1, 2. (a) Uga Saksi-Saksi Jahwe beda ras agama-agama si debanna? (b) Kai si man bahasenta bas artikel enda ras artikel si seterusna?

ENTEREM jelma rusur nungkung man Saksi-Saksi Jahwe, ”Ise peminpin kena?” Merhat kalak e metehsa erkiteken melala agama ipinpin sekalak dilaki ntah pe diberu. Tapi, megah siakap ngataken maka peminpinta labo manusia si la serta, peminpinta eme Jesus Kristus! Janah ipatuhina Jahwe selaku Bapa ras peminpinna.—Matius 23:10.

² Lit ka sada terpuk dilaki si ikataken ”juak-juak si tutus dingen pentar”, si minpin umat Dibata i doni gundari. (Matius 24:45) Tapi ja nari sieteh maka Jahwe nge situhuna si minpin kita erkelangken anakNa? Sinen kari telu alasenna. Amin gia ipake Jahwe piga-piga kalak minpin umatNa, tangkas teridah maka Jahwe nge si tuhuna minpinsa mbarenda bage pe gundari.—Jesaya 58:11.

3. Kai si nampati Musa minpin kalak Israel?

³ Wakil-wakil Dibata ikuasai kesah si badia. Ipilih Jahwe me Musa guna minpin kalak Israel. Kai si nampati  ia gelah banci ndalanken tugas si penting enda? Ibere Jahwe man Musa ”kesahNa si badia”. (Oge Jesaya 63:11-14.) Emaka, Jahwe nge situhuna si minpin umatNa, erkiteken kesahNa si nampati Musa.

4. Kai buktina maka lit kesah Dibata bas Musa? (Nehen gambar pemena artikel.)

⁴ Banci nge iidah kalak maka lit bas Musa kesah Dibata? Banci! Kesah si badia mere kengasupen man Musa guna erban mukjizat ras mpebetehken gelar Dibata man Paro, penguasa Mesir si erkuasa. (Keluaren 7:1-3) Kesah si badia ka si nampati Musa jadi peminpin si perkeleng dingen saber. Beda kal ia ras peminpin bangsa si deban si kasar ras mentingken bana! (Keluaren 5:2, 6-9) Jelas me, Jahwe si milih Musa guna minpin umatNa.

5. Man ise ka ibereken Jahwe kesah si badia guna minpin umatNa?

⁵ Man ise ka ibereken Jahwe kesah si badiaNa guna minpin umatNa? Nina Pustaka si Badia, ”Josua anak Nun dem alu kepentaren.” (Ulangen 34:9) ”Kesah [Jahwe] ngkuasai Gideon.” (Hakim-Hakim 6:34) Janah ”Daud ikuasai kesah [Jahwe]”. (1 Samuel 16:13) Kesah si badia si nampati kalak e ngelakoken kai si la banci ilakokenna. (Josua 11:16, 17; Hakim-Hakim 7:7, 22; 1 Samuel 17:37, 50) Jelas me, Jahwe si mereken gegeh man kalak e guna ngelakoken kai si luar biasa, emaka Ia ngenca si patut ipuji.

6. Engkai maka ipindo Jahwe kalak Israel nghamati peminpinna?

⁶ Kai si arusna ilakoken kalak Israel paksa iidahna kesah Dibata lit bas Musa, Josua, Gideon, bage pe Daud? Arusna ihamatina kalak e. Paksa jungut-jungut kalak e man Musa, perdiateken kai si ikataken Jahwe, ”Asa kai nari dekahna bangsa enda nulak Aku?” (Bilangen 14:2, 11) Jelas me, maka Jahwe nge si milih kalak e guna minpin umatNa. Paksa kalak Israel patuh, situhuna ia patuh man Jahwe selaku Peminpin.

7. Uga malekat-malekat nampati Musa?

⁷ Wakil-wakil Dibata isampati malekat-malekat. (Oge Heber 1:7, 14.) Isuruh Dibata me malekat guna negu-negu Musa. Si pemena, iidahna malekat i rambah duri janah isuruh malekat e ia mbebasken ras minpin kalak Israel. (Perbahanen Rasul-Rasul 7:35) Si peduaken, isuruh Jahwe ka malekat mereken hukum man Musa guna kalak Israel. (Galati 3:19) Peteluken, ikataken Jahwe man bana, ”Babailah bangsa e ku ingan si enggo Kukataken man bandu. Ingetlah maka malekatKu pagi si nuduhken dalan man bandu.” (Keluaren 32:34) La ikataken  Pustaka maka iidah kalak Israel malekat ngelakokenca. Tapi, arah cara Musa mereken petunjuk ras maba kalak e, jelas teridah maka malekat si nampati ia.

8. Uga malekat nampati Josua ras Hiskia?

⁸ Ise ka si isampati malekat-malekat? Ikataken Pustaka maka ”komendan tentera [Jahwe]” eme sekalak malekat, nampati Josua gelah menang ngelawan kalak Kanaan. (Josua 5:13-15; 6:2, 21) Bas pudi wari, paksa Raja Hiskia jadi peminpin umat Dibata, ikernepken pasuken Assur atena Jerusalem. Tapi, i bas sada berngi, ”sekalak malekat [Jahwe] lawes ku ingan kalak Assur erkemah janah ibunuhna 185.000 tentera”.—2 Raja-Raja 19:35.

9. Amin gia wakil-wakil Dibata la serta, kai si ipindo bas kalak Israel nari?

⁹ Malekat-malekat e serta. Tapi, kalak si isampatina lang. Contohna, pernah sekali Musa la nghamati Jahwe. (Bilangen 20:12) La isungkun Josua lebe man Jahwe kai si arus ilakokenna paksa erbahan perjanjin ras kalak Gideon. (Josua 9:14, 15) Hiskia pernah meganjang ukur. (2 Kronika 32:25, 26) Amin gia kalak e la serta, ipindo Jahwe gelah kalak Israel patuh. Banci iidah kalak Israel maka ipake Jahwe malekat guna nampati kalak e. Jelas me, Jahwe si minpin umatNa.

10. Uga Musa itegu-tegu Undang-Undang Jahwe?

¹⁰ Wakil-wakil Jahwe itegu-tegu Kata Dibata. Undang-Undang si ibereken man kalak Israel igelari ”Undang-Undang Musa”. (1 Raja-Raja 2:3) Tapi alu tangkas ikataken Pustaka maka Jahwe nge si mereken Undang-Undang e man kalak Israel. Janah Musa pe arus patuh. (2 Kronika 34:14) Contohna, kenca ikataken Jahwe uga carana erbahan tabernakel, ”ibahan Musa me kerina bagi si enggo ipedahken [Jahwe]”.—Keluaren 40:1-16.

11, 12. (a) Kai si arus ilakoken Josua ras raja-raja si minpin umat Dibata? (b) Uga Kata Dibata negu-negu kalak si muat pinpinen?

¹¹ Enggo lit piga-piga kitap Kata Dibata bas Josua paksa ia jadi peminpin. Nina Jahwe bana, ”Pelajarilah e suari ras berngi, janah arus iperdiatekenndu maka kerina si tersurat i je ipatuhindu.” (Josua 1:8) Bas pudi wari, raja si minpin umat Dibata pe arus ngoge Undang-Undang e tiap wari, nuratkenca, janah matuhi ”perentah-perentah si lit i bas kitap e alu tutus”.—Oge Ulangen 17:18-20.

¹² Uga Kata Dibata negu-negu kalak si muat pinpinen? Ukuri kerna Raja Josia. Kenca Undang-Undang Musa dat, iogeken sekretaris Josia man bana. * (Nehen keterangen tambahen.) ”Kenca ibegi raja isi kitap e icaingkenna uisna perban biarna.” Kata Dibata e erban Josia ngkernepken kerina gana-gana i negeri e, janah ibanna wari raya Paskah si seh kal belinna. (2 Raja-Raja 22:11; 23:1-23) Erkiteken iikutken Josia ras peminpin si debanna Kata Dibata, meriah ukur  kalak e erban perubahen sue ras petunjuk si ibereken man umat Dibata. Enda nampati umat Dibata setia man Jahwe.

13. Uga peminpin umat Dibata beda ras peminpin bangsa si deban?

¹³ Peminpin bangsa-bangsa si deban ngikutken kepentaren manusia si terbatas. Contohna, kalak Kanaan ras peminpinna ngelakoken kai si la mehuli, bagi ersada kula ras turangna, homoseks, ersada kula ras asuh-asuhen, mpersembahken anakna ras nembah gana-gana. (Imamat 18:6, 21-25) Janah, peminpin Babilon ras Mesir pe la lit undang-undangna kerna kebersihen. (Bilangen 19:13) Tapi, banci iidah umat Dibata maka peminpinna si setia ngiahken ia gelah bersih subuk i bas penembahenna, daging bage pe lagu langkahna. Jelas me maka si minpin kalak e eme Jahwe.

14. Engkai iukum Jahwe piga-piga si minpin umatNa?

¹⁴ La kerina raja si minpin umat Dibata ngikutken petunjuk Dibata. Raja-raja si la setia e la nggit ngikutken petunjuk i bas kesah si badia nari, malekat-malekat, bage pe Kata Dibata. Iukum ntah pe isambari Jahwe me piga-piga kalak e. (1 Samuel 13:13, 14) Bas pudi wari, ipilih Dibata me sekalak peminpin si serta.

15. (a) Uga nubuat-nubuat ncidahken maka lit pagi peminpin si serta? (b) Ise peminpin si serta e?

¹⁵ Enggo ratusen tahun dekahna, ijanjiken Jahwe maka ipilihNa pagi peminpin si serta man umatNa. Contohna, ikataken Musa man kalak Israel, ”Tapi isuruh [Jahwe] pagi man bandu sekalak nabi bali ras aku, i bas bangsandu nari, janah arus iikutkenndu ia.” (Ulangen 18:15) Ikataken Jesaya maka Ia ”jadi peminpin ras puanglima”. (Jesaya 55:4) Janah isuratken Daniel kerna Mesias, si jadi ”sekalak peminpin”. (Daniel 9:25) Dungna, ipetandaken Jesus Kristus dirina maka ia me ”Peminpin” umat Dibata. (Oge Matius 23:10.) Meriah ukur ajar-ajar Jesus ngikutken ia, janah tek maka ia me si ipilih Jahwe. (Johanes 6:68, 69) Kai si erban kalak e tek maka Jesus Kristus si ipilih Jahwe guna minpin umatNa?

16. Bukti kai si ncidahken maka Jesus ikuasai kesah si badia?

¹⁶ Jesus ikuasai kesah si badia. Paksa Jesus iperidiken, iidah Johanes ”langit talang, janah kesah si badia nusur ku babona bagi nderapati”. Kenca e, minter ”ia ibabai kesah si badia ku taneh si mesawang”. (Markus 1:10-12) Sanga pelayanen Jesus i doni, ikuasai kesah si badia ia subuk i bas pengajarenna bage pe paksa erban mukjizat. (Perbahanen Rasul-Rasul 10:38) Selain si e, kesah si badia nampati  Jesus ncidahken kekelengen, keriahen ukur, ras kiniteken si paguh. (Johanes 15:9; Heber 12:2) La lit peminpin si apai pe si ikuasai kesah si badia bagi Jesus. Jelas me, Jahwe si milih Jesus jadi peminpin.

17. Kai si ilakoken malekat-malekat guna nampati Jesus?

¹⁷ Jesus isampati malekat-malekat. La ndekah kenca Jesus iperidiken, ”reh malekat-malekat nampati ia”. (Matius 4:11) Piga-piga jam sope Jesus mate, ”teridah me man bana sekalak malekat i surga nari si pegegehi ia”. (Lukas 22:43) Ieteh Jesus maka pasti ikirim Jahwe malekat nampati ia katawari pe ia perlu.—Matius 26:53.

18, 19. Uga Kata Dibata negu-negu Jesus i bas kegeluhen ras pengajarenna?

¹⁸ Jesus itegu-tegu Kata Dibata. Mulai pelayanenna nari seh asa mate i tiang siksan, terus iikutken Jesus Kata Dibata. Paksa nandangi mate, ikataken Jesus kata-kata si nggo inubuatken kerna Mesias. (Matius 4:4; 27:46; Lukas 23:46) Tapi, paksa si e seh kel bedana peminpin-peminpin agama ras Jesus. La iikutkenna Kata Dibata adi la sentudu ras pengajarenna. Paksa ngerana kerna kalak e, ipake Jesus Kata Dibata, ”Nina Dibata, bangsa enda ipujina Aku i bas biberna ngenca, tapi ukurna ndauh sirang i bas Aku nari.” (Matius 15:7-9) La pernah ipilih Jahwe kalak si la ngikutken kataNa jadi peminpin umatNa.

¹⁹ Ipake Jesus ka Kata Dibata paksa ngajar kalak si deban. Sanga iuji peminpin agama, la ia ernalem kempak  kepentaren ntah pe pengalamenna guna njabap kalak e. Tapi, iajarina kalak nggunaken Kata Dibata. (Matius 22:33-40) Situhuna, banci saja ituriken Jesus pengalamenna i surga ras pemetehna kerna alam semesta. Tapi, erkiteken keleng atena Kata Dibata, meriah akapna nurikenca ras ”ibuka [Jesus] perukuren kalak e gelah iangkana si tersurat i bas Pustaka si Badia”.—Lukas 24:32, 45.

20. (a) Uga Jesus mereken kemulian man Jahwe? (b) Kai perbedan Jesus ras Herodes Agripa I?

²⁰ Amin gia meriah kal iakap kalak megiken pengajaren Jesus, tapi si terus imuliakenna eme Jahwe, Guruna. (Lukas 4:22) Paksa sekalak dilaki si bayak muji Jesus alu ngataken ia ”Guru si Bujur”, alu meteruk ukur ikataken Jesus, ”Engkai maka ikatakenndu aku bujur? Ma ise pe labo bujur seakatan Dibata?” (Markus 10:17, 18) Tapi, waluh tahun kenca e, Herodes Agripa I jadi peminpin i Juda, beda kel ia ras Jesus. I bas sada wari, bas acara si khusus, ipake Herodes paken kerajan si mejile janah seh kal ergana. Paksa iidah kalak janah ibegikenna ia ngerana, ersurak kalak e, ”Labo manusia si ngerana enda, tapi sekalak dibata kap!” Meriah iakap Herodes ngaloken pujin enda. Tapi kai si terjadi kenca si e? ”Minter iparap malekat [Jahwe] si Herodes, sabap iperajangna kemulian si arusna ibereken man Dibata. Berngan ia, jenari mate.” (Perbahanen Rasul-Rasul 12:21-23) Jelas me, la ipilih Jahwe Herodes jadi peminpin. Tapi, icidahken Jesus maka Jahwe si milih ia janah rusur imuliakenna Jahwe selaku Peminpin Si Meganjangna.

21. Kai si man bahasenta bas artikel seterusna?

²¹ La ate Jahwe piga-piga tahun saja Jesus jadi peminpin. Kenca ipekeke, ikataken Jesus man ajar-ajarna, ”Enggo ibereken Dibata man bangku kerina kuasa i surga ras i doni.” Nina ka, ”Janah ingetlah! Aku tetap kap ras kam seh ku kedungen jaman.” (Matius 28:18-20) Tapi, uga cara Jesus minpin umat Dibata surga nari? Ise si ipake Jahwe jadi wakil Jesus i doni? Janah uga kalak Kristen banci nandai wakil Dibata? Artikel seterusna njabap penungkunen e.