1. Kai saja kegunan tebusen banta?

MBUE pasu-pasu si banci sidatken erkiteken korban tebusen Jesus. Contohna, anak-anak Adam si ndalanken peraten Jahwe banci pagi jadi bagin keluargaNa. Selain si e, banci kita nggeluh rasa lalap alu ermeriah ukur. Janah, si pentingna tebusen pe lit hubungenna ras persoalen si seh kel pentingna bas surga ras doni.—Heber 1:8, 9.

2. (a) Persoalen kai si seh kel pentingna si mpengaruhi surga ras doni si ikataken Jesus bas pertotonna? (Nehen gambar pemena artikel.) (b) Kai si man bahasenta bas artikel enda?

² Kira-kira dua tahun sope Jesus mate, iajarina ajar-ajarna ertoto, nina, ”O Bapa kami si ni surga. GelarNdu ipebadia min; reh min KinirajanNdu; sehlah min peratenNdu, i bas doni enda bagi ni surga.” (Matius 6:9, 10) Mari sibahas kai hubungen tebusen ras mpebadiaken gelar Jahwe, pemerentahen Kinirajan Dibata, ras ngelakoken peraten Jahwe.

3. Kai si icidahken gelar Jahwe? Uga setan ncedai gelar Jahwe?

³ Si pemena, ertoto Jesus gelah gelar Dibata ipebadiaken. Gelar Jahwe ncidahken ise Ia situhuna. Ia si mbelinna kuasaNa ras si benarna i alam semesta. Ilebuh Jesus Ia ”Bapa si Badia”. (Johanes 17:11) Erkiteken Jahwe e badia, kerina si ilakokenNa badia bage pe hukum-hukumNa. Tapi i Eden, alu licik ipersoalken Setan hak Jahwe i bas mereken patoken man manusia. Erbual ia kerna Jahwe ras icedaina gelarNa.—Kejadin 3:1-5.

4. Uga Jesus mpebadiaken gelar Dibata?

⁴ Tapi, keleng kal ate Jesus gelar Jahwe, kai pe ilakokenNa guna mpebadiakenca. (Johanes 17:25, 26) Carana, arah perbahanen ras pengajarenna. Isampati Jesus gelah iangkai kalak maka hukum-hukum Jahwe benar, janah kerina si ipindo Jahwe guna kiniulinta. (Oge Masmur 40:9-11.) Paksa ibahan Setan gelah inanami Jesus kiniseran ras kematen si seh kal suina, tetap Jesus setia. Ibuktikenna maka manusia si serta banci patuh man Jahwe uga pe keadanna.

5. Uga kita mpebadiaken gelar Jahwe?

⁵ Uga banci sicidahken maka sikelengi gelar Jahwe? Arah perbahanenta. Ipindo Jahwe kita gelah badia. (Oge 1 Petrus 1:15, 16.) Ertina, Ia saja si arus sisembah dingen sipatuhi alu bulat ukur. Janah paksa isiksa, silakoken peraten Jahwe asa ngasupta. Adi kita nggeluh sue ras patoken Jahwe, simuliaken gelarNa. (Matius 5:14-16) Sibuktiken maka hukumNa si mehulina janah Setan perbual. Erkiteken la serta, rusur kita salah. Tapi paksa silakoken kesalahen e, robah kita janah siusahaken lanai ngelakokenca guna nghamati gelar Jahwe.—Masmur 79:9.

6. Engkai maka banci ianggap Jahwe kita benar amin gia la serta?

⁶ La soal kita terpuk si iminaki ntah ’biri-biri si deban’, ialemi Jahwe nge kesalahenta adi erkiniteken kita man tebusen. IalokenNa kita selaku kalak si nembah Ia ras erbakti man baNa. IkatakenNa maka terpuk si iminaki benar selaku anak-anakNa, janah ’biri-biri si deban’ benar selaku temanNa. (Johanes 10:16; Roma 5:1, 2; Jakup 2:21-25) Emaka, gundari pe tebusen banci erban kita ndeher ras Bapanta janah mpebadiaken gelarNa.

7. Kai saja pasu-pasu sidatken erkiteken tebusen?

⁷ I bas pertoton si iajarken Jesus, nina, ”Reh min KinirajanNdu.” Kai hubungen tebusen ras Kinirajan Dibata? Jesus ras 144.000 kalak si ibuat bas doni nari jadi bagin i bas Kinirajan Dibata. Tebusen si erbanca maka kalak si ibuat bas doni nari banci ku surga. (Ketangkasen 5:9, 10; 14:1) Kalak e ras Jesus pagi si jadi raja bage pe imam si merentah doni seribu tahun dekahna. Paksa si e, KinirajanNa si erban doni enda jadi pardis janah erban manusia jadi serta. Juak-juak Jahwe si i surga bage pe i doni dungna jadi sada keluarga. (Ketangkasen 5:13; 20:6) Ikernepken Jesus me Setan ras kerina masalah si nggo ibahanna. —Kejadin 3:15.

8. (a) Uga Jesus nampati ajar-ajarna ngangkai maka Kinirajan Dibata e penting? (b) Uga kita ndukung Kinirajan Dibata gundari?

⁸ Jesus nampati ajar-ajarna ngangkai maka Kinirajan Dibata e seh kal pentingna. Carana, kenca iperidiken, iberitaken Jesus ”berita si meriah kerna Kinirajan Dibata” ku ja pe ia lawes. (Lukas 4:43) Ikatakenna ka man ajar-ajarna gelah mereken kesaksin kerna dirina ”seh ku belang-belang doni enda”. (Perbahanen Rasul-Rasul 1:6-8) Gundari, alu pendahin erberita, lit kesempaten kalak erlajar kerna tebusen janah jadi rayat Kinirajan Dibata. Sicidahken maka kita rayat Kinirajan si setia adi si dukung terpuk si iminaki mbarken berita si meriah ku belang-belang doni.—Matius 24:14; 25:40.

9. Engkai maka banci kita tek sura-sura Jahwe man manusia pasti terjadi?

⁹ Kai maksud Jesus paksa ikatakenna, ”Sehlah min peratenNdu”? Kerina si ikataken Jahwe pasti terjadi. (Jesaya 55:11) Pemberontaken Setan la banci mpengadi Jahwe. Kai sura-sura Jahwe nandangi doni? AteNa doni idemi anak-anak Adam ras Hawa si serta. (Kejadin 1:28) Adi Adam ras Hawa mate janah la lit pupusna, sura-sura Dibata e la banci terjadi. Emaka, ipeturut Jahwe kalak e mupus. Kerina manusia si erkiniteken jadi serta me pagi ras nggeluh si rasa lalap erkiteken tebusen. Keleng ate Jahwe manusia janah ateNa kita nggeluh alu ermeriah ukur bagi sura-suraNa si ndube.

10. Kai gunana tebusen man kalak si nggo mate?

¹⁰ Uga kerna miliaren kalak si nggo mate si la pernah nandai Jahwe? Ate Jahwe kerina manusia nggeluh. Emaka ipekekeNa me kalak si nggo mate. Enda banci terjadi erkiteken tebusen. Kenca si e, kalak e banci erlajar kerna Jahwe ras nggeluh si rasa lalap. (Perbahanen Rasul-Rasul 24:15) Jahwe eme Ulu kegeluhen. Paksa ipekeke Jahwe kalak si nggo mate, Ia jadi Bapana. (Masmur 36:10) I bas pertoton si iajarken Jesus, ikatakenna maka Jahwe ”Bapa kami si ni surga”. (Matius 6:9) Enggo ibere Jahwe man Jesus dahin si penting guna mpekeke kalak si mate. Nina Jesus, ”Aku kap si mereken kegeluhen ras mpekeke kalak mate.”—Johanes 6:40, 44; 11:25.

11. Kai sura-sura Dibata nandangi rarasen si nterem?

¹¹ Nina Jesus ka, ”Ise si nehken peraten Dibata, ia me seninangku, turangku ras nandengku.” (Markus 3:35) Sura-sura Dibata maka kalak arah kerina bangsa, suku, ras cakap nembah Ia. Kalak e ikataken rarasen si nterem, ”ise pe la ngasup meligaisa”! Kalak e erkiniteken nandangi tebusen janah nggit patuh man Dibata. Ipuji kalak e Ia janah nina, ”Keselamatenta reh i bas Dibatanta nari, e me si kundul i kursi Kinirajan e dingen i bas anak biri-biri e nari!”—Ketangkasen 7:9, 10.

12. I bas pertoton si iajarken Jesus, kai si banci sipelajari kerna sura-sura Jahwe nandangi manusia?

 ¹² Enggo melala sipelajari kerna Jahwe ras sura-suraNa nandangi manusia arah pertoton si iajarken Jesus. Si pemena, arus sipebadiaken gelar Jahwe ras sipuji Ia asa ngasupta. (Jesaya 8:13) Korban tebusen Jesus mereken keselamaten ras mpebadiaken gelar Jahwe. Situhuna, erti gelar Jesus ”Jahwe eme keselamaten”. Si peduaken, arah Kinirajan Dibata banci igejapken manusia si patuh kerina manfaat tebusen. Janah si peteluken, tek kita maka la lit kai pe si banci ngambati sura-sura Jahwe.—Masmur 135:6; Jesaya 46:9, 10.

13. Engkai maka kita iperidiken?

¹³ Cara si penting ncidahken pengerganta nandangi tebusen eme alu mbaktiken diri man Jahwe janah iperidiken. Alu bage, sicidahken maka erkiniteken kita nandangi tebusen ras sicidahken maka ”sikerajangen [Jahwe] kap kita”. (Roma 14:8) Paksa iperidiken, sipindo man Jahwe gelah ibereNa kita ”pusuh peraten si bersih”. (1 Petrus 3:21) Enda banci ibere Jahwe erkiteken lit tebusen. Janah tek kita maka pasti ibereNa kerina si nggo ijanjikenNa.—Roma 8:32.

14. Engkai maka iperentahken Jahwe kita ngkelengi kalak si deban?

¹⁴ Kekelengen nge si ngiahken Jahwe i bas ngelakoken kai pe. AteNa kerina penembahNa ngusih Ia janah sikeleng-kelengen. (1 Johanes 4:8-11) Paksa sikelengi kalak si deban, alu tangkas sicidahken maka jadi ”anak-anak Dibata” ateta. (Matius 5:43-48) Dua perentah si mbelinna eme ngkelengi Jahwe ras temanta manusia. (Matius 22:37-40) Cara ncidahken kekelengenta man kalak si deban eme ngajari ia kerna Kinirajan Dibata. Adi sipatuhi perentah Jahwe guna ngkelengi kalak si deban, khususna turang seninanta, kekelengenta man baNa ”jadi serta”.

15. (a) Pasu-pasu kai si banci sialoken gundari bas Jahwe nari? (b) Pasu-pasu kai si banci sialoken bas wari si pepagi?

¹⁵ Adi erkiniteken kita nandangi tebusen, ibereken Jahwe jaminen maka kerina dosanta banci ”ialemi”. (Oge Perbahanen Rasul-Rasul 3:19-21.) Bagi si nggo sibahas, banci ibuat Jahwe piga-piga manusia jadi anakNa i surga erkiteken tebusen. Kalak e me si ikataken terpuk si iminaki. (Roma 8:15-17) IundangNa ’biri-biri si deban’ jadi bagin keluargaNa i doni. Kenca serta kalak e, lit kari ujin pendungi. Adi kalak e tetap setia, jadi anak-anak Jahwe me ia. (Roma 8:20, 21; Ketangkasen 20:7-9) Lalap nge ikelengi Jahwe kerina anakNa. Tebusen pasti maba pasu-pasu seh rasa lalap. (Heber 9:12) Enggo ibere Jahwe pemere si meherga enda, janah ise pe la banci muatsa bas kita nari.

16. Uga tebusen mbebasken kita?

¹⁶ Adi robah kita, kai pe la banci ilakoken Iblis guna ngambati kita jadi bagin keluarga Jahwe pagi. ’Sekali ngenca Jesus mate seh rasa lalap.’ Emaka tebusen nggo jadi penggalaren seh rasa lalap. (Heber 9:24-26) Adam si maba kita ku kematen, tapi korban Jesus maba kita ku kegeluhen si rasa lalap. Tebusen banci mbebasken kita i bas doni Setan nari janah lanai mbiar man kematen.—Heber 2:14, 15.

17. Kai ertina kekelengen Jahwe man bandu?

¹⁷ Janji Dibata lalap itepatiNa. Bali bagi hukum alam si iban Dibata si la banci mobah, Jahwe pe la pernah mobah. La pernah ikecewakenNa kita. (Maleaki 3:6) Ibere Jahwe kai si ndauh ergan asangken kegeluhen. IbereNa kita kekelengenNa. ”Janah kita jine enggo meteh janah tek nandangi kekelengen Dibata man banta. Dibata kekelengen kap.” (1 Johanes 4:16) Janji Jahwe lalap nge terjadi. Lanai ndekah, doni jadi pardis si mejile. Kerina kalak ngusih Jahwe ras sikeleng-kelengen. Emaka kerina umat Dibata subuk i surga bage pe i doni pasti ngataken, ”Pujin ras kemulian, kepentaren ras pengataken bujur, kehamaten, gegeh, ras kuasa man Dibatanta seh rasa lalap. Amin!”—Ketangkasen 7:12.