1, 2. (a) Kai si nggo ituriken Jahwe man banta? (b) Janji kai si lit i bas Jesaya 46:10, 11 ras 55:11?

SEDERHANA kel kata-kata pemena Pustaka si Badia, tapi mbages kel maknana, nina, ”Mula-mulana ijadiken Dibata langit ras doni.” (Kejadin 1:1) Melala kel tinepa Jahwe i bas alam semesta, tapi sitik denga ngenca siidah janah sitik ka kal ngenca pemetehta kerna luar angkasa, sinalsal, ras gravitasi. (Pengerana 3:11) Tapi, nggo ituriken Jahwe sura-suraNa nandangi doni ras manusia. ItepaNa manusia sentudu ras tempasNa janah ateNa kalak e nggeluh ermeriah ukur i doni. (Kejadin 1:26) Kalak e jadi anak-anakNa janah Ia jadi Bapana.

² I bas pasal telu buku Kejadin, sipelajari maka sura-sura Jahwe nggo itentang. (Kejadin 3:1-7) Tapi, la lit masalah si la banci idungi Jahwe. La lit si banci erban Ia gagal. (Jesaya 46:10, 11; 55:11) Banci kita tek maka sura-sura Jahwe si pemena pasti terjadi i bas waktu si tepat!

3. (a) Pengajaren penting kai si nampati kita ngangkai berita i bas Pustaka nari? (b) Engkai maka sibahas gundari pengajaren e? (c) Penungkunen kai kari sibahas?

 ³ Sieteh kai sura-sura Jahwe nandangi doni ras manusia, bage pe kai bagin Jesus i bas sura-sura e. Enda kebenaren Pustaka si seh kal pentingna, janah mungkin e me kebenaren si pemena sipelajari sanga tangtangna erlajar Kata Dibata. Gundari, sisampati ateta kalak si deban mpelajari ajaren si penting enda. Tahun enda lit kesempaten si istimewa guna ngelakokenca, eme ngundang kalak si deban reh ku Peringeten kematen Kristus. (Lukas 22:19, 20) Adi reh kalak e ku acara si penting enda, banci ipelajarina terbuen kerna sura-sura Dibata si luar biasa. Emaka gundari me waktu si mehuli guna ngukuri penungkunen kai si banci sigunaken i bas ngiahken kalak gelah reh. I bas artikel enda, sibahas kari telu penungkunen: Kai sura-sura Dibata nandangi doni ras manusia? Engkai maka lenga terjadi? Engkai korban tebusen Jesus ngenca si banci erban sura-sura Dibata terjadi?

4. Uga tinepa ”encidahken kemulian Dibata”?

⁴ Jahwe eme Si Nepa, luar biasa kel tinepaNa. Kerina si itepaNa mejile kel. (Kejadin 1:31; Jeremia 10:12) Kai si banci sipelajari arah tinepa si seh kel jilena bage pe ratur enda? Sipelajari maka kerina si itepa Jahwe, mulai si kitikna nari seh ku si mbelinna, kerina erguna. Janah, sanga iukurindu kerna sel manusia si luar biasa, ntah pe sanga idahndu anak si mbaru tubuh, ntah ngenen matawari sundut si seh kal jilena, uga nge perasanndu? Meriah kel ukurta ngidahsa erkiteken kita itepa alu kengasupen guna meteh kai si tuhu-tuhu mejile.—Oge Masmur 19:2; 104:24.

5. Kai si ilakoken Jahwe gelah kerina tinepaNa erdahin alu mehuli?

⁵ Alu metenget, iban Jahwe batasen man kerina tinepaNa. IbanNa hukum alam ras hukum moral. IbanNa hukum enda, gelah kerina i bas alam semesta erdahin alu mehuli. (Masmur 19:8-10) Kerina i bas alam semesta lit ingan ras gunana si nggo itetapken. Contohna, hukum gravitasi erban atmosfer tetap lit i bas doni, janah ngkuasai samudra ras galumbang. Adi la lit gravitasi, la lit kegeluhen i doni. Batasen si ibahan Jahwe i bas alam erban lit keteraturen si serta i bas alam semesta. Enda ncidahken maka lit sura-suraNa nandangi doni ras manusia. Sanga erberita, sisampati kalak si deban nandai ise Si Nepa alam semesta.—Ketangkasen 4:11.

6, 7. Kai piga-piga pemere si ibereken Jahwe man Adam ras Hawa?

⁶ Sura-sura Jahwe eme gelah manusia nggeluh si rasa lalap i doni. (Kejadin 1:28; Masmur 37:29) Ia melumbar, emaka iberekenNa erbage pemere si meherga man Adam ras Hawa. (Oge Jakup 1:17.) Ibereken Jahwe kebebasen guna milih ras kengasupen guna rukur, ngkelengi, ras erteman. Ngerana Si Nepa man Adam janah ipebetehkenNa cara ngelakoken kai si mehuli. Ipelajari Adam ka uga ngurus dirina, rubia-rubia, bage pe taneh. (Kejadin 2:15-17, 19, 20) Ibereken Jahwe man Adam ras Hawa kengasupen guna ngenanami kai si mehuli, njemaksa, ngenenca, mbegi ras nganggehsa. Alu bage, banci ia nggeluh ermeriah ukur i bas rumahna si mejile. Melala pendahin si mehuli si ilakokenna. Janah banci terus erlajar ras ndatken kai si mbaru seh rasa lalap.

⁷ Kai ka deba nari bagin i bas sura-sura Dibata? Ibereken Jahwe man Adam ras Hawa kengasupen mupus anak-anak si serta. Janah anak-anakna pe banci ka mupus ngasa dem doni enda. Ate Jahwe gelah ikelengi orang tua anak-anakna, bagi Ia ngkelengi anakNa, Adam ras Hawa. IberekenNa man keluarga manusia doni enda ras kerina si meherga bage pe si mejile. Enda me rumahna, janah la pernah ibuat i bas ia nari.—Masmur 115:16.

8. Engkai maka ibereken Dibata hukum man Adam ras Hawa si isuratken i bas Kejadin 2:16, 17?

⁸ Tapi labo kerina mis terjadi bagi si iarapken Jahwe. Engkai? Ibereken Jahwe man Adam ras Hawa sada hukum si sederhana gelah ieteh kalak e lit batasen kebebasenna. Nina, ”Kerina buah batang kayu si lit i bas peken enda banci ipanndu, seakatan buah batang kayu si mereken pemeteh kerna si bujur ras si jahat. Buah batang kayu e la banci ipanndu; adi ipanndu, la banci lang mate kam i bas wari e.” (Kejadin 2:16, 17) Hukum e la mesera iakap kalak e ngangkaisa ras matuhisa, erkiteken melala denga pangan si ntabeh i je.

9, 10. (a) Tuduhen kai si ikataken Setan kerna Jahwe? (b) Kai si iputusken Adam ras Hawa? (Nehen gambar pemena artikel.)

⁹ Igunaken Setan si Iblis nipe guna nipu Hawa gelah la patuh man Bapana, Jahwe. (Oge Kejadin 3:1-5; Ketangkasen 12:9) Ipermasalahken Setan hukum si ibereken Dibata man manusia eme gelah ula ipanna ”sada pe buah batang kayu i bas peken”. Tempa-tempa ikatakenna, ’Berarti la banci ilakokenndu bagi si iarapkenndu?’ Kenca si e nina man Hawa, ”Labo tuhu e, labo kam mate.” Enda sada guak. Kenca si e iusahakenna gelah tek Hawa maka la perlu ibegikenna Dibata. Nina Setan, ”Bage nina Dibata, perban ietehNa kenca ipanndu, bali kam ras Dibata, meteh si bujur ras si jahat.” Maksud Setan la ate Jahwe kalak enda man buah e erkiteken banci erban kalak e dat pemeteh si istimewa. Janah iberena janji palsu maka banci ia bali ras Dibata.

¹⁰ Arus iputusken Adam ras Hawa kai si ilakokenna. Ipatuhina nge Dibata, ntah ibegikenna nipe? Sayangna, iputuskenna la matuhi Dibata. Itulakna Jahwe selaku Bapana janah iikutkenna Setan. Gundari kalak enda lanai ikawali Dibata.—Kejadin 3:6-13.

11. Engkai maka la banci ipediat Dibata bage saja dosa Adam ras Hawa?

¹¹ Sanga la ipatuhi Adam ras Hawa hukum Dibata, kalak e jadi la serta. Janah, ia jadi musuh Dibata, erkiteken nembeh ateNa kejahaten. Kerna Jahwe ikataken, ”Si tuhuna mataNdu si badia labo ngasup ngidah kejahaten.” (Habakuk 1:13) Adi la Jahwe ertindak nandangi Adam ras Hawa, kerina tinepa Dibata terancam. Malekat ras manusia banci saja tersungkun-sungkun banci nge kalak e tek man kata-kata Dibata. Tapi Jahwe setia man patokenna; janah la pernah ilanggarNa. (Masmur 119:142) Aminna pe lit kebebasen Adam ras Hawa guna milih, la banci kalak e nilah arah akibat nentang Jahwe. Dungna kalak e mate janah mulihken ku asalna si pemena eme taneh.—Kejadin 3:19.

12. Kai si terjadi man anak-anak Adam?

¹² Sanga ipan Adam ras Hawa buah e, lanai ialoken Jahwe ia jadi bagin keluargaNa. IpelawesNa ia i bas peken Eden nari, janah lanai banci mulihken ku je. (Kejadin 3:23, 24) Iban Jahwe gelah inanamina akibat keputusenna. (Oge Ulangen 32:4, 5.) Dungna, lanai banci iusih kalak e sipat-sipat Jahwe alu serta. Adam ras kerina kesusurenna lanai ngenanami wari si pepagi si luar biasa. Kinilasertan, dosa, ras kematen ngenca si banci isusurkenna. (Roma 5:12) Bene me kesempaten nggeluh si rasa lalap iban Adam. La banci ipupus Adam ras Hawa anak si serta, janah anakna pe bage ka. Labo Adam ras Hawa ngenca si ipengaruhi Setan nentang Dibata, kerina manusia pe iusahakenna mpengaruhisa.—Johanes 8:44.

13. Kai peraten Jahwe nandangi manusia?

¹³ Keleng denga ate Jahwe manusia. Aminna pe nggo itadingken Adam ras Hawa Ia, nggit denga Ia erteman ras manusia. Janah la ateNa kalak e mate. (2 Petrus 3:9) Emaka mis iatur Dibata gelah manusia banci erteman mulihi ras Ia. Uga Ia ngelakokenca alu la ngelanggar patokenNa? Mari sinen.

14. (a) Erpalasken Johanes 3:16 kai si ilakoken Dibata guna nelamatken manusia i bas dosa ras kematen nari? (b) Penungkunen kai sibahas ras kalak si deban?

¹⁴ Oge Johanes 3:16. Enterem kalak si iundang ku Peringeten nandai ayat enda. Tapi uga korban Jesus banci erban kita nggeluh si rasa lalap? Lit kesempatenta nampati kalak ngangkai jabapenna sanga siundang ia ku acara Peringeten, sanga kita ras kalak e bas acara Peringeten, bage pe sanga sidahi mulihi. Reh bagesna pengangkanna kerna tebusen, reh bagesna ka pengangkanna kerna uga belinna kekelengen Jahwe man manusia janah uga pentarna Ia. Pelajaren kai kerna tebusen si banci situriken man kalak e?

15. Kai bedana Jesus ras Adam?

¹⁵ Isikapken Jahwe sekalak manusia si serta si banci mereken kegeluhenna jadi tebusen. Dilaki si serta e arus setia man Jahwe. Arus ia nggit mereken kegeluhenna man manusia. (Roma 5:17-19) Ipindahken Jahwe kegeluhen Jesus, tinepaNa si pemena, surga nari ku doni. (Johanes 1:14) Alu bage Jesus jadi manusia si serta, seri ras Adam. Tapi la bagi Adam, iikutken Jesus patoken si iarapken Jahwe i bas manusia si serta nari. Aminna pe ngadapi ujin si mberat, lalap ia patuh man undang-undang Dibata.

16. Engkai tebusen sada pemere si meherga?

¹⁶ Banci iselamatken Jesus manusia i bas dosa ras kematen nari alu mate selaku manusia si serta. Ilakokenna kerina kai si arus ilakoken Adam mbarenda. Jesus, manusia si serta, tuhu-tuhu setia janah patuh man Dibata. (1 Timotius 2:6) Mate ia guna kita, janah mereken kesempaten man kerina dilaki, diberu, bage pe anak-anak guna nggeluh si rasa lalap. (Matius 20:28) Tebusen ngenca si banci erban sura-sura Dibata terjadi.—2 Korinti 1:19, 20.

17. Kai gunana tebusen?

¹⁷ Meherga kel si arus igalari Jahwe guna nikapken tebusen. (1 Petrus 1:19) Meherga kel iakapNa kita, emaka nggit Ia mereken anakNa si meherga guna kita. (1 Johanes 4:9, 10) Erkiteken e, Jesus me bapanta labo Adam. (1 Korinti 15:45) Janah, labo nggeluh si rasa lalap saja ngenca sidat, tapi banci ka kita mulihi jadi keluarga Dibata. Alu tebusen, manusia banci jadi serta janah ialoken Jahwe mulihken alu la ngelanggar patokenNa. Bayangken uga riahna pagi sanga kerina kalak si setia jadi serta! Dungna, kerina si lit i surga ras i doni ersada jadi keluarga. Kerina kita jadi anak Dibata.—Roma 8:21.

18. Ndigan Jahwe banci ”jadi kai pe man kerina kalak”?

¹⁸ Aminna pe orangtuanta si pemena la matuhi Jahwe, keleng denga ateNa manusia, emaka iberekenNa tebusen. Aminna pe la serta, la banci iban Setan kita la setia man Jahwe. Alu tebusen, isampati Jahwe kita jadi kalak si adil ras benar. Bayangken uga pagi kegeluhenta sanga kerina ”si ngidah anak e dingen si tek man bana” nggeluh rasa lalap! (Johanes 6:40) Terjadi me sura-sura Bapanta si perkeleng ras bijaksana, janah isampatiNa manusia jadi serta. Dungna Jahwe banci ”jadi kai pe man kerina kalak”.—1 Korinti 15:28, Terjemahan Dunia Baru [NW].

19. (a) Pengergan kerna tebusen arusna ngiahken kita ngelakoken kai? (Nehen kotak ” Teruslah Sidarami Kalak si Patut”.) (b) Kai si man bahasenta bas artikel seterusna?

¹⁹ Pengerganta man tebusen arus ngiahken kita gelah nuriken pemere si meherga enda man si deban. Perlu ieteh kalak maka alu tebusen, itawarken Jahwe kesempaten nggeluh si rasa lalap man kerina manusia. Tapi manfaat si terbelinen eme ndungi masalah si iban Setan i bas peken Eden mbarenda. Sibahas kari uga e terjadi i bas artikel seterusna.