1, 2. (a) Engkai maka ngukuri kerna Nuah, Daniel, ras Jop banci mpegegehi kita? (b) Uga situasina sanga itulis Esekiel kata-kata i bas Esekiel 14:14?

PERNAH nge latih kapndu rukur perban sakit, la lit senndu, ntah pe ianiaya? Pernah nge la meriah ukurndu ngelayani Jahwe? Adi bage pengakapndu, ukuri kerna Nuah, Daniel, ras Jop, si banci mpegegehi kam. Kalak e la sempurna janah tentangenna pe seri ras tentangenta gundari. Mon-mon kegeluhenna pe terancam. Tapi tetap kalak e setia man Jahwe, janah jadi contoh kerna kalak si tek janah patuh man Jahwe.​—Baca Esekiel 14:12-14.

² Itulis Esekiel ayat tema pembahasenta enda sanga ia i Babilon kira-kira tahun 612. * (Nen keterangen tambahen.) (Esekiel 1:1; 8:1) La ndekah kenca Jerusalem ibinasaken tahun 607. Arah kalak si nggeluh denga i Jerusalem,  sitik ngenca si setia ras patuh si bali bagi Nuah, Daniel, ras Jop, janah iselamatken. (Esekiel 9:1-5) Piga-piga arah kalak e eme Baruh, Ebedmelek, ras kalak Rehab.

3. Kai si man bahasenta bas artikel enda?

³ Bage ka pe, kalak si selamat pagi bas kedungen doni enda eme kalak si benar i lebe-lebe Jahwe ngenca, si bagi Nuah, Daniel, ras Jop. (Ketangkasen 7:9, 14) Emaka mari sibahas ngkai maka ipake Jahwe telu dilaki enda jadi contoh uga carana ngelakoken si benar i lebe-lebe Jahwe. Sibahas kari (1) kai saja si iadapi kalak e ras (2) uga carata ngusih kalak e, si tek janah patuh man Jahwe.

4, 5. Kai piga-piga tentangen si iadapi Nuah? Amin gia bage kai si luar biasa arah Nuah nari?

⁴ Kai piga-piga tentangen si iadapi Nuah? I bas jaman Enoh, nini bulang Nuah, jahat kel kerina kalak sanga si e. “Kerina cakap si ibelaskenna nimbak Dibata.” (Judas 14, 15) Reh dekahna kerina kalak reh jahatna. I bas jaman Nuah, “i japa pe terjadi kejahaten.” Nusur malekat-malekat jahat ku doni, iubahna dirina jadi manusia, kenca e iempoina diberu-diberu. Anak-anakna kejam ras jahat. (Kejadin 6:2-4, 11, 12) Tapi banci iidah kerina kalak maka Nuah beda kel. Ikataken Pustaka maka “Nuah ngena ate [Jahwe].” La bagi kalak si lit isekelilingna, ilakoken Nuah kai si benar. “Ia erdalan i bas dalan Dibata.”​—Kejadin 6:8, 9.

⁵ Kai kesimpulenta kerna Nuah? Si pemena, cuba ukuri uga dekahna Nuah setia man Jahwe bas doni si jahat sope Banjir si Mbelin. Labo 70 ntah pe 80 tahun ngenca tapi hampir 600 tahun! (Kejadin 7:11) Si peduaken, labo lit mbarenda runggun bage pe turang senina si banci mpegegehi ras ndukung ia bagi kita gundari. *—Nen keterangen tambahen.

6. Kai buktina maka pang kel Nuah?

⁶ Labo bias iakap Nuah jadi kalak si mehuli saja. Pang ia ngataken man kalak si deban maka tek ia man Jahwe. Ikataken Pustaka maka ia kalak si ‘pembarken berita si ngena ate Dibata.’ (2 Petrus 2:5) Nina rasul Paulus kerna Nuah, “Erkiteken si e doni isalahken, janah Nuah ikataken Dibata benar erkiteken kinitekenna.” (Heber 11:7) Emaka itokoh-tokohi kalak ia janah ipengadi kalak e atena ia. Banci jadi iancam kalak ia, tapi la ia mbiar. (Kuan-kuanen 29:25) Perban tek ia, ibere Jahwe man bana sipat si pang. Janah ibereNa ka sipat si seri man kerina umatNa si setia gundari.

7. Kai tentangen si iadapi Nuah sanga erban bahtra e?

⁷ Enggo lebih 500 tahun Nuah setia man Jahwe, kenca e isuruh Jahwe gelah ibanna sada bahtra si galang. Tujunna gelah piga-piga manusia ras binatang-binatang selamat arah Banjir si Mbelin. (Kejadin 5:32; 6:14) Pasti mesera kel akap Nuah erban bahtra si galang e. Terlebih ka, pasti ietehna  maka itokoh-tokohi kalak nge kari ia. Tapi tek ia janah patuh man Jahwe. Emaka “ilakoken Nuah kerina.”​—Kejadin 6:22.

8. Kai buktina tek Nuah maka icukupi Jahwe nge keperlun keluargana?

⁸ Lit tentangen si deban si iadapi Nuah. Arus icukupina keperlun diberuna bage pe anak-anakna. Sope Banjir si Mbelin, erjuang kel kalak gelah banci man. Nuah pe bage kang. (Kejadin 5:28, 29) Tapi, labo e si utamana kel iukurina. Ngelayani Jahwe ibanna jadi si pentingna i bas geluhna. Amin gia sibuk ia erban bahtra, banci jadi 40 ntah 50 tahun, tapi tetap iutamakenna ngelayani Jahwe. Janah 350 tahun kenca Banjir si Mbelin pe tetap iutamakenna. (Kejadin 9:28) Mehuli kel adi siusih Nuah e, si tek janah patuh man Jahwe!

9, 10. (a) Kai buktina kita tek ras patuh bagi Nuah? (b) Kai asilna adi tetap kam patuh man Dibata?

⁹ Kai buktina kita tek ras patuh bagi Nuah? Silakoken kai si benar menurut Jahwe, la kita nggit jadi bagin doni Setan janah siutamaken Jahwe. (Matius 6:33; Johanes 15:19) Emaka segat ate doni enda kita. Contohna, perban terus kita patuh man hukum Dibata kerna seks ras perjabun, banci jadi itokoh-tokohi kalak kita bas media ntah pe berita. (Baca Maleaki 3:17, 18, Terjemahan Dunia Baru * Nen keterangen tambahen.) Bagi Nuah, ula kita mbiar. Man Jahwe sajalah kita mbiar, maksudna siergai kel Ia janah la ateta erban Ia kecewa. Siteh maka Jahwe ngenca si banci mereken kegeluhen rasa lalap man banta.​—Lukas 12:4, 5.

¹⁰ Cuba sungkuni bandu, ‘Terus nge kulakoken kai si benar iakap Dibata amin gia itokoh-tokohi ntah ipandangi kalak aku? Tek nge aku maka icukupi Jahwe nge keperlun keluargaku, amin gia mesera kuakap cari makan?’ Adi tek kam man Jahwe janah patuh kam man baNa bagi Nuah, pasti kam iperdiateken Jahwe.​—Pilipi 4:6, 7.

11. Kai saja tentangen si iadapi Daniel ras telu temanna i Babilon? (Nen gambar pemena artikel.)

¹¹ Kai piga-piga tentangen si iadapi Daniel? Daniel ipaksa tading i Babilon, kota si melala i je dibata-dibata palsu ras kalak si nembah roh-roh jahat. Kalak si i je segat atena kalak Jahudi janah itokoh-tokohina kalak e bage pe Dibatana, Jahwe. (Masmur 137:1, 3) Pasti kitik kel ukur Daniel ras kalak Jahudi si deban si ngkelengi Jahwe! Janah, nterem kalak mperdiateken Daniel ras telu temanna Hananya, Misael, ras Asaria perban kalak e ilatih guna jadi si erdahin raja Babilon. Isuruh me kalak e gelah ipanna pangan raja, termasuk pangan si ilarang Jahwe. Tapi “la ia nggit ngelanggar aturen agamana aminna pe man bana isikapken pangan ras inemen lau anggur i bas istana.”​—Daniel 1:5-8, 14-17.

12. (a) Uga nge kalakna Daniel e? (b) Uga perasan Jahwe man Daniel?

 ¹² Lit ka tentangen si iadapi Daniel. Tempa-tempa tentangen enda labo mesera ngadapisa. Seh kel ia pentarna, perban si e ibere raja ia tugas si istimewa. (Daniel 1:19, 20) Tapi, Daniel la meganjang rukur ntah pe iakapna pendapatna lalap si benar. Tetap ia meteruk rukur. Lalap ikatakenna maka Jahwe nge si erban ia sukses. (Daniel 2:30) Cuba ukuri: Ikut ban Jahwe Daniel jadi contoh si man usihen bali bagi Nuah ras Jop. Sanga si e, Nuah ras Jop nggo terbukti setia ngelayani Jahwe segedang geluhna, tapi Daniel nguda denga. Tek kel Jahwe man Daniel! Janah memang ibuktiken Daniel maka ia tuhu-tuhu setia janah patuh man Dibata segedang geluhna. Sanga umur Daniel hampir 100 tahun, ikataken malekat Dibata man bana, “O Daniel, keleng kal ate Dibata man bandu.”​—Daniel 10:11.

13. Banci jadi kai nge alasenna maka iban Jahwe Daniel jadi pejabat si seh kel pentingna?

¹³ Perban idukung Jahwe Daniel, banci ia jadi pejabat si seh kel pentingna, tangtangna i Babilon kenca si e i Medi-Persia. (Daniel 1:21; 6:1, 2) Banci jadi iban Jahwe Daniel dat jabaten si bage gelah banci isampatina umatNa, bagi Jusup i Mesir ras Ester bage pe Mordekai i Persia. * (Nen keterangen tambahen.) (Daniel 2:48) Banci nge ibayangkenndu uga perasan Esekiel ras kalak Jahudi si deban si itaban, sanga idahna Daniel igunaken Jahwe nampati kalak e? Pasti terpegegehi kel kalak e!

14, 15. (a) Uga keadanta seri ras keadan Daniel? (b) Kai si banci ipelajari orang tua arah orang tua Daniel?

¹⁴ Uga carata ngusih Daniel si tek janah patuh man Dibata? Melala kel gundari perbahanen seks si salah bage pe kalak si nembah dibata palsu. Nterem si nggo terpengaruh Babilon si Mbelin, eme kerina agama palsu i sebelang doni, si ikataken Pustaka ingan “setan-setan.” (Ketangkasen 18:2) Tapi kita bali kap bagi kalak asing i doni  enda. Emaka banci iidah kalak maka kita beda, janah itokoh-tokohina kita. (Markus 13:13) Tapi bagi Daniel, ndeherlah kita ras Jahwe, Dibatata. Adi meteruk ukur kita, tek kita man Jahwe, janah patuh kita man baNa, meherga akapNa kita.​—Hagai 2:7.

¹⁵ Orang tua banci dat pelajaren penting arah orang tua Daniel. Sanga Daniel kitik denga i Juda, teremen kalak i je jahat. Tapi banci keleng ate Daniel Jahwe. Kebetulen saja nge e? Lang. Pasti iajari orang tuana ia kerna Jahwe. (Kuan-kuanen 22:6) Erti gelar Daniel eme “Dibata kap Hakimku,” enda bukti maka keleng ate orang tuana Jahwe. Emaka orang tua, sabarlah kam ngajari anakndu kerna Jahwe. Ula kam bosan-bosan ngajarisa. (Epesus 6:4) Ras-raslah kena ertoto. Totoken ia. Usahakenndulah ngajari ia gelah idalankenna perentah Jahwe, alu bage mbelin pasu-pasu Jahwe man bandu.​—Masmur 37:5.

16, 17. Tentangen kai si iadapi Jop?

¹⁶ Kai piga-piga tentangen si iadapi Jop? Rempet berubah kegeluhen Jop. Tangtangna “ia me si bayakna i Timur.” (Jop 1:3) Seh kel ia bayakna, janah melala kalak si nandai ia ras iergai kalak kel ia. (Jop 29:7-16) Amin gia bage, la pernah iakap Jop ulin ia asangken kalak si deban, ntah pe la pernah iakapna la ia perlu Dibata. Enda sieteh perban ilebuh Jahwe ia “suruh-suruhenKu” janah katakenNa kerna ia, “La lit sekalak pe i babo doni si bagi ia patuhna ras ulina. IsembahNa Aku janah la lit si jahat ilakokenna.”​—Jop 1:8.

¹⁷ Tapi rempet kegeluhen Jop berubah. Keri si nasa litna bas ia, dungna tertekan ia janah mate saja atena. Gundari siteh maka Setan nge si erbanca Jop bage. Ikatakenna maka nggit Jop ngelayani Jahwe perban dat keuntungen ia. (Baca Jop 1:9, 10.) Labo ipeturut Jahwe tuduhen jahat arah Setan e. Kai nge si ilakokenNa guna mbuktiken maka Setan e perbual? IbereNa kesempaten man Jop guna mbuktiken maka setia ia man Dibata janah ilayanina Ia perban keleng atena.

18. (a) Kai si menarik akapndu arah Jop? (b) Kai si banci sipelajari kerna Jahwe arah perbahanenNa man Jop?

¹⁸ Ngeri kel serangen-serangen Setan man Jop janah ibanna gelah iakap Jop serangen e rehna bas Dibata nari. (Jop 1:13-21) Kenca si e, lit telu teman palsu Jop si mbelasken kata-kata si erban sedak akap Jop. Ikatakenna maka Jop e jahat emaka iukum Dibata ia. (Jop 2:11; 22:1, 5-10) Aminna pe bage tetap ia setia man Jahwe. (Jop 6:1-3) Memang ibelasken Jop ka nge kata-kata si bodoh. Tapi iangkai Jahwe nge e perban sangana melala masalah Jop. Iidah Jahwe maka labo pernah itadingken Jop Ia amin gia terus ia iserang janah ihina Setan. Kenca dung masalah si iadapina e, ibere Jahwe man bana dua kali lipat asangken si lit bas ia mbarenda. Itambahi Jahwe ka umurna 140 tahun nari. (Jakup 5:11) Kenca si e, terus ilayani Jop Dibata asa ukurna. Ja nari sieteh e? Perban Esekiel 14:14, ayat  tema artikel enda, itulis ratusen tahun kenca Jop mate.

19, 20. (a) Uga caranta ngusih Jop si tek janah patuh man Jahwe? (b) Uga caranta mbuktiken maka mekuah ateta turang seninanta bali bagi Jahwe?

¹⁹ Uga carata ngusih Jop si tek janah patuh man Jahwe? La soal uga pe keadanta, terus ateta siutamaken Jahwe bas kegeluhenta. Tuhu-tuhu tek kel ateta man baNa janah patuh ateta bas pusuhta nari. Situhuna, buen alasenta guna tek janah patuh asangken Jop. Cuba ukuri kai si nggo siteh gundari. Melala siteh kerna cara-cara Setan nerang kita. (2 Korinti 2:11) Sebap bas Pustaka, khususna bas buku Jop, siteh ngkai maka ipeturut Jahwe kita menderita. Arah nubuat Daniel, sieteh maka Kerajan Dibata e tuhu-tuhu sada pemerentahen si iperentah Jesus Kristus. (Daniel 7:13, 14) Janah sieteh maka lanai ndekah merentah me Kerajan e ku doni enda janah idungina kerina masalahta.

²⁰ Pengalamen Jop e ngajari kita ka gelah mekuah ateta turang seninata si sangana lit masalahna. Bagi Jop, banci jadi ibelaskenna kata-kata si bodoh. (Ulangen 28:34) Tapi ula min minter salah perukurenta kerna ia ntah pe situduh ia ngelakoken kai si salah. Tapi, nggit min kita ngangkai ia. Adi bage silakoken, siusih me Bapakta, Jahwe, si perkeleng ras perkuah ate.​—Masmur 103:8.

21. Uga 1 Petrus 5:10 ngingetken kita ku pengalamen Nuah, Daniel, ras Jop?

²¹ Nuah, Daniel, ras Jop nggeluh bas jaman ras keadan si berbeda. Tapi tetap ia setia bas ngadapi tentangenna. Pengalamen kalak e ngingetken kita ku kata-kata rasul Petrus enda, “Kenca kam ngenanami kiniseran kentisik, serta me kam ibahan Dibata, si dem lias ate . . . ipetetapNa dingen ipegegehiNa kam janah iberekenNa man bandu palas si nteguh.”​—1 Petrus 5:10.

22. Kai si man bahasenta bas artikel seterusna?

²² Kata-kata si lit bas 1 Petrus 5: 10 e pe erguna ka man umat Dibata si gundari. Ibereken Jahwe jaminen maka pasti ipepaguhNa ras ipegegehiNa umatNa. Ateta ipegegehi Jahwe min kita, janah tetap paguh ras setia man baNa. Enda me alasenna siusih ateta Nuah, Daniel, ras Jop si tek ras patuh man Jahwe. Bas artikel seterusna, sipelajari kari maka kalak e banci tetap setia man Jahwe perban tuhu-tuhu itandai kalak e Ia. Janah, banci ‘iangka kalak e kerina’ si ngena ate Jahwe si arus ilakokenna. (Kuan-kuanen 28:5) Kita pe banci bage.