”juak-juak si tutus dingen pentar”? (b) Turiken kai bedana Badan Pinpinen ras Watch Tower Society.

¹⁰ Tahun 1919, telu tahun kenca Turang Seninanta Russell mate, ipilih Jesus me ”juak-juak si tutus dingen pentar”. Guna kai? Guna mereken ’pangan i bas paksana’ man ajar-ajarna. (Matius 24:45) I bas tahun-tahun e, piga-piga turang senina si iminaki si lit bas kantor pusat Brooklyn, New York, mereken pangan rohani man juak-juak Jesus. Kenca tahun 1940, mulai me ipake kata ”badan pinpinen” bas publikasinta. Paksa e, badan pinpinen me biasana si jadi peminpin Watch Tower Bible and Tract Society. Tapi, tahun 1971, ituriken maka Badan Pinpinen la seri ras Watch Tower Society, si ertanggungjabap bas masalah hukum saja. Kenca si e, turang senina si iminaki banci jadi bagin Badan Pinpinen amin gia la ikut minpin Watch Tower Society. Mbaru-mbaru enda, turang senina si jadi ’biri-biri si deban’ ngelayani selaku pinpinen organisasi si terdaftar, si igunaken umat Dibata, termasuk Watch Tower Society. Alu bage banci iutamaken Badan Pinpinen ngajarken kerna Pustaka. (Johanes 10:16; Perbahanen Rasul-Rasul 6:4) Ituriken Menara Pengawal 15 Juli 2013 maka ”juak-juak si tutus dingen pentar” eme piga-piga kalak si iminaki, si ras-ras ngelayani selaku Badan Pinpinen.

11. Uga Badan Pinpinen erban keputusen?

¹¹ Ibahan Badan Pinpinen keputusen penting selaku sada terpuk paksa kalak e runggu tep-tep minggu. Alu bage  banci kalak e arih-arih janah tetap ersada. (Kuan-kuanen 20:18) Kerina anggota Badan Pinpinen seri pentingna, emaka tiap tahun pegancih kalak e muat pinpinen paksa runggu. (1 Petrus 5:1) Bage ka pe enem panitia si iawasi Badan Pinpinen. La lit anggota Badan Pinpinen si erpengakap maka ia peminpin senina-seninana. Kalak e pe ”juak-juak”, si ngaloken pangan rohani i bas juak-juak si tutus nari janah ngikutken petunjukna.

12. Penungkunen kai si man bahasenta?

¹² Badan Pinpinen la serta janah la ndatken ilham. Kalak e banci erban kesalahen paksa mereken penjelasen kerna Pustaka ntah pe i bas ngaturken organisasi. Contohna, i bas Indeks Publikasi Menara Pengawal lit bagin kerna ”Pengertian yang Diperjelas” si risiken daftar pengertin Pustaka si nggo  isesuaiken mulai 1870. La ikataken Jesus maka juak-juakna si setia mereken pangan rohani si serta. Emaka, uga banci sijabap penungkunen Jesus, ”Ise dage juak-juak si tutus dingen pentar?” (Matius 24:45) Kai buktina Badan Pinpinen e juak-juak si tutus? Mari sibahas telu hal si nampati badan pinpinen.

13. Uga kesah si badia nampati Badan Pinpinen?

¹³ Badan Pinpinen isampati kesah si badia. Kesah si badia nampati Badan Pinpinen guna ngangkai kebenaren Pustaka si mbarenda la iangkaina. Contohna, perdiateken i bas daftar ”Pengertian yang Diperjelas”. La lit manusia si apai pe si ngangkai ras nuriken ”biak Dibata si terbuni” e arah usahana sendiri! (Oge 1 Korinti 2:10.) Seri pengakap Badan Pinpinen ras kai si ikataken Paulus, nina, ”Dage asum iterangken kami kebenaren pertendin man kalak si enggo dewasa kegeluhen pertendinna labo kami ngerana alu kata-kata si iajarken kepentaren manusia, tapi alu kata-kata si iajarken kesah Dibata.” (1 Korinti 2:13) Amin gia ratusen tahun ajaren palsu nggo lit janah la lit petunjuk si jelas, ngkai maka lit kemajun kerna pengertin Pustaka mulai 1919? Alasenna erkiteken isampati Jahwe alu kesahNa si badia!

14. Menurut Ketangkasen 14:6, 7, uga malekat nampati Badan Pinpinen ras umat Dibata gundari?

¹⁴ Badan Pinpinen isampati malekat-malekat. Mbelin kal tanggung jabap Badan Pinpinen i bas ngaturken lebih waluh juta perberita sebelang doni. Engkai maka dahin e berhasil? Erkiteken penampat malekat. (Oge Ketangkasen 14:6, 7.) I bas melala kejadin, itegu-tegu malekat perberita gelah jumpa ras kalak si mbaru denga ertoto man Dibata mindo penampat! * (Nehen penjelasen tambahen.) Dahin erberita ras ngajari terus reh buena amin gia lit tentangen si mesangat. Enda banci terjadi erkiteken penampat malekat.

15. Uga Badan Pinpinen la seri ras peminpin agama Kristen si deban? Bereken contoh.

¹⁵ Badan Pinpinen itegu-tegu Kata Dibata. (Oge Johanes 17:17.) Perdiateken kai si terjadi i bas tahun 1973. Isungkun terbiten The Watchtower 1 Juni kerna ”banci kin iperidiken kalak si la tertadingkenna isap”. Jabapen si ibereken erpalasken prinsip Pustaka, jabapenna lang! Ikutip The Watchtower piga-piga ayat janah iturikenna engkai maka kalak si la banci ngadi ngisap arusna ipedarat. (1 Korinti 5:7; 2 Korinti 7:1) Ikatakenna maka patoken enda la reh i bas manusia nari, tapi reh ”i bas Dibata nari, si mpetandaken diriNa arah KataNa si tersurat”. Organisasi Jahwe ngenca si tuhu-tuhu nggit ngikutken Kata Dibata amin gia paksa ngelakokenca banci saja mesera kal iakap anggotana. Mbaru-mbaru enda lit buku si mbahas kerna agama i Amerika Serikat, si ngataken, ”Rusur iubah Peminpin agama Kristen pengajarenna  gelah cocok ras kiniteken, pendapat anggotana bage pe jelma si nterem gelah ndatken dukungen.” Tapi, la iikuti Badan Pinpinen kai si meriah iakap jelma si nterem. Sebalikna, anggota-anggotana itegu-tegu Kata Dibata, bukti maka tuhu-tuhu itegu-tegu Jahwe umatNa gundari.

16. Alu cara kai banci siinget Badan Pinpinen?

¹⁶ Oge Heber 13:7. Nina Pustaka ”ingetlah peminpin-peminpin” si lit bas kita. Cara ngelakokenca eme alu notoken ia. (Epesus 6:18) Melala kal tanggungjabapna, misalna, mpesikap pangan rohani, ngaturken dahin erberita sebelang doni, ras ngurus sumbangen si masuk man organisasi. Emaka, perlu kal sitotoken kalak e alu ratur!

17, 18. (a) Uga kita ngikutken petunjuk i bas Badan Pinpinen nari? (b) Uga dahinta guna erberita ndukung Badan Pinpinen ras Jesus?

¹⁷ Banci ka siinget Badan Pinpinen alu ngikutken petunjukna. Ibere Badan Pinpinen kita petunjuk arah publikasi, perpulungen, ras kebaktinta. Kalak e ka si milih pertua keliling, janah pertua keliling milih pertua. Cara pertua keliling ras pertua nginget Badan Pinpinen eme alu megermet ngikutken pengarahenna. Janah kerina kita nghamati peminpinta, Jesus, alu patuh man kalak si ipakena gundari.—Heber 13:17.

¹⁸ Cara si deban nginget Badan Pinpinen alu mereken si mehulina i bas dahin erberita. Iiahken Heber 13:7 kalak Kristen guna ngusih kiniteken kalak si muat pimpinen. Icidahken Badan Pinpinen kiniteken si mbelin alu ergiah-giah erberita ras ndukung berita si meriah. Sidukung nge turang seninanta e i bas dahin si penting enda? Adi ue, meriah siakap paksa ikataken Jesus man banta, ”Kai si ibahanndu man sekalak si musilna i bas seninangku enda, e me si tuhuna perbahanenndu man bangku.”—Matius 25:34-40.

19. Engkai maka itekadkenndu ngikutken peminpinta, Jesus?

¹⁹ Paksa mulih Jesus ku surga, la ipeturutna juak-juakna. (Matius 28:20) Ietehna maka kesah si badia, malekat-malekat, ras Kata Dibata nampati ia paksa minpin i doni. Iberena juak-juak si tutus penampat si seri gundari. Badan Pinpinen terus ’ngikutken Anak Biri-biri’, la soal ”ku ja gia ia lawes”. (Ketangkasen 14:4) Emaka, paksa siikutken petunjuk i bas Badan Pinpinen nari, situhuna kita ngikutken peminpinta, Jesus. Lanai ndekah, ibabana me kita ku kegeluhen si rasa lalap. (Ketangkasen 7:14-17) Janah la lit peminpin manusia si banci njanjiken si e!